དབྱི་ཐ་ལིའི་གྲོས་ཁང་གིས་ཁྲིམས་གཞིར་གྲོས་འཆམ་བྱུང་ནས“ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་དོན་རྐྱེན”ཇེ་མང་དུ་ཕྱིན་པར་གདོང་གཏད།
ཁུངས། ཀློག་གྲངས།
​དབྱི་ཐ་ལིའི་གྲོས་ཁང་གིས་ཚེས17ཉིན་ཁྲིམས་གཞི་ཞིག་ལ་གྲོས་འཆམ་བྱུང་བ་དང་། དེའི་དམིགས་ཡུལ་ནི་མགྱོགས་མྱུར་ངང་འཕར་བཞིན་པའི་ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་དོན་རྐྱེན་ལ་གདོང་གཏོད་ཆེད་རེད།  ཁྲིམས་གཞི་དེར་རྒྱལ་ནང་དུ་རྩོད་གཞི་བྱུང་བ་དང་།  ངོ་རྒོལ་བྱེད་མཁན་གྱིས་དེས་ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་དང་དབྱི་སི་རལ་སྲིད་གཞུང་ལ་ཁྲིམས་མཐུན་ངང་སྐྱོན་བརྗོད་བྱེད་པའི་བར་གྱི་དབྱེ་མཚམས་མག་མོག་ཏུ་གཏོང་སྲིད་པར་འདོད།  
ཨ་རིའི་མཉམ་འབྲེལ་གསར་འགྱུར་ཁང་གིས་གནས་ཚུལ་སྤེལ་བ་ལྟར་ན། དབྱི་ཐ་ལིའི་གྲོས་ཁང་ཞོལ་མ་མོས་མཐུན་བྱུང་བའི་འདེམས་ཤོག147དང་། མོས་མཐུན་མེད་པའི་འདེམས་ཤོག93། དབང་ཆ་དོར་བའི་འདེམས་ཤོག5བཅས་ཀྱི་མཇུག་འབྲས་ལས་ཁྲིམས་གཞི་དེར་གྲོས་འཆམ་བྱུང་།   ཁྲིམས་གཞི་དེ་ལས་དམར་གསོད་ཆེན་པོའི་རྗེས་དྲན་མནའ་འབྲེལ་ཞེས་པའི་རྩ་འཛུགས་དེ་ཉིད་ཀྱིས་ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་མཚན་ཉིད་དང་དེ་བཞིན་འབྲེལ་ཡོད་དཔེ་མཚོན་དངོས་སུ་ལུང་དྲངས་ཡོད།

2023ལོའི་ཟླ10པར་སྐོར་ཐེངས་གསར་པའི་ཕ་ལེ་སི་ཐན་དང་དབྱི་སི་རལ་གྱི་འགལ་བ་བྱུང་རྗེས། དབྱི་སི་རལ་གྱིས་ཕ་ལེ་སི་ཐན་གྱི་ཅ་ཧྲ་ས་ཁུལ་དང་ཅོར་ཏན་གཙང་པོའི་ནུབ་ངོགས་སུ་འགུལ་སྐྱོད་བྱས་པའི་དབང་གིས་རྒྱལ་སྤྱིའི་སྤྱི་ཚོགས་ཀྱིས་རྒྱ་ཁྱབ་ངང་སྐྱོན་བརྗོད་བྱས།  དུས་མཚུངས་སུ། ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་དོན་རྐྱེན་དེ་ཡོ་རོབ་གླིང་དུ་ཇེ་མང་དུ་ཕྱིན་པར་བརྩིས། དབྱི་ཐ་ལིའི་ཡིའུ་ཐའེ་པ་ཞིག་གིས་རྩ་འཛུགས་བྱས་ཏེ་བསྡོམས་རྩིས་བྱས་པ་ལྟར་ན། 2025ལོར་དབྱི་ཐ་ལིར་དོན་རྐྱེན་དེའི་རིགས963བྱུང་བ་དེ་ལོ་སྔོན་མ་ལས་ཧ་ལམ10%འཕར་ཡོད་ཅིང་། དེ2023ལོའི་ལྡབ་གཉིས་ལྷག་ཡིན་ལ།   2022ལོའི་ཧ་ལམ་ལྡབ4རེད།

དེ་དང་ཆབས་ཅིག     དབྱི་སི་རལ་དང་ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་བར་གྱི་དབྱེ་མཚམས་ལ་སྐྱོན་བརྗོད་བྱེད་པའི་རྩོད་གཞི་དབྱི་ཐ་ལི་རུ་ཉིན་བཞིན་ཛ་དྲག་ཏུ་འགྲོ་བཞིན་ཡོད། ཁྲིམས་གཞི་འདིར་ངོ་རྒོལ་བྱེད་མཁན་གྱིས་དམར་གསོད་ཆེན་མོའི་རྗེས་དྲན་མནའ་འབྲེལ་གྱི་ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་མཚན་ཉིད་དང་དེའི་དཔེ་མཚོན་ཁྲིམས་གཞིའི་ནང་བཞག་ཚེ། ཕ་ལེ་སི་ཐན་དང་དབྱི་སི་རལ་བར་གྱི་འབྲེལ་ཡོད་གནད་དོན་གྱི་གཏམ་བརྗོད་ལ་ཚོད་འཛིན་བྱེད་སྲིད་པའི་སེམས་ཁྲལ་བྱེད་བཞིན་ཡོད། རྒྱབ་སྐྱོར་བྱེད་མཁན་གྱིས་བསྟན་དོན། ཁྲིམས་གཞི་དེ་ནི་ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་དོན་རྐྱེན་གྱི་གྲངས་འབོར་གློ་བུར་དུ་འཕར་བའི་དགོས་ངེས་ཀྱི་ཨ་ལན་ཡིན་ལ།  ཡིའུ་ཐའེ་པར་ངོ་རྒོལ་བྱེད་པའི་རིང་ལུགས་ཀྱི་གཏམ་སྤྱོད་ལ་ངོས་འཛིན་དང་རྡུང་རྡེག་གཏོང་བར་བཀོལ་བའི་ད་ལྟ་སྤྱོད་བཞིན་པའི་བྱེད་ཐབས་ལ་རྒྱབ་སྐྱོར་བྱ་རྒྱུར་ཕན་མོད།   ཡིན་ཡང་དབྱི་སི་རལ་སྲིད་གཞུང་ལ་སྐྱོན་བརྗོད་བྱེད་པར་ཚོད་འཛིན་ཐེབས་མི་སྲིད།