དེ་རིང་གི་ལེ་ཚན་འདི་ཚན་པ་གཉིས་སུ་བཀར་ཡོད། ཚན་པ་དང་པོ་སློབ་རའི་གསར་འགྱུར་སྐུད་ལམ་ནང་དུ་མཚོ་སྔོན་དགེ་ཐོན་སློབ་ཆེན་གྱི་སློབ་རའི་གསར་འགོད་པ་ཨ་རྟ་མགྲིན་སྐྱབས་དང་དེ་མིན་རྭ་རྒྱ་ཤེས་རིག་ནོར་བུའི་སློབ་གླིང་གི་སློབ་རའི་གསར་འགོད་པ་རྟ་མགྲིན་ཐར་གཉིས་ཀྱིས་སྔ་གཞུག་ཏུ་ཕ་ཡུལ་དང་སློབ་གླིང་བཅས་སུ་སྤེལ་གྱིན་པའི་སློབ་གསོའི་ཐད་ཀྱི་གནས་ཚུལ་འགའ་སྒྲོག་འདོན་བྱས་ཡོད་ལ། དེ་མིན་ཆེད་དུ་ད་ལོའི་དབྱར་གནང་སྐབས་སུ་མཚོ་སྔོན་མི་རིགས་སློབ་ཆེན་གྱིས་གཙོ་སྒྲུབ་མཛད་པའི༼སློབ་ཆེན་པའི་གཞི་རིམ་སློབ་གསོ་རོགས་སྐྱོར་ཚོགས་པ༽དཔའ་ལུང་ས་ཁུལ་དུ་བསྐྱོད་པའི་གནས་ཚུལ་དམིགས་སུ་བཟུང་ནས་བཅར་འདྲི་བྱས་ཡོད། སྐུད་ལམ་གྱི་གདན་ཞུའི་སྐུ་མགྲོན་ནི་སློབ་ཆེན་པའི་གཞི་རིམ་སློབ་གསོ་རོགས་སྐྱོར་ཚོགས་པའི་ཚོགས་གཙོ་བསོད་ནམས་རྒྱ་མཚོ་དང་དེ་མིན་ཚོགས་མི་ལྷ་ལུང་འབུམ་གཉིས་ཡིན། གཞན་ང་ཡི་ལང་ཚོའི་རྨི་ལམ་བཅས་བཀོད་སྒྲིག་བྱས་ཡོད།