ཟླ་དང་པོའི་ཚེས་ལྔ་ཉིན་གྱི་སྔ་དྲོར། ཞིང་ཆེན་ཏང་ཨུའི་ཧྲུའུ་ཅི་ཁྲིན་ཀང་ཟི་ལིང་གྲོང་ཁྱེར་སྔོན་གཤེགས་དཔའ་བོའི་བང་སོར་སོང་ནས། གསར་བརྗེ་སྔོན་གཤེགས་དཔའ་བོའི་རྗེས་དྲན་རྡོ་རིང་ལ་མེ་ཏོག་ཕྲེང་བ་ཕུལ་བ་དང་། ཀྲུང་གོའི་བཟོ་ཞིང་དམར་དམག་ནུབ་ལམ་དམག་རྗེས་དྲན་ཁང་དུ་ལྟ་སྐོར་བྱས་ནས། གསར་བརྗེ་སྔོན་གཤེགས་དཔའ་བོར་རྗེས་དྲན་ཞུས། ཁོས་ནན་གྱིས་བསྟན་དོན། རླབས་ཆེན་ཏང་འཛུགས་སྙིང་སྟོབས་དར་སྤེལ་བྱེད་པ་དང་། ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་བྱེད་པ། མཐུན་སྒྲིལ་འབད་འཐབ་སྒོས་དུས་རབས་གསར་བའི་རྒྱང་སྐྱོད་ཀྱི་ལམ་གསར་བར་ཞུགས་ཏེ། ཧུར་ཐག་གིས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་མཚོ་སྔོན་གྱི་ལེའུ་འབྲི་དགོས། ཁྲིན་ཀང་དད་གུས་ལྡན་པའི་ངང་གསར་བརྗེ་སྔོན་གཤེགས་དཔའ་བོའི་རྗེས་དྲན་རྡོ་རིང་གི་མདུན་དུ་སོང་ནས། མེ་ཏོག་ཕྲེང་བ་བཟང་བོར་སྒྲིག་ནས་གུས་འདུད་ཐེངས་གསུམ་ཞུས་པར་མ་ཟད། རྗེས་དྲན་རྡོ་རིང་དང་མཐའ་འཁོར་གྱི་འབུར་བརྐོས་ལ་བལྟས་པ་དང་། ནུབ་ལམ་དམག་གིས་མདོ་ལ་རུ་རྔུལ་ཁྲག་གཏོར་བའི་རྣམ་པར་ཕྱིར་དྲན་བྱས་ནས། གསར་བརྗེ་སྔོན་གཤེགས་དཔའ་བོར་བཅངས་པའི་དད་གུས་སེམས་པ་མཚོན་པར་བྱས།
ཁྲིན་ཀང་གསར་བརྗེའི་ཕུགས་འདུན་གནམ་ལས་མཐོ་བའི་ནུབ་ལམ་དམག་གི་འབུར་བརྐོས་མདུན་དུ་འགྲེང་བར་མ་ཟད། ཀྲུང་གོའི་བཟོ་ཞིང་དམར་དམག་ནུབ་ལམ་དམག་རྗེས་དྲན་ཁང་དུ་ཡིད་རྟོན་གྱི་སྟོབས་ཤུགས་ཞེས་པའི་བརྗོད་དོན་འགྲེམ་སྟོན་ལ་ལྟ་སྐོར་བྱས། རྩ་ཆེ་བའི་དངོས་ཟོག་འགྲེམ་སྟོན་དང་ལོ་རྒྱུས་ཀྱི་ཡིག་ཆ་རེ་རེ་ཡིས། ནུབ་ལམ་དམག་གི་དམག་མིས་ཕུགས་འདུན་ཡིད་རྟོན་དང་རྔུལ་ཁྲག་གིས་བྲིས་པའི་གསར་བརྗེའི་ལོ་རྒྱུས་བཀོད་ཡོད། ཁྲིན་ཀང་གིས་འགྲེལ་བཤད་ལ་ཉན་ནས། ལོ་རྒྱུས་ལ་རྒྱུས་ལོན་གསལ་བོ་བྱས། ཁོས་བཤད་རྒྱུར། སྤྱིར་བཏང་མིན་པའི་ལོ་ཟླ་དེར་ཕྱིར་དྲན་བྱས་ན། ང་ཚོས་གསར་བརྗེ་སྔོན་གཤེགས་དཔའ་བོར་བླ་མེད་ཀྱི་དད་གུས་ཞུ་བ་དང་། ཁོ་ཚོར་ནམ་ཡང་རྗེས་དྲན་ཞུ་བ་དང་ཁོ་ཚོ་ཡིད་ལ་དམ་པོར་བཟུང་སྟེ། གསར་བརྗེའི་གཞི་རྒྱུད་དང་གསར་བརྗེའི་ཁྲག་རྒྱུད་རྒྱུན་འཛིན་བྱེད་དགོས།
ཁྲིན་ཀང་གིས་ནན་གྱིས་བསྟན་དོན། ལོ་རྒྱུས་ནི་ཆེས་བཟང་བའི་དཔེ་དེབ་ཡིན། མིག་སྔར། ཞིང་ཆེན་གོང་འོག་ཡོངས་ཀྱིས་ཏང་གི་ཚོགས་ཆེན་ཐེངས་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་བྱེད་བཞིན་པའི་སྒང་ཡིན་པས། ང་ཚོས་བློ་བརྟན་འགྱུར་མེད་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཛུབ་སྟོན་གནང་བའི་ཁ་ཕྱོགས་བརྒྱུད་དེ། ངེས་པར་གསུམ་ཡིད་ལ་དམ་པོར་འཛིན་པ་དང་། ལོ་རྒྱུས་བསླབས་ནས་གནས་ལུགས་རྟོགས་པ་དང་ལོ་རྒྱུས་བསླབས་ནས་དད་སེམས་བསྐྱེད་པ། ལོ་རྒྱུས་བསླབས་ནས་སྤྱོད་བཟང་བསྟེན་པ། ལོ་རྒྱུས་བསླབས་ནས་ལག་ཏུ་བསྟར་ཏེ། སྙིང་སྟོབས་ཀྱི་ཉིང་བཅུད་དང་མདུན་སྐྱོད་ཀྱི་སྟོབས་ཤུགས་བསྡུ་ལེན་བྱེད་དགོས། ཏང་ལ་བློ་དཀར་བ་དང་། ཏང་ལ་བློ་དཀར་བར་བྱེད་རྒྱུ་དེ་ཆེས་མཐོ་བའི་ཆབ་སྲིད་སྒྲིག་ལམ་དུ་བརྩི་བ་དང་། གཏན་ཕབ་གཉིས་ཀྱི་ཐག་གཅོད་རང་བཞིན་གྱི་དོན་སྙིང་ལ་རྒྱུས་ལོན་གཏིང་ཟབ་བྱེད་པ། འདུ་ཤེས་བཞི་ཇེ་དྲག་ཏུ་གཏོང་བ་དང་རང་རྟོན་བཞི་ཇེ་བརྟན་དུ་གཏོང་བ། སྲུང་སྐྱོང་གཉིས་བཟང་བོར་སྒྲུབ་ནས། ཆབ་སྲིད་ཀྱི་ལངས་ཕྱོགས་དང་ཆབ་སྲིད་ཀྱི་ཁ་ཕྱོགས། ཆབ་སྲིད་ཀྱི་རྩ་དོན། ཆབ་སྲིད་ཀྱི་བགྲོད་ལམ་སྟེང་ནམ་ཡང་བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་དང་གཅིག་གྱུར་ཚད་མཐོན་པོ་བྱེད་དགོས། གསར་བརྗེའི་ལོ་རྒྱུས་ཡིད་ལ་དམ་པོར་འཛིན་པ་དང་། ཏང་གི་ཐོག་མའི་བསམ་འདུན་དང་འགན་འཁྲི་ཡིད་ལ་དམ་པོར་འཛིན་པ། ལེན་སླ་མོ་མིན་པ་གསུམ་ནམ་ཡང་ཡིད་ལ་དམ་པོར་འཛིན་པ། ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་མངོན་འགྱུར་བྱེད་རྒྱུ་ནི་ལས་སླ་མོ་ཞིག་གཏན་ནས་མིན་པས། འཐབ་རྩོད་ཀྱི་སྙིང་སྟོབས་དར་སྤེལ་གཏོང་བ། མཁྲེགས་གཏོར་དཀའ་སེལ་བྱེད་ཕོད་པར་བྱས་ཏེ། ཧུར་ཐག་གིས་དུས་རབས་ལ་ངོ་གནོང་མི་དགོས་པའི་གྲུབ་འབྲས་བསྐྲུན་དགོས། ཕུགས་འདུན་ཡིད་རྟོན་ཇེ་བརྟན་དུ་གཏོང་བ་དང་། རླབས་ཆེན་ཏང་འཛུགས་སྙིང་སྟོབས་དར་སྤེལ་གཏོང་བ། དུས་རབས་གསར་བའི་ཏང་གི་གསར་གཏོད་གཞུང་ལུགས་ལ་བརྟེན་ནས་ཕུགས་འདུན་བརྟན་སྲུང་བྱེད་པ་དང་འདུ་ཤེས་ཇེ་བརྟན་དུ་གཏོང་བ། ལག་ལེན་ལ་མཛུབ་སྟོན་བྱེད་པ། བྱ་བར་སྐུལ་འདེད་གཏོང་བ་རྒྱུན་འཁྱོངས་བྱས་ནས། གུང་ཁྲན་རིང་ལུགས་ཀྱི་ཕུགས་འདུན་དང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཐུན་མོང་ཕུགས་འདུན་མཚོ་སྔོན་ནས་རྒྱུན་འཁྱོངས་དང་ལག་ལེན་བཟང་བོ་བྱེད་དགོས། བློ་སེམས་རྩེ་གཅིག་གིས་མི་དམངས་བསམ་པ་དང་། རྒྱལ་སྲིད་ནི་མི་དམངས་ཡིན་པ་དང་། མི་དམངས་ནི་རྒྱལ་སྲིད་ཡིན་པ་ཡིད་ལ་དམ་པོར་འཛིན་པ། མི་དམངས་ཀྱི་མཛེས་སྡུག་འཚོ་བའི་ཐད་ཀྱི་རེ་སྒུག་འབད་འཐབ་ཀྱི་དམིགས་འབེན་དུ་བརྩིས་ཏེ། མཚོ་སྔོན་གྱི་འཕེལ་རྒྱས་ཐད་ནས་སྔར་ལས་མཛེས་སྡུག་ལྡན་པ་དང་མང་ཚོགས་ཀྱི་འཚོ་བ་སྔར་ལས་བདེ་སྐྱིད་ལྡན་པར་བྱེད་དགོས། མཐུན་སྒྲིལ་འབད་འཐབ་རྒྱུན་འཁྱོངས་བྱེད་པ་དང་། ནུབ་ལམ་དམག་གི་སྙིང་སྟོབས་དང་མི་རིགས་ཀྱི་སྙིང་སྟོབས། དུས་རབས་ཀྱི་སྙིང་སྟོབས་བཅས་ཟུང་འབྲེལ་བྱས་ནས། དུས་རབས་གསར་བའི་རྒྱང་སྐྱོད་ལམ་དུ་བསྐྱོད་པའི་སྒུལ་ཤུགས་ཆེན་པོ་རུ་བསྒྱུར་བ་དང་། དེང་རབས་ཅན་གྱི་མཚོ་སྔོན་གསར་བ་འཛུགས་སྐྲུན་བྱེད་པའི་ཐད་ནས་གྲུབ་འབྲས་གསར་བ་ལེན་ཐུབ་པར་བྱེད་དགོས།
ཁྲིན་རུའེ་ཧྥིན་དང་ཀྲུའུ་ཞང་ཧྥིན་གཉིས་གོང་གི་བྱ་འགུལ་ལ་ཞུགས།
རིན་ཆེན་མཚོས་བསྒྱུར།
