ཨུ་རུ་སིའི་སྲིད་འཛིན་གྱི་གསར་འགྱུར་དྲུང་ཡིག་ཕའེ་སི་ཁི་ཧྥུའུ་ཡིས་ཚེས29ཉིན་བསྟན་དོན། ཨུ་རུ་སི་ཡིས་དབྱི་ལང་ཉིང་རྡུལ་ནུས་པའི་མཚོན་ཆ་རྒྱ་ཡན་དུ་མི་གཏོང་བའི་ཆིངས་ཡིག་ལས་ཕྱིར་མི་འབུད་པའི་རེ་བཞིན་ཡོད་ཟེར།

ཕའེ་སི་ཁི་ཧྥུའུ་ཡིས་ཉིན་དེར་སྤེལ་བའི་གསར་འགྱུར་སྒྲོག་སྤེལ་ཚོགས་འདུའི་སྟེང་བསྟན་དོན། ཉིང་རྡུལ་ནུས་པའི་མཚོན་ཆ་རྒྱ་ཡན་དུ་མི་གཏོང་བའི་ཆིངས་ཡིག་ནི་རྒྱལ་སྤྱིའི་ཉིང་རྡུལ་ནུས་པ་རྒྱ་ཡན་དུ་མི་གཏོང་བའི་རྐྱེན་སྲོལ་གྱི་རྨང་རྡོ་ཡིན། ཨུ་རུ་སིའི་ཕྱོགས་ཀྱིས་དབྱི་ལང་མུ་མཐུད་དུ་ཆིངས་ཡིག་དེའི་འགན་ཁུར་བའི་ཟབ་ཞུགས་མཁན་གཙོ་བོར་འགྱུར་བར་རེ་བཞིན་ཡོད་ཟེར།

ཕའེ་སི་ཁི་ཧྥུའུ་ཡིས་་བཤད་རྒྱུར། དབྱི་ལང་གི་མཛའ་མཐུན་གྲོགས་པོ་དག་གིས་རིམ་པ་མི་འདྲ་བ་ནས་ཡང་དང་བསྐྱར་དུ་དབྱི་ལང་དུ་ཉིང་རྡུལ་ནུས་པའི་མཚོན་ཆ་བཟོ་བའི་བྱ་སྤྱོད་གང་ཡང་མེད་པ་དང་། ཉིང་རྡུལ་ནུས་པའི་མཚོན་ཆ་བཟོ་བའི་འཆར་གཞི་ཡང་མེད་པ་ཁས་ལེན་བྱས་ཡོད། དབྱི་ལང་གིས་རང་གི་རྒྱལ་སྤྱིའི་ཉིང་རྡུལ་ནུས་པ་རྒྱ་ཡན་དུ་མི་གཏོང་བའི་རྐྱེན་སྲོལ་འོག་ཏུ་ཁུར་དགོས་པའི་འོས་འགན་ལག་བསྟར་བྱེད་པའི་ཞོར་དུ་ཉིང་རྡུལ་ནུས་པའི་ཞི་བདེའི་བེད་སྤྱོད་ཐད་འབད་འབུངས་བྱེད་བཞིན་ཡོད་ཟེར།

དབྱི་ལང་གི་སྨྱན་བྱད་ཀྱིས་ཚེས28ཉིན་བསྒྲགས་པ་ལྟར་ན། དབྱི་ལང་དབྱི་སི་ལན་གྲོས་ཁང་གི་གྲོས་དཔོན་གཞོན་པ་ནེ་ཁི་ཀྲ་ཏི་ཡིས་བསྟན་དོན། གྲོས་ཁང་གིས་དབྱི་ལང་ཉིང་རྡུལ་ནུས་པའི་མཚོན་ཆ་རྒྱ་ཡན་དུ་མི་གཏོང་བའི་ཆིངས་ཡིག་ལས་ཕྱིར་འབུད་པའི་གནད་དོན་ལ་ཞིབ་འཇུག་བྱེད་བཞིན་ཡོད་ཟེར།

བསོད་ནམས་ཚེ་རིང་གིས་བསྒྱུར།