བུད་མེད་ཀྱི་བདེ་སྲུང་ཞེས་པ་ནི་བུད་མེད་རྣམས་མི་ན་བར་གནས་པར་བྱ་བའི་ཐབས་ལ་བརྩོན་པའི་རིག་པ་སྟེ། ཇི་ལྟར་ན་བར་འགྱུར་བའི་ཚུལ་ཤེས་པ་ལས་ཐོག་མར་ཐ་མལ་བའི་གནས་ལུགས་དང་མཚན་ཉིད་ཤེས་དགོས་པས། ལེའུ་འདིར་དང་པོར་བུད་མེད་ཀྱི་སྐྱེ་འཕེལ་མ་ལག་གི་གནས་ལུགས་དང་མཚན་ཉིད་བཤད་པ་དང་། དེ་ནས་རིམ་བཞིན་བུད་མེད་ཀྱི་ལུས་དང་དབང་བོ་སྨིན་ཚུལ་དང་སྨིན་པའི་ཚད། གནས་སྐབས་ཀྱི་ཁྱད་ཆོས་བཅས་ལ་བལྟས་ཏེ་རིམ་བཞིན་བུད་མེད་གཞོན་དར་སྐབས་ཀྱི་བདེ་སྲུང་དང་། གཉེན་སྒྲིག་སྐབས་ཀྱི་བདེ་སྲུང་། སྦྲུམ་ལྡན་དུས་ཀྱི་བདེ་སྲུང་། བང་ནང་གི་བདེ་སྲུང་། ནུ་སྣུན་དུས་ཀྱི་བདེ་སྲུང་། འཆར་ལྡན་བུ་སྐྱེ། རོ་ཙ་ཉམས་དུས་ཀྱི་བདེ་སྲུང་། རྒ་བའི་དུས་ཀྱི་བདེ་སྲུང་བཅས་བཤད་པ་སྟེ་གཙོ་བོ་བདེ་སྲུང་གི་སྐོར་དང་། གལ་ཏེ་ན་བའི་གནས་སྐབས་སུ་གྱུར་ན་ཐབས་དང་ལག་ལེན་མེད་ཐབས་མེད་པ་འགའ་རེ་གལ་ཆེ་བས་རྒྱུན་མཐོང་མོ་ནད་སྔོན་འགོག་གི་ས་བཅད་གཅིག་བཅས་ཀྱི་སྒོ་ནས་བཤད་པར་བྱའོ། །
ས་བཅད་དང་པོ། བུད་མེད་ཀྱི་སྐྱེ་འཕེལ་མ་ལག་གི་གནས་ལུགས།
བུད་མེད་ཀྱི་སྐྱེ་འཕེལ་མ་ལག་གི་གནས་ལུགས་ལ་ཕྱི་ནང་གི་སྐྱེ་དབང་དང་། འབྲེལ་ཡོད་ཕུང་གྲུབ། ཉེ་འཁོར་གྱི་དབང་བོ་བཅས་འདུས། ཚང་སྒམ་ནི་སྐྱེ་འཕེལ་དབང་བོའི་རྟེན་ཡིན་ལ་བྱིས་པ
