ཚེས་བཅོ་བརྒྱད་ཉིན་ཧན་གོའི་དམག་ཕྱོགས་ཀྱིས་བསྒྲགས་པ་ལྟར་ན། ཧན་གོའི་སྐམ་དམག་གིས་ཉིན་དེར་ཧན་གོ་དང་ཁྲའོ་ཞན་གྱི་དམག་དོན་རྒྱལ་མཚམས་ཉེ་འདབས་ནས་ལོ་རྒྱུས་སྟེང་གཞི་རྒྱ་ཆེས་ཆེ་བའི་མེ་སྒྱོགས་གཏོང་འཕེན་གྱི་སྦྱོང་བརྡར་བྱ་འགུལ་སྤེལ་བ་རེད།
བསྒྲགས་པ་ལྟར་ན། ཉིན་དེའི་ཕྱི་དྲོའི་དུས་ཚོད་ལྔ་ཡས་མས་སུ། ཧན་གོའི་དམག་ཕྱོགས་ཀྱིས་ཧན་གོ་དང་ཁྲའོ་ཞན་གྱི་དམག་དོན་རྒྱལ་མཚམས་ཀྱི་ཧན་གོའི་ཕྱོགས་ནས་མེ་སྒྱོགས་གཏོང་འཕེན་བྱེད་པའི་སྦྱོང་བརྡར་བྱ་འགུལ་དུས་མཉམ་དུ་སྤེལ། སྦྱོང་བརྡར་དེར་བསྡོམས་པས་མེ་སྒྱོགས་དམག་དཔུང་རུ་ཆེན་ཞེ་དགུ་ཞུགས་པ་དང་། མེ་སྒྱོགས་སུམ་བརྒྱ་ལྷག་གཏོང་འཕེན་བྱས། དེའི་གཞི་རྒྱ་ནི་ཧན་གོའི་སྐམ་དམག་གི་མེ་སྒྱོགས་སྦྱོང་བརྡར་གྱི་ལོ་རྒྱུས་སྟེང་ཆེས་ཆེ་བ་ཡིན།
བསྒྲགས་པ་ལྟར་ན། ཐེངས་འདིའི་སྦྱོང་བརྡར་ནི་ཁྲའོ་ཞན་གྱིས་ཧན་གོ་དང་ཁྲའོ་ཞན་གྱི་ནུབ་ཕྱོགས་རྒྱལ་མཚམས་ས་ཁུལ་ནས་མེ་སྒྱོགས་གཏོང་འཕེན་བྱས་པའི་དོན་རྐྱེན་བྱུང་ནས་ལོ་ངོ་གཅིག་འགོར་བའི་སྐབས་སུ་སྤེལ་བ་དང་། ཧན་གོའི་སྐམ་དམག་གི་བྱ་སྤྱོད་དེའི་དམིགས་ཡུལ་ནི་ཁྲའོ་ཞན་གྱི་དཀྲུག་འཕེན་བྱ་སྤྱོད་ལ་རྒོལ་ལན་སྤྲོད་ཤུགས་ཇེ་ཆེར་གཏོང་བའི་ཆེད་དུ་ཡིན་ཟེར།
