“ད་ནི་ངའི་ཁྱིམ་གྱི་སྒོ་ཆེན་མཐོང་དུས་སེམས་པ་སྐྱོ་བའི་ཁེངས་འདུག”ཅེས་འབྲོག་པ་ཞིག་གིས་གོང་མོ་ཞང་སྲིད་གཞུང་གི་མགྲོན་ཁང་ནས་ང་ཚོར་གསོན་ཉམས་ལྡན་པའི་ངང་དྲེད་མོང་གིས་ཁོ་ཚང་གི་ཁང་པ་བཤིག་ཚུལ་བཤད་བྱུང་།
ཁང་པའི་ནང་དུ་ལུག་ཤ་དང་མར་གྱི་དྲི་མ་འདྲེས་མ་ཞིག་སྣ་ལམ་དུ་འཐུལ་ཡོང་ཞིང་། སྒེའུ་ཁུང་ཕྱི་རོལ་ནི་མཚོ་བོད་མཐོ་སྒང་ཁོ་ནར་ཡོད་པའི་སྔོ་ཞིང་དྭངས་པའི་ནམ་མཁའ་རེད། ཟླ་བ་དྲུག་པར་བསླེབས་ཀྱང་བྱང་ཐང་དུ་ད་དུང་གྲང་ངར་གྱིས་བསྡམས་ཤིང་རླུང་ཡང་ཤིན་ཏུ་ཆེ། ཕུད་ནས་ཟླ་གཅིག་ཙམ་ལས་མ་འགོར་བའི་དགུན་ལྭ་སླར་ཡང་མི་གྱོན་ཀ་མེད་བྱུང་།
གོང་མོ་ཞང་ནི་མངའ་རིས་ས་ཁུལ་གྱི་སྒེར་རྩེ་རྫོང་དུ་ཡོད། སྒེར་རྩེ་རྫོང་གིས་དོ་དམ་བྱེད་པའི་བྱང་ཐང་རང་བྱུང་སྲུང་སྐྱོང་ཁུལ་གྱི་ཁྱབ་ཁོངས་ནི་མངའ་རིས་ས་ཁུལ་གྱི་རྫོང་ཁ་ཤས་ལས་ཆེས་ཆེ་ཤོས་ཡིན། ད་ཐེངས་ང་ཚོ་སྒེར་རྩེར་འགྲོ་དོན་ཡང་ལས་གཞི་ཞིག་གི་ཆེད་དུ་ཡིན། ལས་གཞི་དེ་རུ་ཞང་སྲིད་གཞུང་དང་གྲོས་ཐག་བཅད་དེ་ས་གནས་དེ་གའི་མི་དང་རི་སྐྱེས་སྲོག་ཆགས་བར་གྱི་འགལ་བ་ཇེ་ལེགས་སུ་གཏོང་ཐབས་བྱེད་རྒྱུ་དེ་ཡིན། སྒེར་རྩེ་རྫོང་ནགས་ལས་ཅུའུ་དང་གོང་མོ་ཞང་སྲིད་གཞུང་གིས་གྲོས་མོལ་བྱས་མཐར་སེང་རྡོ་གྲོང་ཚོའི་གཡང་ལུང་རུ་ཁག་དེ་མངའ
