ཟླ9པའི་ཚེས29ཉིན། མཚོ་སྔོན་ཞིང་ཆེན་མི་རིགས་སྐད་ཡིག་ལོ་ཙཱ་མཐུན་ཚོགས་ཀྱིས་གཙོ་སྒྲུབ་བྱས་ཤིང་། མཚོ་སྔོན་ཞིང་ཆེན་མི་དམངས་སྲིད་གཞུང་གྲངས་ཉུང་མི་རིགས་སྐད་ཡིག་ཡིག་སྒྱུར་ཁང་གིས་འགན་སྒྲུབ་དང་། ཡུས་ཧྲུའུ་བོད་རིགས་རང་སྐྱོང་ཁུལ་མི་རིགས་སྐད་ཡིག་ལས་དོན་ལྟེ་གནས་ཀྱིས་རོགས་སྒྲུབ་བྱས་པའི་མཚོ་སྔོན་ཞིང་ཆེན་གྱི་མི་རིགས་སྐད་ཡིག་ལོ་ཙཱའི་རིག་གཞུང་བགྲོ་གླེང་ཚོགས་འདུ་ཐེངས་བཅུ་བཞི་པ་ཡུས་ཧྲུའུ་རུ་འཚོགས། 

ཐེངས་འདུའི་བགྲོ་གླེང་ཚོགས་འདུའི་སྟེང་།“མི་རིགས་སྐད་ཡིག་ལོ་ཙཱའི་ཞབས་ཕྱི་ནུས་པ་ཇེ་ཆེར་བཏང་སྟེ་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་སྐྲུན་ལ་རམ་འདེགས་བྱེད”ཞེས་པ་བརྗོད་དོན་གཙོ་བོ་བྱས་ཏེ། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་སྤེལ་བཅའ་ཁྲིམས》སློབ་སྦྱོང་དྲིལ་སྒྲོག་དང་ལག་བསྟར་མཐར་ཕྱིན་བྱས་ཤིང་། མི་རིགས་སོ་སོ་རྒྱ་ཁྱབ་ཏུ་འགྲོ་འོང་དང་། ཕྱོགས་ཡོངས་ནས་སྤེལ་རེས། གཏིང་ཟབ་སྒོས་མཉམ་འདྲེས་བཅས་ཡོང་བར་སྐུལ་སྤེལ་བྱས་ཏེ། ཞིང་ཆེན་ཡོངས་ཀྱི་མི་རིགས་སྐད་ཡིག་ལོ་ཙཱའི་བྱ་གཞག་སྤུས་ཚད་མཐོ་བའི་ངང་འཕེལ་རྒྱས་སུ་འགྲོ་བར་སྐུལ་འདེད་བཏང་།

ཚོགས་འདུའི་ཐོག་ཏུ། མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་གཞོན་པ་འཇིགས་བྱེད་སྐྱབས་ཀྱིས་ཚོགས་འདུའི་བརྗོད་དོན་གཙོ་བོའི་སྐོར་དང་འབྲེལ་ནས་འཆད་ཁྲིད་གནང་བ་དང་། དཔྱད་རྩོམ་བདམས་ཐོན་བྱུང་མཁན་གྱི་ལོ་ཙཱ་བ11གིས་རང་རང་གི་དཔྱད་རྩོམ་སྒྲོག་འདོན་བྱས། ཚོགས་ཞུགས་འཐུས་མི་རྣམ་པས་བགྲོ་གླེང་གཏིང་ཟབ་པ་བྱས་ཏེ། ཕྱོགས་མི་འདྲ་བ་ནས་མི་རིགས་སྐད་ཡིག་ལོ་ཙཱས་མི་རིགས་སོ་སོའི་འགྲོ་འོང་དང་མཉམ་འདྲེས། བརྗེ་རེས་བཅས་ལ་སྐུལ་འདེད་དང་། མི་རིགས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཞབས་འདེགས་ཞུ་བའི་ནུས་པ་སྔོག་འདོན་བྱས་པ་དང་། ལོ་ཙཱའི་ལག་ལེན་གྱི་ཉམས་མྱོང་དང་གཞུང་ལུགས་ཞིབ་འཇུག་གི་གྲུབ་འབྲས་སོགས་ཀྱི་སྐོར་ནས་བསམ་ཚུལ་བརྗེ་རེས་བྱས། ཚོགས་འདུ་ཚོགས་ཡུན་དུ། ཚོགས་ཞུགས་མི་སྣ་མཉམ་དུ་ཡུས་ཧྲུའུ་ཡོམ་འགོག་རྒུད་སྐྱོབ་དྲན་གསོ་ཁང་དང་། ལེབ་ཁོག་ལོ་རྒྱུས་རིག་གནས་གནའ་ཤུལ་སོགས་སུ་ལྟ་སྐོར་དུ་ཕྱིན་ཏེ། རླབས་ཆེ་བའི་ཡོམ་འགོག་རྒུད་སྐྱོབ་སྙིང་སྟོབས་དང་མི་རིགས་སོ་སོའི་འགྲོ་འོང་མཉམ་འདྲེས་བརྗེ་རེས་ཀྱི་འདས་མ་ད་གསུམ་ལ་རྒྱུས་ལོན་བྱས།