ཡེ་མིན་སྲིད་གཞུང་དམག་དཔུང་གིས་ཚེས་བཅོ་ལྔ་ཉིན་བཤད་རྒྱུར། སྲིད་གཞུང་དམག་དཔུང་གིས་ཉིན་དེར་ཡེ་མིན་ལྷོ་ཕྱོགས་ཀྱི་ཏཱ་ལེ་ཨ་ཞིང་ཆེན་ནས་ཧུའུ་སེ་དྲག་ཆས་པའི་བར་འཁྲུག་རྩོད་དྲག་པོ་བྱས་ཏེ། ཕྱོགས་གཉིས་ཀྱི་མི་བཅུ་གཉིས་རྐྱེན་ལམ་དུ་ཤོར་ཟེར།
མིང་བཤད་མི་འདོད་པའི་ཡེ་མིན་སྲིད་གཞུང་གི་དཔོན་རིགས་ཤིག་གིས་བཤད་རྒྱུར། ཧུའུ་སེ་དྲག་ཆས་མི་སྣས་ཉིན་དེར་ཏཱ་ལེ་ཨ་ཞིང་ཆེན་ནུབ་ཕྱོགས་ཀྱི་ཅཱ་ཐེ་པེད་ས་ཁུལ་གྱི་སྲིད་གཞུང་དམག་དཔུང་ལ་དཔུང་འཇུག་བྱས་ཏེ། སྲིད་གཞུང་དམག་དཔུང་གིས་དེར་རྒོལ་ལན་དྲག་པོ་སྤྲད། མིག་སྔའི་བར་དུ་འཁྲུག་རྩོད་དེ་ལས་སྲིད་གཞུང་གི་དམག་མི་ལྔ་རྐྱེན་ལམ་དུ་ཤོར་བ་དང་། ཧུའུ་སེ་དྲག་ཆས་པའི་མི་བདུན་རྐྱེན་ལམ་དུ་ཤོར་ཡོད་ཟེར།
ཏཱ་ལེ་ཨ་ཞིང་ཆེན་དེ་ཡེ་མིན་ལྷོ་ཕྱོགས་ས་ཁུལ་དུ་གནས་པ་དང་། གཟའ་འཁོར་འགའི་རིང་ལ། ཧུའུ་སེ་དྲག་ཆས་པས་ཏཱ་ལེ་ཨ་ཞིང་ཆེན་དུ་གཞི་རྒྱ་ཆེ་བའི་འཇབ་རྒོལ་དོན་རྐྱེན་བཟོས། བསྒྲགས་པ་ལྟར་ན། ཏཱ་ལེ་ཨ་ཞིང་ཆེན་བྱང་ཕྱོགས་ཀྱི་རི་ཁུལ་ཧུའུ་སེ་དྲག་ཆས་པས་བཙན་བཟུང་བྱས་ཡོད་པ་དང་། སྲིད་གཞུང་དམག་དཔུང་གིས་ས་ཁུལ་དེའི་སྡེ་བ་སྐོར་ཞིག་ཚོད་འཛིན་བྱས་ཡོད་པ་རེད།
ལོཙཱ་བ། བསོད་ནམས་ཚེ་རིང་།
