གླིང་སྒྲུང་ལས་བུད་མེད་ཀྱི་ཞིབ་འབྲི།
2019.03.20 ཁུངས། ཀློག་གྲངས། 115

འཛམ་གླིང་བུ་མོའི་རྣ་རྒྱན་དུ་གྱུར་པའི་གླིང་གེ་སར་རྒྱལ་པོའི་སྒྲུང་ནི་རང་རེའི་ཁ་བའི་ལྗོངས་དང་། ལྷག་པར་དུ་ཀྲུང་ཧྭ་མི་རིགས་རིག་གནས་བང་མཛོད་ནང་གི་ཏོག་ལྟ་བུར་གྱུར་འདུག་པ་ཀུན་གྱིས་ཤེས་གསལ་ལྟར། རིན་ཐང་གཞལ་དུ་མེད་པའི་ཡིག་ཚང་ཆེན་མོ་འདི་ནི་གནའ་རབས་བོད་ཀྱི་རིག་གནས་དང་སྒྱུ་རྩལ། ཆབ་སྲིད་དང་དཔལ་འབྱོར། དམག་དོན་དང་ལོ་རྒྱུས། དམངས་སྲོལ་དང་ཆོས་ལུགས་བཅས་ཀྱི་བཙལ་ན་རྙེད་པར་དཀའ་བའི་གླེགས་བམ་གལ་ཆེན་ཞིག་ཡིན། གཤམ་དུ་གླིང་སྒྲུང་ལས་བུད་མེད་ཀྱི་སྣང་བརྙན་དང་ཐོབ་ཐང་རྒྱན་གོས་སྐོར་རགས་ཙམ་གླེང་བར་བྱའོ།།

སྣང་བརྙན།

སྤྱིར་གཏམ་རྒྱུད་གང་ཡིན་རུང་གཙོ་བོ་མི་སྣའི་སྣང་བརྙན་གསར་བཞེངས་བྱེད་པ་ནི་རྩོམ་རིག་སྒྱུ་རྩལ་གྱི་རྡོག་རྩ་ལྟ་བུ་ཡིན། གླིང་སྒྲུང་ནང་དུ་དེ་འདྲའི་མི་སྣ་མང་པོ་ཞིག་ཞིབ་འབྲི་བགྱིས་པ་གསོན་ཉམས་ལྡན་པས་རྩོམ་རིག་སྒྱུ་རྩལ་གྱི་རིན་ཐང་ཡང་དེ་བས་གཞལ་དུ་མེད། དེའི་ནང་ནས་ཀྱང་སྣང་བརྙན་ཞིབ་འབྲི་རྩེར་སོན་འདུག་པ་ནི་བུད་མེད་ཀྱི་སྣང་བརྙན་སྐོར་ཡིན། བུད་མེད་དེ་ཚོའི་ནང་ནས་ཀྱང་སྣང་བརྙན་ཞིབ་འབྲི་རྩེར་སོན་འདུག་པ་ནི། གླིང་གེ་སར་རྒྱལ་པོའི་ཇ་མ་རྣམས་ལས་ཆེས་མཛེས་པའི་སྒ་སྐྱ་ལོའི་སེང་ལྕམ་འབྲུག་མོ་ལགས་ཡིན། དཔེར་ན། 《ཧོར་གླིང་གཡུལ་འགྱེད》དུ། དར་དཀར་འདྲ་བའི་ཤ་ལོ་གདའ། དར་དམར་འདྲ་བའི་ཤ་བཀྲག་གདའ། ཧོར་བ་ཁྲ་ཡི་སྤྱན་མིག་གདའ། སྨུག་ཆུང་འཛིན་མའི་གཟི་མདངས་གདའ།  ཞེ་སྡང་སྦྲུལ་གྱི་ཨ་འབྲས་གདའ། ཕར་འགྲོས་གོམ་པ་རྟ་བརྒྱ་རི།། དེ་མིན་རྟ་བརྒྱ་མི་རི་སྟེ། མཁའ་འགྲོའི་གར་སྟབས་ཤིག་གེར་གདའ། ཚུར་ཡོང་གོམ་པ་དྲེལ་བརྒྱ་རི། དེ་མིན་དྲེལ་བརྒྱ་མི་རི་སྟེ། རིག་འཛིན་རྩེ་འབྲོ་ཤིགས་སེ་གདའ། སྐྲ་ལོ་སྨུག་པོ་མཛོ་བརྒྱ་རི། དེ་མིན་མཛོ་བརྒྱ་མི་རི་སྟེ། དབུ་སྐྲ་ཉག་མ་རེ་རེ་ན། ཤེལ་མུ་ཏིག་ཚོམ་བུ་ཤ་ལེར་གདའ། མཆིལ་མ་གཡང་དཀར་ལུག་བརྒྱ་རི། དེ་མིན་ལུག་བརྒྱ་མི་རི་སྟེ། ལྗགས་ལ་ཨ་ཡིག་རང་བྱོན་གདའ། ཞེས་པ་ལྟ་བུ་དང་། ཡང་། ཁྱོད་འདྲའི་ན་ཆུང་མཚར་མོ་ཞིག ། བོད་མ་བརྒྱའི་རུམ་ནས་སྐྱེ་ཚུལ་མེད། དེ་སྐྱེས་ཀྱང་ཁྱོད་འདྲ་འོང་ལུགས་མེད། ཁྱོད་སྒྲོལ་མ་དཀར་མོའི་སྐྱེ་མཐའ་ཡིན། ཁ་ཕར་འཁོར་སྐྲ་མཛེས་རྒྱན་ཡག་མ། ཁ་ཚུར་འཁོར་འཇའ་རིས་མདངས་ལྡན་མ། སྐྲ་གཡས་པ་གཡས་སུ་འཕངས་པ་ན། རྒོད་ཐང་དཀར་གཤོག་པ་བརྐྱངས་པ་འདྲ། སྐྲ་གཡོན་པ་གཡོན་དུ་འཕངས་པ་ན། རྒོད་ཐང་སྨུག་གནམ་འཕང་གཅོད་པ་འདྲ།  རྒྱབ་སྐྲ་རྒྱན་གཡུ་བྱུར་ཕྲེང་བསྒྲིགས་པ། ལྷའི་བུ་མོ་ཡུལ་འོངས་པ་འདྲ། མདུན་ཁ་དོག་སྣ་ལྔའི་རྒྱན་ཆ་དེ། བྱ་རྨ་བྱས་སྒྲོ་གུར་ཕུབ་པ་འདྲ། ཡར་ལངས་ན་རྒྱ་དར་འཕྱར་བ་འདྲ། མར་བསྡད་ན་གུར་ཁང་ཕུབ་པ་འདྲ། མདའ་ཉག་ཕྲན་ཞིག་ལ་ཅི་ཚང་བ། ཁྱོད་སེང་ལྕམ་འབྲུག་མོར་ཚང་ནས་ཡོད། བློ་རྣོ་བ་མདེའུ་ངར་མ་འདྲ། ཁོག་ཡིད་སེམས་དྲང་བ་མདའ་མོ་འདྲ། ཡིད་དྭངས་པ་མེ་ལོང་གཟུགས་བརྙན་འདྲ། ཞེས་པ་སོགས་ཧ་ཅང་ཞིབ་ཚགས་ཀྱི་སྒོ་ནས་བོད་རིགས་བུད་མེད་ཞིག་གི་སྣང་བརྙན་རྩོམ་རིག་སྒྱུ་རྩམ་གྱི་ལམ་ནས་བརྗོད་དེ། ཕར་འགྲོས་གོམ་པ་རྟ་བརྒྱ། ཚུར་ཡོང་གོམ་པ་དྲེལ་བརྒྱ། སྐྲ་ལོ་སྨུག་པོ་མཛོ་བརྒྱ། མཆིལ་མ་གཡང་དཀར་ལུག་བརྒྱ། བློ་རྣོ་བ་མདེའུ་ངར་མ། ཁོག་ཡིད་སེམས་དྲང་བ་མདའ་མོ། ཡིད་དྭངས་པ་མེ་ལོང་གཟུགས་བརྙན་ལ་སོགས་པ་སྟེ། ཕྱིའི་རྣམ་པ་དང་ནང་ཀུན་སྤྱོད་ཞིབ་འབྲི་བགྱིས་ཡོད་པ་དེ་བོད་རིགས་རང་གི་བརྩམས་ཆོས་མ་གཏོགས་གཞན་ལས་འདི་འདྲའི་སྣང་བརྙན་ཉིན་མའི་སྐར་མ་བཞིན་དུ་ཧ་ཅང་དཀོན་པོ་འདུག་པས་གླིང་སྒྲུང་གི་མི་སྣ་གསར་བཞེངས་ཀུན་ལས་ཏོག་ལྟ་བུའི་གོ་གནས་ངེས་ཅན་ཞིག་ཟིན་ཡོད་དོ།།

གླིང་གེ་སར་མཆོག་གི་ཇ་མ་བྱང་ཨ་སྟག་འཁྱིང་བའི་ཀླུ་མོའམ་ལྷ་མོ་ནི། ཇ་མ་མིང་ཆེན་བཅུ་གསུམ་ལས་བྱས་རྗེས་ཆེས་ཆེ་བའི་བུད་མེད་ཅིག་ཡིན་ཞིང་། ཁོ་མོའི་མི་ཚེ་གང་བོར་མཐའ་གཅིག་ཏུ་གེ་སར་རྒྱལ་པོར་ཞབས་ཏོག་ལེགས་པར་བསྒྲུབས་ཏེ། རང་ནུས་ལྷ་མོ་ནི་བོད་རིགས་དཔའ་མོའི་ཚབ་བྱེད་གཞན་ཕན་གྱི་ཆེད་དུ་ཕུལ་བས། ཨ་སྟག་ལྷ་མོ་ནི་བོད་རིགས་དཔའ་མོའི་ཚབ་བྱེད་གཅིག་པུར་གྱུར་པ་དང་། གཡུལ་འགྱེད་དེ་འདྲ་མང་པོ་ཞིག་གི་ཁྲོད་དུ། མོ་རང་གི་ལོ་རྒྱུས་ཀྱི་སྣང་བརྙན་ནི་རྡོ་རིང་ཞིག་དང་མཚུངས་པར་ཀུན་གྱི་མིག་ལམ་དུ་ལྷང་ངེར་གནས་ལ། བསྐལ་བརྒྱ་མ་སྟོང་བར་དུ་བག་ཆགས་ཟབ་མོ་བཞག་ཡོད་པ་ཡིན་ནོ།། དཔེར་ན། 《ཧོར་གླིང་གཡུལ་འགྱེད》དུ། གུར་ནག་པོ་མུན་པ་འཁྲིགས་འདྲ་ཞིག་གི་ནང་ནས། དཔའ་ཨ་སྟག་ལྷ་མོ་དེ། དཔའ་དྲུག་ཡིད་དུ་འོང་ཞིང་། ཆས་དྲུག་མིག་ལ་མཛེས་པ། མགོ་དར་འཕྲུ་གར་སྟབས་ལིང་ལིང་། ཁྲབ་དཀར་མོ་བྱང་ཕུད་ཉུལ་ཉུལ། སྐེད་འཁོར་གསུམ་འཁྲོལ་སྒྲ་སིལ་སིལ། རྟ་རག་པ་སྟག་ལག་གི་གོང་དུ་ཞོན་ཞིང་། ཟངས་གཞུ་དམར་པོ་འགུག་རིང་དེའི་ནང་དུ། ཟངས་མདའ་དམར་པོ་དུག་ལྕེ་དེ་བཞག་ནས། ཞེས་པ་དང་། 《དམྱལ་གླིང་མུན་པ་རང་གསལ》དུ། ནངས་སྔ་དྲོ་ཁྲ་ཡག་རྫ་ལ་སོང་། འདིས་ལྕགས་གཞུ་བཀུག་ནས་ལྕགས་མདའ་འཕངས། འབྲོང་བྲེ་སེར་མ་བུ་དགུ་བརྒྱ་བསད། མགོ་རུ་ཐུར་ཤ་ལེ་ཐང་ལ་འཕངས། དགོང་ཕྱི་དྲོ་འབྲོང་མོ་བསད་བསད་ནས། རི་ཆེན་པོ་ཁྲག་གིས་དམར་པོ་བྱས། མ་ཨ་སྟག་ལྷ་མོ་གར་སོང་ན། བྱ་རྒོད་པོའི་གཤོག་རྩ་ཉིལ་ལི་ལི། སྤྱང་དར་མ་གཟན་རྒྱུག་ཐ་ར་ར། ཉིན་གུང་ན་དམར་གཞུང་ལ་སོང་། རྐྱང་ཁ་དཀར་མ་བུ་དགུ་བརྒྱ་བསད། ན་ཆེན་པོའི་ཁ་དོག་ཁྲག་གིས་བསྒྱུར། ས་བདེ་མོ་ཐམས་ཅད་ཤ་ཡིས་བཀང་། ཁུག་གཤོང་གཤོང་ཐམས་ཅད་ཁྲག་གིས་བཀང་། དགོང་ཕྱི་དྲོ་རྒྱ་མཚོའི་ཁ་ལ་སོང་། ལྕགས་ཀྱུ་སྣ་ཚོགས་སྐེད་ལ་བསྐོར། ཉ་སྲམ་མང་པོའི་སྲོག་གཟན་བྱས། ཆུ་རྒྱ་མཚོའི་ཁ་དོག་ཁྲག་གིས་བསྒྱུར། རྒྱབ་འཁོར་གསུམ་ཁྲབ་རྨོག་མནབས་པའི་ཚེ། གཟའ་ཁྱབ་འཇུག་ནག་པོ་ཁྲོས་པ་འདྲ། སྡང་དགྲ་བོས་རིག་ན་གློ་སྙིང་འདར། ཞེས་པ་སོགས་ལས་བུད་མེད་ཞིག་གི་སྙིང་སྟོབས་དང་གཟི་བརྗིད། བློ་སྤོབས། དྲང་བདེན་བཅས་རྟོགས་ནུས་ཏེ། སྐྱེས་ཕོ་རབ་ཀྱིས་བསྒྲུབ་མི་ནུས་པའི་དོན་མཐའ་དག་སྒྲུབ་ནུས་པས། བོད་རིགས་བརྩམས་ཆོས《གླིང་སྒྲུང》ལས་མཐོང་བའི་བུད་མེད་དཔའ་མོའི་རང་གཤིས་འདི་ལྟ་བུ་བརྩམས་ཆོས་གཞན་ལས་ཉིན་མོའི་སྐར་མ་བཞིན་དུ་ཧ་ཅང་མཐོང་དཀོན་པོ་འདུག་ལ། འཇིག་རྟེན་གྲགས་པ་ལས་རིང་དུ་བརྒལ་དོན་ཡང་གཙོ་བོ་འདི་ལྟ་བུའི་གསོན་ཉམས་ལྡན་པའི་སྣང་བརྙན་ཞིབ་འབྲི་མང་བའི་རྐྱེན་གྱིས་ཡིན་པར་སྙམ་མོ།།

གླིང་གེ་སར་མཆོག་གི་ཇ་མ་ཧོར་དམར་ནག་བཅུ་གཉིས་ཀྱི་བདག་མོ་སྟེ་སྟོང་ཉིད་མགར་བཟའ་ཆོས་སྒྲོན་ནི་སྐྱེས་ས་ཧོར་ཡུལ་ཡིན་ཡང་བློ་སེམས་གླིང་དཀར་སྟོད་ལ་དཀར་ཞིང་སེང་ཆེན་རིན་པོ་ཆེ་ཡི་ཇ་མ་མིང་ཆེན་རྣམས་ཀྱི་ཡ་གྱལ་དུ་གྱུར་པ། གཤིས་རྒྱུད་འཇམ་ཞིང་ངང་རྒྱུད་བཟང་བ། ཕྲག་དོག་དང་འགྲན་སེམས་མེད་པ། སྤྱི་སེམས་ཆེ་ཞིང་སྒེར་སེམས་མེད་པ། ཧོར་དམར་ནག་བཅུ་གཉིས་ཀྱི་མཛེས་མ་རྣམས་ཀྱི་གྲས་ནས་གཙུག་རྒྱན་གྱི་ཅོད་པན་ལྟ་བུར་སྣང་བ་དེར་ཡང་། དཔེར་ན།

《ཧོར་གླིང་གཡུལ་འགྱེད》དུ། མགར་ཆོས་དར་རྒྱལ་པོའི་སྲས་མོ་སྟོང་ཉིད་མགར་བཟའ་ཆོས་སྒྲོན། ལྷ་མོ་སྟོང་གི་སྤྲུལ་པ། མ་མཚོ་རྒྱལ་དཀར་མོའི་སྐྱེ་བ། མི་དགེ་སྤངས་པའི་དགེ་མ། དགེ་བཅུ་སྤྱོད་པའི་ཆོས་མ། སྤྲང་ཉམ་ཆུང་བརྒྱ་ཡི་ཕ་མ། ཆུ་མོ་ཕག་གི་ལོ་པ། དུང་ཟླ་དཀར་ལུ་འདྲ་བ། སྨིན་དྲུག་ཁྲ་མོའི་སྐྱོ་རོགས། ལུས་ལྡེམ་ལྡེམ་སྦ་དཀར་ཕུང་པོ། སྐྲ་ཤར་ཤར་རྒྱ་ལྕང་ལོ་མ། ཞལ་དཀར་དཀར་བཅོ་ལྔའི་ཟླ་བ། ཚེམས་འགྲིགས་འགྲིགས་དུང་སོ་རང་འགྲིགས། སྤྱན་ཁྲ་ཆུང་ནམ་མཁའི་སྐར་ཆེན། རྒྱན་བཏགས་ན་ནགས་ཀྱི་རྨ་བྱ། གསུང་བསྒྲགས་ན་དབྱར་ཁའི་ཁུ་བྱུག་ལྟ་བུ་ཞེས་དང་སྒོམ་ཆེན་རི་ཁྲོད་པ་རྣམས་ཀྱིས་མཐོང་ན་ཞལ་འཛུམ་འཆོར་ལེ། རྒྱ་ལམ་ནས་མགྲོན་པོ་རྣམས་ཀྱིས་མཐོང་ན་ཕྱི་མིག་བལྟ་ལེ། ཁྲི་ཁའི་བླ་མ་རྣམས་ཀྱིས་མཐོང་ན་སྤྱད་གཟུར་ལེ། གྲྭ་པ་དགེ་སློང་རྣམས་ཀྱིས་མཐོང་ན་ཡིད་སྨོན་འཆོར་ལེ། ཕོ་གསར་མགོ་ཆུང་གིས་མཐོང་ན་ཡིད་འཕྲོག་ལེ། སྟེང་ལྷ་མོ་བུ་མོ་འབུམ་ཕྲག་ཟིལ་གྱིས་གནོན་ལེ། སྐུ་ལུས་མདའ་ཉག་ཕྲན་སྒྲོ་བཞི་དང་འདྲ་བ་འོག་ཀླུ་མོ་འབུམ་ཕྲག་ཟིལ་གྱིས་གནོན་ལེ། གསུང་སྙན་གྱི་གླུ་བླངས་ན། སྒྲ་སྙན་པའི་པི་ཝང་དང་ནོར་ལེ། བར་དྲི་ཟའི་བུ་མོ་འབུམ་ཕྲག་ཟིལ་གྱིས་གནོན་པ་ཞིག་བྱས་ཤིང་། རྒྱབ་གོས་དམར་ནག་གསར་འབྲུག་ཅན་གྱི་ན་བཟའ་ལ་ཝ་དམར་བྱུ་རུའི་གོང་བ་བསྐོར། གཡི་དཀར་དུང་གི་མདོག་ཅན་གྱིས་མཐའ་ཤན་བྱས། སྲམ་ནག་མཐིང་མདོག་ཅན་གྱིས་ཁ་ཆོན་བརྒྱབ། མུ་ཏིག་འཇའ་ཚོན་སྣ་ལྔའི་གློ་ཆ་བཏགས། གཡུ་བྱུ་རུ་མུ་མེན་ལ་སོགས་པས་སྐེ་རྒྱན་བྱས། དར་ལིང་ཁ་དོག་སྣ་ལྔའི་སྐ་རགས་བཅིངས། གསེར་ནག་གའུ་སུམ་སྒྲིག་སྐེ་ལ་བཏགས་པའི་ན་ཆུང་ཤིན་ཏུ་མཛེས་མ་དེས་བཟའ་བཏུང་རྣམས་ཁྱེར་ནས་ཡོང་བ་ན་ཞེས་བརྗོད་པ་སོགས་ལས་མི་སྣ་སྒྲུབ་བཞེངས་ཀྱི་ཐད་དུ་སྣང་བརྙན་ཟབ་མོ་ཞིག་བཞག་ཡོད་ཅིང་། བོད་རིགས་བརྩམས་ཆོས་ལས་བུད་མེད་ཀྱི་སྣང་བརྙན་རྩེར་སོན་འདུག་པ་མཚོན་ལ། དེ་ལྟ་བུ་ཡང་དཔེར་ན་ཞང་ཞུང་ཆོས་དབང་གྲགས་པའི་རཱ་མ་ཎའི་རྟོགས་བརྗོད་ལས། སྐྱེ་རྒུའི་རིག་སྔགས་མཁན་དེ་རྣམས།། སི་ཏཱའི་མིང་གི་བཟློས་བརྗོད་ཀྱིས། འགྲམ་པ་རུས་པའི་འཕྲུལ་འཁོར་ནི། དྲལ་བ་ནུ་མའི་ངོགས་སུ་འཕྱང་། ཞེས་པ་སོགས་བོད་རིགས་རང་གིས་བསྐྲུན་པའི་མཛེས་མའི་སྣང་བརྙན་དུ་མའང་ཡོད་དོ།།

གླིང་གེ་སར་རྒྱལ་པོའི་སྒྲུང་ཕལ་ཆེར་གྱི་ནང་དུ་རྫོང་རེ་ཕབ་ན་ཁོང་ལ་ཇ་མ་རེ་ཐོབ་པ་ནི་ཧ་ཅང་རྒྱུན་འབྱམས་སུ་གྱུར་འདུག་ལ། སྐབས་དེར་ཐོབ་པའི་བུད་མེད་རྣམས་ཇ་མ་ཁོ་ན་ཞིག་གི་ཆེད་དུ་མིན་ལ་མི་རིགས་ཤིག་གམ་རྒྱལ་ཁབ་ཅིག་གི་ཆབ་སྲིད་ལ་རག་ལས་འདུག་པ་ཞིག་གོ། གནའ་བོའི་དུས་སུ་མཛའ་མཐུན་གྱི་ཆེད་དུ་བུ་མོ་སྟེར་བའི་ལུགས་སྲོལ་གང་མང་ཞིག་ཡོད་པ་དཔེར་ན། བོད་ཀྱི་རྒྱལ་པོ་སྲོང་བཙན་སྒམ་པོས་རྒྱའི་སྲས་མོ་ལྷ་གཅིག་ཀོང་ཇོ་ཁབ་ཏུ་བཞེས་པ། ཆོས་རྒྱལ་མེས་ཨོག་ཚོམ་གྱིས་གྱིམ་ཤིང་ཀོང་ཇོ་ཁབ་ཏུ་བཞེས་པ་ལ་སོགས་པའི་དཔེ་མཚོན་མང་པོ་ཞིག་ཡོད་ཀྱང་ཡིག་ཚོགས་མང་བར་དོགས་ནས་མ་བྲིས། འདིའི་སྐོར་ལ་སློབ་དཔོན་མར་ཁེ་སིས། དབང་སྒྱུར་གྲལ་རིམ་བར་གྱི་གཉེན་འབྲེལ་ནི་ཆབ་སྲིད་ཀྱི་དགོས་པ་ཁོ་ན་ཡིན་ཞེས་གསུངས་པ་ལྟར་གླིང་གེ་སར་རྒྱལ་པོ་རྟ་རྒྱུག་ལས་རྣམ་པར་རྒྱལ་ཏེ་མི་འཇིག་གསེར་ཁྲིར་མངའ་གསོལ་རྗེས། གླིང་དཀར་སྟོད་ནས་སེང་ལྕམ་འབྲུག་མོ་དང་མེ་བཟའ་འབུམ་སྐྱིད་གཉིས་ཁབ་ཏུ་བཞེས་ཤིང་། རིམ་བཞིན་ཕྱོགས་བཞི་དང་རྫོང་ཆེན་བཅོ་བརྒྱད་ཕབ་པའི་འཕྲིན་ལས་རྒྱ་ཆེར་སྤེལ་ཏེ། ནག་པོ་བདུད་ནས་ཨ་སྟག་ལྷ་མོ། སེར་པོ་ཧོར་ནས་མགར་བཟའ་ཆོས་སྒྲོན། སྨུག་པོ་འཇའ་ནས་ཤེལ་དཀར་རྒྱང་མཛེས། ཁ་ཤ་མོན་ནས་མེ་ཏོག་ལྷ་མཛེས་སོགས་མིང་དུ་གྲགས་པའི་ཇ་མ་མིང་ཆེན་བཅོ་བརྒྱད་བླངས་པར་གྲགས་སྐད། བུ་མོ་དེ་དག་ལས་ཀྱང་རེ་འགའ་དགྲ་བོ་འདུལ་བྱེད་ཀྱི་སྐུད་སྣེ་ལྟ་བུར་གྱུར་ཏེ། གེ་སར་གྱི་གཡུལ་འཐབ་གང་མང་ཞིག་གི་ཁྲོད་དུ་སུབ་ཐབས་དབེན་པའི་ལོ་རྒྱུས་ཀྱི་ཞབས་བརྟན་བཀོད་ཡོད། དཔེར་ན། མེ་བཟའ་བདུད་ཀྱིས་ཁྱེར་བ་ན་ཁོང་ཡར་ཁམས་བྱང་ལ་བྱོན་ནས་བདུད་ཀླུ་བཙན་རྒྱལ་པོར་ཐོད་མདའ་སྤྲད་པ་དང་ཨ་སྟག་ལྷ་མོ་གྲོགས་སུ་བཀུག་པ་སོགས་བུད་མེད་ཀྱི་སྣང་བརྙན་དང་བུད་མེད་ཀྱི་བྱས་རྗེས་གྲངས་ལས་འདས་པ་ཞིག་གླིང་སྒྲུང་གི་ནང་དུ་བཀོད་ཡོད་པ་ཀུན་གྱིས་ཤེས་གསལ་ལྟར་རོ།།

ཐོབ་ཐང་།

སྤྱིར་མི་རིགས་གང་ཡིན་རུང་སྔོན་ཆད་བུད་མེད་ཀྱི་གོ་སའི་ཐོབ་ཐང་ཧ་ཅང་དམའ་བ་གནའ་བོའི་ལོ་རྒྱུས་དང་ཡིག་ཚང་ལས་ཀུན་གྱིས་ཤེས་གསལ་ལྟར། ལྷག་པར་དུ་ཁ་བ་རི་བོའི་ཁྲོད་ཀྱི་བོད་མི་རིགས་རང་ལ་མཚོན་ནའང་བུད་མེད་ཀྱི་ཐོབ་ཐང་དང་དབང་ཆ་མི་རིགས་གཞན་ལས་དེ་བས་དམའ་བའི་སྣང་བ་ཞིག་སྟེར་བ་སྟེ། བོད་སྲིད་པའི་ཁ་དཔེར་ཡང་བུ་མོ་དང་བོང་བུས་སྐྱིད་མི་ཐེག ཁྱི་བུ་མོ་གཉིས་ལ་བློ་གཏད་མེད། མ་སྐྱིད་ས་ནས་མི་ཆགས། སྐྲ་མདུད་ས་ནས་མི་འདུག   ཟེར་བ་ལྟ་བུ་སོགས་ལས་ཀྱང་སྐབས་དེའི་བུད་མེད་ཀྱི་ཐོབ་ཐང་དང་དབང་ཆ་གསལ་བོར་མཚོན་ཡོད་མོད། འོད་ཀྱང་བོད་ཀྱི་ལོ་རྒྱུས་གར་སྟེགས་ལ་ཕྱི་མིག་ཐེངས་གཅིག་བལྟས་ཚེ། ལོ་རྒྱུས་གར་སྟེགས་སུ་གོ་ས་ངེས་ཅན་བཟུང་མྱོང་བའི་གདགས་ཁྲི་བཙན་པོའི་བཙུན་མོ་མ་མ་གྲོ་ཞ་སྐྱིད་བརླིང་མ་ལྟ་བུར་མཚོན་ན། ཏུན་ཧོང་གཏེར་ཡིག་ལས། དྲི་གུམ་བཙན་པོ་སྐུ་ཆུང་བའི་ཚེ་མཚན་ཇིར་གདགས་ཤེས། མ་མ་གྲོ་ཞ་སྐྱིད་བརླིང་མ་ལ་དྲིས་ན། མ་མའི་མཆིད་ནས། སྐྱི་བྲག་མར་བ་ནི་རྙིལ་ཏམ་མ་རྙིལ། དང་མ་འབྲི་སྤང་ནི་མྱེས་ཚིག་གམ་མ་ཚིག  མཚོ་དམ་བར་དབར་མཚོ་ནི་སྐམས་སམ་མ་སྐམས་ཤེས་མཆི། བྲག་མ་རྙིལ། མཚོ་ཡང་མ་སྐམས། སྤང་ཡང་མྱེས་མ་ཚིག་ཅེས་བགྱི་སྣ། མ་མ་གྲོ་ཞ་མ། རྒས་ནས་རྣ་ལོག་པར་ཐོས་ཏེ། བྲག་ཀྱང་རྙིལ། སྤང་ཡང་མྱེས་ཚིག་མཚོ་ཡང་སྐམས་ཤེས་ཐོས་ནས། འོན་ཏང་ཆུ་དགུམ་སྲི་དགུམ་གྱིས། དྲི་གུམ་བཙན་པོར་མཚན་ཐོགས་ཤིག་ཅེས་འཁོད་པར་གཞིགས་ན། མ་མ་གྲོ་ཞ་སྐྱིད་བརླིང་མ་ནི་བོད་ཀྱི་གདོད་མའི་ཆོས་ལུགས་སུ་མཚན་མཁན་གྱི་མིང་བཟུང་བར་མ་ཟད། བོད་ཀྱི་ལོ་རྒྱུས་སྟེང་དུ་བུད་མེད་ཀྱི་ཐོབ་ཐང་ངེས་ཅན་འཛིན་པའི་བུད་མེད་འཇོན་ཐང་ཅན་ཞིག་གོ ། དེ་བཞིན་དུ་གླུ་སྲིང་མེར་ལྕམ་དང་རྒྱ་བཟའ་ཁྲི་མ་ལོད་སོགས་ལྟ་བུའི་བུད་མེད་སྐོར་ཞིག་གིས་བོད་ཀྱི་རྒྱལ་སྲིད་དར་རྒྱས་ཡོང་བའི་ཆེད་དུ་རང་ནུས་ཡོད་རྒུ་བཏོན་ཏེ། ལོ་རྒྱུས་ཀྱི་གར་སྟེགས་སུ་རྒྱུ་སྐར་ཁྲོད་ཀྱི་ཟླ་བ་བཞིན་བུད་པ་དེས་ཀྱང་བོད་ཀྱི་བུད་མེད་ལ་ཐོབ་ཐང་གི་དབང་ཆ་ཡོད་པ་ར་སྤྲོད་བྱུང་ངོ་།།

དེའི་མཚུངས་སུ་དཔའ་བོའི་བྱུང་རབས་ཆེན་མོ་གླིང་སྒྲུང་ལས་ཀྱང་བུད་མེད་རྣམས་ལ་ཐོབ་ཐང་གི་དབང་ཆ་ཡོད་པ་མངོན་གསལ་གྱིས་མཐོང་ཐུབ་ཅིང་། དྲང་ཕྱོགས་དང་ལྡོག་ཕྱོགས་གཉིས་ཀ་གང་རུང་གི་སྒོ་ནས་བུད་མེད་ཀྱི་ཐོབ་ཐང་གང་མང་ཞིག་མིག་གི་དགའ་སྟོན་དུ་གསལ་བར་བཤམས་འདུག  དཔེར་ན། 《དམྱལ་གླིང་མུན་པ་རང་གསལ》དུ། ནག་པོ་བདུད་ཀྱི་ས་ཆ་ལ། དགྲ་ཡོད་ན་མདུང་མོ་མཉམ་འཛིན་གྱིས། ཕྱི་དགྲ་བོའི་གདོང་ལ་མཉམ་རྒྱུག་བྱོས། ནང་སྡེ་བའི་སྐྱིད་སྡུག་གཅིག་ནི་གྱིས། མཐོ་མི་ཆེན་སྡེ་ལ་བྱམས་སྐྱོང་གྱིས། སྡེ་གཉོམ་ཆུང་སྐྱོང་གི་ཕ་མ་མཛོད། སྡེ་བཙན་པོ་རྣམས་ཀྱི་གཉའ་ནས་ནོན། ནང་སྡེ་བ་ཁ་མགོ་ཡོད་པར་གྱིས། གླིང་གེ་སར་རྒྱལ་པོས་ཅི་གསུང་སྒྲུབས། ཞེས་དང་། བདུད་ནག་པོའི་དཔོན་མོ་བྱེད་དུས་ཀྱི། ཏོག་དང་ཐོབ་དང་ཐམ་ག་དང་། དཔོན་གནས་ཁྲི་འཕང་མཐོན་པོ་དང་། ཡུལ་སྡེ་འབངས་འཁོར་བྲན་དང་བཅས། གོང་དཔོན་མོའི་ཆས་རྣམས་ཁྱེད་ལ་འབུལ། མ་དཔའ་མོའི་རྣམ་ཤེས་ཁྱེད་ཀྱིས་མཁྱེན། །ཞེས་པ་སོགས་ལས་སྐྲ་ལན་བུ་ཅན་གྱི་བུད་མེད་ཞིག་གི་གོ་གནས་དང་ཐོབ་ཐང་གསལ་བོར་བསྟན་ཡོད།

གླིང་རྗེ་གེ་སར་རྒྱལ་པོས་ཨ་སྟག་ལྷ་མོར་དེ་འདྲའི་དབང་དང་ཆ་ཆེས་མཐོན་པོ་བྱིན་ཡོད་པ་དེས་བོད་རིགས་བུད་མེད་རྣམས་ཀྱི་རང་དབང་དང་ཐོབ་ཐང་ཕྱོགས་ལ་མཐུན་རྐྱེན་མི་ཉུང་བ་ཞིག་བསྐྲུན་འདུག་པ་ཡང་གླིང་སྒྲུང་ལས་མངོན་གསལ་དུ་མཐོང་ཐུབ་པ་སྟེ་བུད་མེད་དང་སྐྱེས་པའི་ཆབ་སྲིད་ཀྱི་དབང་ཆ་གཅིག་མཚུངས་ཡིན་པ་ཡང་། དཔེར་ན། གླིང་གི་ལས་དམག་རྣམས་རིམ་བཞིན་སྟག་གདན་གཟིག་གདན་བཅས་ཀྱི་གྲལ་ག་འཁོད་པའི་དུས་ན། སེང་ལྕམ་འབྲུག་མོ་དང་མ་ཡུམ་འགོག་བཟའ། ཨ་སྟག་ལྷ་མོ། རྒྱ་བཟའ་ལྷ་སྐྱིད་སོགས་གླིང་གི་བུད་མེད་གྲགས་ཆེན་དག་ཀྱང་གྲལ་ལ་བཞུགས་ཡོད་པར་མ་ཟད། ད་དུང་གླིང་གི་སྤྱི་དོན་ཐད་ལ་བསམ་འཆར་དང་ལྟ་སྟངས་གསར་བ་འདོན་པའི་དབང་ཆའང་ཡོད་པ་ལྟ་བུའོ། གཞན་ཡང 《ཧོར་གླིང་གཡུལ་འགྱེད》ལས། ས་ཆ་མེད་ཧོར་གྱི་ས་ཆ་ནས། དགྲ་ཐུལ་བའི་བར་དུ་འདུག་རྒྱུ་ཡིན། སེམས་སྐྱིད་རོགས་མགར་བཟའ་ཁྱོད་རང་ཡིན། དགྲ་འདུལ་ཚེ་ཡ་གྲོས་རོགས་དགོས། བཏུལ་ཚར་དུས་ཁྲ་མོ་གླིང་ལ་འགྲོ ། སྨན་འབྲུག་མོ་དེ་དང་ཁྱད་པར་མེད། མཁར་སེང་འབྲུག་སྟག་རྩེ་ནང་རྫོང་གྱིས།  སྡེ་ཧོར་གླིང་གཉིས་ཀྱི་དཔོན་མོ་གྱིས། མཛོད་ཁྲ་མོའི་སྒོ་ཡི་ལྡེ་མིག་ཟུངས། ངས་ཚེ་མཐའ་མགར་བཟའ་མི་སྐྱུར་ངེས། །ཞེས་པ་ལྟ་བུར་བལྟས་ནའང་བུད་མེད་ཀྱི་ཐོབ་ཐང་དང་དབང་ཆར་རྒྱུས་ལོན་རགས་ཙམ་བྱེད་ཐུབ། གླིང་སྒྲུང་ནང་དུ་དབང་ཆ་ཆེས་མཐོ་བ་ནི་གེ་སར་ལས་གཞན། ད་དུང་སྤྱི་དཔོན་དང་མ་བཞི་དཔོན་པོ་ཁྲོ་ཐུང་། སྟག་རོང་ཨ་ནུ་གཟིག་འཕེན། ཡང་རྟུལ་དམ་པའི་མེ་བདུན། ཞེ་རྟུལ་ཁྲ་གླག་སྤྱང་གསུམ་ལྟ་བུའི་བློན་པོ་མིང་ཆེན་དང་གྲགས་ཆེན་མང་ན་ཡང་། དོན་གལ་ཆེན་ལ་ཐུག་དུས་དོ་དམ་ཚང་མ་སེང་ཆེན་དང་གྲགས་ཆེན་མང་ན་ཡང་། དོན་གལ་ཆེན་ལ་ཐུག་དུས་དོ་དམ་ཚང་མ་སེང་ལྕམ་འབྲུག་མོར་བཅོལ་བཞིན་ཡོད་པ་གེ་སར་གྱི་གླུ་ལས་མཚོན་ཐུབ་པ་སྟེ། བདུད་ཡ་མེད་ཀླུ་བཙན་རྒོད་པོ་དེ། ལྷོ་འཛམ་བུ་གླིང་གི་སྤྱི་དགྲ་རེད། དབུས་གླིང་དཀར་སྟོད་ཀྱི་སྒེར་དགྲ་རེད། འཆོར་མི་ཉན་འདུལ་བའི་དུས་བབས་གསུངས།། ང་དེ་ཕྱིར་བདུད་རྒན་འདུལ་དུ་འགྲོ།། བདུད་ནོར་གླིང་ལ་འདྲེན་པར་འགྲོ།། སྨན་མེ་བཟའ་ཨ་འབུམ་ལེན་དུ་འགྲོ།། རྩིས་ལེན་རྩིས་སྤྲོད་དེ་རིང་བྱེད།། ཆུང་མ་འབྲུག་མོས་རྩིས་ལེན་མཛོད།། ཅེས་གླུ་དེ་ལྟར་བླངས་རྗེས་ཕོ་བྲང་ནང་གི་རིན་ཆེན་ཡོད་དོ་ཅོག་རྩིས་སྤྲོད་བརྒྱབ་པ་དང་དུས་མཚུངས་སུ་ཁོང་ཉིད་ཆུང་དུས་ཀྱི་འཁྲབ་རྨོག་འཁོར་གསུམ་ཡང་གནང་སྟེ་བདུད་ནག་པོར་ཐོད་མདའ་སྤྲོད་པར་ཕེབས་སོ།། ཞེས་པ་ལྟར་རོ།།

གེ་སར་བདུད་ལ་ཕེབས་ཤུལ་དུ་ཨ་ཆེན་ཧོར་གྱིས་གླིང་ལ་བཙན་འཛུལ་བྱས་ཏེ་ཇ་མཁར་རྨང་ནས་བཤིག་པ་དང་སེང་ལྕམ་འབྲུག་མོ་ཕྲོགས། ཧོར་གླིང་གཉིས་ཀྱི་བར་ལ་ཡ་ང་བའི་མི་ཤི་རྟ་འགྱེལ་གྱི་གཡུལ་འཁྲུག་ཆེན་པོ་བྱུང་སྐབས། སེང་ལྕམ་འབྲུག་མོས་རང་ཡུལ་བསྐྱར་འཛུགས་དང་ནང་ཕུ་ནུའི་ཤ་འཁོན་གྱི་ཆེད་དུ། གེ་སར་ལ་སྔ་ཕྱིར་ཐེངས་གསུམ་ལ་འཕྲིན་བཏང་བ་དེས་བོད་རིགས་བུད་མེད་ཞིག་གི་འགྱུར་མེད་ཀྱི་སྙིང་སྟོབས་བླ་ན་མེད་པ་མཚོན་འདུག་སྤྱིར་བོད་ཀྱི་འགྲོ་ལུགས་དང་བཤད་རྒྱུན་ལ་ཕ་ཤུལ་བུ་ཡིས་འཛིན་པ་མ་གཏོགས་བུ་མོས་མི་འཛིན་ཟེར་མོད། འོན་ཀྱང་གླིང་སྒྲུང་དུ་ཕའི་རུས་དང་མའི་རུས་འདོགས་པའི་འདྲ་མཉམ་དབང་ཆའང་ཧ་ཅང་རྒྱུན་འབྱམས་སུ་གྱུར་ཡོད། དཔེར་ན། སྐྱ་ལོ་སྟོན་པ་རྒྱལ་མཚན་དང་སྔོ་ལོ་གྲོ་ལོ་སོགས་ཀྱི་རུས་པའི་རུས་ཡིན་ཞིང་། རོང་ཚ་ཁྲ་རྒན་དང་འགོག་བཟའ་ཇོ་རུ་གཉིས་ཀྱི་སྔོན་དུ་ཕའི་རུས་མིན་པར་མ་ཡི་རུས་སྦྱར་ཡོད། ད་དུང་གླིང་སྟོད་སྨད་བར་གསུམ་གྱི་ཚ་ཆེན་གྱི་མིང་དེ་ཡང་གླིང་གི་ལྡོང་ཆོས་འཕན་ནག་པོས་ཇ་མ་གསུམ་བླངས་པ་དེ་ལས། རིམ་བཞིན་སྟོད་གླིང་གསེར་བ་མཆེད་བརྒྱད། བར་གླིང་འོམ་བུ་ཚོ་དྲུག  སྨད་གླིང་རྨུ་སྤྱང་སྡེ་བཞི་ཞེས་ཨ་མ་གསུམ་གྱི་རུས་ལས་མཆེད་པར་གྲགས་སོ།།

སྤྱིར་བཏང་དུ་བོད་རིགས་དམངས་ཁྲོད་དུ་བུད་མེད་རྣམས་སྐྱེས་པའི་གོང་དུ་བསྡད་མི་ཆོག་པ་དང་། ལྷ་ཁང་དང་བཙན་ཁང་སོགས་སུ་རང་གར་རྒྱུ་མི་ཆོག་པ། ལྷ་རྩེད་དང་ལྷ་བསང་གཏོང་སྐབས་བུད་མེད་རྣམས་ཡོང་མི་ཆོག་པ་བཅས་ནི་ཆོས་ལུགས་ཀྱི་ཤུགས་རྐྱེན་འོག་ཕོ་མོ་གཉིས་འདྲ་མཉམ་མིན་པའོ།།

གླིང་སྒྲུང་ལས་ཕོ་མོའི་ཁྱད་པར་དང་དབྱེ་བ་དགར་རྒྱུ་མེད་པར་བརྟེན། དེ་ནི་གེ་སར་བདུད་ལ་ཕེབས་ཁ་ལྟ་བུར་མཚོན་ནའང་གཡོག་མོ་ལེ་དགོ་དགོ་མ་སོང་ནས་བསང་དུད་ནམ་མཁའ་བཀང་འདྲ་ཞིག་ཕུལ་ཏེ་ལྷ་ལ་སྐྱབས་འཇུག་བྱས་ཚུལ་གྱི་རྣམ་པའི་སྟེང་ནས་ཀྱང་ཤེས་ཐུབ་བོ། །

རྒྱན་གོས།  

དེ་ཡང་ང་ཚོ་བོད་མི་རིགས་ལ་གནའ་སྔ་མོའི་དུས་ནས་བཟུང་གོས་སུ་ཤིང་ལོ་གྱོན་པའི་དུས་སྐབས་བྱུང་བ་དང་། རྗེས་སུ་རིམ་གྱིས་གནམ་གཤིས་ཀྱི་དྲོད་གྲང་ལ་འགྱུར་ལྡོག་བྱུང་བའི་དབང་གིས་རི་དྭགས་ཀྱི་པགས་རིགས་གྱོན་པའི་སྲོལ་རིམ་གྱིས་དར། དེང་ཐོག་མི་རྣམས་ཀྱིས་དམར་གྱོན་དང་རིམ་གྱིས་ལག་མཉེད་བྱས་ནས་གྱོན་ཏེ་པགས་རིགས་འཚེམ་བཟོ་བྱེད་སྟངས་སོགས་ལའང་མདོ་དབུས་ཁམས་གསུམ་དུ་དབྱེ་བ་མང་དུ་བྱུང་། དེ་དང་མཚུངས་པར་གླིང་སྒྲུང་དུ་བསྟན་པའི་རྒྱན་གོས་ལའང་རིགས་དང་རྣམ་གྲངས་གང་གི་ཆ་ནས་ཀྱང་ཕུན་སུམ་ཚོགས་པོ་ཞིག་འདུག་སྟེ། སྐྱེས་པའི་རྒྱན་གོས། བུད་མེད་ཀྱི་རྒྱན་གོས། བྱིས་པའི་རྒྱན་གོས། བགྲེས་པོའི་རྒྱན་གོས། ཆོས་ལུགས་པའི་རྒྱན་གོས་སོགས་དང་། དུས་ཚིགས་ཀྱི་འགྱུར་ལྡོག་ལ་བརྟེན་ནས་དབྱར་ཁར་རས་ལྭ་དང་དགུན་ཁར་རི་དྭགས་ཀྱི་པགས་རིགས་གྱོན་པའི་སྲོལ་ཡོད་ཅིང་། སྤྱོད་ལུགས་ཀྱི་དབང་དུ་བྱས་ནའང་རྒྱུན་སྤྱོད་གྱོན་གོས་དང་གཟབ་འཆོར་རྒྱན་གོས་གཉིས་ཡོད་དོ།།

གླིང་སྒྲུང་ནང་བུད་མེད་ཀྱི་སྣང་བརྙན་ཞིབ་འབྲི་བགྱིས་པ་ཆེས་མང་ལ། སྣང་བརྙན་རེ་རེའི་ཁྲོད་དུ་རྒྱན་གོས་ཀྱི་སྐོར་དེ་བས་ཀྱང་མངོན་གསལ་དོད་པ་ཡིན།

དེ་དག་ཚང་མ་མཛེས་དཔྱོད་རིག་པའི་ངོས་ཐད་ནས་བརྗོད་ན་སྒྱུ་རྩལ་གྱི་རིན་ཐང་ཚད་ངེས་ཅན་ཞིག་ལ་བསླེབས་འདུག་ཅེས་ཆེད་མཁས་བ་དག་གིས་གསུངས། གླིང་སྒྲུང་དུ་བུད་མེད་རྣམས་ཀྱི་ལུས་ལ་ཚར་སློག་དང་། དར་གོས། སྣམ་ཕྲུག་སོགས་དང་། རྐང་ལ་ཀོ་ལྷམ། རས་ལྷམ་དང་། ཕྱིང་ལྷམ། རྒྱན་ཆ་ལ་གཡུ་བྱུར། གསེར་མེན་མུ་ཏིག་སོགས་ཀྱིས་གྲུབ་པའི་སྐེ་རྒྱན་དང་རྣ་རྒྱན། ཐོང་ཁའི་དངུལ་གྱི་གའུ། གསེར་དངུལ་ཟངས་གསུམ་གྱི་མཛུབ་དཀྲིས། གདུ་བུ། དངུལ་གྱི་གློ་ཟུར། དངུལ་གྱི་བཞོ་ཟུང་སོགས་ཀྱིས་མཛེས་པར་བྱེད་པ་ཡིན་ཏེ། དཔེར་ན།《རྨ་ཤེལ་བྲག》ཏུ། གླིང་གི་དཔོན་མོ་དེ་མགོ་རྒྱན་རབ་ནོར་བུ་སྣ་ཚོགས། ལུས་གོས་རབ་ཟ་འོག་དགུ་བརྩེགས། སྐེད་ཆིངས་འཇའ་ཚོན་རང་ཤར། སེར་པོ་སྤོས་ཤེལ་དགུ་བསྒྲིགས། ཁྲ་བོ་གཟི་བྱུར་དགུ་བསྒྲིགས། དམར་པོ་བྱུར་མགུལ་དགུ་བསྒྲིགས། སྔོན་པོ་གཡུ་མགུལ་དགུ་བསྒྲིགས། གསེར་དངུལ་འགུག་ཡ་གྲ་འགྲིགས། གསེར་ཆབ་ནོར་བུའི་ཕྲ་ཚོམ། གསེར་རྣ་མུ་ཏིག་བཏགས་ལུང་། གསེར་གྭ་རིན་ཆེན་དགུ་བསྒྲིགས། གློ་ཟུར་ནོར་འཛིན་དགུ་བསྒྲིགས། མུ་ཏིག་ཟར་ལོ་རང་འགྲིགས། དར་ལྷམ་འཇའ་རིས་སུམ་བརྩེགས། ལྷམ་སྒྲོག་ཆུ་མིག་དགུ་བསྒྲིགས་སོགས་རྒྱན་རབ་ཕུན་སུམ་ཚོགས་པས་སྤྲས་ཏེ་མཛེས་དགུ་ལུས་ལ་ཚངས་ཞེས་པ་དང་། 《ཐོག་གླིང》དུ། སྒ་སྐྱ་ལོ་སེང་ལྕམ་འབྲུག་མོ་དེས། རྒྱན་རབ་བཅོ་བརྒྱད་སྐུ་ལ་གསོལ། རྒྱན་གོས་ལུག་ཆུང་ཚ་རུ་ལ། ཕོ་སྲམ་བརྒྱ་ཡིས་སྒང་བཟོ་བྱས། མོ་སྲམ་བརྒྱ་ཡིས་གཤོང་བཟོ་བྱས། སྲམ་ཕྲུག་བརྒྱ་ཡིས་སྲུབས་ཟིན་བྱས། གཟིག་མི་གཟན་པགས་པས་ཁ་ཤན་བརྒྱན། དོམ་ཁྲག་འཐུང་པགས་པས་མཐའ་རྒྱན་བྱས། བཀའ་ན་ཤོག་དྲུག་ཁེབས་པ་བྱུང་། གྱོན་ན་བྱང་རླུང་ལྷགས་པ་ཁོགས། སྐེད་འཆིང་དུང་གི་ཆབ་ཁྲ་ལ། རྒྱ་བྱུར་དཀྲུག་མས་ཕྲ་རྒྱན་བརྒྱབ། དར་གོས་མདངས་ལྡན་མཛེས་རྒྱན་གྱིས་ཞེས་འཁོད་ཡོད་པ་ལྟ་བུ་ལས་མདོ་དབུས་ཁམས་གསུམ་གྱི་རྒྱན་ཞེས་འཁོད་ཡོད་པ་ལྟ་བུ་ལས་མདོ་དབུས་ཁམས་གསུམ་གྱི་རྒྱན་གོས་ལ་ཁྱད་ཆོས་འབུར་དུ་ཐོན་པའི་སྒྱུ་རྩལ་རང་བཞིན་གྱི་བཟོ་ལུགས་སྣ་ཚོགས་ཤིག་བྱུང་ཡོད་པ་མཚོན་ལ། དེ་ནི་བོད་རང་གི་ཐུན་མོང་མ་ཡིན་པའི་སྒྱུ་རྩལ་རང་བཞིན་དང་མཛེས་དཔྱོད་ཀྱི་རིན་ཐང་ལྡན་པའི་དམངས་སྲོལ་རིག་གནས་ཀྱི་མ་ལག་ཅིག་ཡིན་པའང་མཚོན་ཡོད། རི་དྭགས་ཀྱི་པགས་རིགས་གཙོ་བོ་བྱེད་པའི་རྒྱན་གོས་ནི་སྟག་ལྤགས། གཟིག་ལྤགས། དོམ་ལྤགས། སྲམ། ཝ་སོགས་ཡིན་ལ། གླིང་སྒྲུང་ལས་བྱུང་བའི་རྒྱན་གོས་ཀྱི་རིགས་ཚང་མ་རྩ་ཆེན་ཡིན་དོན་ཡང་དེ་དག་གྲུབ་བྱེད་ཀྱི་རྒྱུ་ཚང་མ་གཞལ་དཀའ་བའི་རིན་ཆེན་ཁོ་ན་ཡིན་པའི་རྐྱེན་གྱིས་ཡིན་ལ། དེ་ལས་ང་ཚོ་བོད་པ་རྣམས་ལ་གནའ་སྔ་མོ་ནས་རང་བྱུང་གི་མཛེས་སྡུག་ལ་དགའ་བའི་སེམས་འདུན་དྲག་པོ་མཚོན་པའང་ཤེས་ཐུབ་བོ། །

 གཅོད་པ་དོན་གྲུབ་དང་སྙིང་བོ་ཚེ་རིང་གིས་བརྩམས་པའི《གཅོད་པ་དོན་གྲུབ་དང་སྙིང་བོ་ཚེ་རིང་གི་ཆེད་རྩོམ་ཕྱོགས་བསྒྲིགས》