མིའི་ལུས་ཕུང་དང་ཕྱི་རོལ་ཁོར་ཡུག ནམ་ཟླ་སོགས་ལ་འབྲེལ་བ་ཧ་ཅང་དམ་པོ་ཡོད་པས་ཕྱིའི་ནམ་ཟླའི་འགྱུར་ལྡོག་གིས་མིའི་ལུས་ཕུང་ལའང་ཤུགས་རྐྱེན་གང་མང་བཟོ་བཞིན་ཡོད། དཔེར་ན་ང་ཚོས་དུས་རྒྱུན་མཐོང་ཐུབ་པ་ནི་ནམ་ཟླའི་འགྱུར་བས་ལུས་ཀྱི་དྲོད་གྲང་ཆ་མ་སྙོམས་པས་ཆམ་པ་ཕོག་པ་དང་རུས་ཚིགས་ན་བ་སོགས་འབྱུང་བ་ལྟ་བུ་རེད། མི་སུ་དང་གང་ཡིན་ཀྱང་དུས་ཚིགས་དང་བསྟུན་ནས་དུས་རྒྱུན་གྱི་སྤྱོད་ལམ་ལ་མཉམ་འཇོག་བྱ་དགོས། རང་རེའི་བོད་ཀྱི་གསོ་རིག་ལས་ཀྱང་ནད་མ་བྱུང་བའི་སྔོན་གྱི་འགོག་སྲུང་ལ་དུས་རྒྱུན་གྱི་སྤྱོད་ལམ་གལ་ཆེན་དུ་བསྟན་ཡོད་པ་དང་དུས་རྒྱུན་གྱི་སྤྱོད་ལམ་ལེགས་པོ་ཞིག་འོང་ན་གསོ་རིག་གི་གཞུང་ནས་བཤད་པའི་ནད་འབྱུང་བའི་རྐྱེན་བཞི་ལས་རྐྱེན་གཅིག་ཇེ་ཉུང་དུ་གྱུར་བ་ཡིན་པས་གཤམ་ནས་དུས་ཚིགས་བཞི་དང་འབྲེལ་ཏེ་རྒྱུན་ལྡན་གྱི་སྤྱོད་ལམ་བཤད་རྒྱུ་ཡིན།
༡. དཔྱིད་ཀའི་དུས་སུ་ཉི་འོད་ཀྱིས་ཕྱི་ནང་ཀུན་དྲོས་པས་ལུས་ཀྱི་གྲང་བ་དྲོད་དུ་འགྱུར་བ་དང་ཡུན་གྱིས་ཉི་མ་བྱང་བགྲོད་ཀྱི་མཐར་ཐུག་པ་ཡིན་པས་ཉི་འོད་རབ་ཏུ་ཚ་བ་ཡིན་ལ་དེ་དང་འབྲེལ་ནས་ལུས་ཕུང་ཕྱི་ནང་གི་ཚ་བའི་མེ་དྲོད་ལྷག་པར་སྐྱེས་ཏེ་ལུས་ཟུང་སྐེམས་པའི་ཚུལ་གྱིས་ལུས་གྱི་སྟོབས་འཕྲོག་ཅིང་ཉམས་པར་བྱེད་
