ཟླ10པའི་ཚེས27ཉིན། གསར་འགོད་པས་བཅོས་སྒྱུར་ཕྱོགས་ཡོངས་ནས་ཟབ་སྤེལ་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཞེས་པའི་མཚོ་བྱང་བོད་རིགས་རང་སྐྱོང་ཁུལ་གྱི་ཆེད་དོན་གསར་འགྱུར་སྒྲོག་སྤེལ་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན། མཚོ་བྱང་ཁུལ་གྱིས་ཞིང་ཆེན་ཡོངས་ཀྱི་མདུན་གྲལ་དུ་བསྐྱོད་པ་གསུམ་དང“243”འཕེལ་རྒྱས་བཀོད་སྒྲིག་དམིགས་འབེན་ལ་སྐུལ་འདེད་གཏོང་བར་དམིགས་ནས་བློ་བརྟན་འགྱུར་མེད་སྒོས་སྐྱེ་ཁམས་སྔོན་དུ་འགྲོ་བ་དང་ལྗང་མདོག་འཕེལ་རྒྱས་ཀྱི་བགྲོད་ལམ་དུ་བསྐྱོད་དེ་སྐྱེ་ཁམས་འཛུགས་སྐྲུན་དང་དཔལ་འབྱོར་འཕེལ་རྒྱས། དམངས་ཚིས་འགན་སྲུང་སོགས་ཁྱབ་ཁོངས་སུ་གྲུབ་འབྲས་མངོན་གསལ་བླངས། ད་ལོའི་ལོ་སྟོད་ལ་ཁུལ་ཁོངས་ཀྱི་ཐོན་སྐྱེད་སྤྱིའི་རིན་ཐང་བརྒྱ་ཆའི་དྲུག་གྲངས་ཆུང་གཅིག་འཕར་ནས་ཞིང་ཆེན་ཡོངས་ཀྱི་ཨང་གཉིས་པར་སླེབས།
ཉེ་བའི་ལོ་འགའི་རིང་། མཚོ་བྱང་ཁུལ་གྱིས་སྐྱེ་ཁམས་ཁོར་ཡུག་བཅོས་སྐྱོང་བྱས་པ་དང་། མདོ་ལ་རི་བོའི་རྒྱལ་ཁབ་སྤྱི་གླིང་འཛུགས་སྐྲུན་དང་མཚོ་སྔོན་པོའི་རྒྱལ་ཁབ་སྤྱི་གླིང་གསར་འཛུགས་ལ་སྐུལ་འདེད་ནན་མོ་བཏང་།
ཞིང་ཆེན་ཡོངས་སུ་ཆུ་གློག་ས་ཚིགས་ཆུང་འབྲིང་གི་ཕྱིར་འཐེན་རིགས་བདུན་དང་དག་ཐེར་རིགས་སོ་གསུམ་གྱི་བཅོས་སྐྱོང་སྔོན་ལ་ཡོངས་འགྲུབ་བྱས་པ་དང་། མཚོ་སྔོན་པོའི་གསེར་ཉའི་ཐོན་ཁུངས་གསོག་ཚད་དང་གཙོད་ཀྱི་ཁ་གྲངས་སོ་སོར་ཐོག་མའི་སྲུང་སྐྱོབ་དུས་ཀྱི་ལྡབ་ཞེ་དགུ་དང་ལྡབ་བཅུ་གཅིག་ལྷག་འཕར་ཡོད།
དཔལ་འབྱོར་བརྟན་ཐོག་ཡར་འཕེལ་ཐད་ཐོད་བརྒལ་གསར་པ་མངོན་འགྱུར་བྱས་ནས་མཚོ་བྱང་ཁུལ་གྱི་ཐོན་སྐྱེད་སྤྱིའི་རིན་ཐང་སྒོར་ཐེར་ཆེན་གཅིག་ལས་བརྒལ། ལོ་ལྔའི་འཆར་འགོད་བཅུ་བཞི་པའི་ཚུན་ལ་བསྡོམས་པས་སྒོར་ཐེར་ཆེན་གཉིས་དང་ཐེར་འབུམ་གསུམ་དུང་ཕྱུར་གཅིག་ལྷག་གི་དངུལ་གཏོང་ཡོངས་འགྲུབ་བྱས། མདོ་ལ་རི་འདབས་ཀྱི་ཕྱུགས་ར་བཟང་བོ་ཞེས་པའི་ཞིང་ཕྱུགས་ཐོན་རྫས་ཀྱི་སྤྱི་སྤྱོད་ཟོང་རྟགས་ཕྱོགས་ཡོངས་ནས་ཁྱབ་གདལ་དུ་བཏང་བ་དང་། ཀ་རིམ་པའི་ཡུལ་སྐོར་ལྗོངས་ཁུལ་སོ་གསུམ་ལ་སླེབས་ཤིང་། མདོ་ལ་ལྷ་ཡི་ཞིང་ཁམས་ཞེས་པའི་ཡུལ་སྐོར་ལམ་ཐིག་རྒྱལ་ཡོངས་ཀྱི་སྐོར་གཉིས་པའི་འགྲིམ་འགྲུལ་ཡུལ་སྐོར་མཉམ་བསྲེས་འཕེལ་རྒྱས་ཀྱི་དཔེ་སྟོན་མིང་ཐོའི་ཁྲོད་ཚུད།
མཁར་གྲོང་མཉམ་བསྲེས་འཕེལ་རྒྱས་ཐད་རྣམ་པ་གསར་པ་མངོན་པ་དང་སྡེ་བའི་ཐུན་མོང་དཔལ་འབྱོར་སྤྱིའི་ཡོང་འབབ་སྒོར་དུང་ཕྱུར་གཅིག་དང་བྱེ་བ་གཅིག་ལ་སླེབས་ཏེ་སྡེ་བའི་ཆ་སྙོམས་ཡོང་འབབ་ཞིང་ཆེན་ཡོངས་ཀྱི་སྔོན་གྲལ་དུ་སླེབས། མཐོ་སྒང་གི་མཛེས་པའི་གྲོང་གསེབ་དང་འཆམ་མཛེས་གྲོང་གསེབ་ཞེ་ལྔ་འཛུགས་སྐྲུན་བྱས་ནས་རོང་འབྲོག་ཁུལ་གྱི་སྡོད་དམངས་ཁྱིམ་ཚང་འབུམ་གཅིག་དང་ཁྲི་གཉིས་ཀྱི་སྡོད་ཁང་ཆ་རྐྱེན་ལེགས་བཅོས་བྱས། མཁར་གྲོང་འཛུགས་སྐྲུན་ལས་གཞི་ཉིས་བརྒྱ་སོ་བརྒྱད་ལག་བསྟར་བྱས་ཏེ་མཁར་གྲོང་གི་ཆུ་མཁོ་འདོན་ཚད་བརྒྱ་ཆའི་གོ་དགུར་སླེབས་པ་དང་། ལྗང་མདོག་ཁེབས་ཚད་བརྒྱ་ཆའི་ཉེར་བརྒྱད་གྲངས་ཆུང་གསུམ་བཞི་ལ་སླེབས། གཞུང་ལམ་འགྲིམ་འགྲུལ་ཤར་གཏོང་ལམ་ཐིག་སྤྱི་ལེ་ཁྲི་གཅིག་ལས་བརྒལ་ནས་ལོ་གཉིས་ཀྱི་སྔོན་ལ་རྫོང་དང་རྫོང་གི་བར་མྱུར་བགྲོད་གཞུང་ལམ་ཤར་གཏོང་བྱེད་པའི་དམིགས་འབེན་མངོན་འགྱུར་བྱས།
དམངས་འཚོ་ཕྱུག་འགྱུར་དང་ལེགས་བཅོས་ཐད་གྲུབ་འབྲས་བཟང་བོ་ཐོབ་ནས་བསྡོམས་པས་མཁར་གྲོང་གི་གསར་དུ་ལས་ཞུགས་བྱས་པའི་མི་གྲངས་སྟོང་དགུ་དང་བརྒྱད་བརྒྱ་དོན་གཉིས་ལ་སླེབས་པ་དང་། རོང་འབྲོག་ཁུལ་གྱི་ངལ་རྩོལ་ནུས་ཤུགས་སྤོ་སྒྱུར་ལས་ཞུགས་ཚད་མི་ཐེངས་འབུམ་གཉིས་དང་ཁྲི་གསུམ་ལྷག་ལ་སླེབས། སློབ་སྔོན་སློབ་གསོའི་ལོ་གསུམ་གྱི་སློབ་ཞུགས་ཚད་དང་འོས་འགན་སློབ་གསོའི་སྲ་བརྟན་ཚད། མཐོ་རིམ་སློབ་གྲྭའི་སློབ་ཞུགས་ཚད་བཅས་ཞིང་ཆེན་ཡོངས་ཀྱི་མདུན་གྲལ་དུ་སླེབས། མཚོ་བྱང་ཁུལ་མི་དམངས་སྨན་ཁང་གཉིས་པ་ཁུལ་ཡོངས་ཀྱི་རིམ་པ་གསུམ་པའི་སྨན་ཁང་དུ་གསར་འཛུགས་བྱས། སྨན་བཅོས་འགན་སྲུང་གི་གློག་རྡུལ་དཔང་ཡིག་བཀོལ་ཚད་ཞིང་ཆེན་ཡོངས་ཀྱི་ཨང་དང་པོར་སླེབས་པ་དང་། དཀའ་ཁག་ཡོད་པའི་ལོ་ལོན་རྒན་པ་འབུམ་བརྒྱད་དང་ཁྲི་ལྔ་ལ་ཁྱིམ་ཚང་དུ་སོང་ནས་རོགས་སྐྱོར་བྱེད་པའི་ཞབས་ཞུ་འདོན་སྤྲོད་བྱས་ནས་རྒྱལ་ཡོངས་ཀྱི་ཁྱིམ་སྡོད་ཞབས་ཞུ་དང་གཞིས་ཁུལ་གྱི་གཞི་རྩའི་རྒན་གསོ་ཞབས་ཞུའི་ནུས་པ་མཐོར་འདེགས་བཏང་བའི་ཕུལ་བྱུང་ས་ཁུལ་དུ་བདམས།
ལྷ་མོ་ཚེ་རིང་གིས་བསྒྱུར།
