འཛམ་གླིང་ཉོ་ཚོང་རྩ་འཛུགས་ཀྱི2024ལོའི་སྤྱི་བའི་གླེང་སྟེགས་སྐབས་སུ། ཀྲུང་གོའི་ཉོ་ཚོང་སྐུལ་འདེད་ཚོགས་པ་དང་རྒྱལ་སྤྱིའི་ཉོ་ཚོང་ལྟེ་གནས་ཀྱིས་ཚེས10ཉིན་མཉམ་དུ་སྔར་ལས་ལྷད་མེད་དང་བབ་བསྟུན་གྱི་མཁོ་འདོན་མུ་འབྲེལ་ཅིག་འཛུགས་པ་བརྗོད་སྙིང་ཡིན་པའི་བགྲོ་གླེང་ཚོགས་འདུ་སྤེལ་བ་དང་། རྒྱལ་སྤྱིའི་རྩ་འཛུགས་དང་ཚོང་ལས་མཐུན་ཚོགས། རིག་མཛོད་ལས་ཁུངས། ཁེ་ལས་ཀྱི་འཐུས་མི་སོགས་མི100ལྷག་ཚོགས་འདུར་ཞུགས།

ཀྲུང་གོའི་ཉོ་ཚོང་སྐུལ་འདེད་ཚོགས་པའི་ཚོགས་གཙོ་རིན་ཧོང་པེན་གྱིས་བགྲོ་གླེང་ཚོགས་འདུའི་སྟེང་ཞུ་ཚིག་འབུལ་སྐབས་བསྟན་དོན། མིག་སྔའི་དཔལ་འབྱོར་འཛམ་གླིང་ཅན་ལ་གོ་སྐབས་དང་འགྲན་རྩོད་མཉམ་གནས་ཡིན་ཞིང་། སྒོ་འབྱེད་དཀྱེལ་ཡངས་ཀྱི་སེམས་ཁམས་རྒྱུན་འཁྱོངས་བྱས་ཏེ། ངེས་པ་དོན་གྱི་ཕྱོགས་མང་རིང་ལུགས་ལག་ལེན་བྱེད་དགོས། ལྷད་མེད་དང་བབ་བསྟུན་གྱི་མཁོ་འདོན་མུ་འབྲེལ་འཛུགས་པ་ནི་འཛམ་གླིང་རང་བཞིན་གྱི་འགྲན་རྩོད་ཐག་གཅོད་བྱེད་པའི་ཐབས་ལམ་གལ་ཆེན་ཞིག་ཡིན་ཟེར།

རྒྱལ་སྤྱིའི་ཉོ་ཚོང་ལྟེ་གནས་ཀྱི་ལག་བསྟར་ཀྲུའུ་རིན་གཞོན་པ་ཐིན་པའོ་ཡིས་བསྟན་དོན། རྒྱལ་སྤྱིའི་ཉོ་ཚོང་ལྟེ་གནས་ཀྱིས་མཉམ་ལས་གྲོགས་པོ་དང་མཉམ་དུ་ཁེ་ལས་ཆུང་འབྲིང་དང་ཁྱད་པར་དུ་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ཁེ་ལས་ཆུང་འབྲིང་ལ་རོགས་རམ་བྱེད་པར་རེ་བཞིན་ཡོད་པ་དང་། རྒྱལ་ཁོངས་བརྒལ་བའི་གློག་རྡུལ་ཚོང་དོན་གྱི་སྦས་ཤུགས་སྔོག་འདོན་བྱས་ཤིང་། ལྷད་མེད་ཀྱི་མཁོ་འདོན་མུ་འབྲེལ་འཛུགས་པ་དང་གློག་རྡུལ་ཚོང་དོན་གྱི་ཐཱན་ཇེ་ཉུང་དུ་བཏང་སྟེ། གློག་རྡུལ་ཚོང་དོན་གྱིས་སྔར་ལས་ལྷག་པའི་སྒོ་ནས་རྒྱུན་མཐུད་ཐུབ་པའི་འཕེལ་རྒྱས་ཐད་བྱས་རྗེས་འཇོག་ཏུ་འཇུག་དགོས་ཟེར།

མཉམ་འབྲེལ་རྒྱལ་ཚོགས་ཀྱི་ཉོ་ཚོང་དང་འཕེལ་རྒྱས་གྲོས་ཚོགས་ཀྱི་གློག་རྡུལ་ཚོང་དོན་དང་གཞི་གྲངས་དཔལ་འབྱོར་གྱི་འགན་ཁུར་བ་ཐའོ་ཨར་པུས་ཡའོ་ཨིན་ཧྥོ་ལོས་ཏི་ལི་ཁི་སུང་གིས་བསྟན་དོན། ཉོ་ཚོང་དང་འཕེལ་རྒྱས་གྲོས་ཚོགས་ཀྱི2024ལོའི་གཞི་གྲངས་དཔལ་འབྱོར་གྱི་སྙན་ཞུ་ལས་ཁོར་ཡུག་རྒྱུན་མཐུད་ཐུབ་པ་དང་དཀྱེལ་ཡངས་རང་བཞིན་ལྡན་པའི་གཞི་གྲངས་ཅན་གྱི་འཐབ་ཇུས་མྱུར་དུ་སྤྱོད་དགོས་པ་ནན་བཤད་བྱས། ཀྲུང་གོས་གཞི་གྲངས་ཅན་དང་ལྷད་མེད་ཅན་གྱི་མཐུན་སྦྱོར་རིམ་སྤོར་འཕེལ་རྒྱས་ཀྱི་ལག་བསྟར་ཕྱོགས་སྟོན་པར་འགྲེམ་བྱས་ནས། གཞི་གྲངས་ཅན་ཐོན་ལས་ཀྱི་ལྷད་མེད་ཐཱན་ཉུང་གི་འཕེལ་རྒྱས་ལ་སྐུལ་འདེད་གཏོང་བ་གསལ་བོར་བསྟན་ཡོད་ལ། དེ་ནི་གཞི་གྲངས་དཔལ་འབྱོར་དེ་རྒྱུན་མཐུད་ཐུབ་པའི་ཕྱོགས་སུ་འཕེལ་རྒྱས་སུ་འགྲོ་བར་སྐུལ་འདེད་གཏོང་བའི་གསར་གཏོད་ཀྱི་བྱེད་ཐབས་ཤིག་རེད་ཟེར།

ཀྲུང་གོའི་ཉོ་ཚོང་སྐུལ་འདེད་ཚོགས་པའི་རྒྱལ་སྤྱིའི་མཉམ་ལས་པུའུ་ཡི་པུའུ་ཀྲང་ཝུའུ་མིན་གྱིས་བསྟན་དོན། ཀྲུང་གོའི་ཉོ་ཚོང་སྐུལ་འདེད་ཚོགས་པས་མུ་མཐུད་དུ་ལྷད་མེད་ཐཱན་ཉུང་ཁྱབ་ཁོངས་ཀྱི་ཀྲུང་ཕྱིའི་ཁེ་ལས་ཀྱི་བརྗེ་རེས་དང་མཉམ་ལས་ལ་སྐུལ་འདེད་གཏོང་བ་དང་། ལྷད་མེད་འཕེལ་རྒྱས་ཀྱི་འདུ་ཤེས་ལག་བསྟར་བྱས་ནས་སྐབས་གཉིས་པའི་མུ་འབྲེལ་འགྲེམ་སྟོན་ཚོགས་འདུ་བཟང་བོར་བསྒྲུབས་ཏེ། འཛམ་གླིང་ཡོངས་ཀྱི་ལྷད་མེད་མཁོ་འདོན་མུ་འབྲེལ་གྱི་མཉམ་ལས་ཐད་སྤུས་ཚད་མཐོ་བའི་སྟེགས་བུ་འཛུགས་རྒྱུ་ཡིན་ཟེར།

བསོད་ནམས་ཚེ་རིང་གིས་བསྒྱུར།