དེ་ཡང་བོད་ལུགས་གསོ་རིག་གི་གཞུང་ནས་ཕྲུ་གུ་བཙས་རྗེས་ཇི་ལྟར་སྙོར་སྐྱོང་བྱེད་པའི་ཚུལ་དེ་ལ་བྱིས་པ་ཉེར་སྤྱོད་ཟེར་ཞིང་། བྱིས་པ་ཉེར་སྤྱོད་ཅེས་པ་ནི་མའི་མངལ་དུ་སྦྲུམ་པའི་བྱིས་པ་དེ་ཇི་ལྟར་སྐྱེ་བསུ་བྱེད་ཅིང་། སྐྱེ་ཕྲད་བཀྲ་ཤིས་དང་བཀྲ་མི་ཤིས་པར་བརྟག་པ། དེ་ནས་ལྟེ་བ་བཅད་ཅིང་ལུས་བཀྲུ་བ་དང་ནུ་ཞོ་སྣུན་པ་སོགས་ཟླ་བཅུ་གཉིས་ཀྱི་བར་ལ་ཇི་ལྟར་གཉོར་སྐྱོང་བྱེད་པའི་ཐབས་དེ་ཡིན།
བཙའ་དུས་ཀྱི་རྟགས་ལ་བརྟག་ཅིང་ཤིས་པ་བརྗོད་པ།
མྱུར་དུ་བཙའ་བའི་རྟགས་དེ་རྣམས་བྱུང་བའི་ཚེ་ན་སྨན་པས་མ་བུ་གཉིས་ཀ་འཚོ་ཞིང་བདེ་ཐང་ཡོང་བའི་ཆེད་དུ་མྱུར་དུ་བཙའ་བར་བྱེད་པའི་སྨན་ཞི་བྱེད་བཅུ་གཅིག་སོགས་འཐུང་དུ་བཅུག་ཅིང་རླུང་སེལ་བའི་ཨ་གར་སོ་གཅིག་སོགས་བདུག་པ་དང་། སྐྱེ་བསུ་བྱེད་མྱོང་བའི་ཆེད་ལས་སྨན་པའམ་བུད་མེད་ཀྱིས་སྟོད་མཐོ་བར་བྱས་ནས་ཉལ་ལུགས་དང་བཙིར་ལུགས་སོགས་གསལ་བོར་ལབ་ནས་ཕྲུ་གུ་དེ་བཙས་པ་ཡིན་ན། ཐོག་མར་ཕྲུ་གུའི་བཙས་སྟངས་དང་སྤྱི་བོ་སོགས་ལ་བལྟས་ནས་བཀྲ་ཤིས་པ་དང་བཀྲ་མི་ཤིས་པར་བརྟག་པ་ནི། ལུགས་འབྱུང་ཞེས་མགོ་སྔོན་དུ་སྐྱེས་པ་དང་གན་རྐྱལ་དུ་བྱུང་བ། ལྟེ་བས་སྟོད་དཀྲིས་ཤིང་ངུ་སྐད་དྲག་པོར་སྒྲོག་པ། སྤྱི་བོ་རིང་ལ་མགོ་སྲ་བ། མཚོག་མ་ཆུང་བ་སྟེ་སྐྲ་མཚམས་མཐོ་ལ་དཔྲལ
