ཝུའུ་ཁི་ལན་གྱི་སྲིད་འཛིན་ཙེ་ལིན་སི་ཅི་ཡིས་ཚེས29ཉིན་བཤད་རྒྱུར། ཝུའུ་ཁི་ལན་གྱི་རྒྱལ་ས་ཅི་ཧྥུའུ་གྲོང་ཁྱེར་དང་དེ་མིན་མངའ་སྡེ་མང་བོར་བར་སྣང་འཇབ་རྒོལ་ཐེབས་ཟེར། ཝུའུ་ཁི་ལན་གྱི་མཁའ་དམག་གིས་ཉིན་དེར་བཤད་རྒྱུར། ཚེས28ཉིན་གྱི་དགོང་མོ་ནས་ཚེས29ཉིན་གྱི་ཞོགས་པའི་བར། ཨུ་རུ་སིའི་དམག་དཔུང་གིས་ཝུའུ་ཁི་ལན་ལ་འཕུར་མདའ་དང་མི་མེད་གནམ་གྲུ་བཀོལ་ནས་འཇབ་རྒོལ་བྱས་ཡོད་ལ། ཝུའུ་ཁི་ལན་མངའ་ཁོངས་ཀྱི་གནས་བཞི་བཅུ་ལྷག་ལ་འཇབ་རྒོལ་ཐེབས་ཡོད་ཟེར།

ཙེ་ལིན་སི་ཅི་ཡིས་དྲ་ཐོག་ཏུ་རྩོམ་ཡིག་སྤེལ་ཏེ། ཅི་ཧྥུའུ་གྲོང་ཁྱེར་དང་ཅི་ཧྥུའུ་མངའ་སྡེ། ཨོ་ཏི་སཱ་མངའ་སྡེ། ཧཱ་ཨར་ཁི་ཧྥུའུ་མངའ་སྡེ། ཨོ་ལོན་མངའ་སྡེ་སོགས་ས་ཁུལ་མང་བོར་བར་སྣང་འཇབ་རྒོལ་ཐེབས། བར་སྣང་འཇབ་རྒོལ་ལས་ཅི་ཧྥུའུ་གྲོང་ཁྱེར་གྱི་མེ་འཁོར་ས་ཚིགས་ཀྱི་མཛོད་ཁང་ཞིག་དང་དེ་མིན་གཞི་གྲངས་ལྟེ་གནས་དང་། ཚོང་ལས་ལྟེ་གནས། སྡོད་དམངས་ཐོག་ཁང་བཅས་ལ་གཏོར་བརླག་ཐེབས་ཡོད། ཨོ་ཏི་སཱ་མངའ་སྡེ་རུ་སློབ་གསོ་ལས་ཁུངས་ཤིག་དང་ཉལ་ཁང་ཞིག དེ་མིན་ཕྱི་རྒྱལ་གྱི་གྲུ་གཟིངས་འགའ་ལ་འཇབ་རྒོལ་ཐེབས་ཡོད། དེ་ལས་གཞན་ས་ཁུལ་མང་བོའི་གློག་ཤུགས་སྒྲིག་ཆས་དང་འཕྲིན་གཏོང་སྒྲིག་ཆས་སོགས་ལའང་བར་སྣང་འཇབ་རྒོལ་ཁྲོད་གཏོར་བརླག་ཐེབས་ཡོད་ཟེར།

ཝུའུ་ཁི་ལན་རྒྱལ་ཁབ་བྲེལ་མྱུར་གནས་ཚུལ་ཅུས་ཀྱིས་ཚེས29ཉིན་བཤད་རྒྱུར། ཅི་ཧྥུའུ་གྲོང་ཁྱེར་གྱི་ཀི་ལོ་ཞེ་ཡེ་ཧྥུའུ་སི་ཅི་ས་ཁུལ་གྱི་སྡོད་དམངས་ཐོག་ཁང་ཞིག་ལ་འཇབ་རྒོལ་ཐེབས་ཏེ་མི་གཅིག་ལ་རྨས་ཕོག་ཟེར། བར་སྣང་འཇབ་རྒོལ་དེ་ལས་ད་རུང་ཨོ་ཏི་སཱ་མངའ་སྡེ་རུ་མི་བརྒྱད་ལ་རྨས་ཕོག་ཡོད་ཟེར།

ཝུའུ་ཁི་ལན་གྱི་མཁའ་དམག་གིས་བཤད་རྒྱུར། ཨུ་རུ་སིའི་དམག་དཔུང་གིས་ཐེངས་འདིར་གྲུ་གཟིངས་ལ་རྒོལ་བའི་འཕུར་མདའ་གཅིག་དང་འཕུར་མདའ་གཞན་པ་གཉིས། མི་མེད་གནམ་གྲུ152བཅས་གཏོང་འཕེན་བྱས་ཡོད་ཟེར། ཚེས29ཉིན་གྱི་ཞོགས་པའི་དུས་ཚོད་བརྒྱད་བར། ཝུའུ་ཁི་ལན་གྱི་མཁའ་སྲུང་མེ་ཤུགས་དང་གློག་རྡུལ་འཐབ་འཁྲུག་དམག་དཔུང་གིས་འཕུར་མདའ་གསུམ་དང་མི་མེད་གནམ་གྲུ106སར་འཕངས་ཡོད་ཟེར།

བསོད་ནམས་ཚེ་རིང་གིས་བསྒྱུར།