ཟླ་བརྒྱད་པའི་ཚེས་དགུ་ཉིན། མཚོ་སྔོན་དང་བོད་ལྗོངས། སི་ཁྲོན། ཡུན་ནན། ཀན་སུའུ་བཅས་འབྲེལ་མཚམས་ས་ཁུལ་གྱི་ཁུལ་དཔོན་དང་གྲོང་ཁྱེར་འགོ་གཙོའི་མཉམ་ཞུགས་གྲོས་ཚོགས་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དུ་བསྡུས།
རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་སློབ་གསོ་ཚན་རྩལ་ཟི་དང་མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་འབྲེལ་ཡོད་འགོ་ཁྲིད་པ་གདན་ཞུས་ལྟར་ཚོགས་འདུར་ཞུགས་ནས་གཏམ་བཤད།
མགོ་ལོག་བོད་རིགས་རང་སྐྱོང་ཁུལ་གྱི་ཏང་སྲིད་འགོ་ཁྲིད་པས་ཐེངས་འདིའི་ཁུལ་གྲོང་འགོ་གཙོའི་མཉམ་ཞུགས་ཚོགས་འདུར་འགོ་འཛིན་དང་ཤིས་ཚིག་ཕུལ།
མཉམ་འདྲེས་དང་གསར་གཏོད།འཕེལ་རྒྱས་བཅས་བརྗོད་དོན་ཡིན་པའི་མཚོ་སྔོན་དང་བོད་ལྗོངས།སི་ཁྲོན།ཡུན་ནན།ཀན་སུའུ་བཅས་འབྲེལ་མཚམས་ས་ཁུལ་གྱི་ཁུལ་དཔོན་དང་གྲོང་ཁྱེར་འགོ་གཙོའི་མཉམ་ཞུགས་གྲོས་ཚོགས་ཐེངས་དྲུག་པ་ཟླ་བརྒྱད་པའི་ཚེས་དགུའི་ཉིན་གྱི་སྔ་དྲོའི་དུས་ཚོད་དགུའི་སྟེང་མགོ་ལོག་བོད་རིགས་རང་སྐྱོང་ཁུལ་རྨ་ཆེན་རྫོང་དུ་ཚོགས།རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་སློབ་གསོ་ཚན་རྩལ་ཟི་དང་པེ་ཅིན་ནགས་ལས་སློབ་ཆེན་རྩྭ་ལས་དང་རྩྭ་ཐང་རིག་པའི་སློབ་གླིང་།ཀྲུང་གོ་ཚན་རིག་གླིང་ནུབ་བྱང་མཐོ་སྒང་སྐྱེ་དངོས་ཞིབ་འཇུག་ཁང་།མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་།ཞིང་ཆེན་སྤྱི་བདེ་ཐིན། ཞིང་ཆེན་འཛུགས་སྐྲུན་ཐིན།ཞིང་ཆེན་དབུལ་སྐྱོར་གསར་སྤེལ་ཅུའུ་སོགས་ཀྱི་འབྲེལ་ཡོད་འགོ་ཁྲིད་པ་དང་། ཆེད་ལས་མཁས་པ། སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དང་བོད་རང་སྐྱོང་ལྗོངས་ཆབ་མདོ་གྲོང་ཁྱེར།ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ།ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཁུལ།གཞན་རྨ་ལྷོ་བོད་རིགས་རང་སྐྱོང་ཁུལ་དང་ཡུས་ཧྲུའུ་བོད་རིགས་རང་སྐྱོང་ཁུལ།མཚོ་ལྷོ་བོད་རིགས་རང་སྐྱོང་ཁུལ་བཅས་ཀྱི་འབྲེལ་ཡོད་འགོ་ཁྲིད་པ་གྲོས་ཚོགས་ལ་ཞུགས། མགོ་ལོག་ཁུལ་ཨུ་དང་ཁུལ་མི་དམངས་སྲིད་གཞུང་གི་འགོ་གཙོས་གྲོས་ཚོགས་སྟེང་ཤིས་ཚིག་ཕུལ་བར་མ་ཟད་གྲོས་ཚོགས་ལ་འགོ་འཛིན་བྱས།ཚོགས་ཐོག་ཏུ་རིམ་པ་བཞིན་དུ་སི་ཁྲོན་དང་བོད་ལྗོངས།ཡུན་ནན།ཀན་སུའུ།མཚོ་སྔོན་བཅས་འབྲེལ་མཚམས་ས་ཁུལ་གྱི་ཁུལ་དང་གྲོང་ཁྱེར་གྱི་འགོ་གཙོས་བརྗེ་རེས་གཏམ་བཤད་སྤེལ།རྒྱལ་ཁབ་མི་རིགས་ལས་དོན་ཨུ་ཡོན་ལྷན་ཁང་སློབ་གསོ་ཚན་རྩལ་ཟི་དང་མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གི་འབྲེལ་ཡོད་འགོ་ཁྲིད་པ་གདན་ཞུས་ལྟར་ཚོགས་འདུར་ཞུགས་ནས་གཏམ་བཤད།
མཚོ་སྔོན་དང་བོད་ལྗོངས།སི་ཁྲོན།ཡུན་ནན།ཀན་སུའུ་བཅས་འབྲེལ་མཚམས་ས་ཁུལ་གྱི་ཁུལ་དང་གྲོང་ཁྱེར་གྱི་མགོ་གཙོའི་མཉམ་ཞུགས་ཚོགས་འདུ་ནི་ཞི་ཅིན་ཕིང་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ལག་ལེན་མཐར་ཕྱིན་བྱེད་པ་དང་།ཀྲུང་དབྱང་གི་བོད་ལྗོངས་བྱ་བའི་བཞུགས་མོལ་ཚོགས་འདུ་ཐེངས་དྲུག་པའི་དགོངས་དོན་ཁྱོན་ཡོངས་ནས་ལག་ལེན་དོན་འཁྱོལ་བྱེད་པའི་བྱེ་བྲག་གི་མངོན་སྟངས་ཤིག་ཡིན་ལ།འབྲེལ་མཚམས་ས་ཁུལ་ཕན་ཚུན་བར་གྱི་མཉམ་འབྲེལ་མཉམ་ལས་དང་གླེང་མོལ་མཉམ་ལས་ལ་སྐུལ་འདེད་གཏོང་བའི་ལས་སྟེགས་གལ་ཆེན་ཞིག་ཀྱང་ཡིན།ཉིས་སྟོང་བཅོ་ལྔ་ལོར་མཉམ་ཞུགས་ཚོགས་འདུ་ཚོགས་མགོ་བརྩམས་པའི་ཚུན་ལ་འབྲེལ་མཚམས་ས་ཁུལ་གྱི་མཉམ་ལས་ལམ་སྲོལ་སྔར་ལས་འཐུས་ཚང་དུ་སོང་ཞིང་།སྐྱེ་ཁམས་རིག་གནས་ཡུལ་སྐོར་དང་མི་ཆོས་འབྲེལ་འདྲིས་སོགས་མཚོན་བྱེད་ཡིན་པའི་དངོས་དོན་མཉམ་ལས་ཀྱི་ཁྱབ་ཁོངས་སྔར་ལས་རྒྱ་བསྐྱེད་པ་དེས་འབྲེལ་མཚམས་ས་ཁུལ་གྱི་སྤྱི་ཚོགས་འཕེལ་རྒྱས་ལ་སྐུལ་འདེད་ཀྱི་ནུས་པ་ལེགས་པོ་ཐོན་ཞིང་།ཁྱབ་ཁོངས་ས་ཁུལ་གྱི་རིགས་སོ་སོའི་མི་དམངས་མང་ཚོགས་ལ་ངེས་པ་དོན་གྱིས་ཕན་ཁེ་སྐྲུན་ཡོད།
ཐེངས་འདིའི་མཉམ་ཞུགས་ཚོགས་འདུས་མཉམ་ལས་ཀྱི་ཁྱབ་ཁོངས་རྒྱ་བསྐྱེད་པ་དང་མཉམ་ལས་ཀྱི་རྣམ་པ་གསར་སྐྲུན། མཉམ་ལས་ཀྱི་ཚད་གཞི་ཇེ་མཐོར་གཏོང་བ་བཅས་རྩ་དོན་དུ་བཟུང་ཞིང་། ཡར་སྔོན་གྱི་མཉམ་ཞུགས་ཚོགས་འདུ་ཐེངས་ལྔའི་ཉམས་མྱོང་གི་རྨང་གཞིའི་ཐོག་སྔར་ལས་སྒོ་འབྱེད་ཀྱི་བསམ་བློ་དང་དངོས་དོན་མཉམ་ལས་ཀྱི་རྣམ་པས་མཚོ་སྔོན་དང་བོད་ལྗོངས། སི་ཁྲོན། ཡུན་ནན། ཀན་སུའུ་བཅས་འབྲེལ་མཚམས་ས་ཁུལ་གྱི་ཁུལ་དང་གྲོང་ཁྱེར་བར་སྔར་ལས་ལྷག་པའི་སྒོ་ནས་ཕན་ཚུན་འབྲེལ་འདྲིས་ཀྱི་རྣམ་པ་བཟང་བོ་དང་ཕན་ཚུན་གཅིག་ལ་གཅིག་བརྟེན་གྱི་ལས་དབང་གཞི་གཅིག་ཅན་མཉམ་སྐྲུན་བྱས་ཏེ། རིགས་སོ་སོའི་མི་དམངས་མང་ཚོགས་ཀྱི་སྐྱིད་སྣང་དང་ཐོབ་སྣང་། བདེ་སྣང་བཅས་ཀྱི་ཚད་གཞི་མཐོར་འདེགས་སུ་བཏང་ཡོད། ཏང་གི་ཚོགས་ཆེན་བཅོ་བརྒྱད་པའི་ཚུན་ལ། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བློ་བརྟན་འགྱུར་མེད་ཀྱི་མགོ་ཁྲིད་འོག ད་ལྟ་མཚོ་སྔོན་དང་བོད་ལྗོངས། སི་ཁྲོན། ཡུན་ནན། ཀན་སུའུ་བཅས་འབྲེལ་མཚམས་ས་ཁུལ་གྱི་སྤྱི་ཚོགས་དཔལ་འབྱོར་སྔར་ལས་གོང་འཕེལ་བྱུང་ཞིང་། ཁྱོན་ཡོངས་འཕེལ་རྒྱས་ཀྱི་གནད་འགག་གི་དུས་རིམ་ལ་སླེབས་ཡོད་པར་མ་ཟད།མཉམ་ལས་འབྲེལ་འདྲིས་ཐད་ནས་ཀྱང་སྐས་རིམ་གསར་བར་སླེབས་ཡོད།
ཚོགས་ཐོག་ཏུ་ཁུལ་དང་གྲོང་ཁྱེར་བརྒྱད་ཀྱི་མགོ་གཙོས་བརྗོད་དོན་གཙོ་བོར་འབྲེལ་ཏེ་སོ་སོར་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་ལག་ལེན་དོན་འཁྱོལ་བྱེད་པ་དང་། ཀྲུང་དབྱང་གི་བོད་ལྗོངས་བྱ་བའི་བཞུགས་མོལ་ཚོགས་འདུ་ཐེངས་དྲུག་པའི་དགོངས་དོན་ཁྱོན་ཡོངས་ནས་ལག་ལེན་དོན་འཁྱོལ་བྱེད་པ། ས་ཁོངས་མཉམ་ལས་འཕེལ་རྒྱས་ཀྱི་གྲུབ་འབྲས་གསར་པ་དང་སྒྲུབ་སྟངས་གསར་པ། ཉམས་མྱོང་གསར་པ་བཅས་ལ་སྤྱི་བསྡོམས་བཟང་བོ་བྱས་ཏེ། སྐྱེ་ཁམས་སྲུང་སྐྱོབ་དང་ཁྱད་ལྡན་ཐོན་ལས་ཀྱི་འཕེལ་རྒྱས་བར་སྟོང་བསྐྱེད་པ། རིག་གནས་ཡུལ་སྐོར་གྱི་འཕེལ་རྒྱས་ཆེན་པོར་སྐུལ་འདེད་གཏོང་བ་དང་འགྲིམ་འགྲུལ་སྐྱེལ་འདྲེན་གྱི་ཆ་རྐྱེན་སྔར་ལས་ལེགས་བཅོས་གཏོང་བ། མཐའ་མཚམས་མཉམ་བཅོས་མཉམ་སྐྱོང་གི་སྒྲིག་ལུགས་སྔར་ལས་འཐུས་ཇེ་ཚང་དུ་གཏོང་དགོས་པ་སོགས་ཀྱི་ཐད་ནས་སྔ་རྗེས་སུ་གཏམ་བཤད། ཚང་མས་བསྟན་དོན། མཚོ་སྔོན་དང་བོད་ལྗོངས། སི་ཁྲོན། ཡུན་ནན། ཀན་སུའུ་བཅས་འབྲེལ་མཚམས་ས་ཁུལ་གྱི་ཁུལ་དང་གྲོང་ཁྱེར་ལ་མཚོན་ན་རི་ཆུ་འབྲེལ་ཞིང་མི་ཆོས་མཐུན་ལ། དམངས་སྲོལ་འདྲེས་ཤིང་རིག་གནས་ཀུན་མཐུན་ཡིན་པས་བརྟེན་ས་གཅིག་དང་མགོ་ཁུངས་གཅིག་ལ་འཁེལ་ཡོད་པ་དང་། ཀྲུང་ཧྭ་མི་རིགས་ཀྱི་ཁྱིམ་གཞི་ཆེན་མོའི་ནང་ས་ཁུལ་འཕེལ་རྒྱས་དང་དར་སྤེལ་གཏོང་བའི་འོས་འགན་ཕྲག་ཏུ་འཁུར་དགོས་ཤིང་།ཁྱོན་ཡོངས་ནས་འབྱོར་འབྲིང་སྤྱི་ཚོགས་འཛུགས་སྐྲུན་ལེགས་འགྲུབ་འབྱུང་བའི་འགན་འཁྲི་ཡིད་ལ་དམ་པོར་བཅངས་ནས་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་སྟོན་འོག་དངོས་དོན་གཉེར་བ་དང་འབད་པ་ལྷོད་མེད་བྱས་ཏེ་རིགས་སོ་སོའི་མི་དམངས་ཀྱི་ཀྲུང་གོའི་ཕུགས་འདུན་མངོན་འགྱུར་བྱེད་པར་འབད་པ་བྱ་དགོས།
ཚང་མས་བལྟས་ན། མཚོ་སྔོན་དང་བོད་ལྗོངས། སི་ཁྲོན། ཡུན་ནན། ཀན་སུའུ་བཅས་འབྲེལ་མཚམས་ས་ཁུལ་གྱི་ཁུལ་དང་གྲོང་ཁྱེར་བཅས་ཀྱིས་ལག་རྡང་མཉམ་འབྲེལ་དང་དཔུང་བ་མཉམ་གཤིབ་ཀྱིས་ས་ཁོངས་བར་ཀྱི་སྐྱེ་ཁམས་ཁོར་ཡུག་ལ་སྲུང་སྐྱོང་ལེགས་པོ་བྱེད་དགོས་པ་དང་ལྷག་པར་དུ་རྨ་ཆུའི་སྟོད་རྒྱུད་ཀྱི་རི་ཆུ་སྲུང་སྐྱོང་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ། ས་ཁོངས་མཉམ་འབྲེལ་གྱི་ལམ་ལུགས་འཛུགས་གཉེར་བྱེད་པ། མཉམ་དུ་འཕེལ་རྒྱས་ཀྱི་གོ་སྐབས་འཚོལ་ཞིབ་བྱེད་པ། འཆམ་མཐུན་བརྟན་འཇགས་ཀྱི་སྤྱི་ཚོགས་འཚོ་སྡོད་ཁོར་ཡུག་ལེགས་བཅོས་བྱེད་པ། ཞིང་ཕྱུགས་ལས་དང་སློབ་གསོ། རིག་གནས། གནས་སྐོར། མི་རིགས་མཐུན་སྒྲིལ་སོགས་ཁྱབ་ཁོངས་སོ་སོའི་མཉམ་འབྲེལ་བྱ་བར་ཤུགས་བསྣན་ཏེ་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་ཀྱི་ལམ་ཆེན་དུ་བསྐྱོད་དགོས་པ་དང་མིག་སྔའི་གནས་བབ་གསར་པ་དང་ལས་འགན་གསར་པ། བླང་བྱ་གསར་པ་བཅས་ལ་དབྱེ་ཞིབ་ནན་མོ་བྱས་ཏེ། སྔར་ལས་ཁོད་ཡངས་པ།ཚད་གཞི་མཐོན་པོའི་མཉམ་ལས་འབྲེལ་འདྲིས་ལ་སྐུལ་འདེད་གཏོང་དགོས་པར་བསྟན།
གསར་འགོད་པ། དཔའ་བརྟན་རྒྱལ་དང་དཔལ་འཛོམས།
རྩོམ་སྒྲིག་འགན་ཁུར་བ། ཕྱུག་ལོ།
ལྟ་སྐུལ་བ། དབང་གྲགས་ཚེ་རིང་།
སྤྱིའི་ལྟ་སྐུལ་བ། ཆོས་ཕྱུག་རྒྱལ།
