གཅིག ཟླ་མཚན་ནི་བུད་མེད་རྣམས་ལང་ཚོ་དར་ལ་བབས་པའི་དུས་ནས་འགོ་ཚུགས་ཏེ་འབབ་པ་དང་། སྤྱིར་བཏང་ཉིན་ཉི་ཤུ་རྩ་བརྒྱད་ཀྱི་མཚམས་སུ་ཐེངས་རེ་འབབ་པ་ཡིན་མོད། ལུས་ཁམས་ཀྱི་ཁྱད་ཆོས་མི་གཅིག་པའི་དབང་གིས་བུད་མེད་ལ་ལར་ཉིན་ཉི་ཤུའི་མཚམས་སུ་འབབ་པ་དང་ལ་ལར་ཉིན་བཞི་བཅུ་ཞེ་ལྔ་ཙམ་ནས་ཐེངས་རེ་འབབ་མཁན་ཡང་ཡོད། ཟླ་མཚན་འབབ་པའི་དུས་ཡུན་སྤྱིར་བཏང་ཉིན་གསུམ་ནས་ལྔ་བར་ཡིན་པ་དང་ནད་མེད་པའི་བུད་མེད་ཀྱི་ཟླ་མཚན་དམར་ལ་དྭངས་མོ་ཡིན།
གཉིས། ཟླ་མཚན་མ་བབས་པའི་སྔོན་གྱི་ཉིན་ཤས་ནང་ལུས་ཁམས་མི་བདེ་བའི་ཚོར་སྣང་སྣ་ཚོགས་ཡོད་དེ། དཔེར་ན་ནུ་མ་གཟེར་བ་དང་རྒྱུ་ཞབས་སྤོས་པ། བཤང་བ་འགག་པ། ལུས་ངལ་བ། ཤ་གནད་གཟེར་བ། མཚན་ལམ་གྱི་བརླན་གཤེར་ཇེ་མང་དུ་འགྲོ་བ་སོགས་ནད་རྟགས་མང་ཉུང་སྣ་ཚོགས་འབྱུང་སྲིད།
གསུམ། ཟླ་མཚན་འབབ་པའི་སྐབས་སུ་འཕྲོད་བསྟེན་ལ་དོ་སྣང་གང་ལེགས་བྱས་ཏེ་ནང་ལྭ་གཙང་མར་བཀྲུས་ནས་ཡང་ཡང་བརྗེ་བ་དང་། མཚན་མ་ཆུ་དྲོད་འཇམ་གྱིས་བཀྲུ་བ། ལུས་ཁམས་ཀྱི་དྲོད་སྲུང་ལ་དོ་སྣང་གང་ལེགས་བཅས་བྱེད་དགོས།
བཞི། ཟླ་མཚན་འབབ་སྐབས་ཚལ་སྣག་མང་ཙམ་ཟོས་ན་ལྕགས་རྒྱུ་ཁ་གསབ་དང་ཁྲག་གསོ་རྒྱུར་ཕན་པ་ཡོད།
ལྔ། ཟླ་མཚན་ནི་བུད་མེད་རྣམས་ཀྱི་བདེ་ཐང་གི་མཚོན་རྟགས་ལྟ་བུ་ཞིག་ཡིན་པས། ཟླ་མཚན་སྔ་སྣུར་གྱིས་ཆད་པ་ནི་ལོ་ན་རྒས་པའི་སྔོན་རྟགས་ཤིག་ཡིན། གསོ་རིག་མཁས་པས་ཞིབ་འཇུག་བྱས་པ་ལྟར་ན། བུད་མེད་ཀྱི་མི་ཚེ་ཧྲིལ་བོར་ཁམས་དམར་ཧའོ་ཧྲེང་བཞི་བརྒྱ་ནས་ལྔ་བརྒྱ་ལྷག་ཕྱིར་འབུད་ཀྱིན་ཡོད་ལ། ཟླ་མཚན་ཐོག་མར་བབས་པ་ནས་ཟླ་མཚན་ཡོངས་སུ་ཆད་པའི་དུས་བར་ལོ་བཞི་བཅུ་ཙམ་འགོར་གྱི་ཡོད་པས། བདེ་ཐང་གི་བུད་མེད་ཅིག་ལ་མཚོན་ན་ཟླ་མཚན་ཆད་པའི་དུས་ནི་ལོ་ང་ལྔའི་གཡས་གཡོན་ཡིན་དགོས་པ་རེད།
འོན་ཀྱང་། ལོ་སོ་ལྔ་ཙམ་ནས་བསམ་སེའུའི་ནུས་པ་རིམ་བཞིན་ཇེ་ཞན་དུ་འགྲོ་བ་དང་མཉམ་དུ་བུད་མེད་ཀྱི་སྐུལ་རྒྱུ་རིམ་བཞིན་ཇེ་ཉུང་དུ་འགྲོ་བ་དང་ཟླ་མཚན་ཡང་རང་བཞིན་དུ་དུས་ཐོག་ལ་སླེབས་མི་ཐུབ་པ་ཡིན། བུད་མེད་ལ་ལར་བསམ་སེའུའི་འཚོ་བཅུད་ཚུལ་བཞིན་མ་འདང་བ་ལས་ལོ་བཞི་བཅུའི་གོང་དུ་ཟླ་མཚན་ཆད་པ་དང་། པགས་མདོག་སེར་སྐྱ་དང་པགས་པ་རྩུབ་མོར་འགྱུར་བ། གཉེར་མ་ཇེ་མང་དུ་འགྲོ་བ། གཉིད་ཡེར་བ། དྲན་ཤེས་ཇེ་ཞན་དུ་འགྲོ་བ་སོགས་ཀྱི་སྣང་ཚུལ་འབྱུང་ངེས།
ཟླ་མཚན་ཆད་སྔ་ན་ཁམས་ཟད་པའི་དུས་སྐབས་འབྱུང་སྔ་བ་དང་། ཤུགས་མེད་པ་དང་སེམས་ལ་སུན་སྣང་སྣ་ཚོགས་སྐྱེ་བ། གཉིད་མི་ཁུག་པ་སོགས་ལང་ཚོ་རྒས་པའི་རྟགས་ཀྱང་འབྱུང་ངེས། དེར་མ་ཟད། བུད་མེད་ཀྱི་འབྲས་སྐྲན་ནད་མང་ཆེ་བ་ཟླ་མཚན་ཆད་པའི་རྗེས་ཀྱི་བུད་མེད་ལ་འབྱུང་བ་མང་།
དྲུག ལང་ཚོ་དར་བའི་སྐབས་སུ་ཟླ་མཚན་ནི་བུད་མེད་རྣམས་ཀྱི་ལུས་ཁམས་ཀྱི་ཆོད་ཉིད་ལ་འགྱུར་ལྡོག་ཅི་བྱུང་གི་མངོན་རྟགས་ཤིག་ཡིན་ཏེ། དཔེར་ན་མངལ་ཆགས་ན་ཟླ་མཚན་མི་འབབ་པ་དང་། དེ་མིན་བུ་སྣོད་ཀྱི་འབྲས་སྐྲན་རིགས་མང་ཆེ་བར་ཟླ་མཚན་མི་འབབ་པའམ་ཟླ་མཚན་མི་ཆད་པ་སོགས་རྒྱུན་ལྡན་མིན་པའི་སྣང་ཚུལ་འབྱུང་སྲིད་པས། བུད་མེད་རྣམས་ཀྱིས་ཟླ་མཚན་གྱི་ཆོས་ཉིད་ལ་དོ་སྣང་བཟང་བོ་བྱས་ནས་ནད་རིགས་སྔ་མོ་ནས་བརྟག་དཔྱད་དང་ཤེས་རྟོགས་བྱེད་དགོས།
གོང་གི་ཤེས་བྱ་འདི《བདེ་སྲུང་རྒྱུན་ཤེས》ལས་བདམས་པ་ཡིན།
