དེ་ཡང་འདས་པའི་དུས་སྐབས་སོ་སོའི་ནང་གི་གསོ་རིག་དར་ཚུལ་ལས་བྱེ་བྲག་མ་བུ་བདེ་སྲུང་སྐོར་གྱི་གཞུང་ལུགས་བྱུང་འཕེལ་དང་མང་ཚོགས་ཀྱི་ནང་དུ་ལག་ལེན་ཇི་ལྟར་བྱས་པའི་ཡིག་ཆ་དང་བསྟུན་ཏེ་ཅུང་ཟད་བཀོད་ན། དེ་ཡང་མྱུ་གུ་འབུས་པའི་དུས་སྐབས་དང་འཕེལ་རྒྱས་ཀྱི་དུས་སྐབས། རང་སོར་གནས་པའི་དུས་སྐབས། ཉམས་པ་སོར་ཆུད་དང་མ་ཉམས་གོང་སྤེལ་གྱི་དུས་སྐབས་བཅས་སྐབས་བཞིར་དབྱེ་ཆོག་པར་སེམས།
གཅིག མྱུ་གུ་འབུས་པའི་དུས་སྐབས།
དེ་ཡང་མི་དབང་པཎ་ཊི་ཏ་ཆེན་པོ་སྡེ་སྲིད་སངས་རྒྱས་རྒྱ་མཚོས་མཛད་པའི་གསོ་རིག་སྨན་གྱི་ཁོག་འབུབས་ལས། ཟས་ཕན་གནོད་ཤེས་ཙམ་དང་། རྨ་གསར་བ་ལ་མར་ཁུ་བཏང་ནས་རྩ་ཁ་སྡོམ་པ། སྦང་མའི་འཇིབ་བྱེད་པ་ལ་སོགས་པ་ཀློ་དང་བོད་དུ་མི་ཆགས་པ་ནས་བཟུང་ཡོད། ཅེས་གསུངས་པ་དེ་མཐོང་བ་དང་ཐོས་པ་ཙམ་གྱིས་ཀྱང་། རང་རེ་བོད་ཀྱི་གསོ་བ་རིག་པའི་བསྟན་པ་རིན་པོ་ཆེ་འདི་ཉིད་ལ་ཡང་ལོ་རྒྱུས་ཤིན་ཏུ་རིང་བོ་ཞིག་ཡོད་པ་ནི་རང་ཤུགས་སུ་བསྟན་ཡོད་པ་ཤེས་ཐུབ་ཅིང་། དེ་དག་གི་བདེན་དཔང་ནི་བོད་ཀྱི་ཐུན་མིན་གསོ་བ་རིག་པའི་གཞུང་རྒྱ་མཚོ་ལྟ་བུ་རྣམས་ལས། མར་ཁུ་ལ་བརྟེན་ནས་རྨ་བཅོས་པ་དང་། ཆང་གི་སྦང་མ་དག་ལ་བརྟེན་ནས་སྐྲངས་པ་འདུལ་བ་སོགས་ཀྱི་ལག་ལེན་ཕྲ་མོ་རེ་ཙམ་གྱི་སྲོལ་རྒྱུན་ཡང་དག་པ་ནི། ཡང་དེ་རི
