ཟླ་བཅུ་གཉིས་པའི་ཚེས་ཉེར་གསུམ་ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཀྲུང་ནན་ཧའེ་ཡིང་ཐའེ་རུ། པེ་ཅིང་དུ་ལས་འགན་བསྒྲུབས་ཚུལ་ཡར་ཞུ་བྱེད་པར་ཡོང་བའི་ཨོ་མིན་དམིགས་བསལ་སྲིད་འཛིན་ཁུལ་གྱི་སྲིད་འཛིན་དཔོན་ཧི་ཡུས་ཁྲིན་ལ་མཇལ་འཕྲད་གནང་ནས། ཧི་ཡུས་ཁྲིན་གྱིས་ཕུལ་བའི་ཨོ་མིན་གྱི་མིག་སྔའི་གནས་བབ་དང་དམིགས་བསལ་སྲིད་འཛིན་ཁུལ་སྲིད་གཞུང་གི་ལས་དོན་བསྒྲུབས་ཚུལ་སྐོར་གྱི་ཡར་ཞུར་གསན།
ཞི་ཅིན་ཕིང་གིས་ད་ལོ་སྲིད་འཛིན་དཔོན་ཧི་ཡུས་ཁྲིན་གྱིས་དམིགས་བསལ་སྲིད་འཛིན་ཁུལ་གྱི་སྲིད་གཞུང་གི་སྣེ་ཁྲིད་དེ། སྲིད་དོན་ནན་སྐྱོང་དང་དམ་པ་དོན་གཉེར། སྤྱི་ཚོགས་ཀྱི་ཁྱོན་ཡོངས་བརྟན་ལྷིང་རྒྱུན་འཁྱོངས་བཅས་བྱས་པ་དང་། ཀྲུང་གུང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་ལ་སློབ་སྦྱོང་དང་དེ་དྲིལ་སྒྲོག་དང་ལག་བསྟར་ནན་ཏན་བྱས་ལ། ཨོ་མིན་གྱིས་རྒྱལ་ཁབ་བདེ་འཇགས་ལ་སྲུང་སྐྱོབ་བྱེད་པའི་བཅའ་ཁྲིམས་བརྟན་བརླིང་ངང་བཟོ་བཅོས་བྱས་པར་མ་ཟད། ཨོ་མིན་རྒྱན་འཇོག་བཅའ་ཁྲིམས་བཟོ་བཅོས་དང་རེས་སྐོར་གསར་པའི་རྒྱན་འཇོག་ལས་གཉེར་འགྲན་རྩོད་བྱེད་པའི་ལས་དོན་བརྟན་པོའི་ངང་ཐག་གཅོད་བྱས་པ་ལས་གཞན། ཧིན་ཆིན་ཀོང་ཏུང་ཨོ་མིན་མཉམ་ལས་ཟབ་སྤེལ་ཁུལ་འཛུགས་སྐྲུན་ལ་སྐུལ་འདེད་ཏན་ཏིག་བཅས་བྱས་ཡོད། ཀྲུང་དབྱང་གིས་སྲིད་འཛིན་དཔོན་ཧི་ཡུས་ཁྲིན་དང་དམིགས་བསལ་སྲིད་འཛིན་ཁུལ་སྲིད་གཞུང་གི་བྱ་བར་ཁས་ལེན་གང་ལེགས་བྱེད་ཀྱིན་ཡོད་ཅེས་གསུངས།
ཞི་ཅིན་ཕིང་གིས་ཀྲུང་དབྱང་གིས“རྒྱལ་ཁབ་གཅིག་ལ་ལམ་ལུགས་གཉིས”ཀྱི་བྱེད་ཕྱོགས་ཁྱོན་ཡོངས་ནས་འཕྱུགས་མེད་དང་བློ་བརྟན་འགྱུར་མེད་ངང་ལག་བསྟར་བྱས་ཏེ། ཨོ་མིན་དམིགས་བསལ་སྲིད་འཛིན་ཁུལ་གྱིས་རང་ངོས་ཀྱི་ལེགས་ཆ་དང་ཁྱད་ཆོས་འདོན་སྤེལ་གང་ལེགས་བྱ་རྒྱུར་ནུས་ཤུགས་ཡོད་རྒུས་རྒྱབ་སྐྱོར་བྱས་ནས། ཨོ་མིན་གྱི་ཁྱད་ཆོས་ལྡན་པའི“རྒྱལ་ཁབ་གཅིག་ལ་ལམ་ལུགས་གཉིས”ཀྱི་ལག་ལེན་གྱི་རྣམ་པ་གསར་པ་ཧུར་ཐག་སྒོས་བཏོད་དེ། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་སྟོབས་ལྡན་ཕྱོགས་ཡོངས་ནས་བསྐྲུན་ཆེད་ལེགས་སྐྱེས་གསར་པ་སྔར་ལས་ཆེན་པོ་འབུལ་དགོས་ཞེས་ནན་གྱིས་གསུངས།
ཧན་ཀྲིན་དང་ཏེན་ཞུའེ་ཞང་། ཞ་པའོ་ལུང་སོགས་མཇལ་འཕྲད་ལ་ཞུགས།
བན་དེ་སྐྱབས་ཀྱིས་བསྒྱུར།
