རང་ལ་ནད་བྱུང་ན་གང་སར་སྨན་པ་བསྟེན་མི་རུང་། སྨན་རྫས་རྫུན་མ་འཚོང་མཁན་མང་ཆེ་བས་ཁྱིམ་རྒྱུད་ཀྱི་གསང་བའི་སྨན་ཐོ་ཡིན་ཟེར་ནས་ནད་བྱུང་ཏེ་དུས་ཡུན་རིང་བོ་འགོར་བའི་ནད་པ་རྣམས་འགུག་བཞིན་ཡོད། ནད་བྱུང་ནས་དུས་ཡུན་རིང་བོ་འགོར་བའི་ནད་པ་རྣམས་ཀྱིས་བརྩི་སྲུང་བྱེད་དགོས་པའི་ནད་བཅོས་རྩ་དོན་ནི་བཅུ་ཆའི་གསུམ་སྨན་བཅོས་དང་བཅུ་ཆའི་བདུན་དེ་ལུས་ཁམས་གསོ་རྒྱུ་དེ་ཡིན་པས། སྨན་སྣ་གཅིག་གིས་ནད་བརྒྱ་འཇོམ་ཞེས་པའི་མགོ་སྐོར་ཐེབས་མི་རུང་། 

རིན་གོང་དམའ་བར་ཧམ་པ་སྐྱེ་མི་རུང་། མི་ལ་ལ་སྨན་ཁང་དང་རྒྱལ་གཉེར་སྨན་རྫས་ཚོང་ཁང་དུ་འགྲོ་འདོད་མེད་ཅིང་རིན་གོང་དམའ་མོར་སྙེགས་ནས་ཆེད་དུ་སྒེར་གྱི་སྨན་རྫས་ཉོ་བཞིན་ཡོད་པ་དེ་ཡང་ནད་པའི་འཛེམ་བྱ་གཙོ་བོ་ཞིག་ཡིན། 

སྲང་ལམ་ཆེ་ཆུང་ཀུན་ཏུ་འཚོང་བཞིན་པའི་སྨན་རྫས་རིགས་ལ་ཡིད་ཆེས་བྱེད་མི་རུང་། ལྷག་པར་དུ་གྲངས་ཉུང་མི་རིགས་སུ་བརྫུས་ནས་སྨན་རྫས་འཚོང་བཞིན་པའི་སྟག་གི་རུས་པ་དང་ཆུ་ཐག གླ་རྩི་དང་དོམ་མཁྲིས་སོགས་སྨན་རྫས་རྩ་ཆེན་ཡིན་ཟེར་བ་དེ་དག་ལས་མང་ཤོས་ནི་རྫུན་མ་ཡིན་པས། གཡོ་འོག་ཏུ་ཚུད་མི་རུང་།

 སྨན་རྫས་རྫུན་མ་ཉོ་བ་སྔོན་འགོག་བྱེད་པར་ཚང་མས་སྣང་ཆུང་བྱེད་མི་རུང་ལ། སྨན་རྫས་རྫུན་མ་དབྱེ་འབྱེད་ཀྱི་ནུས་པ་ངེས་ཅན་ཞིག་ཡོད་དགོས། དེ་ལྟར་བྱས་ཚེ་རང་རང་ཉིད་ཀྱི་བདེ་ཐང་སྲུང་སྐྱོབ་བྱེད་ཐུབ་པ་མ་ཟད་མགོ་སྐོར་ཐེབས་མི་སྲིད།

རྩོམ་སྒྲིག་པ། སྒྲོལ་མ་སྐྱིད།