ད་ལྟ་གཟིགས་བཞིན་པ། > མདུན་ངོས། > རྩོམ་རིག > སྒྱུར་རྩོམ།

མགོ་རྟིང་སློག་པ།

སྤེལ་དུས། 2015-05-13 09:48:06   ཡོང་ཁུངས། རང་རེའི་ལས་ཁུངས།   རྡེབ་ཚད།    ནང་དོན་འདི་སྤེལ་མཁན། དབང་རྒྱལ་ཚེ་རིང་།

མོ་ཡན་གྱིས་བརྩམས།

སྙིང་མོ་སྐྱིད་ཀྱིས་བསྒྱུར།

མག་མོག་གི་གློག་འོད་དང་ལྗོན་ཤིང་གི་གྲིབ་མའི་གར་སྟབས། ད་དུང་རྡོ་ཀ་མ་རུ་ཆག་གྲུམ་ལས་གྲུབ་པའི་ལམ་ཆུང་དེ་བརྒྱུད་ནས་ང་རང་མགྲོན་ཁང་གི་སྦུག་དུ་ཡོད་པའི་རྒྱས་ཤོམ་ཅན་གྱི་ཁང་བརྩེགས་དང་པོར་གཟས་ནས་སོང་། དོ་དགོང་ཞིང་ཆེན་རྩ་འཛུགས་པུའུ་ཡི་པུའུ་ཀྲང་གཞོན་པ་སུའུན་ཏཱ་ཧྲིན་གྱིས་ཁང་བརྩེགས་དང་པོའི་ནུབ་ཟས་ཁང་གི་ཁང་བ་ལྔ་པ་རུ་ང་ཚོ་སྟེ། ཁོའི་སློབ་འབྲིང་གི་སློབ་གྲོགས་རྣམས་ལ་གསོལ་སྟོན་བཤམས་ནས་སྣེ་ལེན་བྱས་ཡོད།
སུན་ཏཱ་ཧྲིན་མི་མ་བསླེབ་སྔོན་ལ་དགོད་སྒྲ་ཐོན་ཚར་འདུག ཁོའི་དབུགས་སྔ་མས་རྗེས་མས་གཞུག་ཆོད་ཐུབ་མེད་པའི་དགོད་སྒྲ་དེ་ཐོས་མ་ཐག ང་ཚོ་ཚང་མ་བྲེལ་འཚུབ་ངང་ཡར་ལངས། མ་རེད། ང་ཕུད་པའི་ཁོ་ཚོ་ཚང་མ་མ་གཞི་ནས་ལངས་བསྡད་ཡོད། སུན་ཏཱ་ཧྲིན་གྱི་དགོད་སྒྲ་ཐོས་མ་ཐག་ཁོ་ཚོའི་ལྷོད་ལྷོད་ངང་གནས་པའི་གཟུགས་པོ་གློ་བུར་དུ་ཤ་སྒྲིམ་པས། ད་སོ་མ་འབོལ་ཁྲི་ལས་ཡར་ལངས་བ་འདྲ་བའི་ཚོར་སྣང་ཞིག་སྦྱིན་ཡོང་། ཐ་ན་བལྟས་ཚོད་དུ་མཚོ་ངོས་བཞིན་ལྷིང་འཇགས་ཡིན་པའི་ཞེ་ལན་དབྱིན་གྱིས་ཀྱང་སྐེད་པ་ཅུང་ཇེ་དྲང་དུ་བཏང་རྗེས་རྐུབ་སྟེགས་ཀྱི་རྒྱབ་བསྙེས་སུ་ཁེན་པའི་ལག་པ་གཉིས་ཀ་མར་བླངས་ནས་བསྣོལ་ཏེ་ལྟོ་བའི་མདུན་དུ་བཞག བྲེལ་འཚུབ་ངང་ཡར་ལངས་མཁན་ངོ་མ་དེ་ང་ཡིན། མ་གཞི་ང་རང་ཡར་ལངས་རྩིས་མེད་མོད། ངའི་ལུས་པོ་རང་ཉིད་ཡར་ལངས་སོང་།
ཡག་ཕོ་སྒོ་འཛོམས་པའི་གསར་བུ་དེས་སྒོ་ཕྱེ་རྗེས་སྐེད་པ་སྒུར་སྒུར་དང་གདོང་ལ་སྦྱོང་བརྡར་ལས་གྲུབ་པའི་འཛུམས་ཀྱིས་ཁེངས་ཏེ་མགྱོགས་མྱུར་ངང་ཕྱོགས་ཅིག་ཏུ་གཞོལ། མི་སྣ་གྲགས་ཅན་ཞིག་གར་སྟེགས་བུད་པ་ཇི་བཞིན་སུན་ཏཱ་ཧྲིན་གཟི་འོད་ཆེམ་ཆེམ་དང་བཅས་ང་ཚོའི་མིག་མདུན་དུ་མངོན་བྱུང་། ཁོའི་ཁོག་སྟོད་ལ་གསེར་མདོག་གི་ལྭ་བ་ཕུ་ཐུང་ཅན་ཞིག་གྱོན་ལ། ཁོག་སྨད་དུ་རྐང་སྣམ་ནག་པོ་ཞིག་གྱོན་འདུག ལྟོ་བ་ཅུང་འབུར་རུང་ཆེ་རྒྱུ་མེད། ཀླད་དཀྱིལ་དུ་སྐྲ་མེད་པས་གཞོགས་གཉིས་ཀྱི་སྐྲས་བཀབ་འདུག ཁོའི་སྐྲ་རྐང་རེ་རེ་གསལ་བོར་དགར་ཐུབ་ཅིང་། བལྟས་ཚོད་དུ་ཧ་ཅང་རྩ་ཆེན་ཡིན་པར་སྣང་། ལོ་ཉི་ཤུའི་སྔོན་གྱི་མ་རབས་པྲ་ཆལ་གྱི་སུན་ཏཱ་ཧྲིན་གྱི་སྣང་བརྙན་དེ་ཨུ་ཚུགས་མཐར་སྐྱེལ་གྱིས་ངའི་བློ་ངོར་ཤར་ཏེ་མིག་མདུན་གྱི་ལས་བྱེད་སུན་ཏཱ་ཧྲིན་དང་མངོན་གསལ་གྱི་སྡུར་བ་ཞིག་གྲུབ་བྱུང་། ངའི་མིག་མདུན་དུ་ལངས་བའི་དཔོན་ཆེན་འདི་ཆུང་དུས་སིལ་ཏོག་བརྐུ་དུས་སྟབས་མ་ལེགས་པར་ངེད་ཚང་གི་ཕག་ཁང་དུ་ལྷུང་བའི་སུན་ཏཱ་ཧྲིན་དེ་ནར་སོན་པ་རེད་ཟེར་ན་ངོ་མ་རློམ་དཀའ་སྟེ། རྟོའུ་ལུ་ནར་སོན་རྗེས་བོང་བུ་ལོ་ལོན་ཞིག་ཏུ་ཆགས་པ་རེད་ཅེས་བརྗོད་པ་བཞིན་ནོ། ཡིན་ནའང་་གཞན་དང་མི་མཚུངས་ཞིང་སུས་ཀྱང་ལད་ཟློས་བྱེད་མི་ཐུབ་པའི་ཁོའི་དགོད་སྒྲ་དེས་མིག་མདུན་གྱི་དཔོན་ཆེན་རྒྱགས་པ་དེ་ནི་ཆུང་དུས་ནས་གཞན་དངོས་བརྐུ་མཁན་གྱི་མི་ངན་སུན་ཏཱ་ཧྲིན་ཡིན་པ་ར་སྤྲོད་བྱས།
"ཧི་ཧི་་་་་་་་་་་་་ཧོ་ཧོ་་་་་་་་་་་ཧི་ཧི་་་་་་་་་་་་"་སུན་ཏཱ་ཧྲིན་གྱི་གདོང་ཡོངས་འཛུམ་གྱིས་ཁེངས་ཏེ་ང་ཚོར་ཕྱོགས་ནས་བསླེབས་བྱུང་། ཀོ་བས་བཏུམས་པའི་སྒོ་མཐུག་པོ་དེ་གྲག་འགུལ་ཅི་ཡང་མེད་པར་བརྒྱབ་པ་དང་། ཡག་ཕོ་སྒོ་ཅན་གྱི་གསར་བུ་དེ་ཡང་དུ་བ་ཇི་བཞིན་གར་སོང་ཆ་མེད་དུ་གྱུར།
"ཧི་ཧི་་་་་་་་་ཧོ་ཧོ་་་་་་་ཏུང་ལའང་ཆིན་་་"་་སུན་ཏཱ་ཧྲིན་གྱིས་ཏུང་ལའང་ཆིན་གྱི་ལག་པ་འཇུས་ནས་དགོད་ཞོར་དུ་བཤད་རྒྱུར། "དཔོན་མཛོད་ནང་གི་བྱི་བའི་ཆེ་ཆུང་བྲེ་གང་ཡོད། མཛོད་སྒོ་ཕྱེ་རུང་འབྲོ་མཁན་མེད།"
"ཧི་ཧི་་་་་་་་་་ཧོ་ཧོ་་་་་་་་་་ཀྲང་ཧྥ་ཀྲན་་་་་་་་་་་་་་"་སུན་ཏཱ་ཧྲིན་གྱིས་ཀྲང་ཧྥ་ཀྲན་གྱི་ལག་པ་འཇུས་ནས་དགོད་ཞོར་དུ་བཤད་རྒྱུར། "ཕྱུག་འགྱུར་བྱེད་འདོད་ན་ཐོག་མར་ལམ་ལས་དགོས།"
"ཧི་ཧི་་་་་་་་་་་ཧོ་ཧོ་་་་་་་་སང་ཙི་ལའན་་་་་་་་་་་་"སུན་ཏཱ་ཧྲིན་གྱིས་སང་ཙི་ལའན་གྱི་ལག་པ་འཇུས་ནས་དགོད་ཞོར་དུ་བཤད་རྒྱུར། རིམ་གསུམ་མི་སྣས་ཞྭ་ཆེན་མདའ་གཡབ་ཅན་གྱོན། ཞུ་སྦྱོར་སྔ་མ་ཟོས་རྗེས་ཕྱི་མ་ཟ།
" ཧི་ཧི་་་་་་་་་་་ཧོ་ཧོ་་་་་་་་"ཞའོ་མོ་ཧྥང"་་་་་་་་་་་་"སུན་ཏཱ་ཧྲིན་གྱིས"ཞའོ་མོ་ཧྥང་"གི་ལག་པ་འཇུས་ནས་དགོད་ཞོར་དུ་བཤད་རྒྱུར། "དཔེ་ཆའི་ནང་དུ་གསེར་ཁང་ཡོད། དཔེ་ཆའི་ནང་དུ་སྒེག་མོ་ཡོད།"
སུན་ཏཱ་ཧྲིན་གྱི་གདོང་ལ་འཛུམ་གྱིས་ཁེངས་ནས་ཞེ་ལན་དབྱིན་མདུན་དུ་ལངས་ཏེ་མོའི་མགོ་ནས་རྐང་བར་ཐེངས་འགར་བལྟས་རྗེས་མིག་གཉིས་ཁོ་མོའི་སྐེག་རྡོག་ལྟ་བུའི་གདོང་ཆེན་པོ་དེའི་སྟེང་ཅེར་ནས་དགོད་ཞོར་དུ" ཞུའུ་ལྕམ་མོ་རྒས་མི་འདུག"ཟེར།
ཞེ་ལན་དབྱིན་གྱི་གདོང་ལམ་སེང་དམར་པོར་གྱུར།
སུན་ཏཱ་ཧྲིན་ཀྱིས་ལག་པ་བརྐྱངས་ནས"མ་འཇལ་ཡུན་རིང་། ལག་འཇུ་ཞིག་བྱེད།"ཟེར།
ཞེ་ལན་དབྱིན་གྱིས་ཐེ་ཚོམ་དང་བཅས་ལག་བརྐྱངས་ནས་སུན་ཏཱ་ཧྲིན་ལ་ཡིད་ཚིམ་པ་ཞིག་འཇུ་རུ་བཅུག་པ་དང་། གདོང་ཕྱོགས་གཞན་ཞིག་ཏུ་གཅུས་ནས་བསྡད་པ་ན། ཧ་ཅང་ངོ་ཚ་བའི་རྣམ་པ་དེ་བུ་མོ་ལོ་ཆུང་ཅིག་དང་ཨ་ན་མ་ན་རེད།
""ཞའོ་མོ་ཧྥང"ཁྱོད་ཀྱིས་ཞེ་ལན་དབྱིན་ཚོད་འཛིན་བྱས་པ་མང་དྲགས་པ་མིན་ནམ།"སུན་ཏཱ་ཧྲིན་གྱིས་ཞེ་ལན་དབྱིན་གྱི་ལག་པ་འཇུ་བཞིན་མགོ་བོ་གཅུས་ཏེ"ཞའོ་མོ་ཧྥང"ལ་དྲིས།
མ་ཉེས་ཁ་གཡོག་རེད་ཡ། སུན་པུའུ་ཀྲང་། ཞའོ་མོ་ཧྥང་གིས་འུད་བརྗོད་ངང་བཤད་རྒྱུར། ཁྱོད་ཀྱིས་ངའི་ཚུགས་ཀར་ཅིག་ལྟོས་དང་། ངས་ཁོ་མོ་ཚོད་འཛིན་བྱེད་ཐུབ་རྒྱུ་ཨེ་རེད།
ཁོག་ན་སྡུག་ཅི་ཞིག་ཡོད་རུང་ང་ལ་ཤོད་དང་། སུན་ཏཱ་ཧྲིན་གྱིས་ཞེ་ལན་དབྱིན་གྱི་གདོང་ལ་ཅེར་ནསདཔོན་པོ་ངས་ཁྱོད་ལ་ཐག་གཅོད་བྱས་ཆོག་ཟེར།
སུན་ཏཱ་ཧྲིན་གྱིས་ཞེ་ལན་དབྱིན་གྱི་ལག་པ་བཏང་བ་དང་འཛུམ་ཤིག་ཤིག་ངང་ང་གཟས་ནས་བསླེབས་བྱུང་། མ་གཞི་ངས་ཁོར་ཨ་ཁུ་རྟ་རྫི་---(འདི་ནི་སློབ་ཆུང་འགྲིམས་དུས་ངས་དངོས་སུ་ཁོར་གཏགས་པའི་འཚང་མིང་ཡིན།)ཞེས་ལན་ཅིག་འབོད་འདོད་མོད། ཡིན་ནའང་སྐད་ཆ་ལྕེ་རྩེར་བསླེབས་མ་ཐག་ཕྱིར་ཁོག་ཏུ་མིད། ཁོའི་ལག་པ་རྒྱགས་པ་ཆུང་ཆུང་དེ་ཚུར་བསྲིངས་བ་མཐོང་དུས་ངའི་ལག་པས་སྒུག་ཐབས་བྲལ་བའི་ངང་མྱུར་མོར་ཁོའི་ལག་པར་འཇུས། ངའི་ལག་པས་ཁོའི་ལག་པ་རྒྱགས་པ་ཆུང་ཆུང་དེ་སྒོ་ང་ལས་ཕྱིར་བུད་མ་ཐག་པའི་བྱ་ཕྲུག་ཇི་བཞིན་དྲོད་ཅིང་སྙི་བ་ཚོར་བྱུང་།
ཝེའེ་སྡེར་མོ་ཆེན་པོ། དོ་དགོང་ཁྱོད་ངོ་མ་ནམ་རྒྱུན་དང་མི་འདྲ་བར་ཆགས་འདུག སུན་ཏཱ་ཧྲིན་གྱིས་ངའི་ཕུ་ཐུང་ལ་མཛུབ་མོས་ཕུར་ཙམ་བྱས་རྗེས་དགོད་ཞོར་དུ་སྔོན་ལ་ས་རྒྱུས་བླངས་མེད་དམ།
མགྲོན་ཁང་སྣ་ཤོ་འདི་ཕྱོགས་བཞི་མཚམས་བརྒྱད་ཐམས་ཅད་ཨར་འདམ་གྱིས་གཡོགས་འདུག་པས་ས་སྤར་མོ་བཙལ་རྒྱུ་ཀྱང་དཀའ་མོ་རེད། ངས་སྣང་མེད་ངང་ལན་བཏབ། ཞའོ་མོ་ཧྥང་གིས་ང་ཚོ་བསླེབས་དུས་ཁོ་ལྭ་བ་ཚང་མ་ཕུད་རྗེས་ནུབ་ལྭར་རྐང་བས་ཕུར་ཀྱིན་འདུག་ཟེར།
ཚང་མ་སྐད་ཆེན་པོས་བགད།
ཆོག་གི ཆོག་གི མི་དྲང་མོར་བརྙས་བཅོས་མ་བྱེད། སུན་ཏཱ་ཧྲིན་ཚང་མར་ཁ་གཏད་ནས་མར་སྡོད་མར་སྡོད་ཟེར། ཁོས་འཁྲིས་ཀྱི་རྐུབ་བཀྱགས་རྒྱབ་བསྙེས་མར་རྡེབ་ཙམ་བྱས་ཏེ། ཞེ་ལན་དབྱིན། ཁྱོད་ངའི་འགྲམ་དུ་སྡོད་ཟེར།
ཞེ་ལན་དབྱིན་གྱིས་དོགས་མི་བདེ་བའི་ངང་ང་རང་འདིར་བསྡད་ན་ཆོག་ཟེར།
མི་ཆོག སུན་ཏཱ་ཧྲིན་གྱིས་ད་ལྟ་ནུབ་ཕྱོགས་དང་འབྲེལ་མཐུད་བྱེད་རྒྱུ་དར་ཁྱབ་ཆེ་བས། སྐྱེས་མར་ཁྱད་དབང་སྤྲོད་ཟེར།
སུན་པུའུ་ཀྲང་གིས་ཁྱོད་རང་དེར་སྡོད་ཟེར་ན་དེར་སྡོད་ཅིག ཞའོ་མོ་ཧྥང་གིས་བཤད།
ཕར་སྡོད་དང་། ཕར་སྡོད་དང་། ཏུང་ལའང་ཆིན་གྱིས་ཞེ་ལན་དབྱིན་ཡར་འཐེན་ནས་དྲུད་དེ་སུན་ཏ་ཧྲིན་གྱི་འཁྲིས་སུ་སྡོད་དུ་བཅུག
ཅོག་ཙེ་སྒོར་སྒོར་དེ་ཧ་ཅང་ཆེ་བས་མི་དྲུག་པོ་ཐར་ཐོར་དུ་བསྡད་འདུག
ཚང་མ་རུབ་རུབ་ངང་སྡོད་དང་། སུན་ཏཱ་ཧྲིན་གྱིས་བཤད།
མི་གཅིག་ཀྱང་མ་འགུལ།
སྒེག་ཉམས་ཀྱིས་ཕྱུག་པའི་ཞབས་ཞུ་མ་ཞིག་སུན་ཏཱ་ཧྲིན་གྱི་རྒྱབ་ཏུ་ཕྱིན་ནས་སྐད་དམའ་མོས་སུན་པུའུ་ཀྲང་། ཆང་ཅི་ཞིག་འཐུང་ངམ་ཞེས་དྲིས།
སུན་ཏཱ་ཧྲིན་གྱིས་ང་ཚོར་ལན་ཅིག་བལྟས་བ་དང་སློབ་གྲོགས་རྙིང་བའི་ལྷན་འཛོམས་ལ་ཆང་དཀར་འཐུང་བ་དཔེ་ཡིན།
ངས་ཆང་དཀར་མི་འཐུང་། ཞེ་ལན་དབྱིན་གྱིས་བཤད།
ཡང་ཁྱོད་ཀྱིས་སྤྲོ་བ་བཅོམས་འདོད་དམ། ཞའོ་མོ་ཧྥང་གིས་ཞེ་ལན་དབྱིན་ལ་མིག་ལོག་ཅིག་བལྟས།
ཆང་དཀར་་ལ་མོའོ་ཐའེ་དང་ཝུའུ་ལའང་ཡེ། ཅོ་ཀའེ། ཧྥིན་ཅོ་སོགས་ཡོད་པས་ཁྱོད་གང་མཆོད་དམ། ཞབས་ཞུ་མས་དྲིས།
ཅོ་ཀའེ། སུན་ཏཱ་ཧྲིན་གྱིས་བཤད།
ཞབས་ཞུ་མས་ཆང་དམ་གྱིས་ཁ་ཕྱེས་བ་དང་མི་རེ་རེའི་མདུན་གྱི་ཆང་དཀར་དུ་ཆང་བླུགས། ཞེ་ལན་དབྱིན་གྱིས་ཆང་དཀར་གྱི་ཁ་བཀབ་ནས་ངས་ངོ་མ་འཐུང་མི་ཐུབ་ཟེར།
འཐུང་མི་ཐུབ་རུང་གང་བླུགས་ཏེ་བལྟས་ན་ཆོག སུན་ཏཱ་ཧྲིན་གྱིས་བཤད།
སུན་པུའུ་ཀྲང་གི་ཁར་ཉན་རྒྱུ་བྱས། ཀྲང་ཧྥ་ཀྲན་གྱིས་ཞེ་ལན་དབྱིན་གྱི་ལག་གི་ཆང་དཀར་འཕྲོག་སྟེ་བཤད།
ཞབས་ཞུ་མ་གཅིག་གིས་ཆང་ལྡུག་པའི་དུས་ཡུན་ཐུང་ཐུང་དེའི་ནང་དུ་ཞབས་ཞུ་མ་འགས་ཞ་ཆེན་པོ་དང་སྡིག་སྲིན། ཧའེ་ཧྲིན། ཉ་བསྙལ་མ་སོགས་མཚོ་འབུ་དག་སྡེར་མ་ཆེན་པོ་རེ་རེའི་ནང་བླུགས་ཏེ་ཅོག་ཙེ་ཐོག་བསྒྲིགས།
སུན་ཏཱ་ཧྲིན་གྱིས་ཆང་དཀར་བཀྱགས་ནས་བཤད་རྒྱུར། སློབ་གྲོགས་རྣམ་པ། མ་མཇལ་ཡུན་རིང་། ཆང་འདི་ངས་ཁྱོད་ཚོར་བཀྱགས་པ་ཡིན། ཚང་མ་ཞབས་དག་ཡོན་ནོ་ཟེར།
ང་ཚོ་ཡར་ལངས་ནས་ཆང་དཀར་བཀྱགས་ཏེ་མར་སྒུར་ནས་སུན་ཏཱ་ཧྲིན་གྱི་ཆང་དཀར་དང་ཐོད་གཏུག་བརྒྱབ། སུན་ཏཱ་ཧྲིན་གྱིས་ཆང་དཀར་ཅོག་ཙེ་སྟེང་བརྡབ་ཙམ་བྱས་ཏེ་བཤད་རྒྱུར། ཙོག་སྡོད། ཙོག་སྡོད།
ཁོས་ཆང་དཀར་བཀྱགས་ནས་དབུགས་ཐེངས་གཅིག་གིས་བཏང་རྗེས་ཆང་དཀར་མགོ་རྟིང་སློག་ནས་ཚང་མར་ལྟ་རུ་བཅུག
ཆང་ཉུང་ཉུང་འདི་འདྲ་ཅིག་ཅི་ཡང་མ་རེད། ངས་ཀྱང་ལམ་སེང་ཞབས་བཏགས་བརྒྱབ་པ་ཡིན། ཀྲང་ཧྥ་ཀྲན་དང་ཞའོ་མོ་ཧྥང་གིས་ཀྱང་ཞབས་བཏགས་བརྒྱབ། ཞའེ་ལན་དབྱིན་གཅིག་པུས་ཞབས་བཏགས་བརྒྱབ་མི་འདུག སུན་ཏཱ་ཧྲིན་གྱིས་ཁོ་མོའི་ཆང་དཀར་ཅིག་བལྟས་ཏེ་བཤད་རྒྱུར། ཁྱོད་ཀྱི་ཁ་ཤས་ཆང་ལ་ཐུག་ཙམ་ཡང་བྱས་མི་འདུག འདི་ལྟར་ག་ལ་འགྲིག་ཟེར།
ངས་ངོ་མ་འཐུང་མི་ཐུབ་ཀི ཞེ་ལན་དབྱིན་གྱིས་བཤད།
སུན་ཏཱ་ཧྲིན་གྱིས་མོའི་ཆང་དཀར་བཟུང་ནས་མོའི་མདུན་དུ་བཀྱགས་ཏེ་བཤད་རྒྱུར། ཁྱོད་ཀྱིས་ང་ལ་ཁ་ངོ་འདི་འདྲ་ཞིག་ཀྱང་མི་སྟེར་རམ།
ངས་ངོ་མ་འཐུང་མི་ཐུབ་ཀི
ཁྱོད་ཀྱིས་ཆུ་འཐུང་ཨེ་ཐུབ།
ཆུ་འཐུང་ལོས་ཐུབ།
ཆུ་འཐུང་ཐུབ་ན་ཆང་ཡང་འཐུང་ཐུབ།
དེ་ན་འདི་ལྟར་བྱས། སང་ཙི་ལན་གྱིས་ཁ་གྲག་བྱུང་། ཞའོ་མོ་ཧྥང་གིས་ཁྱོས་ཚབ་ཏུ་འཐུང་རྒྱུ་བྱས།
མི་ཆོག སུན་ཏཱ་ཧྲིན་གྱིས་ཆང་འཐུང་དུས་བཟའ་ཟླའི་འབྲེལ་བ་མེད་ཟེར།
ཞའོ་མོ་ཧྥང་གིས་ཁོང་ཁྲོའི་ངང་ཙི་གུའི་སྨན་ཡིན་རུང་ཁྱོས་འཐུང་དགོས།
སུན་ཏཱ་ཧྲིན་གྱིས་མིག་ཆེ་ཆེར་གདངས་ཏེ་ཁྱོད་ཀྱིས་འདི་ལྟར་བརྗོད་དོན་ཅི་ཟེར།
ཞའོ་མོ་ཧྥང་ཅུང་ཙམ་ཧད་རྗེས་ལམ་སེང་གདོང་ལ་འཛུམ་ཞིག་ལངས་ནས་ཁ་འཕྱུགས་སོང་། ཆད་པ་ཆང་དཀར་གསུམ་འཐུང་ཆོག ཞེས་བཤད་མ་ཐག་ལག་པ་བསྲིངས་ནས་ཆང་དམ་ལ་འཇུས།
ཁྱོས་འཐབ་རྩོད་ཀྱི་ཁ་ཕྱོགས་གཙོ་བོ་མ་བསྒྱུར་ཅིག སུན་ཏཱ་ཧྲིན་ཀྱིས་ཞེ་ལན་དབྱིན་ཁྱོས་འཐུང་ངམ་མི་འཐུང་། ཁྱོས་མི་འཐུང་ན་ང་ཚོས་ཀྱང་མི་འཐུང་ཟེར།
ཞེ་ལན་དབྱིན་གྱིས་ཁྱོད་འདི་ད། ར་བཟི་སྟེ་བཟོ་ལྟ་འཆོར་ན་ཁྱོད་ཚོས་ང་ལ་འཕྱ་སྨོད་མ་བྱེད་ཅིག
སུན་ཏཱ་ཧྲིན་གྱིས་སུས་ཕོད་དམ། ང་རང་འདིར་ཡོད་པས་སུས་ཁྱོད་འཕྱ་སྨོད་བྱེད་ཕོད་དམ། ཡང་གཅིག་བཤད་ན་ངས་ཁྱོད་བཟི་རུ་འཇུག་མི་སྲིད།
ཞེ་ལན་དབྱིན་གྱིས་དེ་ན་ཆོག་གི ངས་བཏུང་ཆོག་ཟེར། ཁོ་མོས་ཆང་དཀར་བཀྱགས་ནས་ཧུབ་འཐུང་རྗེས་ཁ་སྙེར་སྙེར་ངང་ཁ་ཚ་བ་ལ།་ཟེར།དེ་རྗེས་མགོ་བོ་ལྟག་རྒྱབ་ལ་དགྱེ་ཙམ་བྱས་ཏེ་ཆང་དཀར་ནང་གི་ཆང་གཙང་མར་བཏུང་བ་དང་། ཆང་དཀར་དེ་ཅོག་ཙེའི་སྟེང་ཁ་སྦུབ་དུ་བཞག་སྟེ་ངའི་ལས་འགན་འགྲུབ་སོང་ཟེར།
ཁྱོས་ལས་འགན་ཅི་ཞིག་འགྲུབ་སོང་། གསར་བརྗེར་རྒྱལ་ཁ་ཐོབ་མེད་པས། བློ་མཐུན་ཚོས་མུ་མཐུད་དུ་འབད་པ་བྱེད་དགོས། སུན་ཏཱ་ཧྲིན་གྱིས་སྤྱི་སྤྱོད་ཐུར་མས་ཆུ་འབུ་གློ་ཉ་ཆེན་པོ་ཞིག་ཞེ་ལན་དབྱིན་གྱི་སྡེར་མའི་ནང་བཞག་རྗེས་ཟ་མ་ཏོག་ཙམ་ཟོ་དང་། མུ་མཐུད་དུ་འཐབ་རྩོད་བྱེད་དགོས། ཚང་མས་ཟ་མ་ཟོ་ཟེར།
་་་་་་་་་་
ཆང་དཀར་གསུམ་བཏུང་རྗེས་ཞེ་ལན་དབྱིན་ཁྱ་ར་ཁྱོ་རེའི་ངང་ཡར་ལངས་ཏེ་ངས་ཅུང་ཙམ་ཡང་འཐུང་མི་སྲིད།
སུན་ཏཱ་ཧྲིན་ཁོ་མོའི་དཔུང་བར་འཇུས་ཏེ་ཁྱོད་གང་ལ་འགྲོ་རྒྱུ་ཟེར།
ཞེ་ལན་དབྱིན་ངས་མི་འཐུང་། ངོ་མ་མི་འཐུང་ཟེར།
སུན་ཏཱ་ཧྲིན་གྱིས་མི་འཐུང་རུང་འདིར་ཙོག་སྡོད་ཟེར།
ལེགས་སོ། ལེགས་སོ། ང་བསྡད་ཆོག
ཏུང་ལའང་ཆིན་གྱིས་ཆང་དཀར་བཀྱགས་ཏེ་སུན་ཏཱ་ཧྲིན་གྱི་འཁྲིས་སུ་ཕྱིན་ནསསུན་པུའུ་ཀྲང་། ངས་ཁྱེད་ལ་ཆང་གང་འདྲེན།ཞེས་སྨྲས།
སུན་ཏཱ་ཧྲིན་གྱིས་ཆང་འཐུང་དུས་སློབ་གྲོགས་མ་གཏོགས་པུའུ་ཀྲང་དང་ཅུའུ་ཀྲང་མེད། སུས་ལུགས་སྲོལ་འདི་བརྩི་སྲུང་མ་བྱས་ན་ཆད་པ་ཆང་དཀར་གསུམ་ཡིན་ཟེར།
ཏུང་ལའང་ཆིན་གྱིས་རྗེས་མར་མཉམ་འཇོག རྗེས་མར་མཉམ་འཇོག་ཟེར།
སུན་ཏཱ་ཧྲིན་གྱིས་ཐོག་མར་ཆད་པའི་ཆང་བཏུང་ཤིག་ཟེར།
སུན་པུའུ་ཀྲང་།
ཡང་ནོར་སོང་།
ཏུང་ལའང་ཆིན་གྱིས་ཆོག་གི ངས་བཏུང་ཆོག་ཟེར།
ཏུང་ལའང་ཆིན་གྱིས་བསྟུད་མར་ཆང་དཀར་གསུམ་བཏུང་རྗེས་གང་བླུགས་ཏེ་བཤད་རྒྱུར། སློབ་གྲོགས། ངས་ཁྱེད་ལ་ཆང་གང་འདྲེན་ཟེར།
ཚང་མས་རེས་མོས་སྒོས་སུན་ཏཱ་ཧྲིན་ལ་ཆང་དྲངས། འཁོར་ཏེ་ཞའོ་མོ་ཧྥང་བསླེབས་དུས། རང་ཉིད་ཀྱིས་ཆང་དཀར་གསུམ་བཏུང་རྗེས་ངས་སྔོན་ལ་ཆད་པ་ཆང་དཀར་གསུམ་བཏུང་བ་ཡིན། སུན་པུའུ་ཀྲང་། སློབ་གྲོགས་ངས་ཁྱོད་ལ་ཆང་གང་འདྲེན།ཞེས་སྨྲས།
སུན་ཏཱ་ཧྲིན་གྱིས་འདི་མི་ཆོག བསམ་གཟས་ནས་སྒྲིག་སྲོལ་ལས་འགལ་བས་ད་རུང་ཆད་པ་ཆང་དཀར་གསུམ།
ཞའོ་མོ་ཧྥང་གིས་བརྗིད་ཉམས་ངང་བཤད་རྒྱུར། འཐུང་ན་འཐུང་། ཕོ་ཁྱོ་ག་ཞིག་ལ་མཚོན་ན་ཆང་དཀར་གསུམ་
ཅི་ཡང་མ་རེད།ཟེར།
ཞེ་ལན་དབྱིན་གྱིས་སྐད་དམའ་མོས་སྨྱོན་པ་རེད།ཟེར།
སུན་ཏཱ་ཧྲིན་གྱིས་སེམས་ན་བྱུང་ངམ།
ཞེ་ལན་དབྱིན་གྱི་གདོང་དམར་ནག་ཏུ་གྱུར་ནས་སུས་ཁོར་ཁ་ཡ་བྱེད་འདོད།
ཞའོ་མོ་ཧྥང་གིས་ཞབས་བཏགས་ལན་གསུམ་བརྒྱབ་རྗེས་གཉིས་གསུམ་དྲུག གསུམ་གསུམ་དགུ སུན་པུའུ་ཀྲང་ད་ངས་ཁྱེད་རང་ལ་ཆང་གང་དྲངས་ན་ཨེ་ཆོག་ཟེར།
སུན་ཏཱ་ཧྲིན་གྱིས་ཆང་དཀར་ཞའོ་མོ་ཧྥང་དང་གཏུགས་ཙམ་བྱས་ནས་རྩིས་རིག་ཡག་པོ་སྦྱངས་འདུག་ཟེར།
ང་ལོ་བཅུ་ལྷག་ཙམ་ལ་དཔེ་ཁང་གི་རྩིས་པ་བྱས་པ་དང་། ལོ་བརྒྱད་ལྷག་ལ་སྤྱི་གཉེར་གཞོན་པ་དང་རྩིས་པའི་འགན་གཅིག་ལྕོགས་སུ་བཞེས་པ་ཡིན་ཟེར།ཞའོ་མོ་ཧྥང་གིས་སེམས་ཅུང་སྡུག་པའི་སྒོ་ནས་བཤད།
ཞེ་ལན་དབྱིན་གྱིས་བཤད་རྒྱུ་ངོ་མི་ཚའམ། ཁྱོས་རང་ཉིད་ད་ལྟའི་གནས་ཚུལ་ལ་ཅིག་ལྟོས་དང་།ཟེར།
ཀྲང་ཧྥ་ཀྲན་གྱིས་སྤུན་ཟླ་ཞའོ་ཡིས་དབང་ཆ་ལོན་མེད་རུང་བརྩེ་དུང་ལོན་ཡོད་པ་མ་ཡིན་ནམ། འོན་ཀྱང་དབང་ཆ་ལོན་མེད་པ་ཡང་མ་ཡིན་ཏེ། སྤུན་ཟླ་ང་ཡང་ལོ་མང་པོར་གཞོན་པ་བྱས་པ་མ་ཡིན་ནམ། གལ་ཏེ་ཞེ་ལན་དབྱིན་ངའི་ཆུང་མ་ཡིན་ཚེ་ང་རང་གསང་སྤྱོད་བསྔོགས་སུ་མངགས་ན་འཐད་པ་ཡིན་ཟེར།
ཞེ་ལན་དབྱིན་གྱི་དམར་རྐྱང་དུ་ཆགས་སོང་། ཁྱོད་ཚོས་ང་ལ་ཀུ་རེ་མ་རྩེད་ཅིག
ཧི་ཧོ། ཞེ་ལན་དབྱིན་ཁོང་ཁྲོ་ལངས་བྱུང་། ཁྱོད་ཁོང་ཁྲོ་ལངས་དུས་ཧ་ཅང་མཛེས།ཏུང་ལའང་ཆིན་གྱིས་བཤད།
ཁྱོད་ཚོས་ཞེ་ལན་དབྱིན་ལ་བརྙས་བཅོས་མ་བྱེད། སུན་ཏཱ་ཧྲིན་གྱིས་དེ་ལྟར་བཤད་ཞོར་ཆང་དཀར་བཟུང་ནས་ཞེ་ལན་དབྱིན། ཤོག། སློབ་གྲོགས་ངས་ཁྱོད་ལ་ཆང་གང་འདྲེན་ཟེར།
ངས་ཆང་དཀར་གསུམ་བཏུང་ཚར། ད་དུང་བཏུང་ན་ང་ར་བཟི་ངེས་རེད།
རང་ཉིད་ཀྱིས་ཆང་དཀར་གསུམ་བཏུང་བ་ཤེས་ན་ད་དུང་ར་བཟི་མེད་པའི་རྟགས་རེད། ཡང་གཅིག་བཤད་ན་ར་བཟི་རུང་ཅི་སྐྱོན། མི་ཚེ་གཅིག་ལ་ཐེངས་གཅིག་བཟི་བ་ཧ་ཅང་དཀའ་མོ་རེད།
རེད།མི་ཚེ་གཅིག་ལ་ཐེངས་གཅིག་བཟི་བ་ཧ་ཅང་དཀའ་མོ་རེད།ཞའོ་མོ་ཧྥང་གིས་སུན་པུའུ་ཀྲང་གིས་བཏུང་ཟེར་ན་ཁྱོད་ཀྱིས་དང་ལེན་བྱས་དང་ཆོག
ངས་ངོ་མ་རྒྱབ་ལ་མི་བལྟ། ཞེ་ལན་དབྱིན་གྱིས་ཆང་དཀར་བཀྱགས་ནས་ཞབས་བཏགས་བརྒྱབ།
བཟང་གི ངོ་འབག་འོག་གི་བཞིན་རས་ངོ་མ་དེ་གཞི་ནས་ལྷང་ངེར་བུད་བྱུང་། སུན་ཏཱ་ཧྲིན་གྱིས་མི་རྣམས་ཀྱིས་ཆང་འཐུང་དུས་མཐོང་ཆུང་བྱེད་མི་རུང་བ་གསུམ་ཡོད་དེ། གདོང་དམར་པོ་དང་སྨན་འཐུང་མཁན། ད་དུང་སྐྲའི་ལན་བུ་ཆུང་ཆུང་བསླེས་མཁན་ཡིན་ཞེས་བརྗོད་པར་ཡང་ཁག་མི་འདུག་ཟེར།
ད་དུང་སྐྲའི་ལན་བུ་ཆུང་ཆུང་བསླེས་མཁན་ཟེར། ཞེ་ལན་དབྱིན་གྱིས་མགོ་བོར་རེག་བཞིན་རྒན་མོ་མགོ་དཀར་རང་རེད།་ཟེར།
ཁྱོད་ཀྱི་སྒེག་ཉམས་ད་དུང་བསྡད་འདུག སང་ཙི་ལན་གྱིས་འོན་ཀྱང་ང་ཚོ་དངོས་གནས་རྒས་འདུག་ཟེར།
ང་ཡང་རྒས་འདུག ཞེ་ལན་དབྱིན་གྱིས་སྐྱེས་པ་ལོ་བཞི་བཅུར་སོན་རུང་ད་དུང་མེ་ཏོག་རྐང་གཅིག་ཡིན་མོད། སྐྱེས་མ་ལོ་བཞི་བཅུར་སོན་དུས་སྲན་ཞོ་སྙིགས་མ་དང་མཚུངས།
ཀྲང་ཧྥ་ཀྲན་གྱིས་ཁྱོད་སྲན་ཞོ་གསར་བ་རེད། ང་ཚོ་ད་སྲན་ཞོ་སྙིགས་མ་རེད་ཟེར།
ཞའོ་མོ་ཧྥང་གིས་ལྕེ་སྲ་མོས་ཚང་མ་སྲན་ཞོ་སྙིགས་མ་རེད་ཟེར།
ཏུང་ལའང་ཆིན་གྱིས་གསར་བུ་ཁྱོས་སྲན་ཞོ་གསར་བ་ཟོས་ནས་འགྲངས་ཐག་ཆོད་པ་རེད་ཟེར།
ཞེ་ལན་དབྱིན་གྱིས་ཁྱོད་ཚོ་ཚང་མས་ང་ཀུ་རེ་རྩེ་ཀྱིན་འདུག་ཟེར།
དེ་འདྲ་ཞིག་ག་ལ་ཡིན། སུན་ཏཱ་ཧྲིན་གྱིས་ཆང་དཀར་བཀྱགས་ནས་ཞེ་ལན་དབྱིན་གྱི་ཆང་སཀར་དང་གཏུགས་ཙམ་བྱས་རྗེས་ཞབས་བཏགས་ཟེར།
ད་དུང་ཞབས་བཏགས་ཡིན་ནམ།
ཞའོ་མོ་ཧྥང་གིས་ཞབས་བཏགས། མི་ཚེ་ནི་དེ་འདྲ་ཞིག་མ་རེད་དམ། ཞབས་བཏགས་ཟེར།
སུན་ཏཱ་ཧྲིན་གྱིས་སུས་ཀྱང་སྡུག་མུས་བཏོན་ཆོག ཡིན་ནའང་ཞའོ་མོ་ཧྥ་ཁྱོས་སྡུག་མུས་བཏོན་མི་ཆོག་ཟེར།
ཞའོ་མོ་ཧྥང་གིས་ཅིའི་ཕྱིར། ཅིའི་ཕྱིར་ངས་སྡུག་མུས་བཏོན་མི་ཆོག་ཟེར།
སུན་ཏཱ་ཧྲིན་གྱིས་གསུར་བུ་ཁྱོས་ང་ཚོ་སློབ་གྲྭའི་མེ་ཏོག་རྩེ་གྲ་དེ་བཏོག་པས་རེད་ཟེར། ཚང་མར་འདང་རྒྱོབ་དང་། ཞེ་ལན་དབྱིན་སློབ་གྲྭའི་དྲིལ་ཁག་རུ་ཁག་དུ་སྡོད་དུས། གླུ་ལེན་ཤེས་པ་མ་ཟད། ཞབས་བྲོ་ཡང་འཁྲབ་ཤེས། ད་དུང་མགོ་རྟིང་སློག་ནས་འགྲོ་ཐུབ། དེ་དུས་རྫོང་ཡོངས་ཀྱི་མི་དམངས་ཀྱིས་སློབ་འབྲིང་དང་པོའི་བུ་མོ་ཞིག་གིས་མགོ་རྟིང་སློག་ནས་གར་སྟེགས་སྟེང་སྐོར་བ་བཅོ་བརྒྱད་འགྲོ་ཐུབ་པ་སུས་མི་ཤེས།
ངའི་བློ་ངོར་ལོ་ངོ་ཉི་ཤུའི་སྔོན་ཞེ་ལན་དབྱིན་གྱིས་གར་སྟེགས་སྟེང་མགོ་རྟིང་སློག་སྟེ་འགྲོ་བའི་རྣམ་པ་ཤར་བྱུང་།
དེ་དུས་ཁོ་མོས་སྐྲ་ལན་བུ་ཆུང་ཆུང་གཉིས་བསྡམས་པ་དང་། སྐྲ་སྣེར་སྐུད་པ་དམར་པོས་བརྒྱན་པ། ལག་པ་གཉིས་ས་ལ་བཙུགས་པ་དང་རྐང་པ་ཡར་བརྩེངས་པ། ལྟོ་བ་ཆུང་ཆུང་དེ་ཕྱིར་མངོན་བཞིན་གར་སྟེངས་ཐོག་ནས་སྐོར་བ་གཅིག་འཕྲོར་གཅིག་བརྒྱབ་ན་གར་སྟེགས་འོག་ནས་ཐལ་མོའི་རྡེབ་སྒྲ་རྒྱུན་མི་ཆད།
ཞེ་ལན་དབྱིན་གྱིས་མིག་ལས་འོད་འཕྲོ་བཞིན་ད་རྒས་འདུག་ཟེར།
སུན་ཏཱ་ཧྲིན་གྱི་མིག་ལས་ཀྱང་འོད་འཕྲོ་བཞིན་ཁྱོད་རྒས་མི་འདུག སློབ་གྲོགས་རྣམ་པར་འཁྲབ་སྟོན་ཞིག་བྱས་ན་ག་འདྲ་རེད་ཟེར།
ཞེ་ལན་དབྱིན་གྱིས་ཁྱོས་ང་བཟོ་ལྟ་ཤོར་དུ་འཇུག་འདོད་དམ་ཟེར།
ཚང་མས་མགྲིན་གཅིག་ཏུ་འཁྲབ་སྟོན་ཅིག འཁྲབ་སྟོན་ཅིག་ཟེར།
རྒས་འདུག ཁྱོད་ཚོས་ངའི་རྒྱགས་པ་ཆགས་པའི་ཚུགས་ཀར་ཅིག་ལྟོས་དང་། ཝུ་ཆང་ཟོ་བ་དང་འདྲ།
སུན་ཏཱ་ཧྲིན་གྱིས་མིག་གིས་ཞེ་ལན་དབྱིན་ལ་འབུར་ཚུགས་སུ་བལྟས་ཏེ་ཨུ་ཚུགས་ངང་འཁྲབ་སྟོན་ཅིག་བྱས་དང་ཟེར།
མི་ཐུབ་ཀི། ཡང་གཅིག་བཤད་ན་ངས་ཆང་འཐུང་རྒྱུ་མང་དྲགས་སོང་ཟེར།
སུན་ཏཱ་ཧྲིན་གྱིས་ཚང་མས་དགའ་བསུ་བྱོས་ཟེར།
ངོ་མས་མི་ཐུབ་ཀི
ཚང་མས་དགའ་བསུ་བྱས།
སུན་ཏཱ་ཧྲིན་གྱིས་ང་ལ་ཁ་ངོ་ཅིག་སྟེར་རོགས་ཟེར།
ཁྱོད་ཚོ་ད།
ཞའོ་མོ་ཧྥང་གིས་ཁྱོད་ཀྱིས་འཁྲོབ་ཟེར་ན་གཅིག་འཁྲོབ་དང་།་ཟེར།
ཞེ་ལན་དབྱིན་གྱིས་ཁྱོས་ཅིའི་ཕྱིར་མི་འཁྲབ་ཟེར།
ཞའོ་མོ་ཧྥང་གིས་ངས་འཁྲབ་ཤེས་རྒྱུ་ན་སྔ་ས་ནས་འཁྲབ་ཡོད། སུན་པུའུ་ཀྲང་ང་ཚོ་དང་འཛོམས་རྒྱུ་དཀའ་མོ་རེད། ལོ་ཉི་ཤུ་འགོར་རྗེས་ད་གཟོད་ཐེངས་གཅིག་འཛོམས་ཐུབ་པ་མ་ཡིན་ནམ།
ངོ་མས་མི་ཐུབ་ཀི
ཁྱོད་འདི་ད་ཁྱི་མགོ་གསེར་གྱི་སྡེར་མར་མི་ཚུད་པ་ནང་བཞིན་རེད།
བཤད་ན་སླ་མོ་རེད། ཁྱོས་ཚོད་ལྟ་ཅིག་བྱས་དང་།
ངས་ཚོད་ལྟ་བྱེད་ཐུབ་པ་ཞིག་ཡིན་ན་སྔ་ས་ནས་ཚོད་ལྟ་བྱས་ཟིན།
ཞེ་ལན་དབྱིན་ཡར་ལངས་ཏེ་ཁྱོད་ཚོས་ཡིན་གཅིག་མི་གཉིས་ང་སྤྲེའུ་ནང་བཞིན་རྩེད་མོ་རྩེ་རུ་འཇུག་རྒྱུ་ཡིན་ནམ་ཞེས་སྨྲས།
སུན་ཏཱ་ཧྲིན་གྱིས་སུས་ཕོད་དམ།ཟེར།
ཞེ་ལན་དབྱིན་གར་སྟེགས་སུ་ཕྱིན་ནས་དཔུང་བ་བརྐྱངས་ཙམ་དང་ཕུར་མ་ཡར་འཐེན་ཙམ་བྱས་ཏེ་ལོ་མང་པོར་སྦྱོང་བརྡར་བྱས་མ་སོང་བས་་་་་་་་་་་ཟེར།
ཞའོ་མོ་ཧྥང་གིས་ངས་དྲང་མོར་བཤད། ཁོ་མོས་ཉིན་རེ་རེ་མལ་ཁྲིའི་སྟེང་མགོ་རྟིང་སློག་པར་སྦྱང་བ་བྱེད་ཟེར།
ཁྱི་ལབ་མ་རྒྱག ཞེ་ལན་དབྱིན་གྱིས་སྡིག་ཞོར་དུ་ཞབས་བྲོ་བའི་བཟོ་ལྟ་དེ་བསྟན་བྱུང་། དཔུང་བ་གཉིས་དྲང་མོར་ཡར་བཀྱགས་པ་དང་། ལུས་པོ་མདུན་དུ་བསྲིངས་ནས་རྐང་བ་ཡ་གཅིག་བཀྱགས་ཙམ་བྱས་མ་ཐག་མར་བཞག་བཞག་སྟེ་ངོ་མས་འཁྲབ་མི་ཐུབ་ཀི་ཟེར།འོན་ཀྱང་མོས་མཚམས་མ་བཞག་པར་མ་ཁརསོ་འདེབས་བཞིན་ཤུགས་ཡོངས་རྫོགས་གཅིག་ཏུ་བསྡུས་པ་དང་དཔུང་པ་གཉིས་ཀ་ས་ལ་བཙུགས་མ་ཐག་རྐང་བ་ལྗིད་པོ་དེ་གཉིས་གཞི་ནས་ཡར་བཀྱགས་བྱུང་། མོའི་ཁོག་སྨད་དུ་གྱོན་པའི་སྨད་གཡོག་དེ་ངང་ལག་ཤུན་ལྤགས་བཤུས་པ་ནང་བཞིན་མར་འགྲིལ་ཏེ་ཁོག་སྟོད་བཀབ་པ་ན། བརླ་ཚོན་པོ་གཉིས་ཀ་རྐང་ཐུང་དམར་པོ་དེ་གསལ་བོར་མངོན་བྱུང་བས། ཚང་མས་སྤྲོ་ཆེན་པོས་ཐལ་མོ་རྡེབ་བྱུང་། ཞེ་ལན་དབྱིན་གིས་ལམ་སེང་འགྲིག་མེད་པ་ཤེས་ཏེ་བྲལ་འཚུབ་ངང་ཡར་ལངས་རྗེས་ལག་པས་གདོང་བཀབ་ནས་ཁྱ་ར་ཁྱོ་རེའི་ངང་ཁང་པའི་ཕྱི་རུ་བརྒྱུགས།
ཚང་མས་དར་ཅིག་ལ་ཁ་རོག་གེར་བསྡད་རྗེས། སུན་ཏཱ་ཧྲིན་གྱིས་ཆང་དཀར་བཀྱགས་ནས་ཞའོ་མོ་ཧྥང་ལ་སློབ་གྲོགས་རྙིང་བ། ངས་ཁྱོད་ལ་ཆང་གང་འདྲེན། ངའི་རེ་བར་ཁྱོས་ཞེ་ལན་དབྱིན་གཅེས་སྤྲས་བྱས།ཟེར།
ཞའོ་་མོ་ཧྥང་གི་མིག་མཐར་མཆི་མ་འཁྱིལ་བཞིན་སུན་པུའུ་ཀྲང་། ཞེ་ལན་དབྱིན་ང་དང་བཟའ་སྒྲིག་བྱས་པས་ངོ་མ་མོ་རང་སྡུག་ལ་སྦྱར་བ་རེད། ང་འདི་ནུས་པ་མེད་ལ་ཡར་ཐོན་ཡོང་རྒྱུ་ཡང་འགོར་བས། བློ་གཅིག་སེམས་གཅིག་གིས་ཏང་གི་བྱ་བ་ཧུར་ཐག་གིས་བསྒྲུབ་ཀྱང་། ཤུགས་དེ་ཡག་པོ་བཀོལ་མ་སོང་།ཟེར།
མའོ་ཀྲུའུ་ཞིའི་སྐད་ཆ་དེ་དག་ནང་བཞིན་རེད། སུན་ཏཱ་ཧྲིན་གྱིས་ང་ཚོས་མང་ཚོགས་ལ་ཡིད་ཆེས་དང་ཏང་ལ་ཡིད་ཆེས་བྱེད་དགོས། འདི་ནི་རྩ་བའི་རྩ་དོན་གཉིས་ཡིན། གལ་ཏེ་རྩ་དོན་འདི་གཉིས་ཀར་དོགས་པ་ཟོས་པ་ཡིན་ན་དོན་དག་ཅི་ཡང་འགྲུབ་མི་སྲིད་ཟེར། 

མཉམ་སྤྱོད་བྱེད་གནས། 


ར་སྤྲོད་ཨང་།          མིང་མེད།    
མཛའ་འབྲེལ་ཨ་ལུང་།
ཀྲུང་གོ་བོད་ཀྱི་དྲ་བ།གུང་ཁྲན་ཏང་གི་དྲ་བ།བོད་ཀྱི་རིག་མཛོད།བོད་ཀྱི་སློབ་འབྲིང་།མཚོ་སྔོན་བོད་རིགས་དྲ་བ།ཁམས་པའི་དྲ་བ།ཞིང་ཆེན་མི་དམངས་སྲིད་གཞུང་།ཀྲུང་གོའི་བོད་སྐད་རླུང་འཕྲིན།བོད་ལྗོངས་འཕྲིན་དྲ།
ཁམས་པའི་བརྙན་འཕྲིན།