དོན་ཚན་ཉེར་དྲུག་པ། བྱི་རིམས་འགྲིམ་འགྲུལ་ཞིབ་བཤེར་ས་ཚིགས་ཀྱིས་འགྲིམ་འགྲུལ་རིམས་ནད་ཞིབ་བཤེར་བྱེད་སྐབས། གཤམ་གྱི་བྱེད་ཐབས་དེ་དག་སྤྱད་ཆོག གཅིག བྱི་རིམས་བྱུང་ས་དང་ཡང་ན་རིམས་ནད་ཁུལ་དུ་འགྲོ་འོང་བྱེད་པའི་འགྲིམ་འགྲུལ་སྐྱེལ་འདྲེན་ཡོ་བྱད་དང་དེའི་ནང་དུ་སྐྱེལ་འདྲེན་བྱེད་པའི་མི་སྣ་དང་དངོས་ཟོག་ལ་རིམས་ནད་ཞིབ་བཤེར་བྱེད་དགོས། གཉིས། བྱི་རིམས་བྱུང་བའི་ནད་པ་དང་བྱི་རིམས་དོགས་ཡོད་ནད་པ། དེ་མིན་འབྲེལ་འདྲིས་དམ་ཟབ་བྱུང་བའི་མི་སྣ་བཅས་ལ་གནས་སྐབས་ལོགས་བཀར་དང་གསོ་རིག་ཞིབ་བཤེར་ལག་བསྟར་བྱེད་དགོས་པར་མ་ཟད། འཕྲལ་བསྟུན་གསོ་རིག་བྱེད་ཐབས་གཞན་པ་སྤྱོད་དགོས། གསུམ། བྱི་རིམས་ནད་གཞིས་འབག་བཙོག་ཐེབས་པ་དང་ཡང་ན་འབག་བཙོག་ཐེབས་སྲིད་པའི་དངོས་པོར་ཞིབ་བཤེར་དང་འཕྲོད་བསྟེན་ཐག་གཅོད་བྱེད་ཐབས་སྤྱོད་དགོས། བཞི། བྱི་རིམས་བྱུང་ས་དང་ཡང་ན་རིམས་ནད་ཁུལ་བརྒྱུད་པའི་འགྲིམ་འགྲུལ་སྐྱེལ་འདྲེན་ཡོ་བྱད་དང་དེ་སྡོད་སར་བྲེལ་མྱུར་འཕྲོད་བསྟེན་ཐག་གཅོད་བྱེད་ཐབས་ལག་བསྟར་བྱེད་དགོས། གཞུང་ལམ་དང་ལྕགས་ལམ། ཆུ་ལམ། མཁའ་འགྲུལ་སོགས་བདག་གཉེར་སྡེ་ཁག་གིས་འབྲེལ་ཡོད་གཏན་འཁེལ་ལྟར། མི་སྣ་དང་དངོས་རྗས། དངོས་ཟོག དེ་མིན་སྐྱེལ་འདྲེན་ཡོ་བྱད་བཅས་ལ་བྱི་རིམས་འགྲིམ་འགྲུལ་ཞིབ་བཤེར་བྱེད་དགོས།
དོན་ཚན་ཉེར་བདུན་པ། བྱི་རིམས་བརྟག་དཔྱད་དང་མ་དཔེ་བསྡུ་རུབ། ཞིབ་བཤེར། ལོགས་བཀར། སྨན་བཅོས་སོགས་སྔོན་འགོག་ཚོད་འཛིན་བྱེད་ཐབས་སྤྱོད་སྐབས། འབྲེལ་ཡོད་སྡེ་ཁག་དང་མི་སྒེར་གྱིས་མཐུན་སྦྱོར་བཟང་བོ་བྱེད་དགོས་པར་མ་ཟད། གནས་ཚུལ་ཇི་མ་ཇི་བཞིན་དུ་བཤད་དགོས་པ་ལས། གནས་ཚུལ་སྦ་གསང་དང་ནར་འགྱངས། རྫུན་ཞུ་བཅས་བྱེད་མི་རུང་། དོན་ཚན་ཉེར་བརྒྱད་པ། བྱི་རིམས་བྱུང་སའི་རྫོང་རིམ་པ་ཡན་གྱི་མི་དམངས་སྲིད་གཞུང་གིས་སྤྱི་བསྒྲགས་དང་བརྡ་འཕྲིན་བསྐུར་བ། ཉེན་བརྡའི་མཚོན་རྟགས་འགོད་པ་སོགས་ཀྱི་བྱེད་ཐབས་བརྒྱུད་དེ་བྱི་རིམས་ཉེན་ཁའི་སྔོན་བརྡ་ཁྱབ་བསྒྲགས་བྱས་ནས་བྱི་རིམས་འབྱུང་བ་སྔོན་འགོག་ཚོད་འཛིན་བྱེད་དགོས།
དོན་ཚན་ཉེར་དགུ་པ། རྫོང་རིམ་པ་ཡན་གྱི་མི་དམངས་སྲིད་གཞུང་གི་འཕྲོད་བསྟེན་བདེ་ཐང་གཙོ་གཉེར་སྡེ་ཁག་གིས་འབྲེལ་ཡོད་སྡེ་ཁག་དང་མཉམ་དུ་ཁྲིམས་ལྟར་འཕྱི་བ་སོགས་བྱི་རིམས་འབྱུང་ཁུངས་ཀྱི་སྲོག་ཆགས་འཛིན་པ་དང་གསོད་པ་སོགས་བྱས་ནས་བྱི་རིམས་མཆེད་པའི་ཉེན་ཁ་ཇེ་ཆུང་དུ་གཏོང་དགོས།
དོན་ཚན་སུམ་ཅུ་པ། ནད་རིགས་འགོག་བཅོས་དང་ཚན་རིག་ཞིབ་འཇུག་ཐད་ཀྱི་དགོས་མཁོ་ལས་གཞན། སྡེ་ཁག་དང་མི་སྒེར་གང་རུང་གིས་གཤམ་གྱི་བྱི་རིམས་འབྱུང་བ་དང་འགོས་ཁྱབ་དུ་འགྲོ་བའི་ཉེན་ཁ་ཡོད་པའི་བྱ་སྤྱོད་སྤེལ་མི་རུང་། གཅིག འཕྱི་བ་སོགས་བྱི་རིམས་འབྱུང་ཁུངས་ཀྱི་སྲོག་ཆགས་རྔོན་པ་དང་གསོ་བ། ཁ་ཟས་སྟེར་བ་སོགས་བྱེད་མི་རུང་། གཉིས། འཕྱི་བ་སོགས་བྱི་རིམས་འབྱུང་ཁུངས་ཀྱི་སྲོག་ཆགས་དང་དེའི་ཐོན་རྫས་ལས་སྣོན་དང་སྐྱེལ་འདྲེན། ཉར་ཚགས། ཉོ་ཚོང་། འགྲེམ་སྟོན་བཅས་བྱེད་མི་རུང་། འཕྱི་བ་སོགས་བྱི་རིམས་འབྱུང་ཁུངས་ཀྱི་སྲོག་ཆགས་དང་དེའི་ཐོན་རྫས་ཁ་ཟས་སུ་བྱེད་མི་རུང་།
དོན་ཚན་སོ་གཅིག་པ། སྲོལ་ཡིག་འདིའི་གཏན་འབེབས་དང་འགལ་བའི་བྱ་སྤྱོད་ལ། བཅའ་ཁྲིམས་དང་ཁྲིམས་སྲོལ་ལས་གཏན་འཁེལ་བྱས་པའི་བཅའ་ཁྲིམས་འགན་འཁྲི་ལག་བསྟར་བྱེད་དགོས།
དོན་ཚན་སོ་གཉིས་པ། སྲོལ་ཡིག་འདིའི་གཏན་འབེབས་དང་འགལ་ནས། འཕྱི་བ་སོགས་བྱི་རིམས་འབྱུང་ཁུངས་ཀྱི་སྲོག་ཆགས་རྔོན་པ་སོགས་བྱས་ན།
རྫོང་རིམ་པ་ཡན་གྱི་མི་དམངས་སྲིད་གཞུང་གི་ནགས་རྩྭ་དང་འཕྲོད་བསྟེན་བདེ་ཐང་གཙོ་གཉེར་སྡེ་ཁག་གིས་རང་གི་འགན་འཁྲི་ཁག་བགོས་ལྟར་ཁྲིམས་འགལ་བྱ་སྤྱོད་སྤེལ་མཚམས་འཇོག་ཏུ་འཇུག་པ་དང་། འཕྱི་བ་སོགས་བྱི་རིམས་འབྱུང་ཁུངས་ཀྱི་སྲོག་ཆགས་དང་རྔོན་འཛིན་ཡོ་བྱད། ཁྲིམས་འགལ་གྱི་ཐོབ་ཆ་ཡོད་ཚད་གཞུང་བཞེས་བྱེད་དགོས་པར་མ་ཟད། སྒོར་སྟོང་གཉིས་ཀྱི་ཡན་དང་ཁྲི་གཅིག་གི་མན་གྱི་ཆད་པ་གཅོད་དགོས།
ལྷ་མོ་ཚེ་རིང་གིས་བསྒྱུར།
