མཚོ་སྔོན་ཞིང་ཆེན་གྱིས་རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་མཐོ་ས་འཛུགས་སྐྲུན་གྱི་ཆེད་མཁས་བློ་འདོན་ཨུ་ཡོན་ལྷན་ཁང་བཙུགས།
2025.10.31 ཁུངས། མཚོ་སྔོན་ཉིན་རེའི་ཚགས་པར། ཀློག་གྲངས། 0

ཟླ10ཚེས30ཉིན། མཚོ་སྔོན་ཞིང་ཆེན་གྱིས་རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་མཐོ་ས་འཛུགས་སྐྲུན་གྱི་ཆེད་མཁས་བློ་འདོན་ཨུ་ཡོན་ལྷན་ཁང་འཛུགས་རྒྱུར་སྐུལ་འདེད་བཏང་། དམིགས་ཡུལ་གཙོ་བོ་ནི“རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་ཀྱི་མཐོ་ས་སྐྲུན་པའི”སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ་ཆེད་མཁས་པའི་བློ་འདོན་ཇུས་འབུལ་གྱི་ནུས་པ་འདོན་སྤེལ་གང་ལེགས་བྱེད་པ་དང་། སྔར་ལས་ལྷག་པའི་སྒོ་ནས་མཚོ་སྔོན་གྱི་ནུས་ཁུངས་གཙང་མའི་ཁྱབ་ཁོངས་ཀྱི་གནད་དོན་གལ་ཆེན་ལ་ཞིབ་འཇུག་བྱེད་ཤུགས་ཆེ་རུ་བཏང་ནས་རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་མཐོ་ས་གཏོད་པར་རམ་འདེགས་བྱེད་ཆེད་རེད།

རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་མཐོ་ས་འཛུགས་སྐྲུན་བྱེད་པར་བློ་རིག་རྩེར་སོན་གྱི་འདེགས་སྐྱོར་དང་ཁ་འབྲལ་ཐབས་མེད། ཐེངས་འདིར་བཙུགས་པའི་ཆེད་མཁས་བློ་འདོན་ཨུ་ཡོན་ལྷན་ཁང་གིས་མཚོ་སྔོན་ཞིང་ཆེན་གྱིས་རྒྱལ་ཁབ་ཀྱི་ནུས་ཁུངས་གཙང་མའི་ཐོན་ལས་མཐོ་ས་འཛུགས་སྐྲུན་ལ་སྐུལ་འདེད་གཏོང་བར་འཕེལ་རྒྱས་ཀྱི་འཐབ་ཇུས་དང་། སྲིད་ཇུས་ཀྱི་འཆར་འགོད། ལག་རྩལ་གྱི་ཚད་གཞི་སོགས་ཐད་གྲོས་འགོ་འདོན་རྒྱུར་འགན་འཁུར་བ་དང་། མཐོ་ས་འཛུགས་སྐྲུན་ཁྲོད་ཀྱི་རྣམ་གྲངས་གལ་ཆེན་ལ་དཔྱད་སྒྲུབ་དང་དཔྱད་འཇོག་བྱེད་པའི་ལས་ཀར་ཞུགས་པ། ཐོན་སློབ་ཞིབ་གསུམ་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བ། ནུས་ཁུངས་གཙང་མའི་ལག་རྩལ་གསར་གཏོད་དང་གྲུབ་འབྲས་གཞན་སྒྱུར་ལ་སྐུལ་འདེད་གཏོང་བ། རྒྱལ་ཁབ་ཕྱི་ནང་གི་ནུས་ཁུངས་གཙང་མ་འཕེལ་རྒྱས་འགྲོ་བའི་གནས་ཚུལ་ལ་རྗེས་སྙེག་དང་ཞིབ་འཇུག་བྱེད་པ། བརྗེ་རེས་དང་མཉམ་ལས་ཀྱི་གྲོས་འགོ་འདོན་པ་བཅས་ཀྱི་འགན་འཁུར་རྒྱུ་དང་། ཆེད་དོན་བློ་འདོན་གྱི་ལས་འགན་གཞན་དག་སྒྲུབ་འགན་འཁུར་རྒྱུ་རེད།

ཤེས་གསལ་ལྟར་ན། ཆེད་མཁས་བློ་འདོན་ཨུ་ཡོན་ལྷན་ཁང་གི་དྲུང་ཡིག་ཁྲུའུ་ཞིང་ཆེན་ནུས་ཁུངས་ཅུའུ་དང་ཆུ་གློག་ཆུ་བེད་འཆར་འགོད་ཇུས་འགོད་སྤྱི་ཁྱབ་ཁང་དུ་བཙུགས་ཡོད་པ་དང་། ཆེད་མཁས་བློ་འདོན་ཨུ་ཡོན་ལྷན་ཁང་གི་ཉིན་རྒྱུན་གྱི་འབྲེལ་གཏུག་དང་མཐུན་སྦྱོར་ལས་དོན་གཅིག་བསྡུས་བྱེད་པའི་འགན་འཁུར་པ་དང་། གདམ་གསེས་དང་གདན་འདྲེན། ཁ་གསབ་སོགས་ཀྱི་ལས་དོན་ཡག་པོ་བསྒྲུབ་པར་རྩ་འཛུགས་བྱེད་རྒྱུ་རེད།

ཚེ་མགོན་རྒྱལ་གྱིས་བསྒྱུར།


ཞོགས་པའི་ཕྱོགས་བསྡུས་གསར་འགྱུར། སྒྲ་ལྡན་རྒྱལ་སྤྱིའི་གསར་འགྱུར། དུས་ཐོག་གསར་འགྱུར།