ཟླ10པའི་ཚེས7ཉིན། མཚོ་ཤར་གྲོང་ཁྱེར་ཁྲོམ་རའི་ལྟ་སྐུལ་དོ་དམ་ཅུའུ་ཡི་ཆེས་གསར་པའི་གཞི་གྲངས་ལས་མངོན་པ་ལྟར་ན། མཚོ་ཤར་གྲོང་ཁྱེར་གྱི་ད་ཡོད་ཁེ་ལས31ལ་དུས་ཡུན་རིང་པོར་ཕན་ནུས་ཡོད་པའི་སྐྱེ་ལྡན་བདེན་དཔང་ར་སྤྲོད་ཀྱི་འཛིན་ཡིག41ཡོད་པ་དང་། ཁེ་ལས37ལ་ལྗང་མདོག་ཟས་རིགས་ཀྱི་དཔང་ཡིག106ཡོད་པ་མ་ཟད། མཚོ་ཤར་ནི་ཞང་ཀང་གིSTCསྤུས་ལེགས་དཔང་ཡིག་ཐོག་མ་ཐོབ་པའི་གྲོང་ཁྱེར་ཡིན་ལ། གྲོང་ཁྱེར་ཡོངས་ཀྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཀྱི་སྤུས་ཚད་མཐོ་བའི་འཕེལ་རྒྱས་ལ་འདེགས་སྐྱོར་ནུས་ལྡན་འདོན་སྤྲོད་བྱས་ཡོད།
ད་ལོའི་ཟླ་དགུ་པའི་ཟླ་འགོར། མཚོ་ཤར་གྲོང་ཁྱེར་གྱིས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་བསྐྲུན་པའི་དམིགས་འབེན་ལྟར། མཐོ་སྒང་གི་གྲང་བསིལ་སྔོ་ཚལ་གྱི་ཐོན་ལས་ཕྲེང་འབྲེལ་ཡོངས་ལ་ཁྱབ་པའི་ཚད་གཞིའི་མ་ལག་བཟོས། མ་ལག་དེར་ཀུན་སྤྱོད་རྨང་གཞི་དང་ཐོན་སྐྱེད། ཐོན་རྫས་ཚད་གཞི། སྔོག་འདོན་རྗེས་ཀྱི་ཐག་གཅོད་བྱེད་སྟངས། ལས་སྣོན་འཁོར་རྒྱུག་སོགས་ནང་དོན་ཆེན་པོ་བདུན་དང་རིམ་པ་གཉིས་པའི་ཡན་ལག་ཚད་གཞི་སྣ24འདུས་ཡོད། སྤུས་ལེགས་དང་རིན་གོང་ལེགས་པའི་མཐོ་སྒང་གི་གྲང་བསིལ་སྔོ་ཚལ་གྱི་ཟོང་རྟགས་བསྐྲུན་པར་རྨང་གཞི་བརྟན་པོ་བཏིངས་པ་དང་། ནུས་ཤུགས་ཡོད་རྒུས་མཐོ་སྒང་གི་གྲང་བསིལ་སྔོ་ཚལ་ཐོན་ལས་འཕེལ་རྒྱས་ཁྲོད་ཀྱི་འདེབས་ལས་ཚད་གཞི་གཅིག་གྱུར་མིན་པ་དང་། ཐོན་རྫས་ཀྱི་སྤུས་ཚད་བརྟན་བརླིང་མིན་པ། ཟོང་རྟགས་ཕན་འབྲས་མངོན་གསལ་མིན་པ་སོགས་འཕེལ་རྒྱས་ཀྱི་དཀའ་གནད་སེལ། ད་ལྟ། མཚོ་ཤར་གྲོང་ཁྱེར་ལག་བསྟར་བྱེད་བཞིན་པའི་ནུས་ལྡན་གྱི་ས་གནས་ཚད་གཞིའི་གཏན་འབེབས་ནང་ཟབ་ཞུགས་བྱས་ཏེ། སིར་པན་དང་ཞོག་ཁོག ལའོ་ཏུའུ་གླ་སྟར། སེའུ་དམར་པོ། སྒོག་པ། ལྕ་བ། གཡེར་མ། མཚོ་ཤར་གྱི་བྱ་ཕོ། ཧུའུ་ཀྲུའུ་ཡི་ཕག ལུའུ་ཏུའུ་ཡི་རྩྭ་ཕག་སོགས་མཚོ་ཤར་གྱི་ཁྱད་ལྡན་ལྗང་མདོག་སྐྱེ་ལྡན་ཐོན་རྫས་མང་པོར་ཁྱབ་ཡོད།
དེ་དང་ཆབས་ཅིག ལྗང་མདོག་སྐྱེ་ལྡན་ཐོན་རྫས་ལས་སྣོན་མ་བྱས་སྔོན་དང་ལས་སྣོན་བྱེད་སྐབས། ལས་སྣོན་རྗེས་བཅས་ཀྱི་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ་དང་། ལྗང་མདོག་སྐྱེ་ལྡན་ཐོན་རྫས་ཀྱི་ཐོན་སྐྱེད་ལྟ་སྐུལ་ཚོད་འཛིན་མ་ལག་དང་། ཐོན་རྫས་ཞིབ་དཔྱད་ཚད་ལེན་མ་ལག ཁྲོམ་རའི་ཁུངས་འདེད་མ་ལག་བཅས་འཛུགས་པ་དང་འཐུས་ཚང་དུ་བཏང་ནས། འདེབས་ལས་དང་གསོ་སྤེལ་ནས་ཐོན་སྐྱེད་ལས་སྣོན་དང་། ཁྲོམ་རའི་འཁོར་རྒྱུག ཟས་ཆོག་བར་གྱི་རྗེས་འདེད་ནུས་ལྡན་བྱེད་ཐུབ་པ་མངོན་འགྱུར་བྱུང་། མཚོ་སྔོན་ཅང་ཧི་ཡོན་ཞིང་ཕྱུགས་ཚན་རྩལ་འཕེལ་རྒྱས་ཚད་ཡོད་ཀུང་སིས་ཐོན་སྐྱེད་བྱས་པའི“སྐྱེ་ལྡན་ལོག་སྣུམ”དང“སྐྱེ་ལྡན་ཟར་མའི་སྣུམ”ཞང་ཀང་གི་ཚད་གཞི་དང་ཞིབ་བཤེར་ལྟེ་གནས་ཀྱི（STC）བདེན་དཔང་ར་སྤྲོད་བྱས་པ་མ་ཟད། ཞང་ཀངSTCཡི་སྤུས་ལེགས་ཀྱི་དཔང་བདེན་ར་སྤྲོད་ཀྱི་དཔང་ཡིག་ཐོག་མ་ཐོབ། དེས་མཚོ་ཤར་གྲོང་ཁྱེར་གྱིས་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་རྒྱལ་སྤྱིའི་རྒྱུ་སྤུས་ཀྱི་གྲལ་དུ་སླེབས་པ་མཚོན་ཡོད།
ཤ་བོ་རིན་མཚོས་བསྒྱུར།
