ཟླ9པའི་ཚེས13ཉིན། གསར་འགོད་པས་ཞིང་ཆེན་སྲིད་གཞུང་གསར་འགྱུར་གཞུང་སྒྲུབ་ཁང་གིས་སྒྲུབ་པའི《མཚོ་སྔོན་ཞིང་ཆེན་གྱིས་ལྗང་མདོག་རྩིས་ནུས་ཤེས་ལྡན་མི་སྣ་བསྡུ་རུབ་བྱེད་པའི་བྱེད་ཐབས་བཅུ》ཡི་གསར་འགྱུར་ཡོངས་བསྒྲགས་ཚོགས་འདུ་ལས་ཤེས་རྟོགས་བྱུང་བ་ལྟར་ན།  ལྗང་མདོག་རྩིས་ནུས་ཀྱི་ས་གནས་ཀྱི་ཤེས་ལྡན་མི་སྣ་གསོ་སྐྱོང་གི་ནུས་པ་དང་སྤུས་ཚད་སྔར་ལས་མཐོར་འདེགས་གཏོང་རྒྱུ་ནི་ལྗང་མདོག་རྩིས་ནུས་ཐོན་ལས་འཕེལ་རྒྱས་ལ་སྐུལ་འདེད་གཏོང་བའི་ཁ་ཚ་དགོས་གཏུགས་ཀྱི་དགོས་མཁོ་ཞིག་རེད། ཞིང་ཆེན་སློབ་གསོ་ཐིན་གྱིས《མཚོ་སྔོན་ཞིང་ཆེན་གྱིས་ལྗང་མདོག་རྩིས་ནུས་ཀྱི་ཤེས་ལྡན་མི་སྣ་བསྡུ་རུབ་བྱེད་པའི་བྱེད་ཐབས་བཅུ》ལག་བསྟར་དོན་འཁྱོལ་བྱེད་པ་གོ་སྐབས་སུ་བརྩིས་ཏེ།  ལྗང་མདོག་རྩིས་ནུས་ཐོན་ལས་འཕེལ་རྒྱས་ཀྱི་དགོས་མཁོ་དངོས་ལ་གཞི་ཚུགས་ནས་ཐོན་སྐྱེད་དང་། སློབ་སྦྱོང་། ཞིབ་འཇུག བཀོལ་སྤྱོད་བཅས་ཀྱི་མཐུན་སྦྱོར་མི་སྣ་གསོ་སྐྱོང་གི་ལམ་སྲོལ་འཐུས་ཚང་དུ་བཏང་སྟེ་གཞི་རིམ་དུ་སྐྱོད་ཐུབ་པ་དང་།  བཀོལ་ཐུབ་པ།  གནས་ཐུབ་པ་བཅས་ཀྱི་ས་གནས་ཀྱི་ཤེས་ལྡན་མི་སྣ་ཧུར་ཐག་གིས་གསོ་སྐྱོང་བྱས།

ཞིང་ཆེན་སློབ་གསོ་ཐིན་གྱིས་དྲིལ་བསྒྲགས་དང་ལག་བསྟར་གཏིང་ཟབ་བྱེད་པར་ཤུགས་བསྣན་ཏེ། མཉམ་ལས་བརྗེ་རེས་དང་། སློབ་གྲྭས་ཤེས་ལྡན་མི་སྣ་ནང་འདྲེན། ཡོངས་བསྒྲགས་གདན་ཞུ་སོགས་ཀྱི་བྱེད་སྟངས་སྣ་ཚོགས་བརྒྱུད།  མཐོ་རིམ་སློབ་གྲྭས་ཞིང་ཆེན་ཕྱི་ནང་ལ་ཁ་ཕྱོགས་ནས《མཚོ་སྔོན་ཞིང་ཆེན་གྱིས་ལྗང་མདོག་རྩིས་ནུས་ཤེས་ལྡན་མི་སྣ་བསྡུ་རུབ་བྱེད་པའི་བྱེད་ཐབས་བཅུ》ཤུགས་ཆེན་པོས་དྲིལ་བསྒྲགས་བྱེད་པར་རྩ་འཛུགས་དང་དང་སྐུལ་སློང་བྱས་ཏེ། ལྗང་མདོག་རྩིས་ནུས་ཤེས་ལྡན་མི་སྣ་མཚོ་སྔོན་དུ་ལས་ཞུགས་ལས་གཏོད་བྱེད་དུ་ཡོང་བར་ཡིད་དབང་བཀུག

རིག་ཚན་གྱི་གྲུབ་ཚུལ་ལེགས་བཅོས་བྱེད་པའི་ཐད་འབད་བརྩོན་བྱས་ཏེ་རིག་ཚན་གྱི་ཆེད་ལས་མ་ལག་བཅོས་སྒྱུར་གཏིང་ཟབ་ཏུ་གཏོང་བ་དང་། རྩེར་སོན་རིག་ཚན་གྱི་ཆེད་ལས་འཛུགས་སྐྲུན་དང་འབུམ་རམས་པ་དང་རབ་འབྱམས་པའི་བསླབ་གནས་འཛུགས་སྐྲུན་བཟོ་འགོད་ལག་བསྟར་གཏིང་ཟབ་བྱེད་པ། མཐོ་རིམ་སློབ་གྲྭས་འབྲེལ་ཡོད་རིག་ཚན་གྱི་རབ་འབྱམས་པའི་ས་ཚིགས་རེ་ཞུ་བྱེད་པར་རྒྱབ་སྐྱོར་བྱེད་པ། བསླབ་གནས་ཀྱི་ནང་དོན་འཛུགས་སྐྲུན་ལ་ཤུགས་སྣོན་པ། ལྗང་མདོག་རྩིས་ནུས་ཐོན་ལས་འཕེལ་རྒྱས་ལ་ཞབས་འདེགས་ཞུ་བའི་རིག་ཚན་གྱི་ཆེད་ལས་ཚོགས་པ་གྲུབ་པ་བཅས་བྱས་ཏེ། ལྗང་མདོག་རྩིས་ནུས་ཀྱི་ཤེས་ལྡན་མི་སྣ་གསོ་སྐྱོང་བྱེད་པའི་རྨང་གཞི་སྲ་བརྟན་དུ་བཏང་།

ཤེས་ལྡན་མི་སྣ་གསོ་སྐྱོང་བྱེད་ཤུགས་ཆེ་རུ་གཏོང་བའི་ཐད་འབད་བརྩོན་བྱས་ཏེ། མཐོ་རིམ་སློབ་གྲྭས་རིགས་ཁག་གི་ཤེས་ལྡན་མི་སྣའི་སྲིད་ཇུས་ལ་བརྟེན་ནས་རིམ་པ་མཐོ་བའི་ཤེས་ལྡན་མི་སྣ་ནང་འདྲེན་བྱེད་པར་རྒྱབ་སྐྱོར་དང་། འབྲེལ་ཡོད་སྡེ་ཁག་དང་མཐུན་སྦྱོར་ འབྲེལ་མཐུད་བྱེད་ཤུགས་ཆེ་རུ་གཏོང་བ།  བསམ་ཕྱོགས་གསར་སྐྲུན་དང་། ཐབས་ལམ་རྒྱ་སྐྱེད། བྱེད་ཐབས་ནུས་ལྡན་དུ་གཏོང་བ་བཅས་བྱས་ཏེ།  《མཚོ་སྔོན་ཞིང་ཆེན་གྱིས་ལྗང་མདོག་རྩིས་ནུས་ཤེས་ལྡན་མི་སྣ་བསྡུ་རུབ་བྱེད་པའི་བྱེད་ཐབས་བཅུ》བེད་སྤྱོད་ལེགས་པོ་བྱས་ཤིང་།  མཐོ་རིམ་སློབ་གྲྭས་རྒྱལ་ཁབ་ཀྱི་བཟོ་སྐྲུན་རབ་འབྱམས་པའི་གསོ་སྐྱོང་དང་ བཅོས་སྒྱུར་གྱི་ཆེད་དོན་ཚོད་ལྟ་དང་ཞིང་ཆེན་རིམ་པའི་བཟོ་སྐྲུན་རབ་འབྱམས་པའི་ཆེད་དོན་གསོ་སྐྱོང་བྱ་བ་སྤེལ་བར་རྒྱབ་སྐྱོར་དང་། མཚོ་སྔོན་ཞིང་ཆེན་གྱི་སློབ་ཆེན་སློབ་མའི་ལྗང་མདོག་རྩིས་ནུས་ཀྱི་ནུས་པ་ལེགས་བཅོས་བྱེད་པའི་འགྲན་སློང་འགྲན་བསྡུར་སྤེལ་བ། ལྗང་མདོག་རྩིས་ཀྱི་ས་གནས་ཀྱི་ཤེས་ལྡན་མི་སྣ་གསོ་སྐྱོང་བྱེད་ནུས་ཆེ་རུ་གཏོང་བ་བཅས་བྱས། ཚན་རིག་ཞིབ་འཇུག་ལ་ཤུགས་སྣོན་པའི་ཐད་འབད་བརྩོན་བྱས་ཏེ། མཐོ་རིམ་སློབ་གྲྭས་ཞིང་ཆེན་ཕྱི་ནང་གི་འབྲེལ་ཡོད་མཐོ་སློབ་དང་ཚན་རིག་ཞིབ་འཇུག་ཁང་དང་མཉམ་འབྲེལ་བྱེད་པར་རྒྱབ་སྐྱོར་བྱེད་པ་དང་། ལྗང་མདོག་རྩིས་ནུས་ཐོན་ལས་ཀྱི་ཁྱབ་ཁོངས་གཙོ་བོར་ཞིབ་འཇུག་བྱེད་པ། བཀོལ་སྤྱོད་ཀྱི་རྣམ་པ་སྐྱེད་སྲིང་དང་རྒྱ་སྐྱེད་གཏོང་བ། ཞིབ་འཇུག་གི་གྲུབ་འབྲས་དེ་ལས་རིགས་སྔར་ལས་མང་བའི་ཐོན་ལས་ཁྱབ་ཁོངས་སུ་བཀོལ་སྤྱོད་ལེགས་པོ་བྱེད་པར་སྐུལ་འདེད་གཏོང་བ་བཅས་བྱས།  རྒྱལ་ཁབ་རིམ་འདས་རྩིས་ནུས་ཝུའུ་ཞི་ལྟེ་གནས་ཀྱི་མཚོ་སྔོན་སློབ་ཆེན་ཡན་ལག་ལྟེ་གནས་དང་། མིས་བཟོས་རིག་ནུས་གསར་སྐྲུན་ལྟེ་གནས་སོགས་ཚན་རིག་ཞིབ་འཇུག་ལས་སྟེགས་གལ་ཆེན་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ་དང་། མཚོ་སྔོན་སློབ་ཆེན་རྒྱལ་ཁབ་སློབ་ཆེན་གྱི་ཚན་རྩལ་གླིང་ལེགས་འགྱུར་བསྐྱར་སྒྲིག་བྱ་བར་སྐུལ་འདེད་བརྟན་པོ་གཏོང་བ།  ལྗང་མདོག་རྩིས་ནུས་ཀྱི་ས་གནས་ཀྱི་ཤེས་ལྡན་མི་སྣའི་ཚན་རྩལ་གྱི་འདེགས་སྐྱོར་སྐྱེད་སྲིང་བྱེད་པར་ཤུགས་སྣོན་བྱས།

བློ་འདྲིའི་ཞབས་ཞུ་བྱེད་ཤུགས་ཆེ་རུ་གཏོང་བའི་ཐད་ཤུགས་བསྣན་ཏེ། སློབ་གསོའི་ཁོངས་གཏོགས་ཀྱི་ལྗང་མདོག་རྩིས་ནུས་སློབ་ཁྲིད་དང་ཚན་ཞིབ་རིགས་གཅིག་མཁས་ཅན་མཛུབ་སྟོན་ཨུ་ཡོན་ལྷན་ཁང་བཙུགས་ཏེ།  ལྗང་མདོག་རྩིས་ནུས་སློབ་གསོའི་སློབ་ཁྲིད་དང་། རིག་ཚན་འཛུགས་སྐྲུན། ཤེས་ལྡན་མི་སྣ་གསོ་སྐྱོང་། ཚན་རིག་ཞིབ་འཇུག  རིག་གཞུང་བརྗེ་རེས་སོགས་ཀྱི་ཐད་ཆེད་ལས་བློ་འདྲི་དང་། ཐབས་ཇུས་ཇུས་འདོན།  མཛུབ་སྟོན་ཞབས་ཞུ་སོགས་ཀྱི་ལས་དོན་སྤེལ་ནས། ལྗང་མདོག་རྩིས་ནུས་ཀྱི་ས་གནས་ཀྱི་ཤེས་ལྡན་མི་སྣ་གསོ་སྐྱོང་དང་འཕེལ་རྒྱས་ལ་ཞབས་འདེགས་ཞུས།

སྒྲོལ་མ་སྐྱིད་ཀྱིས་བསྒྱུར།