ཟླ8པའི་ཚེས13ཉིན། གསར་འགོད་པས་ཞིང་ཆེན་དམངས་སྲིད་ཅུའུ་ནས་རྒྱུས་ལོན་བྱས་པ་ལྟར་ན། མཚོ་སྔོན་གྱིས་རྒན་པའི་ཁ་གསབ་དངུལ་གྱི་རེ་ཞུ་གོ་རིམ་དང་། ཞིབ་བཤེར་རྐྱེན་སྲོལ་འཐུས་ཚང་། འགྲེམ་གཏོང་བྱེད་ཐབས་ལེགས་བསྒྱུར། ལྟ་ཞིབ་དོ་དམ་ནུས་ཤུགས་ཆེར་བསྐྱེད་བྱས་པར་བརྟེན། ཕྱོགས་ཡོངས་ནས་རྒན་པའི་ཁ་གསབ་དངུལ་གྱི་དོ་དམ་གོ་རིམ་ལེགས་བསྒྱུར་བྱས་ཏེ། རྒན་པ་རྣམས་གང་སར་རྒྱུག་མི་དགོས་པར་བྱ་བ་སྒྲུབ་ཐུབ་པར་མ་ཟད། ཁ་གསབ་དངུལ་གྱི་འགྲེམ་གཏོང་ལ་ནོར་བ་མི་ཤོར་བར་ཁག་ཐེག་བྱས་པ་དང་། མ་དངུལ་གྱི་བཀོལ་སྤྱོད་བདེ་འཇགས་ལ་སྲུང་སྐྱོབ་བྱས།
མཚོ་སྔོན་གྱིས་ཕྱོགས་ཡོངས་ནས་དྲ་ལམ་དང་ཡུལ་དངོས་ཟུང་འབྲེལ་གྱི་རེ་ཞུའི་རྣམ་པ་ཁྱབ་སྤེལ་བཏང་། དྲ་ལམ་གྱི་མ་ལག་ལ་བརྟེན་ནས་རྒན་པའི་ཁ་གསབ་དངུལ་གྱི་རེ་ཞུའི་བྱེད་ནུས་གསར་སྤེལ་བྱས་ཏེ། ཐོབ་ཐང་སྟེང་གི་ཆ་འཕྲིན་འདོན་སྤྲོད་བྱས་ནས་རང་འགུལ་ཞིབ་བཤེར་བྱེད་ཐུབ་པ་དང་། རེ་ཞུའི་རེའུ་མིག་དྲ་ལམ་ནས་སྐོང་ཐུབ་པ། བདེན་དཔང་རྒྱུ་ཆ་པར་བླངས་ནས་སྐུར་ཐུབ་པ། ཞིབ་མཆན་འགོད་པའི་མྱུར་ཚད་དུས་ལྟར་འཚོལ་བཤེར་བྱེད་ཐུབ་པ་སོགས་ཀྱི་བྱེད་ནུས་ཡོད།
ཞིང་ཆེན་རིམ་པའི་དམངས་སྲིད་ཆ་འཕྲིན་དོ་དམ་མ་ལག་ལ་བརྟེན་ནས། སྤྱི་བདེ་དང་མི་ཤུགས་ཐོན་ཁུངས་ཅུའུ། འཕྲོད་བསྟེན་བདེ་ཐང་སོགས་སྡེ་ཁག་གི་གཞི་གྲངས་ཞིབ་བསྡུར་རྐྱེན་སྲོལ་བཙུགས་ཏེ། ཟླ་རེར་རྒན་པའི་ཁ་གསབ་དངུལ་ལེན་པའི་ཆ་རྐྱེན་དང་འཚམ་པའི་གསར་འཕེལ་རྒན་པའི་ཆ་འཕྲིན་ཞིབ་བཤེར་འདམས་གསེས་བྱས་ནས་དམངས་སྲིད་སྡེ་ཁག་ལ་སྤྲད་དེ། ལས་སྒྲུབ་མི་སྣས་རྒན་པའི་ཁྱིམ་བདག་དང་འབྲེལ་བ་བྱས་ཏེ་རེ་ཞུའི་འགྲོ་ལུགས་སྒྲུབ་པ་དང་། མིས་སྲིད་ཇུས་འཚོལ་བ་ནས་སྲིད་ཇུས་ཀྱིས་མི་འཚོལ་བར་ཐོལ་བརྒལ་བྱས་ཡོད་ལ། དེ་དང་མཉམ་དུ་མིའི་བསྐྱར་ཞིབ་ནུས་ཤུགས་ཆེར་བསྐྱེད་བྱས།
ཕྱོགས་ཡོངས་ནས་སྤྱི་ཚོགས་ཅན་གྱི་འགྲེམ་གཏོང་ཁྱབ་སྤེལ་བྱས་ཏེ། ཞིང་ཆེན་ནོར་སྲིད་ཐིན་གྱིས་དངུལ་ཁང་ཆེ་ཁག་དང་མཐུན་སྦྱོར་སྒོས་རྒན་པ་རྣམས་ལ་དམངས་ཕན་བྱང་བུ་དང་ཆེད་སྤྱོད་བྱང་བུ་བཟོས་ནས་ཟླ་རེར་དུས་ཚོད་ལྟར་ཁ་གསབ་དངུལ་བྱང་དུ་གཏོང་ཐུབ་པར་བྱས་ཡོད། ཁ་གསབ་དངུལ་འགྲེམ་གཏོང་གི་སྔོན་བརྡའི་རྐྱེན་སྲོལ་བཙུགས་ཏེ། ཟླ་རེའི་ཁ་གསབ་དངུལ་འགྲེམ་གཏོང་གནས་ཚུལ་ལ་དུས་ལྟར་ལྟ་ཞིབ་བྱས་པར་མ་ཟད། རྒན་པ་དང་ཁྱིམ་མིའི་ཁ་གསབ་དངུལ་འགྲེམ་གཏོང་གནས་ཚུལ་གསལ་བཤད་བྱས།
ཁ་གསལ་མ་དངུལ་གྱི་རེ་ཞུ་དང་དཔྱད་ཞིབ། འགྲེམ་གཏོང་སོགས་ཀྱི་གོ་རིམ་ཧྲིལ་བོར་རྗེས་བསྙེགས་དོ་དམ་བྱས་ཏེ། མ་དངུལ་གཏོང་ཕྱོགས་ཁུངས་འདེད་བྱེད་ཐུབ་པ་མངོན་འགྱུར་བྱས་པ་དང་། དུས་ལྟར་རྒན་པའི་ཁ་གསབ་དངུལ་གྱི་བཀོད་སྤྱོད་གནས་ཚུལ་ལ་ཞིབ་བཤེར་བྱས། དེ་དང་མཉམ་དུ། ལྟ་སྐུལ་ཞུ་གཏུག་གི་རྒྱུད་ལམ་ཡངས་པར་བྱེད་པ་དང་ཞུ་གཏུག་ཁ་པར་དང་ཡིག་སྒམ་ཁྱབ་བསྒྲགས་བྱས་ནས། སྤྱི་ཚོགས་ཀྱི་ལས་རིགས་སོ་སོའི་ལྟ་སྐུལ་དང་ལེན་བྱས།
ཁོན་ཐར་དབང་རྒྱལ་གྱིས་བསྒྱུར།
