འཛམ་གླིང་དཔེ་ཀློག་ཉིན་མོའི་ལོ་རྒྱུས་མདོར་བསྡུས།

གཅིག དམིགས་ཡུལ།

ལོ་རེའི་ཟླ4པའི་ཚེས23ཉིན་ནི་འཛམ་གླིང་དཔེ་ཀློག་ཉིན་མོ་ཡིན་པ་དང་དེའི་མིང་ཆ་ཚང་ལ་འཛམ་གླིང་དཔེ་དེབ་དང་པར་དབང་ཉིན་མོ་ཟེར། 1995ལོར་ལོ་རེའི་ཟླ4པའི་ཚེས23ཉིན་དཔེ་ཀློག་དང་པར་དབང་ཉིན་མོར་གཏན་འཁེལ་བྱས་པ་དང་དེའི་དམིགས་ཡུལ་ནི་སྐྱེ་བོ་མང་བོས་དཔེ་ཀློག་དང་རྩོམ་འབྲི་བྱ་རྒྱུར་སྐུལ་མ་གཏོང་བའི་ཆེད་དུ་རེད། འཛམ་གླིང་ས་ཕྱོགས་གང་སར་གནས་པའི་སྐྱེ་བོ་རྒན་རྒོན་དང་གཞོན་ནུ། དབུལ་པོ། ཕྱུག་པོ། ནད་པ་དང་འཐེང་པོ་གང་ཞིག་ཡིན་རུང་། ཚང་མས་དཔེ་ཀློག་གི་སྤྲོ་སྣང་ཉམས་སུ་མྱོང་བ་དང་། མིའི་རིགས་ཀྱི་ཤེས་དཔལ་ཡར་ཐོན་ལ་ལེགས་སྐྱེས་ཆེན་པོ་འབུལ་མཁན་རྩོམ་རིག་མཁས་ཅན་དང་། རིག་གནས་མཁས་ཅན། ཚན་རིག་མཁས་ཅན། བསམ་བློ་མཁས་ཅན་བཅས་ལ་བརྩི་འཇོག་དང་ཐུགས་རྗེ་ཆེ་ཞུ་ཆེད། ལོ་རེར་ཉིན་མོ་དེར་འཛམ་གླིང་གི་རྒྱལ་ཁབ་བརྒྱ་ལྷག་ཙམ་གྱིས་རྟེན་འབྲེལ་ཞུ་བ་སྦྲགས་དཔེ་ཀློག་དྲིལ་བསྒྲགས་སོགས་ཀྱི་བྱེད་སྒོ་སྣ་ཚོགས་སྤེལ་བ་རེད།

གཉིས། བྱུང་འཕེལ།

འཛམ་གླིང་དཔེ་ཀློག་ཉིན་མོ་འཛུགས་པའི་གྲོས་འགོ་ནི་སི་ཕེན་གྱིས་བཏོན་པ་དང་། སི་ཕེན་ཅ་ཐའེ་ལུའོ་ཉི་ཡ་ས་ཁུལ་གྱི“དཔའ་བརྟུལ་ཆའོ་ཀྲེའི་དུས་ཆེན”ལས་བྱུང་བ་ཞིག་རེད། གཞན་ཡང་། དཔེ་མཛོད་ཁང་གི་དུས་དེབ་ལ་གཞིགས་ན། འཛམ་གླིང་དཔེ་ཀློག་ཉིན་མོ་ནི་སི་ཕེན་གྱི་ཅ་ཐའེ་ལུའོ་ཉི་ཡ་ས་ཁུལ་གྱི་གཏམ་རྒྱུད་ཅིག་ལས་བྱུང་བ་སྟེ། རི་ཁྲོད་དུ་ཡིད་འོང་སྲས་མོར་ཁྱུང་འབྲུག་གིས་གནོད་འཚེ་གཏོང་རྩིས་བྱེད་སྐབས། དཔའ་བརྟུལ་ཆའོ་ཀྲེས་ཚེ་སྲོག་ལ་མ་འཛེམས་པར་ཁྱུང་འབྲུག་དང་འཛིངས་ནས་སྲས་མོའི་ཚེ་སྲོག་བསྐྱབས། སྲས་མོ་སྲོག་ཉེན་ལས་ཐར་རྗེས། ཆའོ་ཀྲེ་ལ་དྲིན་ལན་འཇལ་བའི་ཚུལ་དུ་ལག་རྟགས་ལ་དཔེ་དེབ་ཞིག་སྤྲད་པ་རེད། དུས་དེ་ནས་བཟུང་དཔེ་དེབ་དེ་ཉིད་བློ་རྒྱ་དང་སྟོབས་ཤུགས་ཀྱི་མཚོན་བྱེད་དུ་གྱུར་ལ། ཟླ4པའི་ཚེས23ཉིན་ཡང“དཔའ་བརྟུལ་ཆའོ་ཀྲེའི་དུས་ཆེན”དུ་གྱུར། དུས་ཆེན་སྐབས་སུ་ཅ་ཐའེ་ལུའོ་ཉི་ཡ་ས་ཁུལ་གྱི་གྲོང་མིས་ཤ་ཉེ་སྤུན་མཆེད་ལ་རྒྱ་སེ་མེ་ཏོག་དང་དཔེ་དེབ་སྤྲོད་པའི་གོམས་སྲོལ་ཡོད་པ་རེད།

གསུམ། བྱ་འགུལ།

དཔྱད་གཞིའི་ཡིག་རིགས་ལས་མངོན་པར་གཞིགས་ན། “འཛམ་གླིང་དཔེ་ཀློག་ཉིན་མོ”ཁྱབ་བསྒྲགས་བྱས་ཚུན། རྒྱལ་ཁབ་དང་ས་ཁུལ100ལྷག་ཙམ་བྱེད་སྒོ་དེར་ཞུགས་ཡོད། རྒྱལ་ཁབ་མང་པོ་ཞིག་གིས་ཉིན་དེའམ་ཡང་ན་སྔ་རྗེས་ཀྱི་གཟའ་འཁོར་གཅིག་དང་ཟླ་བ་གཅིག་ནང་ཕུན་སུམ་ཚོགས་པའི་བྱེད་སྒོ་སྣ་ཚོགས་སྤེལ་གྱིན་ཡོད། དེའང་དཔེ་མཛོད་ཁང་དང་། སྨྱན་སྦྱོར། དཔེ་སྐྲུན་ཁང་། སློབ་གྲྭ་སོགས་ཀྱི་ལས་ཁུངས་དང་ཚོགས་པས་དུས་ཚོད་དེའི་སྐབས་སུ་དཔེ་དེབ་ཞལ་འདེབས་འབུལ་བ་དང་མི་རྣམས་ཀྱིས་དཔེ་དེབ་ཀློག་རྒྱུར་སྐུལ་ལྕག་བྱེད་པའི་བྱེད་སྒོ་སྤེལ་བ་རེད།

བཞི། དོན་སྙིང་།

དཔེ་ཀློག་གིས་མི་བུ་ཞིག་འཚར་ལོངས་ཡོང་བར་ཤུགས་རྐྱེན་ཆེན་པོ་ཐེབས་པ་དང་དཔེ་དེབ་ཡག་པོ་ཞིག་གིས་སྐྱེ་བོ་ཞིག་གི་མི་ཚེའི་ལམ་བུར་ཁ་ལོའང་སྒྱུར་ཐུབ་པས། མིའི་ཤེས་རྒྱ་ཆེ་རུ་འགྲོ་བར་དཔེ་ཀློག་ནི་མེད་དུ་མི་རུང་བ་ཞིག་ཡིན་ཞིང་། མི་རིགས་ཤིག་གི་བསམ་བློའི་གནས་ཚད་མཐོ་མིན་དེ་ཚད་ངེས་ཅན་ཞིག་གི་སྟེང་ནས་བརྗོད་ན། མི་རིགས་དེས་དཔེ་ཀློག་གི་མང་ཉུང་ལ་རག་ལས་ཡོད་པ་རེད།

དཔེ་འཕྲིན་གྱི་སྐོར།

གཅིག   བོད་ཀྱི་རྩོམ་པ་པོ་མཛེས་སེ་སོགས་ཀྱི་ལྷུག་རྩོམ་གཅེས་བཏུས་དེབ་སི་ཁྲོན་མི་རིགས་དཔེ་སྐྲུན་ཁང་ནས་པར་དུ་བསྐྲུན།

གཉིས།  རུ་མང་ཀླུ་མཁར་རྒྱལ་གྱིས་བསྒྱུར་པའི《ཧ་ཝར་ཊི་གཙུག་ལག་སློབ་ཆེན་གྱི་ཐོ་རེངས་ཆུ་ཚོད་བཞི་དང་ཕྱེད་ཀ》པར་དུ་བསྐྲུན།

དཔེ་ཆ་འདིའི་མཚན་བྱང་ནི་དབྱིན་ཇིའི་བརྙན་འཕྲིན་ཁང་ཞིག་ཧ་ཝར་ཊི་གཙུག་ལག་སློབ་ཆེན་དུ་བསྐྱོད་དེ་མིང་ལ《ཧ་ཝར་ཊི་གཙུག་ལག་སློབ་ཆེན་གྱི་ཐོ་རེངས་ཆུ་ཚོད་བཞི་དང་ཕྱེད་ཀ》ཞེས་པའི་དངོས་བྲིས་ལེ་ཚན་ཞིག་ཕབ་བསྐྲུན་བྱས་པ་ལས་བྱུང་བ་ཡིན་ཞིང་། རུ་མང་ཀླུ་མཁར་རྒྱལ་གྱིས་བོད་ཡིག་ཏུ་བསྒྱུར་ཏེ་སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་གནང་།

དཔེ་དེབ་འདི་རྩོམ་པ་པོ་ཝེ་ཞུའུ་ཡེའུ་ཡིས་ཆེད་དུ་ཧ་ཝར་ཊི་སློབ་ཆེན་གྱི་སློབ་གཉེར་བ་རྣམས་ཀྱི་ཉིན་རྒྱུན་གྱི་དཔེ་ཀློག་རྣམ་པ་ལ་དམིགས་ནས་བརྩམས་པ་ཞིག་ཡིན་ལ། འདི་ལས་གཙོ་བོ་ཧ་ཝར་ཊི་གཙུག་ལག་སློབ་ཆེན་གྱི་དཔེ་ཀློག་རྣམ་པ་ཞིབ་འབྲི་བྱས་པ་བརྒྱུད་ནས། རང་རེའི་རྒྱལ་ཁབ་ཀྱི་སློབ་ཆེན་གང་དུའང་ལེགས་འགྲུབ་འབྱུང་དཀའ་ལ། ཧ་ཝར་ཊིའི་སློབ་གཉེར་བ་རྣམས་ཀྱི་མདུན་ལམ་དང་ལས་དབང་ལ་ཁ་ལོ་བསྒྱུར་བའི་བཟློག་མེད་ཀྱི་ཆོས་ཉིད་ཅིག་གསལ་སྟོན་གནང་ཞིང་། རླབས་ཆེན་གྱི་ཚན་རིག་པ་ཨན་ཟི་ཐན་ལགས་ཀྱིས་གསུངས་པའི་“མི་ཡི་བར་ཁྱད་ནི་ལས་ཞོར་དུས་ཚོད་སྟེང་བྱུང་བ་ཡིན”ཞེས་པའི་བདེན་ལུགས་དེ་ངོ་སྤྲོད་དང་འགྲེལ་བཤད་མཛད་ཡོད། དཔེ་དེབ་འདི་ཁྱོན་བསྡོམས་པས་ལེའུ་བཅུ་རུ་ཕྱེས་ཡོད་ལ། ལེའུ་རེ་རེའི་ནང་དུ་སྐྱེ་བོ་སུ་ཞིག་གིས་རང་གི་མི་ཚེའི་དམིགས་འདུན་དང་ཕུགས་བསམ་རྣམས་བརྩོན་ལེན་དང་ལེགས་འགྲུབ་འབྱུང་བའི་མན་ངག་རེ་གསལ་བཤད་བྱས་ཏེ། ཧ་ཝར་ཊི་ནི་ལྷ་སྒྲུང་ཞིག་མ་ཡིན་པར་དེ་ནི་བདེན་དཔང་ཞིག་སྟེ། མི་སུ་ཞིག་གི་བློ་སྤོབས་དང་བརྩོན་སེམས། ཕུགས་བསམ་ལ་སོགས་ཀྱི་བདེན་དཔང་ཞིག་ཡིན་པ་ར་སྤྲོད་གནང་ཡོད། དཔེ་དེབ་འདི་ལས་ཧ་ཝར་ཊི་སློབ་ཆེན་ལ་ཆེད་དུ་མངའ་བའི་སྙིང་སྟོབས་དང་སྤོབས་སེམས་ལས་འཕྲོས་ཤིང་བརྩོན་སེམས་དང་གཤིས་རྒྱུད་སོགས་གསོ་སྐྱོང་གནང་བ་ལས་ཞུགས་ཏེ། ཕུགས་འདུན་དང་ལ་རྒྱ། རང་གཤིས། གོམས་སྲོལ། ཤེས་རབ་ལ་སོགས་པའི་ཆ་ནས་ལོ་ཆུང་ན་གཞོན་རྣམས་མི་ཚེའི་ཡང་རྩེ་རུ་ཡར་འདྲེན་དང་སྐུལ་མ་བྱེད་པ་ཡིན།