དེ་སྔ་ཧྥུའུ་ཅན་གྱི་སྐྱེས་པ་ཞིག་རྐང་འཁོར་བཞོན་ནས་འགྲོ་སྐབས་གློ་བུར་དུ་མིག་ནང་དུ་འཕུར་འབུ་ཆུང་ཆུང་ཞིག་འཛུལ་ཞིང་། དེ་མ་ཐག་ལག་པས་མིག་འཕུར་མཉེད་ཐེངས་མང་བྱས་རྗེས་མིག་མི་བདེ་བའི་ཚོར་སྣང་རིན་བཞིན་ཡལ་ནས་སྣང་བ་མེད་པར་གྱུར། འོན་ཀྱང་དེའི་རྗེས་ཀྱི་ཉིན་ཤས་ནང་མི་དེའི་མིག་དམར་པོ་ཆགས་པ་མ་ཟད། མིག་ལ་ན་ཟུག་ལངས་བ་དང་མིག་ཆུ་བཞུར་བ་སོགས་ཀྱི་ནད་རྟགས་ཐོན། སྨན་ཁང་དུ་
སོང་ནས་བརྟག་དཔྱད་བྱེད་དུས་སྨར་སྲིན་རང་བཞིན་གྱི་མིག་སྐྱི་རལ་ཟགས་ཀྱི་ནད་གཞི་ཡིན་པ་གཏན་འཁེལ་བྱས། རྐྱེན་ངན་བར་ཆད་དེ་ནི་འཕུར་འབུ་ཆུང་ཆུང་ཞིག་མིག་ནང་དུ་འཛུལ་བ་ལག་པས་འཕུར་
མཉེད་བྱས་པའི་མཇུག་འབྲས་ལས་བྱུང་བ་ཞིག་རེད།
དང་པོ། འཕུར་འབུ་ཆུང་ཆུང་ཞིག་གིས་ཚབས་ཆེའི་མིག་ནད་སློང་རྐྱེན།
འཕུར་འབུའི་ལུས་པོའི་ཐོག་འབུ་ཕྲ་དང་སྨར་སྲིན་མང་པོ་ཡོད། མིག་ནང་དུ་འཛུལ་བའི་འཕུར་འབུ་དེ་ལག་པས་འཕུར་མཉེད་གཏོང་སྐབས། འབུ་དེའི་ལུས་པོའི་ནང་གི་དུག་ཁུའམ་ཡང་ན་དུམ་བུར་གྱུར་བའི་འབུ་དེས་མིག་སྐྱིའི་ངོས་ལ་ཐད་ཀར་རྨས་སྐྱོན་བཟོས་ཏེ་སྐྱེ་དངོས་ཕྲ་རབ་སིམ་འཛུལ་བྱེད་པ་ཡིན། གལ་ཏེ་མིག་ལ་ན་ཟུག་དྲག་པོ་ལངས་བ་དང་མིག་དམར་པོར་གྱུར་བ། མིག་ཆུ་ཤོར་བ། མིག་སྐྱག་མང་པོ་ཐོན་པ། མིག་རབ་རིབ་ཏུ་གྱུར་ནས་མཐོང་ཤེད་ཉམས་པ་སོགས་ཀྱི་གནས་ཚུལ་བྱུང་ན།དུས་ཐོག་ཏུ་སྨན་ཁང་དུ་བརྟག་དཔྱད་བྱེད་པར་འགྲོ་དགོས།
གཉིས་པ། འཕུར་འབུ་མིག་ནང་དུ་འཛུལ་མ་ཐག་གཅོད་བྱེད་ཐབས།
འཕུར་འབུ་ཆུང་ཆུང་མིག་ནང་དུ་འཛུལ་ན་དངངས་འཚབ་སྐྱེ་སྟེ། ལག་པས་མིག་ལ་འཕུར་མཉེད་མི་གཏོང་བར་ཐག་གཅོད་བྱེད་པའི་གོ་རིམ་འདི་དག་སེམས་ལ་བརྟན་པོར་ངེས་དགོས།
གཅིག མིག་དལ་མོར་རྡེབ་དགོས།
གལ་ཏེ་འཕུར་འབུ་མིག་ནང་དུ་འཛུལ་ན་སེམས་མི་འཚབ་པར་དལ་གྱིས་མིག་ཐེངས་འགར་རྡེབ་ན་མིག་ཆུ་བཞུར་བར་སྐུལ་འདེད་ཐེབས་ནས་འཕུར་འབུ་མིག་ཆུ་དང་མཉམ་དུ་ཕྱིར་ཡོང་སྲིད།
གཉིས། མྱུར་ཏུ་མིག་བཀྲུ་དགོས།
གལ་ཏེ་མིག་རྡེབ་ཀྱང་སྔར་བཞིན་མིག་མི་བདེ་བའི་སྣང་ཚུལ་བྱུང་ན་ཆུ་གཙང་མའམ་ཚྭ་ཆུས་མིག་བཀྲུ་དགོས་པ་དང་། མིག་བཀྲུ་སྐབས་མིག་རིལ་དལ་བུར་སྐོར་སྐྱོད་བྱས་ཏེ་ཆུས་མིག་སྐྱིའི་ཕྱི་ངོས་ཀྱི་དངོས་པོ་གཞན་དག་གཙང་སེལ་ཐུབ་པ་བྱེད་དགོས།
གསུམ། སྔ་མོ་ནས་སྨན་བཅོས་བྱེད་དགོས།
གལ་ཏེ་མིག་བཀྲུས་པའི་རྗེས་སུ་ད་དུང་ཡང་མིག་མི་བདེ་བ་དང་། ཐ་ན་མིག་ལ་ན་ཚ་ལངས་ཤིང་མིག་གིས་འོད་ལ་བལྟ་མི་ཐུབ་པ་སོགས་ཀྱི་གནས་ཚུལ་ཡོད་ན་མྱུར་ཏུ་མིག་ནད་ཚན་ཁག་ཏུ་སོང་ནས་ཆེད་ལས་སྨན་པ་བསྟེན་ཏེ་སྨན་བཅོས་བྱེད་དགོས་པ་ལས། རང་དགར་སྨན་གཏོང་མི་རུང་།
ཀུན་གྱིས་དོ་སྣང་བྱེད་དགོས་པ་ཞིག་ནི་ནམ་རྒྱུན་གྱི་འཚོ་བའི་ཁྲོད་འཕུར་འབུ་མིག་ནང་འཛུལ་བའི་གནས་ཚུལ་ལས་གཞན། ད་དུང་དངོས་པོ་གཞན་དག་གང་རུང་མིག་ནང་དུ་སོང་ན་དུས་ཐོག་ཏུ་ལག་པས་མིག་མི་འཕུར་བར། ཞིབ་ཕྲའི་གནས་ཚུལ་ལ་གཞིགས་ནས་དེ་དང་མཚམས་པའི་བྱེད་ཐབས་སྤྱད་ལ་ཤིན་ཏུ་ལེགས།
རྩོམ་སྒྲིག་པ། གཡང་མོ་སྒྲོལ་མ།
