ཉེ་ལམ། གསར་འགོད་པས་ཡུས་ཧྲུའུ་བོད་རིགས་རང་སྐྱོང་ཁུལ་ཏང་ཨུའི་གཞུང་སྒྲུབ་ཁང་ནས་རྒྱུས་ལོན་བྱུང་བ་ལྟར་ན། སྔོན་ཆད་རིན་པོ་མཚོའི་ནང་དུ་ཁྲུང་ཁྲུང་སྐེ་ནག་ཉེར་གཉིས་ཡོད་ཅིང་ད་ལྟ་ཁྲུང་ཁྲུང་སྐེ་ནག་གི་གྲངས་ཉིས་བརྒྱ་བཅུ་དྲུག་ལ་སླེབས་ཡོད་ཅིང་། སྔར་གྱི་ཁྲུང་ཁྲུང་མགོ་ཁྲ་བརྒྱད་བརྒྱ་ཡོད་པ་དེང་གི་ཆར་ཁྲི་གཅིག་ལྷག་ལ་བུད་ཡོད། ཡུས་ཧྲུའུ་གྲོང་ཁྱེར་དང་སྐྱེ་རྒུ་གྲོང་རྡལ་གཉིས་ཀྱི་མཁའ་དབུགས་གཙང་ཚད་བརྒྱ་ཆའི་གོ་དགུ་ཡན་ལ་སླེབས་ཡོད་ལ། དེ་ནི་ཞིང་ཆེན་ཡོངས་ནསPMགཉིས་དང་གྲངས་ཆུང་ལྔའི་དམིགས་ཚད་ལ་སླེབས་པའི་གྲོང་ཁྱེར་གཅིག་པུ་ཡིན། དེ་མིན་ད་དུང་ཡུས་ཧྲུའུ་གྲོང་ཁྱེར་མངའ་ཁོངས་ཀྱི་གྲོང་ཁྱེར་དང་རྫོང་དྲུག་གི་རྫོང་མཁར་གནས་སའི་ཐུན་མོང་འཐུང་ཆུའི་སྤུས་ཚད་དམིགས་ཚད་བརྒྱ་ཆའི་བརྒྱ་ལ་སླེབས་ཡོད་པ་དང་། ས་ངོས་ཀྱི་ཆུའི་སྤུས་ཚད་དམིགས་ཚད་བརྒྱ་ཆའི་བརྒྱ་ལ་སླེབས་ཡོད། ཉེ་བའི་ལོ་འདི་དག་གི་རིང་ལ། ཡུས་ཧྲུའུ་ཁུལ་གྱིས་ཐོག་མཐའ་བར་གསུམ་ཀུན་ཏུ་རྒྱལ་ཁབ་སྐྱེ་ཁམས་བདེ་འཇགས་ཀྱི་ལྕགས་རི་བསྐྲུན་པའི་ཆབ་སྲིད་ཀྱི་འོས་འགན་དང་ལོ་རྒྱུས་ཀྱི་འགན་འཁྲི་གཡོལ་མེད་ཕྲག་སྟེང་དུ་བླངས་ནས། སྐྱེ་ཁམས་དཔལ་ཡོན་འཛུགས་སྐྲུན་ལ་ཕན་འབྲས་མངོན་གསལ་བླངས་ཡོད།
རྨ་འབྲི་རྫ་གསུམ་འབྱུང་ཡུལ་གྱི་འགོ་ཁུངས་སུ་བསྔགས་པའི་ཡུས་ཧྲུའུ་བོད་རིགས་རང་སྐྱོང་ཁུལ་གྱིས་ལོ་ངོ་དུ་མའི་རིང་ལ། སྐྱེ་ཁམས་ཁུལ་འཛུགས་སྐྲུན་དང་། ལྗང་མདོག་དང་སྐྱེ་ཁམས་ལ་བརྟེན་ནས་རྒྱལ་ཁབ་ལ་དྲིན་ལན་གཞལ་བའི་འདུ་ཤེས་རང་རྒྱུད་ལ་བཅངས་ཏེ། སྐྱེ་ཁམས་ཁོར་ཡུག་སྲུང་སྐྱོབ་ལས་དོན་འདི་ཉིད་ཆབ་སྲིད་ཆེ་ཤོས་དང་འོས་འགན་ལྕི་ཤོས། སྒུལ་ཤུགས་འཛོམས་ཤོས། དམངས་ཚིས་ལེགས་ཤོས་བཅས་སུ་བརྩི་བ་རྒྱུན་འཁྱོངས་བྱས་ནས། ཁྱོན་ཡོངས་དང་ཁྱབ་ཆེ་བའི་སྒོ་ནས་རྒྱུན་རྣམ་གསར་བའི་འོག་གི་སྐྱེ་ཁམས་ཁོར་ཡུག་སྲུང་སྐྱོབ་ཀྱི་བྱེད་ཕྱོགས་གསར་བ་དངོས་འབེབས་དོན་འཁྱོལ་བྱས་ནས། དེ་བསྟུན་གྱི་ཕན་འབྲས་མངོན་གསལ་བླངས། སྐྱེ་ཁམས་དམངས་དམག་དང་སྐྱེ་ཁམས་ལྟ་སྲུང་བ་སོགས་བསྐོ་འཇོག་ལ་བརྟེན་ནས་རྒྱ་ཆེ་བའི་རོང་འབྲོག་མང་ཚོགས་ཀྱི་བརྩོན་སེམས་བསྐྱེད་དེ། སྐྱེ་ཁམས་ཁོར་ཡུག་སྲུང་སྐྱོབ་ལས་སྒོའི་ཁྲོད་ཞུགས་པར་སྐུལ་འདེད་བཏང་བའི་དུས་མཚུངས་སུ། ས་གནས་མི་དམངས་མང་ཚོགས་ལ་སྐྱེ་ཁམས་སྲུང་སྐྱོབ་དང་སྒྲིག་ལུགས་བཅོས་སྒྱུར་ཁྲོད་ཀྱི་ཁེ་ཕན་ལོངས་སུ་སྤྱོད་ཐུབ་པར་འབད་དེ། རི་ལྗང་ཆུ་དྭངས་གསེར་རི་དངུལ་རི་ཡིན་པའི་འདུ་ཤེས་ལ་གོ་བ་ཟབ་མོ་འདྲོངས་པར་བྱས།
རྨ་འབྲི་རྫ་གསུམ་འབྱུང་ཡུལ་གྱི་སྐྱེ་ཁམས་སྲུང་སྐྱོབ་དང་འཛུགས་སྐྲུན་སྐབས་དང་པོའི་སྤྱིའི་འཆར་འགོད་ལས་རིམ་ཉེར་གཉིས་ཀྱི་ཁྲོད་དུ། ཡུས་ཧྲུའུ་ཁུལ་གྱིས་ཁྱོན་བསྡོམས་ལས་གཞི་བཅུ་བདུན་ལག་བསྟར་བྱས་ཤིང་། ལག་བསྟར་མ་དངུལ་སྒོར་ཐེར་འབུམ་གསུམ་དང་དུང་ཕྱུར་བདུན་བྱེ་བ་བརྒྱད་ལ་སླེབས་ཡོད་ཅིང་། དེས་སྤྱིའི་འཆར་འགོད་མ་དངུལ་སྒོར་ཐེར་འབུམ་བདུན་དང་དུང་ཕྱུར་ལྔའི་ཁྲོད་བརྒྱ་ཆའི་ལྔ་བཅུ་ཟིན་ཡོད། རྨ་འབྲི་རྫ་གསུམ་འབྱུང་ཡུལ་གྱི་སྐྱེ་ཁམས་སྲུང་སྐྱོབ་དང་འཛུགས་སྐྲུན་སྐབས་གཉིས་པའི་འཆར་འགོད་རྒྱ་ཁྱོན་ལ་སྤྱི་ལེ་གྲུ་བཞི་མ་འབུམ་གཅིག་དང་ཁྲི་དགུ་སྟོང་བརྒྱད་ཡོད་ཅིང་། དེས་སྐབས་གཉིས་པའི་འཆར་འགོད་རྒྱ་ཁྱོན་གྱི་ཕྱེད་ཀ་ཟིན་ཡོད། ཉིས་སྟོང་བཅུ་བཞི་ལོ་ནས་ཉིས་སྟོང་བཅུ་བདུན་ལོའི་བར་དུ་ཡུས་ཧྲུའུ་ཁུལ་ཡོངས་ལ་རྒྱལ་ཁབ་ཀྱིས་དངུལ་གཏོང་དང་ཁ་གསབ་མ་དངུལ་སྒོར་ཐེར་འབུམ་གསུམ་དང་དུང་ཕྱུར་གསུམ་བྱེ་བ་གསུམ་ས་ཡ་ལྔ་ལྔ་བཏང་ནས། རི་བཀག་ནགས་འདེབས་དང་བརླན་ས་སྲུང་སྐྱོབ། ས་ནག་བཅོས་སྐྱོང་། བྱེ་འགོག་རྩྭ་འདེབས། བྱེ་འགྱུར་ས་ཆ་འགོག་བཅོས། རྩྭ་ཐང་གི་ནགས་ལས་ལ་གནོད་པའི་སྲིན་འབུ་འགོག་སྲུང་དང་ཚོད་འཛིན་བྱེད་པ། སྐྱེ་ཁམས་ཕྱུགས་ལས་ཀྱི་རྨང་གཞིའི་སྒྲིག་ཆས་འཛུགས་སྐྲུན་སོགས་ཀྱི་ལས་གཞི་རབས་དང་རིམ་པ་ལག་བསྟར་བྱས།
གོང་གསལ་གྱི་ལས་གཞི་རྣམས་རིམ་པར་ལག་བསྟར་བྱས་པའི་དུས་མཚུངས་སུ། རང་བྱུང་ནགས་ཐོན་ཁུངས་སྲུང་སྐྱོབ་བཟོ་སྐྲུན་དང་རྨོ་བསྐྱུར་ནགས་འདེབས་བཟོ་སྐྲུན། གནད་སའི་སྤྱི་ཕན་ནགས་ལས་བཟོ་སྐྲུན། རྨ་འབྲི་རྫ་གསུམ་འབྱུང་ཡུལ་གྱི་སྐྱེ་ཁམས་སྲུང་སྐྱོབ་དང་འཛུགས་སྐྲུན་བཟོ་སྐྲུན་སྐབས་དང་པོ་དང་གཉིས་པ་སོགས་ནགས་ལས་བཟོ་སྐྲུན་གཙོ་བོ་ལག་བསྟར་བྱས་ཏེ། རྒྱལ་དབང་ནགས་ར་དང་། ཞང་དང་སྡེ་བ། དགོན་སྡེ། ནགས་སྲུང་བ་བཅས་གནས་བཞི་གཞི་གཅིག་ཅན་གྱི་སྲུང་སྐྱོབ་མ་ལག་ཐོག་མར་གྲུབ་པར་མ་ཟད། སློབ་གྲྭ་དང་སྨན་ཁང་། སྡོད་དམངས་ཀྱི་ར་སྐོར། སྤྱི་གླིང་། ནགས་ར་སོགས་ས་གནས་རེ་གཉིས་ཀྱི་ལྗང་མདོག་བྱ་བ་ཡོངས་འགྲུབ་བྱས་ནས། སྤྱི་ཆིངས་བརྒྱ་དང་ཉེར་བརྒྱད་དང་གྲངས་ཆུང་དགུ་ཡི་ས་ཁྱོན་ལ་ལྗང་བསྒྱུར་བྱས། ཁུལ་ཡོངས་ཀྱི་ནགས་ཚལ་ཁེབས་ཚད་དེ་ཉིས་སྟོང་བཞི་ལོའི་བརྒྱ་ཆའི་གཉིས་དང་གྲངས་ཆུང་བརྒྱད་ནས་ཉིས་སྟོང་བཅུ་བདུན་ལོར་བརྒྱ་ཆའི་གསུམ་དང་གྲངས་ཆུང་གཅིག་ལ་འཕར།
