ཨ་ཧྥེ་རི་ཁ་ལྷོ་མའི་ཕྱི་སྡོད་ཀྲུང་གོ་བས་ཉེ་སྔོན་པུས་ལེ་ཐའོ་ལེ་ཡཱ་ནས2026ལོའི་ཀྲུང་གོ་དང་ཨ་ཧྥེ་རི་ཁ་ལྷོ་མའི་ཟླ་མཆོད་རིག་གནས་བརྗེ་རེས་དུས་ཆེན་སྤེལ། ཀྲུང་གོ་དང་ཨ་ཧྥེ་རི་ཁ་ལྷོ་མའི་ཕྱི་འབྲེལ་དཔོན་པོ་དང་། ཕྱི་སྡོད་ཀྲུང་གོ་བ། ཀྲུང་གོའི་དངུལ་གཏོང་ལས་ཁུངས་ཀྱི་འཐུས་མི། དེ་མིན་ཨ་ཧྥེ་རི་ཁ་ལྷོ་མའི་ལས་རིགས་སོ་སོའི་མི་སྣ་བཅས་མི་ལྔ་བརྒྱ་ལྷག་དུས་རབས་ཐང་ཆེན་དུ་ལྷན་དུ་འཛོམས་ནས། ཀྲུང་གོ་དང་ཨ་ཧྥེ་རི་ཁ་ལྷོ་མའི་དཔལ་ཡོན་དཔེར་ལེན་ལ་མཉམ་དུ་གྲོས་བསྡུར་དང་རྒྱལ་ཁབ་གཉིས་ཀྱི་དམངས་ཁྲོད་ཀྱི་མཛའ་བརྩེ་ལ་སྐུལ་འདེད་བཏང་།
ཨ་ཧྥེ་རི་ཁ་ལྷོ་མར་སྡོད་པའི་ཀྲུང་གོའི་གཞུང་ཚབ་ཁང་གི་སྐུ་ཚབ་ཐན་ཀྲན་ཕིན་གྱིས་ཞུ་ཚིག་འབུལ་སྐབས་བསྟན་དོན། མི་གཞུང་བརྗེ་རེས་ནི་ཀྲུང་གོ་དང་ཨ་ཧྥེ་རི་ཁ་ལྷོ་མ་ཕྱོགས་གཉིས་ཀྱི་འབྲེལ་བའི་དམངས་ཀྱི་འདོད་བློའི་རྨང་གཞི་ཡིན་ཞིང་། རྒྱལ་ཁབ་གཉིས་ཀྱི་ལས་རིགས་སོ་སོས་རིག་གནས་ལ་བརྟེན་ནས་རྒྱུས་ལོན་ལ་སྐུལ་འདེད་གཏོང་བ་དང་བརྗེ་རེས་ལ་བརྟེན་ནས་ཡིད་ཆེས་ཇེ་ཟབ་ཏུ་གཏོང་བར་རེ་སྒུག་བྱས་ཡོད་ལ། སྔར་ལས་ལྷག་པའི་སྒོ་ནས་ཀྲུང་གོ་དང་ཨ་ཧྥེ་རི་ཁ་ལྷོ་མའི་དཔལ་ཡོན་བརྗེ་རེས་དཔེར་ལེན་ལ་སྐུལ་འདེད་གཏོང་བ་དང་། རྒྱལ་ཁབ་གཉིས་ཀྱི་མང་ཚོགས་བར་གྱི་མཛའ་བརྩེ་ཇེ་ཟབ་ཏུ་གཏོང་བ། རྒྱུན་མཐུད་ངང་ཀྲུང་གོ་དང་ཨ་ཧྥེ་རི་ཁ་ལྷོ་མའི་མཛའ་བརྩེའི་སྤྱི་ཚོགས་རྨང་གཞི་ཇེ་བརྟན་དུ་བཏང་སྟེ། མིའི་རིགས་ཀྱི་ལས་སྐལ་གཅིག་མཐུན་ཚོགས་པ་འཛུགས་པར་སྔར་ལས་མི་གཞུང་སྟོབས་ཤུགས་གཅིག་བསྡུ་བྱེད་པར་སྐུལ་འདེད་གཏོང་དགོས་ཟེར།
བྱ་འགུལ་དེའི་གཙོ་སྒྲུབ་ཕྱོགས་ཀྱི་འཐུས་མི། ཡའོ་ཧན་ནེ་སི་པའོ་ཧྭ་ཞིན་སྒྱུ་རྩལ་ཚོགས་པའི་ཚོགས་གཙོ་ཧོང་ཅིན་ཅིན་གྱིས་བསྟན་དོན། ཀྲུང་གོའི་ཟླ་མཆོད་དུས་ཆེན་དང་ཨ་ཧྥེ་རི་ཁ་ལྷོ་མའི་རིག་གནས་ཤུལ་བཞལ་ཟླ་བའི་བྱ་འགུལ་མཉམ་དུ་སྤེལ་བ་རེད། ཐེངས་འདིའི་བྱ་འགུལ་ལས་རྒྱལ་ཁབ་གཉིས་ཀྱི་མི་དམངས་ཀྱི་སེམས་པའི་སྦྲེལ་ཐག་ཇེ་དམ་དུ་གཏོང་བ་དང་། ཕན་ཚུན་གྱིས་བརྗེ་རེས་ཁྲོད་ནས་རྒྱུས་ལོན་བྱེད་པ་དང་རྒྱུས་ལོན་བྱས་ནས་འབྲེལ་འདྲིས་ཇེ་ཟབ་ཏུ་བཏང་སྟེ། ཀྲུང་གོ་དང་ཨ་ཧྥེ་རི་ཁ་ལྷོ་མའི་དམངས་ཁྲོད་ཀྱི་མཛའ་བརྩེ་ཇེ་ཟབ་ཏུ་འགྲོ་བར་སྐུལ་འདེད་གཏོང་ཐུབ་པའི་རེ་བ་ཡོད་ཟེར།
ཨ་ཧྥེ་རི་ཁ་ལྷོ་མའི་ལོ་རྒྱུས་མཐུན་ཚོགས་ཀྱི་ཀྲུའུ་ཞི་ཟུར་པ་ཧཱ་ལི་སི་དང་ཨ་ཧྥེ་རི་ཁ་ལྷོ་མ་དང་ཀྲུང་གོའི་ན་གཞོན་མཉམ་འབྲེལ་ཚོགས་པའི་དྲུང་ཡིག་ཆེན་མོ་མཱ་ཡཱ་ལོ། དུས་རབས་ཐང་ཆེན་གྱི་སྤྱི་གཉེར་བ་ཨོ་ཁང་ནཱ་སོགས་ཨ་ཧྥེ་རི་ཁ་ལྷོ་མའི་ཚོགས་ཞུགས་སྐུ་མགྲོན་དག་གིས་ཞུ་ཚིག་འབུལ་སྐབས་ཀྲུང་གོའི་རིག་གནས་ལས་བསྟན་པའི་ལྷན་འཛོམས་ཀྱི་འདུ་ཤེས་དེ་ཁས་ལེན་གང་ལེགས་བྱས་པ་དང་། གཞུང་སྒྲུབ་ཕྱོགས་ཀྱིས་རིག་གནས་འབྲེལ་ཟམ་དུ་བྱས་ཏེ། ཀྲུང་གོ་དང་ཨ་ཧྥེ་རི་ཁ་ལྷོ་མའི་དཔལ་ཡོན་དཔེར་ལེན་དང་མི་གཞུང་བརྗེ་རེས་ལ་སྐུལ་འདེད་གཏོང་བར་གདེང་འཇོག་ཆེན་པོ་བྱས།
ཚོགས་ཡུན་ཉིན་གཉིས་ཡིན་པའི་བྱ་འགུལ་སྐབས་སུ། ཀྲུང་གོ་དང་ཨ་ཧྥེ་རི་ཁ་ལྷོ་མའི་སྒྱུ་རྩལ་པས་མཉམ་དུ་རིག་རྩལ་འཁྲབ་སྟོན་བྱས་ཤིང་། ཤར་ཕྱོགས་ཀྱི་གནའ་བོའི་དབྱངས་རྟ་དང་ཨ་ཧྥེ་རི་ཁ་གླིང་གི་ཡུལ་སྲོལ་མཉམ་འདྲེས་སྒོས་ཡུལ་དངོས་ཀྱི་ལྟད་མོ་བར་མིག་དང་རྣ་བའི་ལོངས་སྤྱོད་གྱ་ནོམ་པ་བསྩལ། བྱ་འགུལ་སྤེལ་སའི་ཡུལ་དངོས་སུ་ད་རུང་གཟུགས་འདས་ཤུལ་བཞག་རིག་གནས་ཀྱི་འགྲེམ་སྟོན་དང་ཀྲུང་གོའི་དངུལ་གཏོང་ཁེ་ལས་ཀྱི་མཚམས་སྦྱོར། ཀྲུང་ཧྭའི་ཟས་རིགས་སོགས་བཀོད་སྒྲིག་བྱས་ཏེ། ཨ་ཧྥེ་རི་ཁ་ལྷོ་མའི་མང་ཚོགས་ལ་ཀྲུང་ཧྭའི་རིག་གནས་ཀྱི་ཐུན་མིན་འགུག་ཤུགས་མྱོང་དུ་བཅུག
བསོད་ནམས་ཚེ་རིང་གིས་བསྒྱུར།
