མཚོ་སྔོན་ཞིང་ཆེན་གྱིས་དམངས་ཕན་ཁ་གསབ་རྣམ་གྲངས་ཀྱི་སྨན་བཅོས་འགན་བཅོལ་གྱི“གཅིག་སྤྱོད་བྱང་བུ”བཀོལ་སྤྱོད་བྱེད་མགོ་བརྩམས།
2020.10.14 ཁུངས། ཀྲུང་གོ་བོད་ཀྱི་དྲ་བ། ཀློག་གྲངས། 0

ཟླ་བཅུ་བའི་ཚེས་བཅུའི་ཉིན།  གསར་འགོད་པས་མཚོ་སྔོན་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིན་ནས་རྒྱུས་ལོན་པ་ལྟར་ན།  ད་ལྟའི་བར་དུ་མཚོ་སྔོན་ཞིང་ཆེན་གྱིས་ཞིང་བའི་དམངས་ཕན་ཁ་གསབ་མ་དངུལ་ཁག་བརྒྱ་དང་བཅོ་ལྔ་སྨན་བཅོས་འགན་བཅོལ་གྱི“གཅིག་སྤྱོད་བྱང་བུ”བརྒྱུད་དེ་མང་ཚོགས་ལ་བྱིན་པ་དང་།  རིམ་རྩིས་བྱས་ན་རིགས་མི་འདྲ་བའི་མ་དངུལ་སྒོར་དུང་ཕྱུར་དྲུག་དང་བྱེ་བ་བཞི་ལྷག་ཙམ་བྱིན་པ་རེད།

དམངས་ལ་ཕན་པའི་ཁ་གསབ་མ་དངུལ་གྱི“གཅིག་སྤྱོད་བྱང་བུ”ལས་དོན་ལ་མགྱོགས་མྱུར་ངང་སྐུལ་འདེད་གཏོང་ཆེད།  ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིན་གྱིས་ཁ་གསབ་མ་དངུལ་སྤྲད་དེ་འབྲེལ་ཡོད་དངུལ་ཁང་དང་འབྲེལ་མཐུད་བྱས་པ་བརྒྱུད།  ཁ་གསབ་ལོངས་སྤྱོད་བྱེད་མཁན་གྱིས་བྱང་བུ་བཟུང་བའི་གནས་ཚུལ་དང་དངུལ་རྩའི་ནུས་པ་ནུས་སློང་བྱས་ཚུལ་ཤེས་རྟོགས་བྱས་པ་མ་ཟད།  གྲོང་གསེབ་དང་སྡེ་ཁུལ་དུ་སོང་ནས་བྱང་བུ་བཀོལ་སྤྱོད་བྱེད་མཁན་ལ་དངུལ་བྱང་ནུས་སློང་དང་སྲིད་ཇུས་སྒྲོག་འགྲེལ་སོགས་ཀྱི་ཞབས་ཞུ་འདོན་སྤྲོད་བྱས་ཤིང་།  སྨན་བཅོས་འགན་བཅོལ་བྱང་བུ་སྤྱོད་ཚད་དང་དངུལ་རྩའི་ནུས་པ་ནུས་སློང་བྱེད་ཚད་མཐོ་རུ་བཏང་།  ད་ལྟ་ཞིང་ཆེན་ཡོངས་ཀྱི་རྩྭ་ཐང་སྐྱེ་ཁམས་སྲུང་སྐྱོང་གི་ཁ་གསབ་བྱ་དགའ་དང་།  རྩྭའི་ཁ་གསབ།  དམིགས་བསལ་དཀའ་ངལ་ཅན་གྱི་ཁ་གསབ།  དབུལ་ཕོངས་སློབ་ཆེན་སློབ་མའི་ཁ་གསབ།  གནས་སྐབས་ལས་ཞུགས་གླ་ཕོགས་སོགས་དམངས་ཕན་ཞིང་ཕན་གྱི་ཁ་གསབ་ཡོད་ཚད་སྨན་བཅོས་འགན་བཅོལ་བྱང་བུ་བརྒྱུད་དེ་གཏོང་སྤྲོད་བྱས་ནས།  སྨན་བཅོས་འགན་བཅོལ་བྱང་བུ“གཅིག་སྤྱོད་བྱང་བུ”ཡིས་དམངས་ཀྱི་འཚོ་བར་ཁེ་ཕན་དང་།  སྟབས་བདེ་བཅས་བསྐྲུན་ཡོད་པ་རེད།  །

རྩོམ་སྒྲིག་པ། འབྲུག་མོ།