༢༠༡༨ལོའི་ཐེམ་ཆེན་རྫོང་གི་དྲུག་པའི་ཀླུ་རོལ་ཡུལ་སྐོར་རིག་གནས་སྒྱུ་རྩལ་དུས་ཆེན་དེ། སྟོན་ཟླ་བརྒྱད་པའི་དུས་བཟང་དང་བསྟུན་ནས་རྟ་མཆོག་གི་ཕ་སའམ་ལྷ་མཚོའི་འབྱུང་ཡུལ་དུ་གྲགས་པའི་ཐེམ་ཆེན་རྩྭ་ཐང་དུ་གཟབ་རྒྱས་ངང་བསྡུས།
དྲུག་པའི་ཀླུ་རོལ་གྱི་ཡུལ་སྐོར་རིག་གནས་སྒྱུ་རྩལ་དུས་ཆེན་ནི་ཐེམ་ཆེན་རྫོང་གིས་ལོ་རེ་བཞིན་བསྡུ་བཞིན་པའི་རིག་གནས་སྒྱུ་རྩལ་གལ་ཆེན་ཞིག་ཡིན་ལ། བྱ་འགུལ་འདི་བརྒྱུད་དེ་མི་རིགས་རིག་གནས་དར་སྤེལ་དང་སྲོལ་རྒྱུན་རིག་གནས་སྔོག་འདོན་བྱས་ཏེ་ཕྱོགས་ཡོངས་ནས་ཏང་གི་ཚོགས་ཆེན་བཅུ་དགུ་བའི་རིག་གནས་ལས་རིགས་དང་རིག་གནས་འཕེལ་རྒྱས་ཀྱི་བསམ་ཕྱོགས་གསར་བ་དང་བཀོད་སྒྲིག་གསར་བ། རེ་བ་གསར་བ་ལག་ལེན་དོན་འཁྱོལ་བྱེད་པའི་བྱ་འགུལ་ཞིག་ཡིན།
སྤྱི་ཟླ་བརྒྱད་པའི་ཚེས་བརྒྱད་ཉིན་གྱི་སྔ་དྲོའི་ཆུ་ཚོད་དགུའི་སྟེང་། རིག་གནས་སྒྱུ་རྩལ་དུས་ཆེན་གྱི་འགོ་བརྩམས་པ་དང་ཐོག་མར་འབྲེལ་ཡོད་འགོ་ཁྲིད་ཀྱིས་གཏམ་བཤད་གལ་ཆེན་གནང་། མཚོ་ནུབ་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཀོན་ཅུའུ་ཡིས་རིག་གནས་སྒྱུ་རྩལ་དུས་ཆེན་གྱི་འགོ་རྩོམ་ཁྱབ་བསྒྲགས་བྱས།
དེ་ནས་ས་གནས་ཀྱི་གླུ་བ་གླུ་མ་གཙོ་བྱས་ཏེ། གདན་ཞུའི་གླུ་བ་གླུ་མ་དག་གིས་སྔ་གཞུག་ཏུ༼ དམངས་གླུ་ ༽ དང ༼ ཞབས་བྲོ ༽ ༼ རྡུང་ལེན ༽ ༼ གླུ་དབྱངས ༽ ༼ ཤོམ་འགྲོ ༽ སོགས་ནང་དོན་ཕུན་སུམ་ཚོགས་པའི་རིག་རྩལ་འཁྲབ་སྟོན་བྱས་པ་ལ་རྒྱ་ཆེའི་མང་ཚོགས་ཀྱིས་དགའ་བསུ་ཚད་མེད་ཐོབ།
ཐེངས་འདིའི་གདན་ཞུའི་གླུ་མ་མགོ་ལོག་པད་མཚོ།
བྱ་འགུལ་འདི་སྤེལ་བ་བརྒྱུད་ནས་ས་གནས་ཀྱི་མི་རིགས་རིག་གནས་དང་སྲོལ་རྒྱུན་རིག་གནས་དར་སྤེལ། མི་རིགས་ཕན་ཚུན་བར་གྱི་མཐུན་སྒྲིལ་བཅས་ལ། སྔར་ལས་ལྷག་པའི་གསོན་ཤུགས་གསར་བ་ཞིག་བསྣན།
གསར་འགོད་པ། སྒོ་མེ་དོན་ཚེ། བོང་སྟག་རི་ལུ། ལྕགས་འབུམ་རྒྱལ།
