ཟླ་དགུ་བའི་ཚེས་བརྒྱད་ཉིན། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཧྲུའུ་ཅི་ཝང་ཆིས་ཧྲན་རྒྱལ་ཡོངས་ཞིབ་བཤེར་དང་ལྟ་ཞིབ་ལས་ཁུངས་ཀྱི་གཟེངས་བསྟོད་གྲོས་ཚོགས་ལ་ཞུགས།
ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་ཧྲུའུ་ཅི་ཝང་ཆིས་ཧྲན་ཚེས་བརྒྱད་ཉིན་རྒྱལ་ཡོངས་ཞིབ་བཤེར་དང་ལྟ་ཞིབ་ལས་ཁུངས་ཀྱི་གཟེངས་བསྟོད་གྲོས་ཚོགས་ལ་ཞུགས། ཁོས་ནན་གྱིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་བདུན་པའི་ཚེས་ཉེར་དྲུག་ཉིན་གྱི་གཏམ་བཤད་གལ་ཆེན་གྱི་དགོངས་དོན་སློབ་སྦྱོང་ནན་མོ་དང་རྒྱུས་ལོན་གསལ་བོ་བྱེད་པ་དང་། སློབ་གཉིས་བྱེད་གཅིག་སློབ་སྦྱོང་སློབ་གསོ་རྒྱུན་ལྡན་ཅན་དང་ལམ་ལུགས་ཅན་དུ་བསྒྱུར་བ་དང་བསྟུན་ནས། བློ་དཀར་བ་དང་ཁག་ཁུར་བྱེད་ཕོད་པར་བྱེད་པ། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བགྲོད་ལམ་ཡིད་ཆེས་དང་གཞུང་ལུགས་ཡིད་ཆེས། ལམ་ལུགས་ཡིད་ཆེས། རིག་གནས་ཡིད་ཆེས་ཇེ་བརྟན་དུ་གཏོང་དགོས་ཟེར།
ཝང་ཆིས་ཧྲན་གྱིས་བསྟན་དོན། བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གིས་ཁྱོན་ཡོངས་ནས་ཏང་བཅོས་སྐྱོང་བྱེད་རྒྱུ་དེ་འཐབ་ཇུས་བཀོད་སྒྲིག་ནང་བཞག་སྟེ། ཏང་གི་རྣམ་པ་གསར་བསྒྱུར་བྱས། ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་འདུ་ཤེས་ཇེ་བརྟན་དུ་བཏང་ནས། རང་རྟོགས་སྒོས་ཏང་ཀྲུང་དབྱང་དང་གཅིག་གྱུར་མཐོན་པོ་བྱེད་པ་དང་། རིམ་པ་སོ་སོའི་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས་ཏང་གི་སྲོལ་ཡིག་གིས་བསྩལ་པའི་འགན་ནུས་ལག་བསྟར་ནན་མོ་བྱས་ཏེ། ཁྱོན་ཡོངས་ནས་ཏང་བཅོས་སྐྱོང་ནན་མོ་བྱེད་པ་དང་རུལ་སུངས་ལ་ངོ་རྒོལ་བྱེད་པའི་འཐབ་རྩོད་ལག་ལེན་ཁྲོད། འགྲན་རྩོད་དང་ཉམས་སད་ཐེག་ཐུབ་བྱེད་དགོས། ཏང་ཀྲུང་དབྱང་གིས་ཞིབ་བཤེར་ལྟ་ཞིབ་བྱ་བར་ཁས་ལེན་གང་ལེགས་བྱས། ཁས་ལེན་ནི་སྐུལ་སློང་ཡིན་ལ། དེའི་ཏང་ཀྲུང་དབྱང་གི་རེ་བ་མཚོན་ཡོད། ཀླད་པ་ནམ་ཡང་གསལ་བོ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་དགོངས་དོན་དང་ཤན་སྦྱར་ནས་མི་འདང་ས་འཚོལ་དགོས། འདུ་ཤེས་བཞི་ཇེ་དྲག་ཏུ་གཏོང་བ་ནི་ཚད་མཐའ་མེད་པའི་འགུལ་རྣམ་གྱི་རྒྱུད་རིམ་ཞིག་ཡིན་པ་དང་། དུས་ནམ་ཡང་ཆབ་སྲིད་དང་སྤྱི་ཡོངས་ནས་སྲོག་ཤིང་ལ་དཔེ་ལྟ་བྱེད་རྒྱུ་ནི་རེ་བ་ཆེན་པོ་ཡིན་པས། ཆབ་སྲིད་ལངས་ཕྱོགས་དང་ཆབ་སྲིད་གོ་རྟོགས་རྒྱུན་མ་ཆད་པར་མཐོར་འདེགས་བྱེད་པ་དང་། མུ་མཐུད་དུ་འབད་འཐབ་བྱས་ཏེ། ཏང་དང་མི་དམངས་ཡིད་ཚིམ་པའི་རྒྱུགས་ལན་སྤྲོད་དགོས་ཟེར།
ཀྲའོ་ཧོང་ཀྲུའུ་ཡིས་གཟེངས་བསྟོད་གྲོས་ཚོགས་ལ་མགོ་འཛིན་བྱས།
