མཚོ་སྔོན་མཚོ་ནུབ་དགེ་ལས་སྙིང་རྗེའི་འོད་སྣང་གི་ཕྱོགས་སུ་བསྐྱོད་པ་ཞེས་པའི་མཛད་སྒོ་ཟི་ལིང་ཨེ་ཡར་མིག་ནད་སྨན་ཁང་དུ་སྤེལ།
2019.11.08 ཁུངས། རང་རེའི་ལས་ཁུངས། ཀློག་གྲངས། 112

ཉིས་སྟོང་བཅུ་དགུ་ལོའི་ཟླ་བཅུ་གཅིག་པའི་ཚེས་བརྒྱད་ཉིན། མཚོ་སྔོན་ཞིང་ཆེན་མཚོ་ནུབ་ཁུལ་མི་དམངས་སྲིད་གཞུང་གིས་གཙོ་སྒྲུབ་བྱས་ཤིང་། མཚོ་ནུབ་ཁུལ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་དང་མཚོ་ནུབ་ཁུལ་བཟོ་ཚོང་ཅུའུ་ཡིས་མཉམ་སྒྲུབ་བྱས་པའི་མཚོ་སྔོན་མཚོ་ནུབ་དགེ་ལས་སྙིང་རྗེའི་འོད་སྣང་གི་ཕྱོགས་སུ་བསྐྱོད་པ་ཞེས་པའི་མཛད་སྒོ་ཟི་ལིང་ཨེ་ཡར་མིག་ནད་སྨན་ཁང་དུ་སྤེལ། མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ལིག་ཐུང་ཏེ་དང་། པཎ་ཆེན་སྐུ་ཕྲེང་བཅུ་གཅིག་པའི་འཐུས་ཚབ་པ་ཚེ་དབང་ཉི་མ། མཚོ་སྔོན་ཞིང་ཆེན་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ། ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་ཀྱི་རྒྱུན་ལས་ཀྲུའུ་ཞི་གཞོན་པ་ཀྲང་ཝུན་ཧྭ་དང་། ཞིང་ཆེན་སྲིད་གྲོས་ཀྱི་དྲུང་ཡིག་ཆེན་མོ་གཞོན་པ་ཚོ་ཝུན་ལེན། མཚོ་ནུབ་ཁུལ་གྱི་འབྲེལ་ཡོད་འགོ་ཁྲིད་རྣམས་བཅས་ཚོགས་ཐོག་ཏུ་ཞུགས།


ཚོགས་ཞུགས་འབྲེལ་ཡོད་འགོ་ཁྲིད་རྣམས་ཀྱི་མཉམ་པར། 

ཚོགས་ཐོག་ཏུ་པཎ་ཆེན་སྐུ་ཕྲེང་བཅུ་གཅིག་པའི་འཐུས་ཚབ་པ་ཚེ་དབང་ཉི་མ་ལགས་ཀྱིས་གཏམ་བཤད་སྤེལ། ཁོང་གིས་བཤད་རྒྱུར། པཎ་ཆེན་མཆོག་གིས་ང་ཚོར་རེ་འདུན་གསུམ་གསུངས་མྱོང་། དེ་ལས་གཅིག་ནི་མ་འོངས་པར་བོད་ཁུལ་ནས་འདི་ལྟ་བུའི་བྱ་འགུལ་སྣ་ཚོགས་མང་དུ་སྤེལ་ཐུབ་པའི་རེ་བ་དང་། གཉིས་ནི་ཨེ་ཡར་མིག་ནད་ཚན་ཁག་གིས་བོད་ཁུལ་གྱི་མང་ཚོགས་རྣམས་ཀྱི་མིག་ནད་སྨན་བཅོས་ཆུ་ཚད་མཐོར་འདེགས་སུ་གཏོང་རྒྱུར་བྱས་རྗེས་འཇོག་རྒྱུ་དང་། གསུམ་ནི་ང་ཚོའི་ན་གཞོན་རྣམས་ཀྱིས་མིག་ཟུང་ལ་བདག་གཅེས་བྱེད་པའི་འདུ་ཤེས་དང་ཤེས་བྱ་གོང་འཕེལ་འགྲོ་བའི་རེ་བ་བཅས་རེད། ང་ཚོས་རེ་བ་དེ་ནང་བཞིན་མཉམ་དུ་འབད་པ་བྱས་ཏེ། འོད་སྣང་དབུལ་སྐྱོར་ལས་གཞི་དང་གནད་འཁེལ་དབུལ་སྐྱོར་གྱི་བདེ་ཐང་རོགས་སྐྱོར་ལས་གཞི་བཅས་ཀྱི་ཐད་བྱས་རྗེས་འཇོག་དགོས་ཟེར།


ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ལིག་ཐུང་ཏེ་དང་། པཎ་ཆེན་སྐུ་ཕྲེང་བཅུ་གཅིག་པའི་འཐུས་ཚབ་པ་ཚེ་དབང་ཉི་མ་སོགས་ཀྱིས་མིག་ནད་ཅན་གྱི་ནད་པ་རྣམས་ལ་རྟོག་ཞིབ་བྱེད་ཀྱིན་པ། 

   ཐེངས་འདིའི་སྤྱི་ཕན་ལས་གཞི་ཡིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྒྱལ་ཡོངས་བདེ་ཐང་ཚོགས་ཆེན་སྟེང་བཏོན་པའི་བདེ་ཐང་ཀྲུང་གོའི་འཐབ་ཇུས་ཀྱི་བྱེད་ཐབས་གལ་ཆེན་གྱི་དགོངས་དོན་ལྟར། པཎ་ཆེན་སྐུ་ཕྲེང་བཅུ་གཅིག་པ་མཆོག་གི་ཐུགས་འཁུར་དང་ཧུའུ་ནན་ཨེ་ཡན་མིག་གཅེས་སྤྱི་ཕན་ཐེབས་རྩ་ཚོགས་པའི་རྒྱབ་སྐྱོར་འོག་ཏུ།བདེ་ཐང་དབུལ་སྐྱོར་གྱི་འཐབ་ཇུས་ལག་བསྟར་བྱས་ཏེ། ཉེ་བའི་ཟླ་ངོ་གཉིས་ལྷག་གི་རིང་ལ། མཚོ་ནུབ་ཁུལ་གྱི་ཞིང་འབྲོག་མང་ཚོགས་བརྒྱད་བརྒྱ་དྲུག་བཅུ་ལྷག་ལ་བརྟག་དཔྱད་བྱས་པ་བརྒྱུད་ནས། མིག་ནད་ཅན་གྱི་ནད་པ་ཉིས་བརྒྱ་ལྷག་ལ་རིན་མེད་ནད་བཅོས་བྱས་ལ། དེ་མིན་ལིང་ཏོག་གི་ནད་པ་བཞི་བཅུ་ལྷག་ལ་ཟི་ལིང་ཨེ་ཡར་མིག་ནད་སྨན་ཁང་དུ་བཤགས་བཅོས་བྱས་ནས་ལེགས་འགྲུབ་བྱུང་ཡོད།

མཚོ་སྔོན་མཚོ་ནུབ་དགེ་ལས་སྙིང་རྗེའི་འོད་སྣང་གི་ཕྱོགས་སུ་བསྐྱོད་པ་ཞེས་པའི་ལས་གཞི་འདི་བརྒྱུད་ནས། མཚོ་ནུབ་ཁུལ་གྱི་དབུལ་ཕོངས་མང་ཚོགས་ལས་ལིང་ཏོག་གི་ནད་ཅན་གྱི་ནད་པ་རྣམས་ལ་རོགས་སྐྱོར་བྱས་ནས། ཁོ་ཚོར་ཡང་བསྐྱར་འོད་སྣང་གིས་གཏམས་ཤིང་། སྤུས་ཚད་ཀྱིས་ཐེག་པའི་བདེ་སྐྱིད་ཀྱི་འཚོ་བ་ཞིག་རོལ་བའི་བསྐལ་བ་བསྩལ།