དཔལ་འབྱོར་ཉིན་རེའི་ཚགས་པར་སྤེལ་ནས་ལོ་བཞི་བཅུ་འཁོར་བའི་དུས་འདིར། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕིང་གིས་རྟེན་འབྲེལ་ཞུ་བའི་འཕྲིན་ཡིག་བསྐུར་ཏེ་ཚགས་པར་ཁང་གི་ལས་བྱེད་པ་ཡོངས་ལ་ལྷག་བསམ་ཟོལ་མེད་ཀྱིས་རྟེན་འབྲེལ་ཞུས།
ཞི་ཅིན་ཕིང་གིས་རྟེན་འབྲེལ་ཞུ་བའི་འཕྲིན་ཡིག་ནང་བསྟན་དོན། ལོ་བཞི་བཅུའི་རིང་ལ། དཔལ་འབྱོར་ཉིན་རེའི་ཚགས་པར་གྱིས་ཏང་དང་རྒྱལ་ཁབ་ཀྱི་བྱ་བ་གཙོ་བོར་དམིགས་ཏེ་ཏང་གི་གསར་གཏོད་གཞུང་ལུགས་དྲིལ་སྒྲོག་དང་དཔལ་འབྱོར་སྲིད་ཇུས་འགྲེལ་ཀློག དཔལ་འབྱོར་གྲུབ་འབྲས་སྒྲོག་སྤེལ་སོགས་ཀྱི་ཐད་བྱེད་ནུས་གལ་ཆེན་འདོན་སྤེལ་བྱས།
ཞི་ཅིན་ཕིང་གིས་དཔལ་འབྱོར་ཉིན་རེའི་ཚགས་པར་གྱིས་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་ལ་སློབ་སྦྱོང་ནན་མོ་དང་དེ་ལག་བསྟར་གཏིང་ཟབ་བྱེད་པ་དང་ཆབ་སྲིད་ཀྱི་ཁ་ཕྱོགས་ཡང་དག་རྒྱུན་འཁྱོངས་བྱེད་པ། དཔལ་འབྱོར་སྒྲོག་སྤེལ་བྱེད་པའི་འདུ་ཤེས་དང་བྱེད་ཐབས་གསར་གཏོད་བྱེད་པ། སྨྱན་བྱད་ཡོངས་ཀྱི་བརྒྱུད་སྒྲོག་མ་ལག་མྱུར་དུ་བསྐྲུན་པ་བཅས་བྱས་ཏེ་ཀྲུང་གོའི་དཔལ་འབྱོར་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་དུས་རབས་གསར་པའི་ཀྲུང་གོའི་དཔལ་འབྱོར་འཕེལ་རྒྱས་ཀྱི་གཏམ་རྒྱུད་བཟང་བོར་བཤད་པའི་ཐད་བྱས་རྗེས་སྔར་ལས་ཆེན་པོ་འཇོག་དགོས་པའི་རེ་བ་བཏོན།
ཚེས་གཅིག་ཉིན་གྱི་ཕྱི་དྲོར། དཔལ་འབྱོར་ཉིན་རེའི་ཚགས་པར་སྤེལ་ནས་ལོ་བཞི་བཅུ་འཁོར་བར་རྟེན་འབྲེལ་ཞུ་བའི་ཚོགས་ཆེན་པེ་ཅིང་དུ་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། ཀྲུང་དབྱང་དྲིལ་སྒྲོག་པུའུ་ཡི་པུའུ་ཀྲང་ལིས་ཧྲུའུ་ལེ་ཡིས་ཚོགས་འདུའི་སྟེང་ཞི་ཅིན་ཕིང་གི་རྟེན་འབྲེལ་ཞུ་བའི་འཕྲིན་ཡིག་སྒྲོག་འདོན་བྱས་པར་མ་ཟད་གཏམ་བཤད། ཁོས་བཤད་རྒྱུར། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལ་སློབ་སྦྱོང་དང་དེ་ལག་བསྟར་ནན་མོ་བྱེད་པ་དང་། འགན་འཁྲི་ནམ་ཡང་ཡིད་ལ་དམ་པོར་འཛིན་པ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་དྲིལ་སྒྲོག་བཟང་བོ་བྱེད་པ། ཏང་གི་ཚོགས་ཆེན་ཉི་ཤུ་པའི་དགོངས་དོན་དྲིལ་སྒྲོག་བཟང་བོ་བྱེད་པ། དཔལ་འབྱོར་ཁྱད་ཆོས་འབུར་དུ་ཐོན་པར་བྱེད་པ། སྒྲོག་སྤེལ་སྤུས་ཚད་མཐོར་འདེགས་གཏོང་བ། འཕེལ་རྒྱས་ཡིད་ཆེས་ཆེ་རུ་གཏོང་བ། སྨྱན་བྱད་མཉམ་བསྲེས་འཕེལ་རྒྱས་ལ་སྐུལ་འདེད་གཏོང་བ། ནང་དོན་གསར་སྐྲུན་བྱེད་རྒྱུ་རྩ་བར་བྱེད་པ་དང་སྔོན་ཐོན་ལག་རྩལ་འདེགས་སྐྱོར་དུ་བྱེད་པ། གསར་གཏོད་དོ་དམ་འགན་སྲུང་དུ་བྱེད་པའི་སྨྱན་བྱད་ཡོངས་ཀྱི་བརྒྱུད་སྒྲོག་མ་ལག་འཛུགས་པ། དུས་རབས་གསར་པའི་སྤུས་ཚད་མཐོ་བའི་འཇོན་མིའི་དཔུང་སྡེ་ཧུར་ཐག་གིས་གསོ་སྐྱོང་བྱེད་པ། གསར་གཏོད་ཡར་བརྩོན་དང་དག་སྲུང་གསར་གཏོད་བཅས་བྱས་ཏེ་དཔལ་འབྱོར་ཉིན་རེའི་ཚགས་པར་སྔར་ལས་བཟང་བོར་སྤེལ་དགོས།
ཚོགས་ཐོག་ཏུ། དཔལ་འབྱོར་ཉིན་རེའི་ཚགས་པར་གྱི་འགན་ཁུར་མི་སྣ་དང་བློ་མཐུན་རྒན་པ། ལས་བཟོ་བའི་འཐུས་ཚབ་བཅས་ཀྱིས་གཏམ་བཤད།
དཔལ་འབྱོར་ཉིན་རེའི་ཚགས་པར་གཅིག་དགུ་གྱ་གསུམ་ལོའི་ཟླ་དང་པོའི་ཚེས་གཅིག་ཉིན་སྤེལ་མགོ་བརྩམས་པ་དང་། མིག་སྔའི་བར་ཁོངས་གཏོགས་ཚགས་པར་དང་དུས་དེབ་ཁང་གི་དྲ་བ་བཅུ་དྲུག་ཡོད་ལ། མང་ཚོགས་ཀྱིས་རྒྱལ་སྤྱི་རྒྱལ་ནང་གི་དཔལ་འབྱོར་འཕེལ་རྒྱས་ལ་རྒྱུས་ལོན་དང་དཔལ་འབྱོར་ཆ་འཕྲིན་ཤེས་རྟོགས་བྱེད་པའི་རྒྱུ་ལམ་གལ་ཆེན་དུ་གྱུར་ཡོད།
ལྷ་མོ་ཚེ་རིང་གིས་བསྒྱུར།
