ཉེ་ལམ། གསར་འགོད་པས་མཚོ་ནུབ་ཁུལ་ཡུལ་སྐོར་ཅུའུ་ནས་རྒྱུས་ལོན་བྱུང་བ་ལྟར་ན། ད་ལོའི་རྒྱལ་སྟོན་དུས་ཆེན་སྐབས་སུ། མཚོ་ནུབ་ཁུལ་གྱིས་བསྡོམས་པས་ཡུལ་སྐོར་བ་མི་ཐེངས་འབུམ་བཞི་དང་ཁྲི་དགུ་ལྷག་ལ་སྣེ་ལེན་བྱས་པ་དང་། དེ་དུས་མཉམ་ལས་བརྒྱ་ཆའི་ཉེར་བདུན་དང་གྲངས་ཆུང་བཞི་ལྷག་འཕར་ཡོད་ལ། ཡུལ་སྐོར་ཡོང་འབབ་སྒོར་དུང་ཕྱུར་གཉིས་ལྷག་ལ་སླེབས་ཡོད་པ་དང་། དེ་དུས་མཉམ་ལས་བརྒྱ་ཆའི་ཉེར་གཉིས་དང་གྲངས་ཆུང་བཞི་ལྷག་འཕར་ཡོད། སྐར་མ་རིམ་པའི་མགྲོན་ཁང་དུ་བསྡད་ཚད་བརྒྱ་ཆའི་རེ་ལྔར་སླེབས།
མཚོ་ནུབ་ཁུལ་ཡུལ་སྐོར་ཅུའུ་ཡི་ཅུའུ་ཀྲང་ཐུང་ཅན་ཀོང་གིས་མཚམས་སྦྱོར་བྱས་པ་ལྟར་ན། དུས་ཆེན་སྐབས་སུ། ཁུལ་ཡུལ་སྐོར་ཅུའུ་ཡིས་མཛེས་ལྗོངས་ཁུལ་དང་སྐར་མ་རིམ་པའི་མགྲོན་ཁང་། ཞིང་སྡེའི་ཡུལ་སྐོར་བྱེད་ས། ཡུལ་སྐོར་བ་སྐྱེལ་འདྲེན་ཁེ་ལས་བཅས་ལ་ཞིབ་བཤེར་ནན་མོ་བྱས་པ་དང་། ཞིབ་བཤེར་བྱས་ཏེ་རྙེད་པའི་གནད་དོན་དག་དུས་ཐོག་ཏུ་དག་ཐེར་ལེགས་བཅོས་བྱེད་དགོས་པའི་རེ་བ་བཏོན་པ་ཡིན། དེ་མིན། འབྲེལ་ཡོད་སྡེ་ཁག་གི་ལས་བྱེད་མི་སྣ་ཡུལ་སྐོར་ལས་རིགས་སྡེ་ཁག་ཏུ་ཟབ་ཞུགས་བྱས་ཏེ་ཡུལ་སྐོར་ཁྲོམ་རའི་ལྟ་སྐུལ་དོ་དམ་ལ་ཤུགས་བསྣན་པ་དང་། དཔལ་ཡོན་ཡུལ་སྐོར་ནི་སྤུས་ལེགས་འཚོ་བ་མཐོར་འདེགས་གཏོང་བའི་ཆེད་དུ་ཡིན་ཞེས་པ་སོགས་ཀྱི་བྱ་འགུལ་སྤེལ་ཏེ། དཔལ་ཡོན་ཡུལ་སྐོར་དྲིལ་སྒྲོག་དང་སྣེ་ཁྲིད་བྱ་བར་ཤུགས་བསྣན་པ་དང་། ཡུལ་སྐོར་དང་ལས་རྣམ་གསར་པ་མཉམ་བསྲེས་བྱེད་པར་སྐུལ་འདེད་དང་ཡུལ་སྐོར་དཔྱད་ཞིབ་དང་ཡུལ་སྐོར་སྤུས་ཚད་ལ་སྔར་ལས་མཐོང་ཆེན་བྱས་ཏེ་ཡུལ་སྐོར་བ་དག་གི་ཡུལ་སྐོར་ཐད་ཀྱི་དགོས་མཁོ་བསྐངས་པ་དང་། དོན་དངོས་དང་མཐུན་པའི་སྒོ་ནས་དུས་ཆེན་སྐབས་ཀྱི་ཡུལ་སྐོར་ཁྲོམ་རའི་འཁོར་སྐྱོད་བདེ་འཇགས་ལ་འགན་སྲུང་བྱས་ཟེར།
