དཔྱིད་མགོ་མའི་ཡུལ་ཤུལ་རྩྭ་ཐང་ནི་སྔར་བཞིན་འཁྱགས་པས་བསྡམས་འདུག དྲོད་གྲང་གོར་ཐིག་མན་གྱི་ཏུའུ་ཉི་ཤུའི་འཁྱགས་གྲང་གི་གནམ་གཤིས་ཀྱིས་མིའི་རུས་རྐང་གཟེར་ནའང་། ཆུ་དམར་ལེབ་རྫོང་འཕྲིན་སྐྱེལ་ཀུང་ཟིའི་བོད་རིགས་ལས་བཟོ་བ་ཡོན་ཏན་འཕྲིན་ལས་ལོ་སར་སྐབས་སུ་ལས་རེས་བྱེད་པའི་སེམས་ཤུགས་དེ་ཉམས་སུ་འཇུག་ཐུབ་ཀྱིན་མེད། རྒྱུ་མཚན་ནི་ད་ལོའི་ལོ་སར་འདི་ནི་ཡོན་ཏན་འཕྲིན་ལས་ལ་མཚོན་ན་བྱ་བའི་ལས་གནས་སུ་ཞུགས་རྗེས་ཀྱི་ལོ་སར་ཐེངས་དང་པོ་ཡིན་པ་དང་། ཡང་གཅིག་བཤད་ན་ཁོ་རང་ཕ་མ་དང་མཉམ་དུ་ལོ་སར་མ་ཐུབ་པའི་ལོ་སར་ཐེངས་དང་པོའང་རེད། ལོ་སར་གྱི་སྔོན་དུ་ཡོན་ཏན་འཕྲིན་ལས་ཟི་ལིང་ལ་འགྲོ་བའི་ལམ་བར་དུ་ཡུལ་ལ་ཐེངས་ཤིག་ལོག་པ་དང་། སྐབས་དེར་ཁོས་རང་གི་ཟླ་ཕོགས་ཀྱིས་ཡུལ་མི་རྣམས་ལ་ལོ་སར་གྱི་དངོས་པོ་ཉོས་པར་མ་ཟད། དཔལ་འབྱོར་གྱི་ཡོང་འབབ་དམའ་བའི་ཕ་མ་གཉིས་ལ་རྒྱུན་དུ་ཁོ་གཉིས་ཀྱིས་སེར་སྣ་བྱས་ཏེ་ཉོ་ཐུབ་ཀྱིན་མེད་པའི་ལྭ་བ་རེ་འགའ་ཉོས།
སྤྱིར་ཆུ་དམར་ལེབ་ནས་སྐྱེ་རྒུ་གྲོང་རྡལ་བར་ལ་རླངས་འཁོར་གྱིས་ཉིན་གཅིག་ཙམ་ལ་འགྲོ་དགོས་པ་དང་རི་ལམ་ཀྱག་ཀྱོག་ཡིན་པས་ལམ་དུ་བགྲོད་པར་སྟབས་མི་བདེ་ནའང་། ཡོན་ཏན་འཕྲིན་ལས་ཀྱི་སེམས་སུ་སྨྲ་མི་ཤེས་པའི་སྤྲོ་བ་ཞིག་གིས་བརྟས་འདུག ཁོས་ལམ་འགྲམ་གྱི་
