རྒྱང་སྐྱོད་ཀྱི་སྐབས་སུ། དམར་དམག་གྲངས་ཉུང་མི་རིགས་འཚོ་སྡོད་བྱེད་པའི་ཡུལ་གྲུ་བརྒྱུད་ཅིང་། ང་ཚོའི་གྲངས་ཉུང་མི་རིགས་དང་གཅེན་གཅུང་མིང་སྲིང་ལྟ་བུའི་མི་སེམས་འགུལ་བའི་གཏམ་རྒྱུད་ཡག་པོ་མང་པོ་བཞག་ཡོད་།
2021ལོའི་ཟླ6པའི་ཚེས8ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་མཚོ་སྔོན་ཞིང་ཆེན་རྐང་ཚ་རྫོང་འོམ་ཆུ་གྲོང་རྡལ་དཀོན་ལོ་ཚང་གོང་མ་སྡེ་བར་ཕེབས་དུས། རྒྱང་སྐྱོད་ལམ་བར་གྱི་དམར་དམག་དང་གྲངས་ཉུང་མི་རིགས་བར་གྱི་འབྲེལ་བའི་སྐོར་ནས་གསུང་བཤད་གནང་ཡོད།
རྒྱང་སྐྱོད་ཀྱི་ལམ་དུ། དམར་དམག་དེ་སྔར་མིའོ་རིགས་དང་ཡའོ་རིགས། ཏུང་རིགས། ཀྲོང་རིགས། ཐུའུ་ཅ་རིགས་སོགས་གྲངས་ཉུང་མི་རིགས་བཅུ་ལྷག་གི་འདུས་སྡོད་ཁུལ་དང་མཉམ་འདྲེས་ཁུལ་བརྒྱུད་ཅིང་། དེས་དམར་དམག་རྒྱང་སྐྱོད་ས་ཁུལ་གྱི50%ཡན་ཟིན་ཡོད་ཅིང་། ལམ་བར་དུ་གྲངས་ཉུང་མི་རིགས་ཁག་དང་མཐུན་སྒྲིལ་མཛའ་མཐུན་དང་། ཕན་ཚུན་རོགས་རམ་བྱེད་པའི་གཏམ་རྒྱུད་མང་པོ་བཞག་ཡོད།
མའོ་ཙེ་ཏུང་དང་ཧུའེ་རིགས་ཀྱི་ཨ་ཧོང་མ་ཏི་ཧའེ་ཡི“ཁྱིམ་དུ་མཚན་གཞུང་ལ་སྙིང་གཏམ”གླེང་ནས་ཏང་གི་མི་རིགས་སྲིད་ཇུས་དང་འཇར་འགོག་གི་དགོངས་དོན་གསལ་འགྲེལ་བྱས་ཤིང་། ལིའུ་པོ་ཁྲུན་དང་དབྱི་རིགས་གོ་ཅི་ཁྱིམ་རྒྱུད་ཀྱི་འགོ་པ་ཞའོ་ཡེ་ཏན་གཉིས་ཀྱིས་ཁྲག་བཏུང་མནའ་བཅད་སྤུན་ཟླ་བསྒྲིགས་ཏེ། “དབྱི་ཧའེ་མནའ་འབྲེལ”གྱི་གཏམ་རྒྱུད་ཡག་པོ་བཞག་ཡོད། མགོ་ལོག་པད་མའི་བོད་རིགས་མང་ཚོགས་ཀྱིས་དམར་དམག་དཔུང་ཁག་ལ་དངོས་ཟོག་གྲབས་གསོག་དང་རི་ལམ་དུ་སྣེ་ཁྲིད་བྱས་ནས། “དམར་དམག་ལུང་བའི”གཏམ་རྒྱུད་བཞག་སྟེ་དམག་དམངས་ཀྱི་བརྩེ་དུང་ཟབ་མོ་མཚོན་པར་བྱས་ཡོད།
རྒྱང་སྐྱོད་ཀྱི་སྐབས་སུ། དམར་དམག་གིས་ཏང་གི་མི་རིགས་སྲིད་ཇུས་ལག་བསྟར་ནན་མོ་བྱས་ཏེ། གྲངས་ཉུང་མི་རིགས་ཀྱི་ཡུལ་སྲོལ་གོམས་གཤིས་དང་ཆོས་ལུགས་དད་མོས་ལ་བརྩི་འཇོག་དང་། ལྷག་བསམ་རྣམ་དག་གིས་མི་རིགས་སོ་སོའི་མང་ཚོགས་ལ་ཞབས་འདེགས་ཞུས་ཏེ། རྒྱང་སྐྱོད་ལ་རྒྱལ་ཁ་ཐོབ་པར་རྨང་གཞི་བཏིང་བ་རེད། དེ་དང་ཆབས་ཅིག་རྒྱང་སྐྱོད་ཀྱིས་ཀྲུང་གོའི་གུང་ཁྲན་ཏང་གིས་མི་རིགས་གནད་དོན་དང་གཞི་རྩའི་རྒྱལ་ཁབ་གནས་ཚུལ་ལ་ངོས་འཛིན་ཇེ་ཟབ་ཏུ་ཕྱིན་ནས། མི་རིགས་མཐུན་སྒྲིལ་ལ་སྐུལ་སྤེལ་གཏོང་བའི་སྲིད་ཇུས་ཀྱི་བྱེད་ཕྱོགས་གཏན་འབེབས་དང་ལག་བསྟར་བྱེད་པར་རིགས་པའི་གཞུང་ལུགས་དང་ལག་ལེན་གྱི་རྨང་གཞི་བཏིང་ཡོད།
འཐབ་ལམ་གསར་པ་ནི་རྒྱང་སྐྱོད་ཀྱི་ལམ་བུ་གསར་པ་ཞིག་རེད། “མང་ཚོགས་ལ་སྔར་ལས་ལེགས་པའི་འཚོ་བ་སྐྱེལ་དུ་འཇུག་རྒྱུ་དེ་ཐོག་མཐའ་བར་གསུམ་དུ་ཀྲུང་གོའི་གུང་ཁྲན་ཏང་མིས་འཕེལ་རྒྱས་ཀྱི་གཞི་འཛིན་བྱེད་ཀྱི་ཚད་གཞི་ཡིན། ཀྲུང་གུང་ཚོགས་ཆེན་བཅོ་བརྒྱད་པ་ཚོགས་པའི་ཚུན་དུ། གངས་ལྗོངས་མཐོ་སྒང་ནས་ལྕགས་རི་རིང་པོའི་ཕྱི་རོལ་རྩྭ་ཐང་བར་དང་། ཐེན་ཧྲན་ལྷོ་བྱང་ནས་ལྷོ་ནུབ་མཐའ་མཚམས་བར་མི་རིགས་སོ་སོའི་མང་ཚོགས་ཀྱི་འཚོ་བའི་ཆུ་ཚད་མཐོ་རུ་ཕྱིན་ཡོད་ལ། འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་ཟབ་ཚད་དང་ཁྱབ་ཚད་སྔར་ལས་རྒྱ་ཆེ་བ་རེད། མི་རབས་གསར་པའི་གྲངས་ཉུང་མི་རིགས་ཀྱི་ན་གཞོན་གྱིས་རྒྱང་སྐྱོད་ཀྱི་སྙིང་སྟོབས་རྒྱུན་འཛིན་བྱས་ཏེ། གྲོང་གསེབ་དར་སྤེལ་དང་། ཚན་རྩལ་གསར་གཏོད། སྤྱི་ཚོགས་ཞབས་ཞུ། རྒྱལ་སྲུང་མཐའ་སྲུང་སོགས་གཞི་རིམ་གྱི་ཡུལ་དངོས་དང་པོར་མུ་མཐུད་དུ་ལེའུ་གསར་པ་བྲིས་ཏེ། མི་རིགས་མཐུན་སྒྲིལ་ཡར་ཐོན་ལ་སྐུལ་འདེད་གཏོང་བར་ལང་ཚོའི་སྟོབས་ཤུགས་ལེགས་སྐྱེས་སུ་ཕུལ་ཡོད།
ད་ལྟ། མི་རིགས་ས་ཁུལ་དུ་གྲོང་གསེབ་དར་སྤེལ་རྒྱུན་མཐུད་ངང་སྐུལ་འདེད་བཏང་སྟེ། ཁྱད་ལྡན་ཐོན་ལས་དང་དམངས་འཚོའི་ཞན་ཆ་ཁ་གསབ་བྱ་རྒྱུར་དམིགས་ནས། མི་རིགས་ཁག་ཐུན་མོང་ཐོག་ཕྱུག་འགྱུར་ཡོང་བའི་ཕྱོགས་སུ་གོམ་སྟབས་བརྟན་པོས་མདུན་དུ་སྐྱོད་བཞིན་ཡོད། གྲོང་ཚོ་མང་པོར་ཉིན་རེ་བཞིན་འགྱུར་ལྡོག་གྱི་རྣམ་པ་གསར་པ་ཐོན་ཏེ། མི་རིགས་ཁག་ཐུན་མོང་ཐོག་ཕྱུག་པོར་འགྱུར་བ་དང་ཀྲུང་ཧྭ་མི་རིགས་ཀྱི་གཅིག་མཐུན་ཚོགས་པའི་འདུ་ཤེས་བརྟན་པོ་ཆགས་པར་དུས་རབས་ཀྱི་ཞབས་རྗེས་བཀོད་ཡོད།
