ཉེ་བའི་ལོ་འགའི་རིང་ལ། མཚོ་ནུབ་ཁུལ་གྱིས་ཀྲུང་དབྱང་སྔོན་རྩིས་ཁྲོད་ཀྱི་མ་དངུལ་སྒོར་དུང་ཕྱུར་གཅིག་ལྷག་བཏང་སྟེ། མིས་བཟོས་གཟན་རྩྭའི་རྟེན་གཞི་འཛུགས་སྐྲུན་དང་། ཨ་བྲའི་གནོད་པ་འགོག་བཅོས། བྱེ་འགོག་ནགས་གསོ། ས་ནག་ཐང་བཅོས་སྐྱོང་། བརླན་ས་སྲུང་སྐྱོབ་དང་འཛུགས་སྐྲུན་སོགས་ཕྱོགས་བསྡུས་བཅོས་སྐྱོང་ལས་གཞི་ལག་བསྟར་བྱས།
མཚམས་སྦྱོར་བྱས་པ་ལྟར་ན། མིག་སྔའི་བར། ཉིས་སྟོང་བཅུ་དྲུག་ལོ་ནས་ཉིས་སྟོང་བཅུ་བདུན་ལོའི་བར་གྱི་ལས་གཞིའི་འཛུགས་སྐྲུན་ཡོངས་གྲུབ་བྱས་ཡོད་པ་དང་། ཉིས་སྟོང་བཅོ་བརྒྱད་ལོའི་ལས་གཞིའི་འཛུགས་སྐྲུན་མགྱོགས་མྱུར་སྒོས་སྤེལ་བཞིན་ཡོད། ལས་གཞིའི་འཛུགས་སྐྲུན་ཡོངས་འགྲུབ་བྱས་རྗེས། བརླན་ས་མུའུ་ས་ཡ་གཅིག་དང་འབུམ་གསུམ་ཁྲི་བརྒྱད་དང་། མིས་བཟོས་གཟན་རྩྭའི་རྟེན་གཞི་དང་བྱེ་འགོག་ནགས་གསོ་མུའུ་ཁྲི་བཞི་ལྷག་གྲུབ་པར་བྱེད་པ་དང་། ཨ་བྲའི་གནོད་པ་འགོག་བཅོས་དང་ས་ནག་ཐང་བཅོས་སྐྱོང་། བྱེ་འགྱུར་རྩྭ་ས་མུའུ་ས་ཡ་བཞི་དང་འབུམ་བཞི་ཁྲི་དགུ་བཅོས་སྐྱོང་བྱས་ཏེ། ཁུལ་ཁོངས་ཀྱི་ས་ཆུ་ཤོར་བ་སྲུང་འཛིན་དང་། སྐྱེ་ཁམས་མ་ལག་སྲུང་སྐྱོབ། རོང་འབྲོག་མང་ཚོགས་ཀྱི་ཐོན་སྐྱེད་འཚོ་བའི་ཆ་རྐྱེན་ལེགས་བཅོས་བྱེད་ཐུབ།