ཚོགས་ཡུན་ཉིན4ཡིན་པའི་སྐབས་གཉིས་པའི་དབྱི་རག་གི་རྡོ་སྣུམ་རྣམ་གྲངས་དང་ཚོང་འགུག་རྒྱལ་སྤྱིའི་གྲོས་ཚོགས་སམ་འགྲེམ་སྟོན་ཚོགས་འདུ་ཚེས12ཉིན་རྒྱལ་ས་པཱ་ཀཱ་ཏཱ་ནས་གྲོལ་བ་དང་། འགྲེམ་སྟོན་ཚོགས་འདུ་ཡིས་དབྱི་རག་ས་ཁོངས་རང་གི་ཁེ་ལས་དང་ཀྲུང་གོའི་ཁེ་ལས་འདུས་པའི་རྒྱལ་སྤྱིའི་ཁེ་ལས་མང་བོའི་བློ་ཁ་བཀུག་ཡོད།
འགྲེམ་སྟོན་ཚོགས་འདུའི་སྐབས་སུ། དབྱི་རག་རྡོ་སྣུམ་པུའུ་ཡི་པུའུ་ཀྲང་གཞོན་པ་པཱ་ཞི་མའོ་མུའུ་ཧན་མའོ་ཏི་ཀྲུང་གོའི་ཁེ་ལས་ཀྱི་འགྲེམ་སྟོན་སྟེགས་བུར་ཡོང་ནས་ལྟ་སྐོར་བྱས། ཁོས་གསར་འགོད་པར་བཤད་རྒྱུར། དབྱི་རག་སྲིད་གཞུང་གིས་འགྲེམ་སྟོན་ཚོགས་འདུ་ལ་བརྟེན་ནས་སྔར་ལས་མང་བའི་འགྲན་རྩོས་ནུས་པ་ལྡན་པའི་རྒྱལ་སྤྱི་དང་ས་གནས་རང་གི་ནུས་ཁུངས་ཁེ་ལས་ནང་འགུག་བྱས་ཏེ། དབྱི་རག་ནས་ནུས་ཁུངས་དངུལ་གཏོང་མཉམ་ལས་བྱེད་པ་དང་། དབྱི་རག་གི་ནུས་ཁུངས་ཀྱི་གྲུབ་ཚུལ་ལེགས་བསྒྱུར་ལ་སྐུལ་འདེད་བཏང་ནས། དཔལ་འབྱོར་ཚུལ་བསྒྱུར་དམིགས་འབེན་མངོན་འགྱུར་བྱེད་པར་རེ་བཞིན་ཡོད་ཟེར།
དབྱི་རག་དབུས་ཕྱོགས་རྡོ་སྣུམ་ཀུང་ཟིའི་སྤྱི་གཉེར་བ་མུའུ་ཧན་མའོ་ཏི་ཡཱ་ཞིན་གྱིས་བསྟན་དོན། ཉེ་བའི་ལོ་འགའི་རིང་ལ། ཀྲུང་གོའི་ཁེ་ལས་དང་དབྱི་རག་ཁེ་ལས་ཀྱིས་མཉམ་ལས་དམ་ཟབ་བྱས་ཏེ། རྡོ་སྣུམ་དང་སོལ་རླངས་ཀྱི་གསར་སྤེལ་དང་ལག་རྩལ་གསར་གཏོད་སོགས་ཁྱབ་ཁོངས་ནས་གྲུབ་འབྲས་གཡུར་དུ་ཟ་བ་བླངས་ཡོད་ལ། དེས་དབྱི་རག་གི་དཔལ་འབྱོར་ཚུལ་བསྒྱུར་དང་ས་གནས་མང་ཚོགས་ཀྱི་འཚོ་བ་ལེགས་བཅོས་བྱེད་པར་སྐུལ་འདེད་གཏོང་བའི་ཐད་བྱས་རྗེས་གལ་ཆེན་བཞག་ཡོད་ཟེར།
དབྱི་རག་ནི་རྡོ་སྣུམ་ཕྱིར་གཏོང་རྒྱལ་ཁབ་རྩ་འཛུགས་ཀྱི་རྡོ་སྣུམ་ཐོན་སྐྱེད་བྱེད་པའི་རྒྱལ་ཁབ་ཆེན་མོ་ཨང་གཉིས་པ་ཡིན་ཞིང་། མ་བཅོས་རྡོ་སྣུམ་གྱི་ཕྱིར་གཏོང་ཡོང་འབབ་ཀྱིས་རྒྱལ་ཁབ་ནོར་སྲིད་ཡོང་འབབ་ཀྱི་བརྒྱ་ཆའི་དགུ་བཅུའི་ཡན་ཟིན་ཡོད། རྡོ་སྣུམ་ཕྱིར་གཏོང་རྒྱལ་ཁབ་རྩ་འཛུགས་ཀྱི་གཞི་གྲངས་ལྟར་ན། དབྱི་རག་ནས་རྩད་ཆོད་པའི་མ་བཅོས་རྡོ་སྣུམ་གྱི་གསོག་ཚད་ཧ་ལམ་ཟོ་ཁྲག་ཁྲག་གཅིག་དང་ཐེར་ཆེན་བཞི་ཐེར་འབུམ་ལྔ་ཙམ་ཡོད་པ་རེད།
བསོད་ནམས་ཚེ་རིང་གིས་བསྒྱུར།
