སྐྱེས་པའི་ཁུ་བར་རླུང་སོགས་ཀྱི་སྐྱོན་མེད་པར་རྒྱུན་ལྡན་ཡིན་ན་མདོག་སྦྲང་རྩི་ལྟར་དཀར་ཞིང་འོད་འཚེར་བ། ངོ་བོ་ལྕི་ཞིང་རོ་བསྐ་མངར་དང་ལྡན་པ། བོངས་མང་དུ་འབྱུང་བ། དེ་བཞིན་བུད་མེད་ཀྱི་ཟླ་མཚན་ལ་ཡང་རླུང་སོགས་ཀྱི་སྐྱོན་མེད་པར་རྒྱུན་ལྡན་ཡིན་ན་རེས་འགའ་རྒྱ་སྐྱེགས་ཀྱི་ཁུ་བ་ལྟར་དམར་ལ་ཅུང་སྨུག་ཤས་ཡོད་པ་དང་། རེ་འགའ་རི་བོང་གི་ཁྲག་དང་འདྲ་བར་ཁ་དོག་དམར་ཞིང་དྭངས་ལ་བུད་མེད་དེ་ཉིད་ཀྱི་གོས་ལ་འགོས་པ་ཆུ་གྲང་གིས་བཀྲུས་ན་ཁྲག་གི་ཤུལ་མེད་པར་དག་པར་འགྱུར་བ་ཡིན། དེ་ལྟར་ལྡན་པའི་ཁུ་ཁྲག་གིས་མངལ་ཆགས་པའི་ས་བོན་གྱི་དོན་ཚུལ་བཞིན་དུ་བྱེད་ནུས་ཤིང་། དེ་ཡིས་མངལ་དུ་ཆགས་པའི་ལུས་ཅན་དེ་ཉིད་གཟུགས་བཟང་ཞིང་བློ་དང་དབང་བོ་ཤིན་ཏུ་གསལ་བ་དག་སྐྱེད་པར་བྱེད།
ཟླ་མཚན་འབྱུང་བའི་དུས་དང་རྟགས།
ཟླ་མཚན་དེ་ཡང་སྦྲུམ་མ་མ་གཏོགས་བུད་མེད་སྤྱིར་བཏང་བ་རྣམས་ལ་ཕལ་ཆེ་བར་ལོ་བཅུ་གཉིས་ལོན་པ་ནས་ལྔ་བཅུ་མ་འདས་ཀྱི་བར་དེར་ཁ་ཟས་ཀྱི་དྭངས་མ་རྣམས་ལས་རིམ་བཞིན་བྱུང་བའི་ཁུ་བ་དམར་པོ་བསམ་སེའུ་ལ་གནས་པ་དེ་ཉིད་ཟླ་བ་རེ་རེ་བཞིན་བསམ་སེའུ་ནང་བསགས་པའི་ཁྲག་ཡིན་ལ། ཁྲག་དེ་ཡང་ཟླ་བ་རེ་རེའི་དུས་ཚིགས་སུ་བསམ་སེའུ་དང་བུ་སྣོད་ཀྱི་གཡས་གཡོན་རྩ་ཆེན་གཉིས་ཀྱིས་འབྲེལ་བ་དེ་ལས་བརྒྱུད་དེ་བུ་ས
