སྤྲུལ་སྐུ་འཇིགས་མེད་མཁས་གྲུབ་རྒྱ་མཚོའམ་ཨ་ལགས་འཇམ་དབྱངས་མཆོག་ནི་རབ་བྱུང་བཅུ་དྲུག་པའི་ས་སྦྲུལ་སྤྱི་ལོ ༡༩༢༧ ལོར་མདོ་སྨད་རེབ་གོང་ཡུལ་གྱི་ནགས་རྒྱའི་གདུང་རྒྱུད་དུ་སྐུ་འཁྲུངས། མདོ་ཁམས་གསུམ་ཟིལ་གནོན་དགྱེས་པ་རྡོ་རྗེ་མཆོག་གིས་རྒྱལ་སྲས་མི་བསྐྱོད་རྡོ་རྗེའི་སྤྲུལ་སྐུར་ངོས་འཛིན་གནང་། དགུང་ལོ་བདུན་གྱི་སྟེང་ཡོངས་འཛིན་བློ་བཟང་བསྟན་དར་གྱི་མདུན་ནས་ཕྲལ་སྦྱོར་གྱི་ཀློག་དང་གཟབ་གཤར་གྱི་ཡིག་གཟུགས་སོགས་བསླབས། དགུང་ལོ་བརྒྱད་ཀྱི་སྟེང་འཇིགས་མེད་ལུང་རྟོགས་རྒྱ་མཚོ་མཆོག་ལས་བར་མ་རབ་བྱུང་གི་སྡོམ་པ་མནོས་ཏེ་ཆོས་སྒོར་ཞུགས་པས་འཇིགས་མེད་མཁས་གྲུབ་རྒྱ་མཚོ་ཞེས་སུ་མཚན་གསོལ།
དེ་ནས་བཟུང་། དམ་པ་དེ་གཉིས་དང་ཡོངས་འཛིན་འཇིགས་མེད་མཁས་མཆོག འཇིགས་མེད་ཡེ་ཤེས་སྙིང་བོ། རྡོ་གྲུབ་སྤྲུལ་སྐུ་ཡར་ལུང་བསྟན་པའི་ཉི་མ། མགར་རྩེའི་བླ་མ་ཀུན་བཟང་ཕྱོགས་ལས་རྣམ་རྒྱལ། རྗེ་འཇིགས་མེད་དམ་ཆོས་རྒྱ་མཚོ། དགེ་བའི་བཤེས་གཉེན་ཆེན་པོ་དཔྱི་ས་བློ་གྲོས་རྒྱ་མཚོ་སོགས་