ཟླ་བཅུ་གཉིས་པའི་ཚེས་ཉེར་བདུན་ཉིན། ཞིང་ཆེན་སྲིད་གྲོས་ཀྱི་ཏང་ཙུའུ་ཧྲུའུ་ཅི། ཀྲུའུ་ཞི་རྡོ་རྗེ་རབ་བརྟན་གྱིས་འགོ་འཛིན་བྱས་ཏེ་ཞིང་ཆེན་སྲིད་གྲོས་ཏང་ཙུའུ་རྒྱ་བསྐྱེད་གྲོས་ཚོགས་བསྡུས་ཏེ། ཞིང་ཆེན་ཏང་ཨུའི་སྐབས་བཅུ་གསུམ་པའི་ཚང་འཛོམས་གྲོས་ཚོགས་ཐེངས་བཅུ་གཅིག་པའི་དགོངས་དོན་ལ་ཆེད་དོན་སློབ་སྦྱོང་དང་བརྒྱུད་བསྒྲགས་བྱས་པ་དང་། ལག་བསྟར་དོན་འཁྱོལ་བྱེད་པའི་བསམ་འཆར་ལ་ཞིབ་འཇུག་བྱས། ཏུའུ་ཅེ་དང་ཝང་ཀྲིན་ཁྲང་གཉིས་ཀྱིས་སོ་སོར་ཚང་འཛོམས་གྲོས་ཚོགས་ཀྱི་དགོངས་དོན་སློབ་སྦྱོང་དང་ལག་བསྟར་བྱེད་པར་དམིགས་ནས་སློབ་སྦྱོང་གི་མྱོང་ཚོར་བརྗེ་རེས་བྱས།
གྲོས་ཚོགས་སྟེང་བལྟས་ན། ཞིང་ཆེན་ཏང་ཨུའི་སྐབས་བཅུ་གསུམ་པའི་ཚང་འཛོམས་གྲོས་ཚོགས་ཐེངས་བཅུ་གཅིག་པས་ཀྲུང་གོ་གུང་ཁྲན་ཏང་གི་སྐབས་བཅུ་དགུ་བའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པ་དང་ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་ལག་བསྟར་ནན་མོ་བྱས་པ་དང་། ད་ལོའི་ཞིང་ཆེན་ཡོངས་ཀྱི་བྱ་བ་སོ་སོར་སྤྱི་སྡོམ་ནན་མོ་བྱས་ལ། མིག་སྔའི་གནས་བབ་ལ་དབྱེ་ཞིབ་ཡང་དག་བྱས་པར་མ་ཟད། ཉིས་སྟོང་ཉེར་གཉིས་ལོའི་བྱ་བར་ཁྱོན་ཡོངས་ནས་བཀོད་སྒྲིག་བྱས་ཏེ་སང་ལོར་ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་སྤུས་ཚད་མཐོ་བའི་སྒོ་ནས་འཕེལ་རྒྱས་འགྲོ་བར་ཁ་ཕྱོགས་གསལ་སྟོན་བྱས་པ་དང་། བསྲུང་བྱ་འདོན་སྤྲོད་བྱས་ལ། བཀའ་བརྡ་ཡང་བཏང་བར་འདོད།
གྲོས་ཚོགས་སྟེང་ནན་གྱིས་བསྟན་དོན། ཞིང་ཆེན་ཡོངས་ཀྱི་རིམ་པ་སོ་སོའི་སྲིད་གྲོས་རྩ་འཛུགས་ཀྱིས་ཞིང་ཆེན་ཏང་ཨུའི་ཚང་འཛོམས་གྲོས་ཚོགས་ཀྱི་དགོངས་དོན་ལ་སློབ་སྦྱོང་དང་ལག་བསྟར་ནན་མོ་བྱེད་རྒྱུ་དེ་མིག་སྔར་དང་རྗེས་ཕྱོགས་ཀྱི་དུས་སྐབས་ཤིག་གི་ཆབ་སྲིད་ལས་འགན་གལ་ཆེན་དུ་བརྩིས་ཏེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཚོ་སྔོན་ལ་གཟིགས་ཞིབ་མཛད་སྐབས་ཀྱི་གསུང་བཤད་གལ་ཆེན་གྱི་དགོངས་དོན་དང་ཏང་གི་སྐབས་བཅུ་དགུ་བའི་ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན། ཀྲུང་དབྱང་དཔལ་འབྱོར་བྱ་བའི་གྲོས་ཚོགས་ཀྱི་དགོངས་དོན་བཅས་སློབ་སྦྱོང་དང་ལག་བསྟར་ནན་མོ་བྱེད་རྒྱུ་དང་ཟུང་འབྲེལ་བྱེད་པ་དང་། སྔར་ལས་མཐོ་བའི་ཆབ་སྲིད་ལངས་གནས་ཀྱིས་ཚང་འཛོམས་གྲོས་ཚོགས་ཀྱི་དགོངས་དོན་ལ་སློབ་སྦྱོང་དཔྱིས་ཕྱིན་བྱེད་པ། ད་ལོའི་ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་བླངས་པའི་གྲུབ་འབྲས་མངོན་གསལ་ལ་རྒྱུས་ལོན་ཟབ་མོ་བྱས་ཏེ་འཕེལ་རྒྱས་ཀྱི་ཡིད་ཆེས་སྔར་ལས་ཇེ་དྲག་ཏུ་གཏོང་དགོས།
ཚང་འཛོམས་གྲོས་ཚོགས་ཀྱི་མིག་སྔའི་གནབ་བབ་ཐད་ཀྱི་ཡང་དག་པའི་བརྡར་གཅོད་ལ་རྒྱུས་ལོན་ཟབ་མོ་བྱས་ཏེ་རྩོད་སྒྲུབ་བསམ་བློ་ཇེ་དྲག་ཏུ་གཏོང་བ་དང་འཕེལ་རྒྱས་ཀྱི་གནས་བབ་ཆེན་མོར་རྒྱུས་ལོན་ཡང་དག་བྱེད་དགོས། ཚང་འཛོམས་གྲོས་ཚོགས་ཀྱི་སང་ལོའི་བྱ་བའི་ཕྱོགས་བསྡུས་བསམ་ཕྱོགས་དང་བཀོད་སྒྲིག་བླང་བྱར་རྒྱུས་ལོན་ཟབ་མོ་བྱེད་པ་དང་། འགན་འཁྲིའི་བླང་བྱ་གཏན་འཁེལ་གསལ་བོ་བྱེད་པ། འགན་འཁྲི་ཁག་ཁུར་ཇེ་དྲག་ཏུ་གཏོང་བ། བསམ་བློ་དང་འགུལ་སྐྱོད་གཉིས་ཚང་འཛོམས་གྲོས་ཚོགས་ཀྱི་དགོངས་དོན་སྟེང་གཅིག་གྱུར་བྱེད་པ་དང་། སྲིད་གྲོས་ཀྱི་བྱ་བར་ཟུང་འབྲེལ་བྱས་ཏེ་ལག་བསྟར་དོན་འཁྱོལ་དམ་འཛིན་བྱེད་དགོས། གྲོས་མོལ་སྲིད་གླེང་ཁྲོད་དོན་འཁྱོལ་དམ་འཛིན་བྱེད་དགོས་ཏེ། ཚང་འཛོམས་གྲོས་ཚོགས་ཀྱི་དགོངས་དོན་ལྟར་སང་ལོའི་གྲོས་མོལ་སྲིད་གླེང་གི་གལ་ཆེའི་ནང་དོན་སྔར་ལས་འཐུས་ཚང་དུ་གཏོང་བ་དང་བརྟག་དཔྱད་ཞིབ་འཇུག་གི་ཇུས་གཞི་གཏན་འཁེལ་གསལ་བོ་བྱེད་པ། འཐབ་ཕྱོགས་དང་པོར་ཟབ་ཞུགས་བྱས་ནས་གྲོས་མོལ་སྲིད་གླེང་བྱ་འགུལ་རྩ་འཛུགས་བཟང་བོ་བྱེད་པ། གནས་བཞི་འཛུགས་སྐྲུན་དང་སྐྱེ་ཁམས་སྲུང་སྐྱོབ་སོགས་གཙོ་གནད་བྱ་བར་དམིགས་ནས་བློ་འདོན་ཇུས་འབུལ་བྱེད་དགོས། ཐུན་མོང་གི་འདུ་ཤེས་གཅིག་སྡུད་བྱེད་པའི་ཁྲོད་དོན་འཁྱོལ་དམ་འཛིན་བྱེད་དགོས་ཏེ། སྲིད་གྲོས་ཀྱི་ལས་རིགས་གཅིག་པའི་བྱེད་ནུས་དང་ཨུ་ཡོན་གྱི་དགེ་མཚན་འདོན་སྤེལ་བཟང་བོ་བྱེད་པ་དང་སློབ་སྦྱོང་རྟོག་ཞིབ་དང་བརྟག་དཔྱད་ཞིབ་འཇུག་དང་ལྟ་ཞིབ་སོགས་གོ་སྐབས་བེད་སྤྱོད་བཟང་བོ་བྱེད་པ། རིགས་སོ་སོ་དང་ལས་རིགས་སོ་སོའི་མང་ཚོགས་ལ་ཚང་འཛོམས་གྲོས་ཚོགས་ཀྱི་དགོངས་དོན་དྲིལ་སྒྲོག་བྱེད་པ། ཚད་ཆེས་མཐོ་བའི་སྒོ་ནས་མཚོ་སྔོན་གསར་པ་འཛུགས་སྐྲུན་བྱེད་པའི་སྟོབས་ཤུགས་གཅིག་བསྡུས་བྱེད་དགོས། སྤྱོད་ཚུལ་འཛུགས་སྐྲུན་ཁྲོད་དོན་འཁྱོལ་དམ་འཛིན་བྱེད་དགོས་ཏེ། མང་ཚོགས་ཀྱི་འདུ་ཤེས་བརྟན་པོར་འཛུགས་པ་དང་འགན་འཁྲི་ཁག་ཁུར་ཇེ་དྲག་ཏུ་གཏོང་བ། སྤུས་ཚད་བླང་བྱ་དོན་འཁྱོལ་བྱེད་པ། གསར་སྐྲུན་འདུ་ཤེས་ཇེ་དྲག་ཏུ་གཏོང་བ་བཅས་བྱས་ཏེ་མི་དམངས་སྲིད་གྲོས་ཀྱི་འགན་འཁྲི་ཁག་ཁུར་བཟང་བོ་བྱེད་དགོས། ལས་ཁུངས་འཛུགས་སྐྲུན་ཁྲོད་དོན་འཁྱོལ་དམ་འཛིན་བྱེད་དགོས་ཏེ། ཏང་གི་ལོ་རྒྱུས་སློབ་སྦྱོང་སློབ་གསོའི་གྲུབ་འབྲས་སྲ་བརྟན་དང་རྒྱ་བསྐྱེད་པ་དང་། སྐོར་ཞིབ་དག་ཐེར་རྗེས་ཀྱི་བྱ་བ་ནན་པོ་བསྒྲུབ་པ། སྲིད་གྲོས་ལས་ཁུངས་ཀྱི་བྱ་བ་སོ་སོའི་སྤུས་འདེགས་ནུས་སྤེལ་ལ་སྐུལ་འདེད་གཏོང་བ། ཤུགས་ཆེན་པོས་སློབ་སྦྱོང་བྱེད་འདོད་པ་དང་ལག་ལེན་བྱེད་ཐུབ་པ། ཁག་ཁུར་བྱེད་ཕོད་པ། མཐུན་སྒྲིལ་འབད་འཐབ་བཅས་ཀྱི་སྣང་ཚུལ་སྟུག་པོ་བསྐྲུན་ཏེ་དཔེ་སྟོན་ལས་ཁུངས་ཧུར་ཐག་གིས་འཛུགས་སྐྲུན་བྱེད་དགོས།
ཀྲང་ཝུན་ཁུའེ་དང་མཱ་ཧའེ་དབྱིན། ཀྲང་ཞའོ་རོང་། ལིའུ་ཏ་ཡེ་བཅས་གྲོས་ཚོགས་ལ་ཞུགས། རིན་ཆེན་རྣམ་རྒྱལ་དང་ཏུའུ་ཏི་ཀྲི་གཉིས་གྲོས་ཚོགས་ལ་ཟུར་ཞུགས་བྱས།
ལྷ་མོ་ཚེ་རིང་གིས་བསྒྱུར།