བྱ་སྤྱོད་དངོས་ཀྱིས་བརྗོད་དོན་སློབ་གསོའི་བླང་བྱ་དོན་དུ་གཉེར།
ཐུན་ཏེ་རྫོང་མི་རིགས་སློབ་འབྲིང་གཉིས་པས“ཐོག་མའི་བསམ་འདུན་མི་བརྗེད་པར། འགན་འཁྲི་ཡིད་ལ་དམ་པོར་བཅངས” པའི་བརྗོད་དོན་སློབ་གསོ་སྤེལ་བའི་གནས་ཚུལ།
སྐོར་གཉིས་པའི་བརྗོད་དོན་སློབ་གསོ་སྤེལ་བའི་ལས་ཁུངས་ཡིན་པའི་ཆ་ནས། ཐུན་ཏེ་རྫོང་མི་རིགས་སློབ་འབྲིང་གཉིས་པས་ད་ལོའི་ཟླ་དགུ་བ་ནས་བཟུང་། གོང་རིམ་གྱི་བཀོད་སྒྲིག་ལྟར་དུ་སློབ་གྲྭ་རང་གི་དངོས་ཡོད་གནས་ཚུལ་དང་ཟུང་འབྲེལ་བྱས་ནས།“ཐོག་མའི་བསམ་འདུན་མི་བརྗེད་པར།འགན་འཁྲི་ཡིད་ལ་དམ་པོར་བཅངས”པའི་བརྗོད་དོན་སློབ་གསོའི་བྱ་བ་རབས་དང་རིམ་པ་སྤེལ། སློབ་གསོའི་ཁྲོད་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་གཞུང་ལུགས་དང་ཏང་གི་ཡིག་ཆའི་དགོངས་དོན་ལ་གོ་བ་ཟབ་མོ་ལེན་པ་དང་། ཞི་ཅིན་ཕིང་གི་གསུང་བཤད་གལ་ཆེན་རབས་དང་རིམ་པར་སློབ་སྦྱོང་བྱེད་པ། ཏང་ཡོན་ཚད་ལྡན་ཞིག་ཇི་ལྟར་བྱེད་པའི་སྐོར་ནས་སློབ་སྦྱོང་བྱས། ཏང་ཡོན་དགེ་རྒན་རྣམས་ཀྱིས་སློབ་སྦྱོང་བྱས་པ་བརྒྱུད་དེ་ཆབ་སྲིད་གོ་རྟོགས་ཇེ་མཐོར་སོང་ལ། རང་སྐྱོན་འཚོལ་བ་དང་། རང་སྟེང་གི་གནད་དོན་ལ་དབྱེ་ཞིབ་བྱེད་པ། གནད་དོན་ཇི་ལྟར་ཐག་གཅོད་པའི་ཐབས་ལམ་བཙལ་རྒྱུའི་ཐད་ནས་གྲོས་སྡུར་བྱས་ཤིང་། ཏང་ཡོན་རྣམས་ཀྱིས་ཁས་ལེན་དམ་བཅའ་བཞག་ནས་རང་སྐྱོན་ཡོ་བསྲང་བྱས་པར་མ་ཟད། ཏང་ཡོན་རྒན་པ་རྣམས་ཀྱིས་ན་གཞོན་དགེ་རྒན་སྐྱེད་སྲིང་བྱེད་པར་འབད་བརྩོན་བྱས་པ་དང་། ཏང་ཡོན་རྩ་འཛུགས་བྱས་ནས་སློབ་གྲྭའི་དབུལ་ཕོངས་ཁྱིམ་ཚང་གི་སློབ་མར་རོགས་སྐྱོར་བྱེད་པ། སློབ་མའི་སློབ་སྦྱོང་ཁྲོད་འཕྲད་པའི་གནད་དོན་ཐག་གཅོད་བྱེད་པ། སློབ་མར་ཡང་དག་པའི་མི་ཚེའི་རིན་ཐང་ལྟ་བ་ཆགས་པར་སྣེ་ཁྲིད་བྱེད་པ་སོགས་སློབ་གསོ་ལས་དོན་དང་འབྲེལ་བའི་བྱ་བ་སྣ་མང་སྤེལ།
ཐུན་ཏེ་རྫོང་མི་རིགས་སློབ་འབྲིང་གཉིས་པའི་ཏང་ཡོན་དགེ་རྒན་རྣམས་བརྗོད་དོན་སློབ་གསོའི་སློབ་སྦྱོང་ལ་ཞུགས་པ།
ཐུན་ཏེ་རྫོང་ཐོག་ཏུ་ཡོད་པའི་མི་རིགས་སློབ་འབྲིང་གཉིས་པའི་ནང་དུ་སློབ་མ་སྟོང་གཅིག་དང་ཉིས་བརྒྱ་ལྷག་དང་། དགེ་རྒན་བརྒྱ་དང་ལྔ་ཡོད་ལ། དེའི་ནང་ཏང་ཡོན་དགེ་རྒན་ཉི་ཤུ་ཉེར་གཉིས་ཡོད། སློབ་གྲྭའི་སློབ་སྟོན་སློབ་གཙོ་ཀླུ་འབུམ་རྒྱལ་གྱིས་དགེ་རྒན་ཞིག་ལ་མཚོན་ན། ཕུགས་བསམ་ཡོད་པ་དང་། ཀུན་སྤྱོད་ཡོད་པ། རིག་གནས་ཡོད་པ། སྒྲིག་ལམ་ཡོད་པ་ཞིག་ཡིན་དགོས་ལ། སློབ་གྲྭའི་སློབ་སྒྲུབ་ཁ་ཕྱོགས་དེར་ཏང་གི་སློབ་གསོས་སྣེ་ཁྲིད་དགོས་པར་བཤད།
སློབ་སྟོན་སློབ་གཙོ་ཀླུ་འབུམ་རྒྱལ།
བརྗོད་དོན་སློབ་གསོའི་བྱ་འགུལ་སྤེལ་བ་དང་བསྟུན་ནས། ཏང་ཡོན་དགེ་རྒན་རྣམས་ཀྱིས་རང་གིས་ནོར་འཁྲུལ་བཟོ་བར་དོགས་ཟོན་དང་། སློབ་སྒྲུབ་ཀྱི་ཁ་ཕྱོགས་འཚོལ་ཞིབ་བྱེད་པ། སློབ་མའི་དོན་ལ་སེམས་ཁུར་བྱེད་བཞིན་ཡོད་པ་དང་། ཚད་ལྡན་སློབ་མ་མང་པོ་སྐྱེད་སྲིང་བྱེད་པར་ཡང་འབད་བརྩོན་གང་ལེགས་བྱེད་བཞིན་མཆིས།
སློབ་གྲྭའི་ནང་བརྗོད་དོན་སློབ་གསོའི་སྤེལ་བ་བརྒྱུད། ཏང་ཡོན་དགེ་རྒན་ཚོའི་ཁྲོད་མི་སེམས་འགུལ་བའི་གཏམ་རྒྱུད་ཀྱང་མང་པོ་བྱུང་མྱོང་། དཔེར་ན་སློབ་གྲྭའི་དགེ་རྒན་ཀྲའོ་ཁྲང་ལིན་ནི་འཛིན་བདག་ཅིག་ཡིན་ལ། གུང་ཁྲན་ཏང་ཡོན་ཞིག་ཀྱང་ཡིན། རྫོང་མི་རིགས་སློབ་འབྲིང་གཉིས་པ་ནི་བཅའ་སྡོད་སློབ་གྲྭ་ཞིག་ཡིན་པའི་རྐྱེན་གྱིས་དུས་ཚོད་ཉེར་བཞིའི་རིང་ལ་སློབ་མར་ལྟ་རྟོག་བྱེད་དགོས།ཉིན་ཞིག་གི་དགོང་མོར། ཁོའི་འཛིན་གྲྭའི་ནང་གི་སློབ་མ་ཞིག་ན་ནས་སྨན་ཁང་དུ་འགྲོ་དགོས་བྱུང་བར་ཁོས་རྒྱབ་ཏུ་འཁུར་ནས་སྨན་ཁང་དུ་བསྐྱལ། ཁོས་དུས་ཐོག་ཏུ་ཁྱིམ་བདག་ལ་འབྲེལ་གཏུག་བྱས་ཀྱང་འབྲེལ་གཏུག་བྱེད་མ་ཐུབ་པར་ཉིན་གཉིས་འགོར།དེའི་རིང་ཁོས་སློབ་མ་དེ་ལ་རང་གི་བུ་ཕྲུག་ནང་བཞིན་ཟ་མ་བསྐོལ་བ་དང་གཉོར་སྐྱོང་བྱས་པར་མ་ཟད།སྨན་རིན་སོགས་ཀྱང་སྔོན་ལ་རྩིས་སྤྲོད་བྱས། དེ་ནི་དགེ་རྒན་ཀྲའོ་ཁྲང་ལིན་གྱིས་རང་ཉིད་ཏང་ཡོན་ཞིག་ཡིན་པའི་འགན་འཁྲི་ཕྲག་ཏུ་བླངས་པ་དེ་རེད།
དགེ་རྒན་ཀྲའོ་ཁྲང་ལིན།
བརྗོད་དོན་སློབ་གསོས“བསམ་འདུན་སྲུང་བ་དང་། འགན་འཁྲི་འཁུར་བ། བར་ཁྱད་འཚོལ་བ། དོན་འཁྱོལ་བྱེད་པ”བཅས་ཀྱི་རེ་བ་ནན་མོ་བཏོན་པར་བརྟེན་ནས། ཐུན་ཏེ་རྫོང་མི་རིགས་སློབ་འབྲིང་གཉིས་པའི་ཏང་ཡོན་དགེ་རྒན་རྣམས་ཀྱི་ཆབ་སྲིད་གོ་རྟོགས་ཇེ་མཐོར་སོང་ཡོད་པར་མ་ཟད། རང་རྟོགས་ཀྱིས་འགན་འཁྲི་དང་དུ་ལེན་པའི་སྣང་ཚུལ་མངོན་གསལ་གྱིས་ཇེ་བཟང་དུ་སོང་ཡོད།
ཏང་ཡོན་དགེ་རྒན་ལྕགས་ཐར་རྒྱལ་གྱི་འཛིན་གྲྭའི་ནང་དུ་སློབ་མ་ཞིག་སློབ་སྐབས་གཅིག་ལ་སློབ་བྱོལ་བྱས་ནས་སློབ་ཁྲིད་ལ་མ་ཞུགས་པ་དང་། དགེ་རྒན་གྱིས་ཁྱིམ་བདག་ལ་ཁ་པར་ཐེངས་མང་བཏང་ཡང་།ཁྱིམ་བདག་གིས་སློབ་མ་དེ་སློབ་གྲྭར་ཞུགས་མི་ཐུབ་པའི་གནས་ཚུལ་གང་མང་བཤད། ཡིན་ནའང་། དགེ་རྒན་ལྕགས་ཐར་རྒྱལ་ཁྱིམ་བདག་གིས་བཤད་པར་ཡིད་མ་ཆེས་པར་ད་ལོའི་སྟོན་ཁར་སློབ་མ་དེའི་ཕ་ཡུལ་རྨ་བྱང་ཞང་གཡུ་རྔོག་སྡེ་བར་སོང་ནས་གནས་ཚུལ་ལ་རྒྱུས་ལོན་བྱས་པ་དང་། རྫོང་ཐོག་ནས་གཡུ་རྔོག་སྡེ་བའི་བར་དུ་སྤྱི་ལེ་བརྒྱ་དང་སུམ་ཅུ་ཡོད་པས་ཐག་ཧ་ཅང་རིང་ལ།དགེ་རྒན་ལྕགས་ཐར་རྒྱལ་གྱིས་ལམ་བར་གྱི་དཀའ་ངལ་ལ་མ་འཛེམས་པར་ཁྱིམ་བདག་རྡོ་བྷོ་ཚང་དུ་ཐོན་སྐབས་ཐོག་མར་མིག་ལམ་དུ་མངོན་པ་ནི་མལ་སའི་ནང་ལུས་པའི་རང་གི་སློབ་མ་དེ་རེད། གནས་ཚུལ་ལ་རྒྱུས་ལོན་བྱས་པ་བརྒྱུད། སློབ་མ་དེའི་རྐང་ལག་ཞ་བོར་གྱུར་བ་དང་།ངག་ནས་ཀྱང་སྐད་ཆ་ལྡབ་ལྡིབ་མ་གཏོགས་བཤད་མི་ཐུབ་པ་ཤེས། དགེ་རྒན་ལྕགས་ཐར་རྒྱལ་ཕྱིར་སློབ་གྲྭར་ལོག་ནས་འབྲེལ་ཡོད་འགོ་ཁྲིད་ལ་གནས་ཚུལ་དེ་ཡར་ཞུ་བྱས་པ་དང་།སློབ་མ་དེ་ཕྱིར་སློབ་གྲྭར་ལོག་པར་རེ་སྒུག་བྱས་ཏེ་བསྡད། ཐེངས་གཉིས་པར་དགེ་རྒན་ཁོ་རང་རང་གི་སློབ་མ་དེར་ལྟ་རུ་འགྲོ་དུས། རང་སྟེང་ནས་སྒོར་མོ་ཕུད་དེ་སློབ་མ་དེར་ཟ་རྒྱུ་དང་གོན་རྒྱུ་ཉོས་པ་མ་ཟད། སྒྲ་སྙན་སྒྲ་སྒམ་ཞིག་ཉོས་ནས་བྱིས་པའི་སེམས་ཁམས་དང་འཚམ་པའི་སྒྲ་དབྱངས་དང་བརྙན་མང་པོ་ཞིག་ནང་འཇུག་བྱས་ནས་སློབ་མའི་སར་སོང་སྟེ་བྱིན་པར་ཁོ་རང་མལ་སའི་ནང་འཕག་འཚག་བརྒྱབ་ནས་དགའ་བའི་རྣམ་འགྱུར་བསྟན་པ་དང་། རྣམ་འགྱུར་དེས་དགེ་རྒན་ལྕགས་ཐར་རྒྱལ་ལ་མིག་ཆུ་ཤོར་དུ་བཅུག་སོང་ཟེར། སློབ་མ་དེས་ད་དུང་རང་ལ་ཡི་གེ་འབྲི་སྤྱད་ཅིག་མཁོ་བའི་བརྡ་བསྟན་བྱུང་ཞེས་བྱིས་པའི་ཨ་མས་དགེ་རྒན་ལྕགས་ཐར་རྒྱལ་ལ་བཤད། ད་ལྟ་དགེ་རྒན་ལྕགས་ཐར་རྒྱལ་གྱིས་འབྲི་དེབ་དང་སྨྱུ་གུ་ཉོས་ནས་ཐེངས་གསུམ་པར་སློབ་མར་བསྐོར་རྒྱག་ཏུ་འགྲོ་བར་གྲ་སྒྲིག་བྱས་ཡོད་པར་མ་ཟད། ད་དུང་སློབ་གསོ་ཅུའུ་ལ་གནས་ཚུལ་དེ་ཡར་ཞུ་བྱས་ནས་བྱིས་པ་དེ་དབང་བོ་སྐྱོན་ཅན་གྱི་བྱིས་པའི་གྲས་སུ་འཇོག་པར་བརྩོན་ལེན་བྱེད་བཞིན་ཡོད་ཟེར།
དགེ་རྒན་ལྕགས་ཐར་རྒྱལ་གྱིས་སློབ་སྦྱོང་དགོངས་ཞུ་བྱས་པའི་སློབ་མར་བསྐོར་བརྒྱབ་པ།
ཐུན་ཏེ་རྫོང་མི་རིགས་སློབ་འབྲིང་གཉིས་པའི་ཏང་ཀྲི་པུའུ་ཧྲུའུ་ཅིའམ་སློབ་གཙོ་ནོར་དབང་གིས་བཤད་པ་ལྟར་ན། བརྗོད་དོན་སློབ་གསོ་སྤེལ་བ་བརྒྱུད་དེ། དགེ་རྒན་རྣམས་ཀྱི་རང་འགུལ་རང་བཞིན་དང་། སློབ་མར་དོ་དམ་བྱེད་སྟངས། ཆབ་སྲིད་བསམ་བློའི་སློབ་གསོར་ཤུགས་སྣོན་པའི་ཚད་སྔར་ལས་ཇེ་དྲག་ཏུ་སོང་འདུག་ཟེར།
སློབ་གྲྭ་འདིའི་ཀུན་སྤྱོད་དང་ཁྲིམས་སྐྱོང་ཞེས་པའི་བསླབ་ཚན་གྱི་དགེ་རྒན་རིན་ཆེན་རྡོ་རྗེ་ཡིས་བཤད་རྒྱུར། ང་རང་དགེ་རྒན་ཞིག་པའི་ཆ་ནས་སློབ་ཁྲིད་ཀྱི་གོ་རིམ་སོ་སོ་ནས་དགེ་རྒན་ཞིག་གི་ཀུན་སྤྱོད་དང་འགན་འཁྲི་ཡིད་ལ་དམ་པོར་བཅངས་ཏེ་རྒྱལ་ཁབ་ཀྱི་མ་འོངས་པའི་རྒྱུད་འཛིན་མཁན་དང་། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་གྱི་གདོང་འདེགས་མཁན་ཚོར་རང་ནུས་ཅི་ལྕོགས་ཀྱིས་སློབ་ཁྲིད་བྱེད་ཞོར་དུ་མེས་རྒྱལ་ལ་དགའ་ཞིང་། སྤྱི་ཚོགས་རིང་ལུགས་ལ་དགའ་བ། ཏང་ལ་དགའ་བའི་སློབ་བུ་ཞིག་བྱེད་དགོས་པར་མ་ཟད། མ་འོངས་པར་རྒྱལ་ཁབ་ལ་ཕན་འདོགས་པ་དང་། མི་རིགས་ལ་ཕན་ཐོགས་པའི་སློབ་མ་ཞིག་བྱེད་དགོས་པའི་སློབ་གསོ་གཏོང་ཅི་ཐུབ་བྱས་པ་ཡིན་ཟེར།
“ཐོག་མའི་བསམ་འདུན་མི་བརྗེད་པར། འགན་འཁྲི་ཡིད་ལ་དམ་པོར་བཅངས”པའི་བརྗོད་དོན་སློབ་གསོ་སྤེལ་བ་དེ་ལ་དོན་སྙིང་གལ་ཆེན་ལྡན་ལ་ཤན་ཤུགས་ཀྱང་ཟབ་མོ་ལྡན། མི་རིགས་སློབ་འབྲིང་གཉིས་པའི་ཏང་ཀྲི་པུའུ་ཡིས་མུ་མཐུད་དུ་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བསམ་བློའི་སྣེ་ཁྲིད་འོག བརྗོད་དོན་སློབ་གསོའི་བྱ་འགུལ་གཏིང་ཟབ་སྒོས་སྤེལ་ཏེ། སློབ་གྲྭའི་བྱ་བའི་དམིགས་འབེན་དང་ལས་འགན་སོ་སོ་བདེ་བླག་ངང་འགྲུབ་པར་ཁག་ཐེག་བྱས།
གསར་འགོད་པ། ལྷ་བརྟན། ཕྱུག་ལོ། ཚེ་རིང་སྒྲོལ་མ། སྐལ་བཟང་རྣམ་རྒྱལ།
