མའོ་ལོ་ཀིའི་ནང་སྲིད་པུའུ་ཡིས་ཚེས་བཅོ་བརྒྱད་ཉིན་སྤྱི་སྒྲོག་སྤེལ་ཏེ། མའོ་ལོ་ཀིའི་ཀྲུང་དབྱང་ཁྲིམས་འཛིན་རྟོག་ཞིབ་ཅུའུ་ཡིས་ཉིན་དེར་བྱང་ཕྱོགས་ཀྱི་ཏི་ཐུའུ་ཨན་གྲོང་ཁྱེར་ནས་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ལ་འབྲེལ་བ་ཡོད་པའི་མི་སྣ་ལྔ་འཛིན་བཟུང་བྱས་ཟེར།
སྤྱི་སྒྲོག་ལས་བཤད་རྒྱུར། དོགས་ཡོད་ཉེས་ཅན་ལྔའི་ལོ་ཚོད་ནི་ལོ་ཉེར་གསུམ་ནས་སོ་གསུམ་བར་ཡིན་པ་དང་། རྟོག་ཞིབ་བྱས་པ་ལས་ཁོ་ཚོ་སི་རི་ཡཱ་དང་དབྱི་རག་ཏུ་ཡོད་པའི་དབྱི་སི་ལན་རྒྱལ་ཁབ་ཅེས་པའི་ཐལ་སྤྱོད་རྩ་འཛུགས་ཀྱི་དྲག་ཆས་ཉེས་ཅན་བར་འབྲེལ་འདྲིས་ཡོད་པ་དང་། མའོ་ལོ་ཀི་ནས་གཞི་རྒྱ་ཆེ་བའི་འཇིགས་སྐུལ་འཇབ་རྒོལ་དོན་རྐྱེན་བཟོ་རྩིས་ཡོད་ཟེར།
སྤྱི་སྒྲོག་ལས་བཤད་རྒྱུར། ཉེན་རྟོག་ཕྱོགས་ཀྱིས་འགུལ་སྐྱོད་སྤེལ་སྐབས་གློག་རྡུལ་སྒྲིག་ཆས་དང་གྲི་སོགས་དངོས་རྫས་རྩད་ཆོད་པ་དང་། མའོ་ལོ་ཀིའི་ཁྲིམས་འཛིན་སྡེ་ཁག་གིས་གྱོད་དོན་དེར་རྟོག་ཞིབ་གསལ་བོ་བྱེད་བཞིན་ཡོད།
ལོ་ཙཱ་བ། བསོད་ནམས་ཚེ་རིང་།
