ཐེམ་ཆེན་རྫོང་གིས་སྐྱེ་ཁམས་སྲུང་སྐྱོབ་ཀྱི་ལས་གཞི་ནན་མོར་བཟུང་སྟེ་རྩྭ་ཐང་གི་ས་ཆུའི་རྣམ་པ་ཇེ་ལེགས་སུ་བཏང་།
2019.01.09 ཁུངས། མཚོ་སྔོན་གསར་འགྱུར་དྲ་བ། ཀློག་གྲངས། 41

ཉེ་ལམ་གསར་འགོད་པས་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཐེམ་ཆེན་རྫོང་ཕྱུགས་ལས་ཆུ་བེད་ཅུའུ་ནས་རྒྱུས་ལོན་བྱུང་བ་ལྟར་ན། རྩྭ་ཐང་གི་སྐྱེ་ཁམས་ཁོར་ཡུག་སྲུང་སྐྱོབ་དང་ཕྱུགས་ལས་གོ་རིམ་ལྡན་པར་འཕེལ་རྒྱས་ལ་གཏོང་ཆེད།  ད་ལོར་ཐེམ་ཆེན་རྫོང་གིས་ཕྱུགས་སྐྱུར་རྩྭ་འདེབས་ཀྱི་ལས་གཞི་དང་། མཚོ་སྔོན་མདོ་ལ་རི་བོའི་སྐྱེ་ཁམས་ཁོར་ཡུག་སྲུང་སྐྱོབ་དང་ཕྱོགས་བསྡུས་བཅོས་སྐྱོང་འཛུགས་སྐྲུན་སོགས་ཀྱི་ལས་གཞི་གཙོ་བོ་ལ་ཤུགས་བསྣན་ཏེ་ཕྱོགས་ཡོངས་ནས་མཐོ་སྒང་གི་ཨ་བྲ་ལ་གཏན་འགོག་དང་རྩྭ་ཐང་བྱེ་འགྱུར་ལ་བཅོས་སྐྱོང་བྱས་ཏེ་ཕྱུགས་ལས་གོང་སྤེལ་བྱ་བ་གོ་རིམ་ཡོད་པའི་སྒོ་ནས་སྤེལ། 

ཐེམ་ཆེན་རྫོང་ནི་མཚོ་ནུབ་ཁུལ་གྱི་ཕྱུགས་ལས་འཕེལ་རྒྱས་ཀྱི་ས་ཁུལ་གཙོ་བོ་ཡིན་ལ། ཐོན་ལས་སྒྲིག་གཞི་གཙོ་བོ་ནི་ཕྱུགས་ལས་ཡིན། དུས་ཡུན་རིང་བོར་གནམ་གཤིས་དང་མི་སོགས་ཀྱིས་གནོད་འཚེ་ཐེབས་པའི་རྐྱེན་གྱིས་རྩྭ་ཐང་ཉམས་ཞན་དུ་གྱུར་ཏེ་གཞི་རྒྱ་ཇེ་ཆུང་ལ་བྱིན། ཨ་བྲའི་གནོད་པ་ནི་ས་ཁུལ་དེའི་སྐྱེ་ཁམས་ཁོར་ཡུག་དང་ཕྱུགས་ལས་འཕེལ་རྒྱས་ལ་གནོད་འཚེ་བཟོ་བའི་རྒྱུ་རྐྱེན་གཙོ་བོ་ཡིན་པས་ཨ་བྲའི་གནོད་འཚེ་གཏན་འགོག་བྱས་ཏེ་རྩྭ་ས་ཇེ་ལེགས་ལ་གཏོང་རྒྱུ་ནི་ཐེམ་ཆེན་རྫོང་གི་སྐྱེ་ཁམས་སླར་གསོ་བྱེད་པ་དང་དཔལ་འབྱོར་འཕེལ་རྒྱས་སུ་གཏོང་བའི་གནད་འགག་རེད།

2018ལོར་ཐེམ་ཆེན་རྫོང་གིས་མཚོ་སྔོན་མདོ་ལ་རི་བོའི་སྐྱེ་ཁམས་ཁོར་ཡུག་སྲུང་སྐྱོབ་དང་ཕྱོགས་བསྡུས་ལེགས་བཅོས་འཛུགས་བསྐྲུན་ལས་གཞི་ལག་བསྟར་གྱི་གོ་སྐབས་དམ་འཛིན་བྱས་ཏེ་སྒོར་ས་ཡ་དྲུག་དང་འབུམ་ལྔ་ལྷག་བཏང་སྟེ་རྩྭ་ཐང་ལ་གནོད་འཚེ་གཏོང་བཞིན་པའི་སྐྱེ་དངོས་གཏན་འགོག་བྱས། ས་ནག་ཐང་བཅོས་སྐྱོང་དང་རྩྭ་བཏབ་པ་སོགས་ཀྱི་ཐམས་ལམ་བརྒྱུད་དེ་རྩྭ་ས་ཉམས་ཞན་དང་ས་ཆུ་ཤོར་བ་སྲུང་འཛིན་བྱས་པས། རིམ་གྱིས་རྩྭ་ཐང་གི་སྐྱེ་ཁམས་མ་ལག་ཇེ་ལེགས་སུ་འགྲོ་བར་ཕན་ཐོགས་ཆེན་པོ་བྱུང་།