ཨུ་རུ་སིའི་གསར་འགྱུར་ལས་རིགས་ཀྱིས་བསྒྲགས་པའི་གནས་ཚུལ་ལྟར་ན། ཨུ་རུ་སིའི་ཙུང་ཐུང་ཕུའུ་ཅིན་གྱིས་བཀའ་རྒྱ་བཏང་སྟེ་དམག་ཕྱོགས་ཀྱིས་བྲེལ་མྱུར་སྦྱོང་བརྡར་བྱ་འགུལ་སྤེལ་ཏེ། དམག་དཔུང་གི་ནུབ་ཕྱོགས་ས་ཁུལ་གྱི་འཐབ་འཁྲུག་གྲ་སྒྲིག་གནས་ཚུལ་ལ་ཞིབ་བཤེར་བྱེད་དགོས་པའི་རེ་བ་བཏོན།

ཨུ་རུ་སིའི་རྒྱལ་སྲུང་བློན་ཆེན་ཧྲའོ་དབྱེ་ཀུའུ་ཡིས་ཚེས་ཉེར་དྲུག་ཉིན་བཤད་རྒྱུར། ཨུ་རུ་སིའི་རྒྱལ་ཕྲན་མཉམ་འབྲེལ་གྱི་ཙུང་ཐུང་གི་བཀའ་རྒྱ་ལྟར་དུ། ནུབ་ཕྱོགས་དམག་ཁུལ་གྱི་དམག་དཔུང་གིས་ཚེས་ཉེར་དྲུག་ཉིན་གྱི་ཕྱི་དྲོའི་དུས་ཚོད་གཉིས་ནས་བཟུང་དོགས་ཟོན་མཐོར་འདེགས་བྱས་ཡོད་ཟེར།

ཧྲའོ་དབྱེ་ཀུའུ་ཡིས་བཤད་རྒྱུར། དམག་དོན་སྦྱོང་བརྡར་དེ་དུས་རིམ་གཉིས་སུ་བགོས་ཡོད་པ་དང་། ཟླ་གསུམ་པའི་ཚེས་སུམ་ཉིན་མཇུག་སྒྲིལ་རྒྱུ་ཡིན། ཨུ་རུ་སིའི་དབུས་ཕྱོགས་ས་ཁུལ་གྱི་དམག་དཔུང་ཡང་བྱ་འགུལ་དེར་ཞུགས་རྒྱུ་ཡིན་ཟེར། ཁོས་དེ་ལས་གཞན་པའི་ནང་དོན་ཞིབ་རྒྱས་འདོན་སྤྲོད་མ་བྱས།

ཁི་ལི་མུའུ་ལིན་ཕོ་བྲང་གིས་གནས་ཚུལ་དེ་བདེན་དཔང་བྱེད་པར་ཁས་ལེན་མ་བྱས་པ་དང་། ཨུ་རུ་སིའི་རྒྱལ་སྲུང་པུའུ་ཡིས་རྣམ་འགྱུར་ཅི་ཡང་བསྟན་མེད།