སྤྱིར་དབང་བོ་ཚང་ཞིང་བློ་རིག་རྣོ་བའི་བྱིས་པ་སྐྱེ་མཆེད་གཙང་མ་ཅན་ཞིག་སྐྱེ་བ་ནི་གནམ་འོག་གི་ཕ་མ་ཀུན་གྱི་རེ་འདོད་ཡིན་ལ། རེ་འདོད་དེ་སྐོང་དགོས་ན་ཕྱི་ནང་གི་རྒྱུ་རྐྱེན་དང་དངོས་ཤུགས་ཀྱི་རྒྱུ་རྐྱེན་མང་པོར་རག་ལས་ཀྱང་། མངལ་ཆགས་པའི་དུས་སྐབས་དང་འབྲེལ་བ་དམ་ཟབ་ཡོད་པས་དེའི་སྐོར་ཅུང་ཟད་གླེང་ན།
དེ་ཡང་ལོ་ཚོད་ལ་གཞིགས་ན་ཕོ་མོ་གཉིས་ཀ་ལོ་ཉི་ཤུ་རྩ་ལྔ་ནས་ཉི་ཤུ་རྩ་བརྒྱད་ཀྱི་བར་ནི་ལུས་ཀྱི་འཚར་སྐྱེ་ཡོངས་སུ་རྫོགས་ཤིང་ལུས་སྟོབས་རྒྱས་པ་དང་། ལུས་ཕུང་བདེ་ཐང་ཡིན་པའི་དུས་ཡིན་སྟབས་སྐབས་དེ་རྣམས་སུ་ཕོ་མོའི་ས་བོན་ཁམས་དཀར་དམར་གྱི་སྤུས་ཚད་ཤིན་ཏུ་བཟང་ཕྱིར་ཆེས་ལེགས་པའི་བུ་རྒྱུད་སྤེལ་བའི་དུས་སྐབས་ཡིན། དུས་ཚིགས་ལ་གཞིགས་ན་སྤྱི་ལོའི་ཟླ་བ་གཉིས་པའམ་གསུམ་པ་དང་། ཡང་ན་ཟླ་བ་བདུན་པའམ་བརྒྱད་པ་གང་རུང་ལ་མངལ་ཆགས་ན་དེ་ཙམ་ཡག་པོ་མེད་དེ། ཟླ་བ་གཉིས་པ་དང་གསུམ་པ་གཉིས་ནི་དགུན་ཁ་དང་དཔྱིད་ཀའི་བར་མཚམས་ཡིན་པས་ཆམ་རིམས་ཕོག་སླ་བའི་ཁར་སྔོ་ཚོད་དང་ཤིང་ཏོག་གསར་བའི་རིགས་ཅུང་ཟད་དཀོན་པས་སྦྲུམ་བུའི་ཁམས་འཕེལ་བ་ལ་མི་ཕན། ཟླ་བ་བདུན་པ་དང་བརྒྱད་པ་གཉིས་ནི་དབྱར་གྱི་ཚ་བ་ཆེ་བའི་དུས་ཡིན་སྟབས་ཚད་འཁྲུ་སོགས་འབྱུང་སླ་བས་སྦྲུམ་མའི་ལུས་འཁྲུགས་ན་སྦྲུམ་བུའི་ཁམས་འཕེལ་བ་ལ་གནོད།
