མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱིས་ཚེས29ཉིན་སྐབས་རྗེས་མའི་དྲུང་ཡིག་ཆེན་མོའི་འདེམ་བསྐོའི་སྐོར་ཐེངས་བཞི་བའི་འདེམ་ཤོག་འཕེན་པའི་བྱ་འགུལ་སྤེལ།

བདེ་འཇགས་ལས་འཛིན་ལྷན་ཚོགས་ཀྱི་ཟླ་འདིའི་རེས་སྐོར་ཀྲུའུ་ཞི། མཉམ་འབྲེལ་རྒྱལ་ཚོགས་སུ་རྒྱུན་དུ་སྡོད་པའི་ཧྥ་རན་སིའི་འཐུས་མི་པའོ་ནཱ་ཧྥང་གིས་འདེམ་ཤོག་འཕེན་པའི་བྱ་འགུལ་མཇུལ་སྒྲིལ་རྗེས་བཤད་རྒྱུར། འདེམ་ཤོག་འཕང་བའི་མཇུག་འབྲས་དེ་འདེམ་སྒུག་པའི་མཚམས་སྦྱོར་རྒྱལ་ཁབ་བརྒྱུད་དེ་འདེམ་སྒུག་པ་སོ་སོར་བརྡ་ཐོ་གཏོང་རྒྱུ་ཡིན་ཟེར།

སྐབས་རྗེས་མའི་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོའི་འདེམ་བསྐོའི་བྱ་འགུལ་དེ་ན་ནིང་ཟླ11པ་ནས་མགོ་བརྩམས་པ་དང་། བདེ་འཇགས་ལས་འཛིན་ལྷན་ཚོགས་ཀྱིས་འདེམ་ཤོག་འཕེན་པའི་བྱ་འགུལ་དེ་གསང་སྟབས་ཀྱིས་སྤེལ་བ་ཡིན་ལ། བདེ་འཇགས་ལས་འཛིན་ལྷན་ཚོགས་ཀྱི་འཐུས་མི་ཁོ་ན་ཞུགས་པ་དང་། འདེམ་ཤོག་འཕངས་པའི་མཇུག་འབྲས་དེ་དཔོན་ཕྱོགས་ཐོ་འགོད་བྱས་མེད་པར་མ་ཟད་ཕྱི་ཕྱོགས་ལ་ཁྱབ་བསྒྲགས་ཀྱང་བྱས་མེད།

བདེ་འཇགས་ལས་འཛིན་ལྷན་ཚོགས་ཀྱི་སྐོར་ཐེངས་སྔོན་མ་གསུམ་གྱི་འདེམ་ཤོག་འཕེན་པའི་བྱ་འགུལ་དེ་སོ་སོར་ཟླ7པའི་ཚེས30ཉིན་དང་ཟླ8པའི་ཚེས21ཉིན། ཟླ9བའི་ཚེས18ཉིན་བཅས་ལ་སྤེལ། ཀྲི་ལིའི་སྔོན་ཆད་ཀྱི་སྲིད་འཛིན་པཱ་ཅེ་ལའེ་ཐི་སྐོར་ཐེངས་གསུམ་པའི་འདེམ་ཤོག་འཕངས་རྗེས་འགྲན་རྩོད་ལས་ཕྱིར་བུད། མིག་སྔར་སྐབས་རྗེས་མའི་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོའི་འདེམ་སྒུག་པ་བདུན་ཡོད།

ད་ལྟའི་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལོས་སི་ནི་ཕུའུ་ཐའོ་ཡཱ་ནས་ཡོང་བ་དང་། 2017ལོའི་ཟླ་དང་པོར་ལས་འགན་ཁུར་བ་དང་། 2021ལོར་བསྟུད་འགན་ཁུར་བའི་གོ་སྐབས་ཐོབ། ཁོའི་འགན་ཡུན་ད་ལོའི་ཟླ12པའི་ཚེས31ཉིན་ལོངས་པ་རེད། རྒྱུན་སྲོལ་ལྟར་ན། དྲུང་ཡིག་ཆེན་མོའི་འགན་ཡུན་ལོ་ལྔ་ཡིན་ལ། བསྟུད་འགན་ཁུར་ཆོག་པ་རེད།

བསོད་ནམས་ཚེ་རིང་གིས་བསྒྱུར།