དགེ་རྒན་ཆེན་མོ་བདེ་མཆོག་ལགས་ཀྱིས་འདི་སྐད་དུ།
2019.05.16 ཁུངས། ཀློག་གྲངས། 4322


ཟུར་བཀོད། དཔེ་འཕྲིན་གསར་བ།

སྨིན་དྲུག་བོད་ཀྱི་ན་གཞོན་སྙན་ངག་དཔེ་ཚོགས་འགྲེམས་སྤེལ་བྱས།

སྤྱི་ཟླ་ལྔ་བའི་ཟླ་མགོར། སྨིན་དྲུག་བོད་ཀྱི་ན་གཞོན་སྙན་ངག་དཔེ་ཚོགས་ཀྱི་འགྲེམས་སྤེལ་བྱ་འགུལ་གནའ་མཁར་ཟི་ལིང་གི་ཚོང་དཔོན་ནོར་བཟང་ཕོ་བྲང་ནས་བསྡུས་ཤིང་། མཛད་སྒོའི་སྟེང་དུ《སྦྲང་ཆར》རྩོམ་སྒྲིག་ཁང་གི་རྩོམ་སྒྲིག་པ་ཡོངས་དང་མཚོ་སྔོན་རྩོམ་པ་པོའི་མཐུན་ཚོགས་ཀྱི་ཀྲུའུ་ཞི་གཞོན་པ་ལུང་རིན་ཆེན། ཀྲུའུ་ཞི་གཞོན་པ་ཨ་སྨྱོན་བཀྲ་ཤིས་དོན་གྲུབ། དྲུང་ཡིག་ཆེན་མོ་འགྱུར་མེད་རྡོ་རྗེ། རྩོམ་རིག་དཔྱད་བརྗོད་པ་ཚེ་གྲུབ། སྙན་ངག་པ་རྨོག་རུ་དོན་གྲུབ་ཚེ་རིང་བཅས་གདན་གཅིག་ཏུ་འཛོམས་ནས་བོད་ཀྱི་དེང་རྩོམ་གྱི་ལྡུམ་རར་གསར་དུ་བཞད་པའི་སྨིན་དྲུག་དཔེ་ཚོགས་སྐོར་ནས་བགྲོ་གླེང་དང་གདེང་འཇོག་གལ་ཆེན་གནང་།

《སྨིན་དྲུག·བོད་ཀྱི་ན་གཞོན་སྙན་ངག་དཔེ་ཚོགས》ཞེས་པ་ནི《སྦྲང་ཆར》རྩོམ་སྒྲིག་ཁང་གིས་ཇུས་འགོད་བྱས་ཤིང་།  དུས་ཡུན་ལོ་ངོ་གཅིག་ཙམ་གྱི་རིང་གི་པར་ཞུ་རྩོམ་སྒྲིག་གི་ལས་རིམ་བརྒྱུད་ནས་ད་ལྟ་དངོས་སུ་པར་སྐྲུན་འགྲེམས་སྤེལ་བྱས་ཡོད།  དཔེ་ཚོགས་འདིར་ཁ་བ་དཀར་པོའི《ཨེ་ཤེ་ཡའི་ཆུ》དང་ལྡོང་བུའི《རྣམ་རྟོག་གི་མཁར་རྫོང》  སྒྲེན་པོའི《ཚིག་གི་ལྡ་ལྡི》   མར་ཁུ་རྒྱལ་མཚན་གྱི《ཁྱོད་མ་སད་པའི་སྔ་རོལ་ཏུ》  ནག་པོའི《ལྦུ་བ་སོབ་སོབ》    རུས་པའི《རྡོ་ལས་བཞད་པའི་ལྷ་ས》བཅས་སྙན་དེབ་དྲུག་བདམས་ཡོད་ལ། འདི་ནི《སྦྲང་ཆར》རྩོམ་རིག་དུས་དེབ་ཀྱིས་པར་བསྐྲུན་བྱས་པའི་སྙན་དེབ་དཔེ་ཚོགས་ཤིག་ཡིན།


ཆོས་ཚའི་ཚེ་རིང་བཀྲ་ཤིས།

པིར་མིང་ལ་རུས་པ། མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་མི། 1975ལོར་མཚོ་ལྷོ་མང་རྫོང་བྱ་མདོ་ཆོས་ཚ་སྡེ་བ་རུ་སྐྱེས། འཐུས་ཚབ་ཀྱི་སྙན་ངག་བརྩམས་ཆོས་ལ《མཐའ་མཇུག་གི་རྩྭ་ཐང་དང་དེའི་རྫི་བོ》 《བུ་ལ་གནང་བའི་སྙན་ངག》《རྡོ་ལས་བཞད་པའི་ལྷ་ས》 《དབྱངས》  སོགས་ལས་གཞན 《ཧི་མ་ལ་ཡའི་སྲས་མོ》  བརྙན་འཕྲིན་ཟློས་གར《སྐྱིད་སྡུག་གི་འཚོ་བ》ཡི་བརྗོད་དོན་གླུ་དབྱངས། 《གསེར་རྟ་བུ་མོ》སོགས་གཞས་ཚིག་སྐོར་ཅིག་ཀྱང་གསར་རྩོམ་བྱས་ཏེ་གསན་མཁན་རྣམས་ལ་བག་ཆགས་ཅུང་ཟབ་བཞག་ཡོད།


མར་ཁུ་རྒྱལ་མཚན།

༡༩༧༦ལོར་མདོ་སྨད་གཅན་ཚ་རུ་སྐྱེས། ༡༩༩༦ལོར་རྨ་ལྷོ་མི་རིགས་དགེ་ཐོན་སློབ་གྲྭ་ནས་སློབ་མཐར་ཕྱིན། ལོ་ངོ་བཅོ་བརྒྱད་ཀྱི་རིང་ལ་དགེ་རྒན་གྱི་ལས་གནས་གཉེར་ཞིང་། ༢༠༡༥ལོར་བྱ་བའི་དབང་གིས་ལས་འཁྱུར་ངལ་གསོ་བྱས་རྗེས་ཕ་ཡུལ་ན་དཔེ་ཀློག་དང་རྩོམ་འབྲིའི་ལས་ལ་འབད་བཞིན་ཡོད། ད་ལྟའི་བར་དུ་སྙན་ངག་གཙོ་བྱས་པའི་བརྩམས་ཆོས་གང་མང་ཞིག་ཞིང་ཆེན་ཕྱི་ནང་གི་དུས་དེབ་དང་ཚགས་ཤོག་སྣ་ཚོགས་སྟེང་བཀོད་མྱོང་། བོད་ཀྱི་དེང་རབས་སྙན་ངག་གི་ཚོགས་པ་མི་རབས་གསུམ་པའི་ཚོགས་མི་ཡིན།


ནག་པོ།

དེང་རབས་བོད་ཀྱི་སྙན་ངག་པ་དང་གཞས་ཚིག་རྩོམ་མཁན། ད་ལྟའི་བར་དུ་སྙན་ངག་གཙོས་པའི་བརྩམས་ཆོས་མང་པོ་བོད་རྒྱ་ཡིག་རིགས་གཉི་གའི་དུས་དེབ་ཆེ་གྲས་སོགས་སུ་སྤེལ་ཡོད། སྙན་དེབ་ལ《བོད་ཀྱི་རབ་བྱེད》(རྒྱ་ཡིག)《ལྦུ་བ་སོབ་སོབ》(བོད་ཡིག)《ཧི་མ་ལ་ཡའི་སྙན་ཚིག》(རྒྱ་ཡིག)སོགས་ཡོད། བརྩམས་ཆོས་འགའ་ཞིག་དབྱིན་ཇི་དང་ཉི་ཧོང་། སོག་པོ ཡུ་གུར་སོགས་ཀྱི་ཡི་གེར་བསྒྱུར་ཏེ་ཚགས་དེབ་སོགས་སུ་བཀོད། བོད་ཡིག་གིས་བྲིས་པའི་སྙན་ངག་རིང་མོ《ལྦུ་བ་སོབ་སོབ》ལ་གངས་རྒྱན་མེ་ཏོག་རྩོམ་རིག་བྱ་དགའ་ཐོབ།


ལྡོང་བུ།

མིང་མེད་ཀྱང་འབོད།   མིང་དངོས་ལ་ལྕགས་རྡོར་རྒྱལ་ཞུ། ཀྲུང་དབྱང་མི་རིགས་སློབ་ཆེན་གྱི་འབུམ་རམས་པ། 1985ལོར་མདོ་སྨད་འབའ་རྫོང་དུ་སྐྱེས། 2007ལོར《སྨྱོན་པའི་དུས་ཚིགས》དང《གཤིན་པོའི་རོལ་དབྱངས》《ཟླ་བའི་རྨི་ལམ》  《གཤོག་པ་ནག་པོ》བཅས་སྙན་ངག་དང་འགྱུར་དེབ་བཞི་བཀྲམས།  དབྱིན་ཡིག་གི་སྙན་ངག་དང་བརྩམས་སྒྲུང་ཁག་ཅིག་བོད་ཡིག་ཏུ་བསྒྱུར། ད་ལྟ《མི་རིགས་ཀྱི་རྩོམ་རིག》དུས་དེབ་ཁང་དུ་རྩོམ་སྒྲིག་པའི་ལས་ཀ་གཉེར་མུས་ཡིན།


བནྡེ་སྐྱབས།

པིར་མིང་ལ་སྒྲེན་པོར་འབོད། ལོ་རབས་བརྒྱད་ཅུའི་དུས་དཀྱིལ་ལ་རེབ་གོང་བཙན་མོ་སྟག་ཡན་ཞེས་པའི་རོང་མ་འབྲོག་གི་རུ་སྡེ་ཆུང་ངུ་ཞིག་ནས་སྐྱེས། ཞིང་ཆེན་ཕྱི་ནང་གི་དུས་དེབ་སྟེང་སྙན་ངག་མི་ཉུང་བ་ཞིག་བཀོད།


ཁ་བ་དཀར་པོ།

དངོས་མིང་དུ་སྤེན་པ་བཀྲ་ཤིས་སུ་འབོད། ལྷ་སར་སྐྱེས། 2003ལོ་ནས་གསར་རྩོམ་ལ་ཞུགས་ཤིང་། བོད་ཁུལ་གྱི་དུས་དེབ་སྣ་ཚོགས་སུ་སྙན་ངག་གཙོ་བོར་གྱུར་བའི་རྩོམ་ལུས་འདྲ་མིན་སྤེལ། སྔ་རྗེས་སུ་གངས་རྒྱན་མེ་ཏོག་དུས་དེབ་ཀྱི་སྙན་ངག་བྱ་དགའ་སོགས་སྙན་ངག་འགའ་ལ་བྱ་དགའ་ཐོབ། ད་ལྟ་བདེ་ཆེན་བོད་བརྒྱུད་ནང་བསྟན་སློབ་གླིང་དུ་རིག་གནས་དགེ་རྒན་གྱི་བྱ་བ་གཉེར་མུས་སུ་གནས།